Hibùlù 2 - To kə Kəzə̀ kə̀ Fughu ko

Zə̀ kə̀ dzə̂ èghəa aŋghəa kə bəghasə̄ sɛ̀

¹ Bòʼ ghəa ghən a dzə̀m Zə̀ kə lo mo kə ŋ ghəŋlo, zən lò e ghee a ki aletɔ̀ʼɔ̀ gaʼā tsughu kətuw aŋ ghəa ghəlà sɛ̀ zuw kɔʼ, enyəa e kwo ko a lô zəghàan maʼn tsughuu ghəa a te gho, a səā təŋò ndûw aŋ ghəa à nughù ghò.

² Tùm zəla tsə̀təndə̄ghā tə Kəzə̀ tə fə̀ bughò naʼà wo â ghê tsele a sɛ̀ fə̀ lo êsəŋò, ghî ghəla ghe fə̀ tâʼkè bwîi ndûw a te fə̀ zuw sugho ŋgòʼ zəla è kpe â ghee.

³ A lo ênzə̂n êzəŋ alesəŋo tîi abugho a dôʼkè gaʼ kətuw aŋ ghəa è səŋò zəla Zə̀ kə fə̀ dzə̂ tsughu alebəghaasə sɛ̌ a? À fə̀ lo ghuūghuè u Mughu ù tè ghùw u sûesʉ alenàʼà wo tum e te. Ghî ghəla ghe fə̀ zuw tum e te n dè wò â sɛ̀ enyəa shwaʼ u te u lo êsəŋò.

⁴ Zə̀ kə̀ m mʉa fughuu wò sùghò gùw è ghee alo tətsə̌a àsùghò alo nsə̀ghàa, àsùghò aŋ ghəa kə fə̀ dzughùu fughuu ndûw fughu kə u Zuʼ tə Zɔlɔ to â ghì ghò aŋ ghəa kə fə̀ tsə̂m tsughu.

Ghùw wəla ù ghəŋlo enyəa sɛ̀ è zəa tuw ko

⁵ Zə̀ kə̀ ka fə̄ mbī zəla è mò ki alebùghò nì nàŋa ndùw dzə̀ â tsəlà tsə̀təndə̄ghā tə wə̄n to, tɔ̂ɔŋ mbī zəla a kə̂aa ghəa a te gho fɛ.

⁶ E lo an də̀ŋò kə̀ li ko am Mwàʼsò kə Kəzə̀ enyəa, “Ghùw nsɔ̌ɔŋnchùw lò kə kwò â ghù aleniī enyəa ù lò kəfəgha a, ŋkāa wɛ u ghùw lo kə kwò ghù lò alelɛnlo â wə̄n a?

⁷ Ghù fə̀ ghəəŋ tsughu nû tsə̀təndə̄ghā tə Kəzə̀ tə n nyɛʼɛ tsə̀ghàsə tsughu ghùw enyə mbəs aŋ kə̀mà fə enə̀gha; ghù m fughu tsughu ghùw â dwaʼa wo àsùghò kɔʼso mò,

⁸ ghù n naŋa tsughu fʉgha wə̀n ù dzə̀m a tsəlà wə̀n.” Ghəa ù fə̀ naāŋ fʉgha wo u dzə̀m a tsəla wə̄n, u ka fə fəgha kə̀ li kə naŋa sə̀ kɔʼ dzə̀ enyəa à lɛ̌ɛn yo wə̄n. A fɛ lǒ, a kaam kòʼò ndùw dzə̀ yò fʉgha wo u dzə̀m a tsəlà wə̄n.

