Hibùlù 3 - To kə Kəzə̀ kə̀ Fughu ko

Yɛso tsə̀ghasə Musî

¹ Waazə̂ ghaŋa à zɔlɔ gho, ghɛ̀ ghəla ghɛ̀ lo mo Zə̀ kə ŋ ghɛ̀ tɔŋɔ am fɔ̀e u kəwalā, naŋa nduw nlo tuw kɛʼɛ ko a zəŋò Yɛso, wəla a dzɛ̂ enyəa ù lǒ tum e Kəzə̀, lò sugho tuw kəfɔ̀e kəla Zə̀ kə mò tɔŋɔ̄.

² Ù mò gaʼ fə̀ŋ e wə̄n a zəŋò ghùw wəla ù mò tsuʼ naŋa kɔʼ wə̄n, tò aŋghəa Musî mò bɔɔm gaʼ sugho fə̀ŋ e wə̄n a te am fwàʼ kə wə̄n â dzeŋe kə ghì a ndùghù è Kəzə̀.

³ E lo nû mgbaŋ enyəa Yɛso kpe nû alekele kɔʼso məla Ǹ tsəghasə m Musi mò, tò aŋghəa ghùw wəla ù bəgha ndughu ki kɔʼso mò tsəghasə ndùghù è te.

⁴ À ndughu bəghaa ghùw — Zə̀ chia kə kuuwn lo ghùw wəla ù bɔm fʉgha wə̀n u dzə̀m.

⁵ Musî fə̀ gaʼ tsughu fə̀ŋ e wə̄n alelo kɔ̂ɔ fò alefwaʼā â dzeŋe kə ghì a Kəzə̀ gho a dzə̀m, ù n dèe zìi wò ghəa ghəla Zə̀ kə ki alenaām ki alebùghò dzɛ̂.

⁶ Kə̀lestò vʉ̀a ù kuūwn fwâʼ am fə̂ŋ e wə̄n e dzə̀m tǒ wɛ aŋ ghì a Kəzə̀. Sɛ̀ lo tǒ ndughu è wən abugho sɛ tee tsughu ko am fəŋ zəla a ki àsùghò am fə̀ŋ zəla a tsɔɔ an tuʼ zəla a chiī.

Ekʉɛnlo â ghì ghəla ghe doʼkè boō fughu

⁷ Zuʼ tə Zɔlɔ tə dzɛ̂ tsughu enyəa, “Tsuʼu nɛ wən, abugho ghɛ̀ zuw tsughu dzə̀ è Kə̀zə̀,

⁸ e kwo ko ghɛ̀ lô so e tughuso nâaŋ fə̀ŋ tɛʼɛ, aŋghəa ghê tselè tsùghò fə̀ tuū alezuw â Zə̀ kò aŋghəa ù mò mɔ̂msò koʼò ghee aŋ ŋgwən.

⁹ À fì a ghe mò mɔ̂msò koʼ mugho, mgbaŋa kòʼò wò kô fwàʼ kaŋa aŋ ghə̀m n tə̀nùu n chìako.

¹⁰ Zə lò e ghee mùghò fə̀ pfʉso nʉgha wò ghàʼ à ghee dzɛ̀ tsughu enyəa, ‘Ghe tughuu ndùuw tsə̀ghà ko alo èkwû zò, ghe yia kwo yo dziī taŋa to.’

¹¹ Mùgho ŋ kɛ̀ tsùghù an nʉgha ù pfʉa wo enyəa, ‘Ghe kê bùghò kòʼ yò an lùʼu kə̀ zʉʉ̄n kə ughùe kəla mùghò fə̀ to naŋa enyəa Ǹ lo fughuu â ghee.’ ”

¹² Ghòmlo nlò a waazə̂ ghò, e kwo ko ghùw wɛʼɛ lô so e kelê fə̀ŋ è bǐigh, ù e tsoo tuu aleboō fughu â Zə̀ kò, ghəa a te a lô ghəŋlo enyəa ù ka ndûw a vʉ̀a Zə̀ kəla kə lô â tuw ko.

¹³ E laam toon nduw nlò ghue zɛʼɛ zo tsuʼu mən n dzə̀m n dzə̀m, aŋghəa ghe tɔŋɔ tsughu dzə tsuʼ fə te fo enyəa “Nɛ!” aŋghəa mwàʼsò kə Kəzə kə deē â sɛ̀. E kwo ko bo e lô nɔɔ̄ ghɛ ghɛ̀ tughu doʼo nduw a te.

¹⁴ Abugho sɛ boō fughu tən tsughu ko nù alendùw kuʼù ndûw, yia a gaʼ tsughu ko fə̀ŋ a zəŋò Zə̀ kò aŋghəa a mò ki gaʼ a te sûesʉ, sɛ̀ lo zəa dzeeŋ sughò nù fʉgha wəla u lô Kə̀lestò wò.

¹⁵ Ghe tɔm naŋa am Mwàʼsò kə Kəzə̀ enyəa, “Tsuʼu nɛ wən, abugho ghɛ̀ zuw tsughu dzə̀ è Kə̀zə̀, e kwo ko ghɛ̀ lô so e tughuso nâaŋ fə̀ŋ tɛʼɛ, to aŋghəa ghê tselè tsùghò fə̀ tuū alezuw â Zə̀ kò.”

¹⁶ À fə̀ lo ghê ndùgho ghe fə̀ zuw dzə̀ è Kə̀zə̀ a, ghe n tughuso naŋa tsughu fə̂ŋ tə ghee a? À mò mgbaŋ yo ko ghî ghəla Musî fə̀ nì nughù sə wo an naʼ zə Edzìp à?

¹⁷ Ù mò pfʉaso unʉghà ghèe ghê ndùgho aŋ ghə̀m n tə̀ nùu n chìako a? À mò yo ghî ghəla ghe mò ghəə̄ŋ boon tsughu a, ghe m bvʉ̂ʉn kpǔuwn wò aŋ ŋgwən a?

¹⁸ Zə̀ kə̀ mò fəgha kə kɛ â ghê ndùgho enyəa ghe kê bùghò sə̀ kòʼ yò an lùʼu kə zʉʉ̄n kəla ù fə̀ to naŋa â ghee a, abugho à buw â ghì ghəla ghe mò tsughoso maʼn wən à?

¹⁹ A ŋ koʼ enyəa ghe mò yo dzə̂ alendùw nyə fughu bòʼ ghe kafə boo fùghù dzə̀ â Zə kò.