Hibùlù 11 - To kə Kəzə̀ kə̀ Fughu ko

Ghî ghəla ghe boō fughu â Zə̀ kò

¹ Aleboō fughuu tsughu â Zə̀ kò lò ghəa zəla e ghəŋlo enyəa sɛ̀ è kwo tən enyəa fʉgha wəla sɛ̀ chiī tùʼ a te lo bùghòo nù, boo e lo tsə̌a zəla è dèe wô enyəa ghəa ghəla a koʼò yo kùm lò nû.

² À fə̀ lo bòʼ ghî à wii a fə̀ boo fughu tsughu â Zə̀ kò e fə̀ ghəŋlo enyəa Zə̀ kə̀ dêe ndûw â ghe enyəa e duʼn nǔ ghèe ghee.

³ À lò aŋghəa a boō fughu tsughu â Zə̀ kò, a zuwkɛlɛ enyəa mbī fə̀ ghue u gbən sə kɔʼ wo mò à dzɛ̀ tsùghù Kəzə̀, to zə e lo enyəa ghe mò fʉgha wəla a koʼò nduw fəghaan sə kɔʼ am fʉgha wəla a koʼò yo.

⁴ À fə lo aŋghəa Ɛbɛ̀l fə̀ boō fughu tsugh â Zə̀ kò e fə̀ ghəŋlo ù kɔ̀ʼ fùghù ndùw Kə̀zə̀ â fughu ko mo kə dzɔ̂ tsə̀ghàsə kə Kɛ̂n kò, Zə̀ kə̀ n nì ndùw Ɛbɛ̀l enyəa ù lò tsəghatsəgha, mò Zə̀ kə fə̀ de tsughu aŋghəa kə boo nduw fughu kə wən ko. Ghəa ù lo ko mò ù mafə kpuw, vʉ̀a ù kuuwn naam kə̂aa ghəa gho am bàm e boo e wə̄n.

⁵ À fə̀ lo bòʼ Ɛnɔ̀k fə̀ boo fughu tsughu â Zə̀ kò e fə̀ ghəŋlo Zə̀ kə n nì nùghù kɔʼ nduw wə̄n enyəa ù ka vʉ zo alo esə tsuʼ; ghe ŋ kə̀ŋ kè wə̄n bòʼ Zə̀ kə̀ mafə wən nî. To ghe e nî wən êzə̀ à n lo mo ghe kə̂aa enyəa, ù mò ghəəŋ nû fə̀ŋ è Kə̀zə̀ n zɔlɔ.

⁶ Abugho ghù dòʼŋkè boo fughu â Zə̀ kò, ghù yò dzə̂ aleghəŋlo fə̀ŋ è wən zə̀ zɔlɔ. Tɔŋlo enyəa ghùw wəla ù ləghaa alendùw a vʉ̀a Zə̀ kò ù kì aleboō tsughu enyəa Zə̀ kə̀ lo nû, chia kə namso sugho ghî ghəla ghe kûm diī alekele wə̄n.

⁷ À fə̀ lo bòʼ Nôa fə̀ boō fughu tsughu â Zə̀ ko e fə̀ ghəŋlo ù n zùw ndùw shwaʼ u Kəzə̀, aŋghəa Zə̀ kə̀ kʉɛɛn tsughu wən kùu nduw ghəa ghəla ù fə̀ kaām koʼò yo, u m bəgha kɔʼ kəkwə̀n alebəghaasə kèndughu kə wə̄n. Aŋ ghəa zən, Nôa fə̌ fi de nduw enyəa ghî a mbī a lo ghî a biigh gho. Bòʼ Nûa fə̀ boō fughu â Zə̀ kò, Zə̀ kə̀ n nì ndùw wə̄n enyəa ù lo ghûw u tsəghatsəgha.

⁸ À fə̀ lo bòʼ Abə̀làhâm fə̀ boo fughu tsughu â Zə̀ kò e fə̀ ghəŋlo enyəa ù zuw dzə̀ e Kə̀zə̀ aŋghəa Zə̀ kə̀ fə̀ tɔŋɔ wə̄n enyəa ù ndùw an lùʼù kəla ù fə̀ ki alendùw zə. Ù n sə̀ nùghù ndùw a fughu mò ù kwò yo luʼu kəla ù mò nduūw a fughu.

⁹ Bòʼ ù fə̀ boo fughu â Zə̀ kò, ù n ndùw mùghùu ndùw an luʼu chia Zə̀ kə fə̀ to naŋa â wə̄n tǒ ghùw wəla ù bwìin nyə nduw nû a fughu, ghe m mughu alo mpfʉ̌a tò aŋghəa Esaʼ àsùghò Yàkɔ̂b fə̀ mughù sugho a te, ghee ghəla ghe fə ki alezəā sughò fʉgha ù mɔʼɔ̄ wəla Zə̀ kə fə̀ to naŋā â Abə̀làhâm.