⁹ A kuuwn kòʼò ndùw nù Yɛso, wəla ghe fə̀ ghəə̄ŋ tsughu enyəa tsə̀təndə̄ghā tə tsùuŋ tsə̀ghàsə tsughu wə̄n aŋ kəmà fə kəgha, Zə̀ kə̀ n tsuʼ naŋa kɔʼ wə̄n alo udwaʼa àsùghò kɔʼso mò, aŋghəa u mò fala alekpuw, enyəa an dzɔ̀ zəla Zə̀ kə̀ ki a zəŋò sɛ̀ to ù mò kpuw an tuw u ghì ghən a dzə̀m.

¹⁰ Ufʉgha u dzə̀m à kì Kəzə̀, mò à fə̀ fʉgha u te wo u dzə̀m gbən wo wə̄n. E fə̀ lo tsəghatsəgha aŋghəa Zə̀ kə̀ fə̀ ghəə̄ŋ tsughu enyəa Yɛso e lo tuw ko â zəŋò ghì a wə̄n gho, bòʼ fala zəla ù fə̀ fala ghè zò aŋghəa ù fə̀ nîi wo ndə̀mà tə wɛ a Kəzə̀ ghò an səghanyəgha ŋ wən àsùghò aŋghəa ù ghəŋlo enyəa ghe zə kətuw.

¹¹ Yɛso ghèe ghê ghì ghəla ù sùw maʼà tsughu bǒo tə ghee to dzeŋe ki tsele u mɔ̀ʼ. Zən lò e ghee ù dənso yô tuw ko aletɔɔŋ nduw ghee enyəa ghe lo waazə̂.

¹² Ù dzɛ̀ â Zə̀ ko enyəa, “Ǹ lo dzàa nduw fəgha kəla ghù lǒ ghè ko â waazə̂ ghaŋa gho. Ǹ lo e kɛɛ ghû abugho ghe zuuŋ wo alefughu ŋkɔʼso â ghù.”

¹³ Ù n dzɛ̀ kpèʼe sùghò enyəa, “Ǹ lo gaʼā tsughuu fə̀ŋ zaŋa a zəŋo Zə̀ kò.” Kòom dzɛ̀ kpèʼe sùghò enyəa, “Mùghò wəlà, ghàʼ à ghê wɛ ghəla Zə̀ kə̀ fughu â mùgho.”

¹⁴ Aŋghəa wɛ a Kəzə̀ à lo aghî, ghe ki nyom è ughue àsùghò kàŋ to, ghuūghùe u wə̄n wə n doʼo wò sùghò êzə̀; enyəa to ù mò bɔŋɔ kpuuw tsughuu sugho alendùw dzûuw maʼà ghùw wəla ù ki daʼa ko aleghəŋlo enyəa ghî ghə̀ e kpuwnlo, tɔŋlo Avʉatsə̄a.

¹⁵ À mò lo ko an dzii zə̀n ù mò lô alezèe zəghàa ghì ghəla ghe mò mughu mbī è ghee tò ukɔ̂ bòʼ ghe tsəŋo vʉ zo.

¹⁶ E kûm lò nû enyəa Yɛso ka fə bughò dzə̀ alebùghò yosò tsə̀təndə̄ghā tə Kəzə̀, ù fə̀ laam bugho alebùghò yosò waawɛ ghə Abə̀làhâm.

¹⁷ Zən lò e ghee Zə̀ kə̀ mò ki aleghəəŋ tsughu enyəa ù dòʼò wô tò waazə an dzii tən tə dzə̀m, enyəa to ù mò doʼo tsughu tuw kə fɔ̀e kəla kə ki se è kwuso zo, ù gaʼ sugho fə̀ŋ am fwàʼ kə wə̄n â Zə̀ kò. Zən fə̀ enyə lò enyəa ù e lo alenìi fughu ndûw ghue u wə̄n tò kəfughu tò Zə̀ kə̀ ghuūw maʼà bòo tə aghì.

¹⁸ Ghəa ghue u wə̄n u lo mo ù mafə fala, ghe n tsoōm sugho wə̄n, ù lò nû aleyoso ghì ghəla ghe tsoōm kaāŋ sugho ghee.