Hibùlù 13 - To kə Kəzə̀ kə̀ Fughu ko

Tsʉ̂ zəla e tsughu tsən tsughu

¹ E ləghaa nduw ko nlò ghue zɛʼɛ zo tò waazə̂.

² Waazə̂ ghò, e kpeeniī kɔʼɔ nlò ghî ghila ghe bwîin wo alo ghɛ̀, ghî à li mafə êzə ghəŋlo ndùw kpènì kɔ̌ʼ tsə̀təndə̄ghā tə Kəzə̀ mo ghe kwo yo.

³ E moʼn tsughù nlò ghî ghəla ghe lo an ndughūtsaʼ, tò è soō ghɛ̀ a ghee lo a dzə̀m an ndùghūtsaʼ e te. E moʼn tsughuu nlò ghî ghəla ghe tsuū ghee; nǐi tsughu nlò enyəa ghɛ̀ zuuw sùgho fɔɔn zəla ghe zuūw.

⁴ Tɔʼɔ kwukele tsughu nlò ghəa a ghùe è niī gho alo ŋ kɔʼso, e kwo ko ghùw aŋ ghì ghəla ghe nî tsughu ghue zo lô səā nûŋlo; nu Zə̀ kə̀ lo baa nu mbɛ an tuw kə ghì ghəla ghe sə nûŋlo àsùghò ghì ghə̀n a dzə̀m ghe nûuŋ kaŋlo.

⁵ Kâ nlò fə̂ŋ tɛʼɛ to aŋghəa a ukʉa gaʼ, nǐi tsughu nlò enyəa fəgha kə̀là ghù wɛʼɛ ki kə m kpe â wə̄n; nu Zə̀ kə̀ dzɛ̂ tsughu enyəa, “Ŋ̀ kê bvʉ̀so màʼà kòʼ yò ghɛ, Ŋ̀ kê zə̀ghàa tàʼa kòʼ sùghò yò ghɛ.”

⁶ À fi lo enyəa a lo nû aledzàa tsughu mo a tsɔ̂ɔ tə̀fə̀ŋ enyəa, “Mughu ù te yosò mùghò, Ŋ̀ ki yo aletsəŋ ghəa e li zo, ghùw lò aleghɛ kə kwò â mùgho a?”

⁷ E moʼn tsughuu nlò tsoʼ tɛʼɛ to, tɔ̂ɔŋ ghì ghəla ghe mò kə̂a wô shwaʼ u Kəzə̀ wò â ghɛ̀. Ghɛ̀ e moʼn tsughuu ghəa a dzûŋ ghəla mughu e ghee e fə̀ deē, ghɛ̀ koʼ ni boo zəla ghe fə̀ ki â Zə̀ kò.

⁸ Yɛso Kə̀lestò lǒ ghùw ù mɔ̀ʼɔ wəla ù fə̀ lo, vʉ̀a ù lò nɛ, vʉ̀a ù dòʼo tən sugho.

⁹ E kwo ndə̀mà tə etsʉ̀ tə̀ fughu tə̀ li tə lô bughò sêe nughùun tsughuu ghɛ an dziī è tsəghatsəgha. À lò ghəa è dzûŋ zò abugho fə̀ŋ e ghùw nɛɛ̄ tsughu mò à lò dzɔ̀ e Kəzə̀, mò à yo dzə̂ aŋ ghəa à naŋlo a lwàŋ u ghəa a ufʉ̀ghàzəa, mo lwâŋ wən yòso yò ghee aŋ ghəa è li zo.

¹⁰ A ki kətsaʼ mò fɔ̀e təla tə fwaʼa an luʼu kəla Dzûu tə̀ ndûw fughuu kɔʼso mò a te, ki yo daʼa ko alezə fəgha kəla ghe sɛ̂ nduw a te.

¹¹ Tuw kə fɔ̀e kə Tə̀dzûu kə̀ bughōo kə n nì nyə̀ wò kàŋ tə tənyòm təla ghe bughòo alefughu tǒ fughu kə̀ suuw maʼn kə təbòo kò an Tsughu è Bâabaa zo, ghe ŋ kuuwn sə̀ kpàa kɔʼ gwən a tənyòm a te gho a beē kə enaʼ a fia ghə fə̀ mughu.

¹² Yɛso mò fɛ fala kpuw sugho a beē kə ghɔŋ wə enaʼ alesùuw maʼà tsughu bôo tə aghì aŋ kàŋ tə wə̄n.

¹³ Bùgho nlo tò sɛ̀ ndûw səā koʼò wə̄n êzəŋ a beē kə ghɔŋ wə enaʼ, a ndûw boʼò sughò tuw kə̀ dəla kəla ù fə̀ boʼō.