¹⁰ Tɔŋlo enyəa ù fə̀ tuw kə naŋa nduw ko an naʼ zəla ghe fə̀ lo mo ghe bʉ̀ghànlò u təndughu wo a te kuʼ naŋa kaŋlo, mò à fə̀ kɛɛ̄n tɔm naŋa tsughu Kəzə̀, a m bə̀ghà kɔ̀ʼ sughò wə̄n.

¹¹ À fə̀ lo sugho bòʼ Sàla fə̀ boo fughu sugho â Zə̀ kò e fə̀ ghəŋlo ù ŋ kele ùnùŋ alekòom bɔŋ wɛ, bugho dzə̀ è wo, mò noo u wə̄n u mafə tsə̀ghà ghəa à koōm dzəa gho, bòʼ ù fə̀ lɛɛn tsughu enyəa ghùw wəla ù fə̀ to to ke te ko naaŋ nù dzughu e wə̄n zo.

¹² Zən lo e ghee ghî a fə̀ sə tsughu aŋ ghuw wə̀n ù mɔ̀ʼ, mò ù m bùʼ mìaa mɛ̀ʼɛ̀ sugho, ghî a fə̀ sə tsughu aŋ ghùe ndzà tò nsə̀ghàbəlà alo kəwala àsùghò shiashia kə mǎakùw kò mo yo aletaŋ.

¹³ Vʉ e fə̀ bugho sɔŋ fughu ghî ghən â mbàŋ mo ghe naam boo fughu ko â Zə̀ ko, mo ghe kâ kèle fəgha kəla Zə̀ kə to naŋā â ghee, à n lo mo ghe ŋ kuuwn kòʼ zìi ndùw alo fəgha kə te ko alo kədɛ̀, sò kwò enyəa ghe lo kele nù, boo tsùghu sugho enyəa ghe fɛ am mbī bwîin nyə wò nù àsùghò enyəa ghe lo ghî ghəla tsəghāa dzì fɛ am mbī.

¹⁴ Ghî ghəla ghe kə̂a ghəa gho enyə, e dêe tə̀la wò nù enyəa ghe kəŋô naʼ e ghee.

¹⁵ Ghe fə̀ koōm moʼn yo naʼ zəla ghe mò sə nughù wo a te, abugho ghe fə̀ môʼnlo, to ghe mafə kəŋ dzì alekôom ndǔw fughu a te e bàm.

¹⁶ Zə ŋ kuuwn lò enyəa ghe ləghâa naʼ zəla e dzɔ̂ tsəgha; tɔ̂ɔŋ naʼ e kəwālā. E fi dêe enyəa Zə̀ kə̀ də̂ŋsò dzə̀ yò tuw ko abugho ghe tɔɔ̄ŋ wə̄n enyəa à lǒ Zə̀ kə ghee; tɔŋlo enyəa kə n naʼ zo â ghee bian naŋa.

¹⁷ À fə̀ lo fə̀ lo bòʼ Abə̀làhâm fə̀ boō fughu â Zə̀ kò e fə̀ ghəŋlo u n nì kɔ̀ʼ Aezìk enyəa e ndûw sâa fughu â Zə̀ kò, aŋghəa Zə̀ kə fə̀ mɔ̂msò kôʼ tsughu wə̄n. Ghùw wəla ghe fə̀ fughu naŋa to ke te ko â wə̄n fə̀ lo nû alenìi sâa ndûw wɛ ù wə̄n ù nùu.

¹⁸ Zə̀ kə mafə â wə̄n ki dzɛ̀ nàŋa enyəa, “À lò am bàm e Aezìk ghù lo kele waawɛ ghəla mùgho fə̀ to naŋā â ghù.”

¹⁹ Abə̀làhâm m boo tsughu enyəa Zə̀ kə̀ lo nû alenìi nughù wô ghùw alo evʉ mò ù m kpuw. A fi lo aledzàa tsughu enyəa Zə̀ kə̀ mò ni fughu wo Aezìk ebàm â wə̄n mo Aezìk maā kpùw.

²⁰ À fə̀ lo bòʼ Aezìk fə̀ boo fughu â Zə̀ kò e fə̀ ghəŋlo Zə̀ kə̀ m fughu tsughu Yakɔb ghèe Esau â bughuso zo am mùghù e ghee â sə ko.

²¹ À fə̀ lo aŋghəa Yakɔb fə̀ boō fughu â Zə̀ kò ghəa a te a fə̀ ghəŋlo ù m fughu tsughu ebughuso â wɛ a Dzùghùsî gho aŋghəa u fə̀ so e kpuw mò ù zʉ̌a wò an tuw kə mbàŋ e wə̄n è nyə̀nlo aŋghəa ù fə̀ fughuu kɔʼso mò â Zə̀ kò.

²² À fə̀ lo aŋghəa Dzùghùsî fə̀ boō fughu â Zə̀ kò e fə̀ ghəŋlo aŋghəa Dzùghùsî so e kpuw ù n dzɛ̀ nàŋa tsughu aŋghəa ghî ghə Ezə̀lɛ̂ à lo nughuun səa kɔʼɔ wo a te an naʼ zə Edzipt, teso dzɛ sùghò aŋghəa ghe lo tsəə̄n wə̄n a te.

²³ À fə̀ lo sugho bòʼ ghê tselè Musî fə̀ boo fughu â Zə̀ kò e fə̀ ghəŋlo ghe n nàn naŋa Musî alo tədzɔŋɔ tə təgha aŋghəa ghe fè dzə tsughu wə̄n, bòʼ ghe fə̀ kôʼ tsughu enyəa wɛ u te fə̀ laan dzɔɔ̄ nû; Ghe ŋ kè tsoō tsəŋ lâŋ kə̀la də̀ŋ kə Edzìpt kə fə̀ tsə̀ghàsò sə wo.

²⁴ À fə̀ lò aŋghəa Musî fə̀ boō fughu â Zə̀ kò e fə̀ ghəŋlo ù n noo tughu tsughu aŋ ghûw, tùe màʼà tsughù enyəa ghe wə̄n nî dzə̀ tò wɛ ù wɛ̄ ù zən ù Fɛlò

²⁵ Ù m biso shìa kɔʼ alefala dzəə̄ŋ ghèe ghê ghì a Kəzə̀ ghò, tsə̀ghàtàʼà alezuw kədzûŋ aŋ kə̀mà fə̀ enə̀gha aŋ ghəa a biigh.

²⁶ Ù m mòʼn tsùghù sùghò enyəa e dzɔ̂ɔ alefala am bàm e Kə̀lestò tsə̀ghàtàʼà sə alekelê fʉgha u dzûŋ wəla u lô an naʼ zə Edzìpt, nu ù fə̀ mòʼn təla nduw ko namso kəla kə lo a sə ko.

²⁷ À fə̀ lo bòʼ Musî fə̀ boo fughu â Zə̀ kò, e fə̀ ghəŋlo ù n tiigh nùghù sə̀ wò an naʼ zə Edzìp, ù ŋ kè ndoʼò tsəŋ nʉgha u kədə̀ŋ u pfʉa wo, ù ŋ ka tsughu ko ezə, tɔŋlo enyəa ù fə̀ naŋa nduw esə a zəŋò ghùw wəla a buw tò a e kôʼ.

²⁸ À fə̀ lò sugho aŋghəa Musî fə̀ boō fughu tsughu â Zə̀ kò e fə̀ ghəə̄n tsughu ù n naŋâ Zə kə e zəŋso naaŋ ko, nɔm kaaŋ sùghò kətàŋ a fûu e təndughu e ghì ghə Ezə̀lɛ̂ enyəa e kwo ko Tsə̀ndə̄ghā è Kə̀zə̀ zəla e wiī ghî gho lô mɔ̂ɔ wɛ a ghee à sûesʉ gho.

²⁹ À fə lo bòʼ ghî ghə Ezə̀lɛ̂ a fə̀ boo fughu â Zə̀ kò e fə̀ ghəŋlo ghe n tsə̀ghà daŋsə dnùw an dzùghùntsòʼ è bàŋa mo ghe bwîi ndùw an luʼu kə zumso tò à yò dzə̀ an ndzughù. Am bùghò ghì ghə Edzìpt a ndùw sə̀ kəŋo wò sughô alebùghò dâŋ, bʉgha u dzùghù e te m bvʉ̀ wò a zəŋò ghee, kuŋso nùghù ndùw ghee.

³⁰ À fə̀ lo bòʼ ghî ghə Ezə̀lɛ̂ à boo fughu â Zə̀ kò e fə̀ ghəŋlo ghe m ŋgə̀a tsə̀ghà wò ghɔŋ wə e nâʼ u Dzɛ̀lekò alo ntsuʼu sə̀ghàmbəgha, wə m bɛ̀lɛ̀ bvʉ̀ è wo.