¹⁴ A ki tən dzə yo naʼ è li zo fɛ am mbī zən, a chîi ndùw tùʼ alo enaʼ e naām ki alebùghò.

¹⁵ Bùgho nlò tò sɛ̀ fughuu ndûw Kə̀zə̀ êzəŋ â kɔʼso mò tǒ fughu kə sɛ̀ am bàm e Yɛso — aŋghəa sɛ̀ dzâa səa wo an dzughu a sɛ̀ enyəa ù lò Mughu ù te.

¹⁶ E kwo ghɛ̀ ke bughuu doʼò kôʼ aleghəəŋ dzɔ̂ zò àsùghò aleteen dzəəŋ fʉgha wo, tɔŋlo enyəa fə̀ŋ è Kə̀zə̀ zɔ̀lɔ nù aŋ ŋgòʼ è ufughu vʉ̀.

¹⁷ E zuuw nduw nlò â ghì ghəla ghe lô tsoʼ tɛʼɛ to, ghɛ̀ è ghəəŋ nduw ghəa ghəla ghe dzâa wo. Ghe lɛnlo â ghɛ̀, nu ghe lo ki aleteso dzɛ̀ â Zə̀ kò ghəa ghən a dzə̀m ghe fə̀ fwaʼ â ghɛ̀. E zuuw nduw nlò â ghee to ghe fwaʼā â ghɛ̀ alo eduʼnlo. Ghɛ̀ lo alezə kə kwò a te abugho ghɛ ghəŋlo enyəa ghe e mʉŋe zee a?

¹⁸ E gɔŋlo nlò an tuw waʼā, nu ghàʼ kwo enyəa fə̂ŋ taʼa tə zɔlɔ nù, ghǎʼ yia dəma enyəa to ghàʼ mô zumso ghəəŋ ndùw ghəa ghəla a lô tsəghatsəgha aŋ ghəa ghən à dzə̀m.

¹⁹ M̀ fɛ ŋgee buʼu wò kə̀ghu a te â ghɛ̀ enyəa ghɛ̀ e gɔ̂ɔŋ nduw â Zə̀ kò enyəa kə lo kôom nîi tuu wô mùghò ebàm a vʉ̀a ghɛ̀.

Gɔ̂ɔŋ zəla e tsughu tsə̄n tsughu ghəa gho

²⁰ Ŋ̀ gɔ̂ŋlò êzəŋ enyəa to Zə̀ kə ebughuun kəla kə mò kôom nî nughù wò Mughùbè Yɛso alo evʉ̄, wəla ù lǒ bàʼàtə̀ndzì ù ghàʼa — aŋghəa kə fə̀ nî kɔʼ kàŋ tə wə̄n to zə kɔʼ kàa məla n dòʼo tən a te,

²¹ mô fughu ghɛ â fʉgha ù dzûŋ wə̀n ù dzə̀m, tò ghɛ̀ è bwiī nduw an dzə̂ è wə̀n. Kə è fwaʼā ghəa gho a zəŋò sɛ̀ am bàm e Yɛso Kə̀lestò, ghəa ghəla a ghəŋlo enyəa fə̀ŋ e wə̄n duʼnlo a te. To sɛ̀ mô fughuu Yɛso Kə̀lestò â kɔʼso məla n dòʼò tən. Zə e lo ko êzə̀.

²² Waazə̂ ghaŋa gho, M̀ buʼu kə̀ghu â ghɛ̀, enyəa ghɛ̀ naŋa wo nlò tuūŋ ko an shwaʼ waŋā wəla ù lo mò mùghò n tsʉ̀ wò ghɛ a te, zən lò e ghee Ǹ tɔm wô sə fə aghəa fən fo â ghɛ̀.

²³ Ghɛ̀ kele tsughu enyəa ghe ŋ wàazə̀ ù sɛ̀ Timotì tsʉ̀ zə̀ghàa an ndùghùtsāʼ. Ghàʼ à wə̄ n lo bùghò kòʼò nù ghɛ̀ a dzə̀m abugho ù kùʼù bugho.

²⁴ Tɔɔŋ zuw nlò tsoʼ tɛʼɛ to ghèe ghê ghì a Kəzə̀ ghò a dzə̀m. Waazə̂ a sɛ̀ ghəla ghe nughu wo an Etalì fughù wò sughò ghɛ̀ â tɔɔŋ zo.

²⁵ Ŋ̀ gɔ̂ŋlò enyəa to Zə̀ kə mô dê ghɛ̀ a dzə̀m â dzɔ̀ e wə̄n zo. Zə e lo ko êzə̀.