³¹ À fə̀ lo bòʼ kpàlà kəla ghe fə̀ tɔŋlo enyəa à lǒ Lahàp fə̀ boo fughu tsughu â Zə̀ kò, e fə̀ ghəŋlo ù ŋ kè kpuūw dzəŋlo ghèe ghê ghî ghəla ghe fə̀ naaŋ yo tuuŋ ko aŋ ghəa e Kəzə̀, bòʼ enyəa ù fə̀ kuuwn ni naŋā ghì ghə Ezə̀lɛ̂ ghəla ghe fə̀ bugho aletsè tə̀ luʼū aŋghəa naʼ e fə̀ lo a te.

³² Ǹ lo alekòom kə̂a kpeʼe wo êndūghō a? Ŋ̀ kôom ŋge ki yo nəgha zo alekə̀a wò aghəa kùu ndùw ghì ghən; tɔɔŋ ghê Gidiyòn, Balàk, Sâmsòn, Dzɛftà, Dɛvìd, Sǎmwɛ̀l àsùghò ghǐisʉghà gho.

³³ À fə̀ lo sugho eboo e fə̀ ghəŋlo enyəa aghî to ghən təma zə tənàʼà an tsam, à li ghə ghə̂əŋ ghəa ghəla à fə lô tsəghatsəgha, à li ghə kele sùghò fʉgha wəla Zə̀ kə fə̀ to naŋā â ghee, à li ghə ghàʼa sùghò u bʉgha,

³⁴ à li ghə n lo sugho alenyəm wə̀n ù n tughu məla m fə̀ bəghanlo, à li ghə n lo sugho aletiī zəŋo ghɔŋ a tsam, à li ghə n dòʼò tsugho ghî a tughu gho aŋghəa ghe fə̀ bûʼ lo ko bvùʼù mə̀ aghì mò, à li ghə ŋ ghaʼa sùghò an tsàm, ghe n lo sugho aletəma zə sùghugòʼ tə tətùu, tə n tinlo è nughù.

³⁵ Yîzən ghə ŋ kòʼ tsughu mò ghî a ghee ghəla ghe fə̀ kpuwnlo ŋ kòom zòo wò ebàm alo evʉ. Ghe n dèsò ghì a Kəzə̀ à li gho am fʉgha wə ŋkwə̀n, à li ghə m kpùw è daŋso, ghe màʼà fə̀ ləghaa yo aletuū maʼà Kə̀zə̀ enyəa to ghî a te a mô zəghà maʼà ghee. Ghe fə̀ enyə boo tsughu alekpuwnlo bòʼ enyəa ghe kê kelê mùghù è dzûŋ zò abugho e ghe kê kɔʼsə kɔʼ alo evʉ̄.

³⁶ Ghe n lugho a loʼ gho, vʉʉn bu alo təkwùu, ghe ŋ kùm tsùghù à li gho alo tetsaʼ nì fè nàŋa ndùw ghee.

³⁷ Ghe n təəm à li gho alo atia, ghe n sughoon kə̀aan à li gho alo təsɔ̌ɔ alo utɔ̀ŋ u bʉ̀ghà, sùghùu ŋ wi a li gho alo təkɔ̄. Ghe m bwîin kàaŋ tsə̀ghà ko alo ese, mo ghe n dzə̀là kele gûw tə tədzə àsùghò gùw tə təndzì to, tò təndzʉ. Ghe ŋ ŋgee laa sugho, ghî ghə m biso tsùu ghee, ndzaŋso sùghò ghee.

³⁸ Mbī zən fə̀ yo dzə̀ luʼu kə̀ dzûŋ ko â ghee alemùghù a te. Ghe n laʼà bwìi ŋgə̌a kaaŋ tsə̀ghà alo təbəghaā asùghò alo tə̀ kàʼà, nyəaa bwìi ndùw a tsəla unwɛ̄ asùghò am gbùʼ a ghueetsə̄ wo.

³⁹ Aŋghəa Zə̀ kə fə̀ bûʼ dê ko aghì ghən enyəa kə duʼn nǔ ghèe ghee bòʼ boo zəla ghe fə̀ ki ghè zò, ghe ŋ kè naām kele fəgha kəla ghe fə̀ to naŋa â ghee.

⁴⁰ Zə̀ fə̀ enyə lǒ bòʼ Zə̀ kə̀ ka fə ka bian naŋ ko dzɔ̀dzɔ̀ tə aghəa tən to a ghee, à fə̀ lo sugho â sɛ, enyəa ghe e ke yo alebùghò doʼò fəgha kəla ghe fə̀ ki aledòʼò mò sɛ̀ yo a te.