Hibùlù 10 - To kə Kəzə̀ kə̀ Fughu ko

Ghe sɛ̂ Kə̀lestò enəgha e mɔ̀ʼ sɛ̀ tən ko êsəŋò

¹ Aŋghəa lâŋ kə Tə̀dzûu kə̀ tsô lò ko kəzəŋso kə dêe wô ghəa à dzûŋ ghəla a ki alebùghò, dèe êzə̀ mò à kùm yò dzə̂ ghəa ghəla a ki alelo ghè ghò, lâŋ kə te kə kê nə̀ghàsò kòʼ yò ghî ghəla ghe kuʼso wo Zə̀ kò am fʉgha wəla ghe gbôo fughuu wə̄n nûu tə̀ nùu.

² Abugho ghì ghəla ghe kɔʼso Zə̀ ko mò lo mo ghe ŋ kùm sùw maʼà tən ghee aŋ ghəa a ghee a biigh gho am fʉgha wəla ghe gbôo fughu nduw â Zə̀ kò, to ghe mô kòom kwo yo enyəa ghe ghəəŋ nù bo zo àsùghò enyəa to ghî a mô kòom gboō fughu yo fʉgha wo â Zə̀ kò.

³ E fɛ kòom lò enyəa fʉgha ù gboo fughuu wo â Zə̀ kò nûu tə̀nùu zə̂əŋ wò aghì aŋ ghəa a ghee à biigh gho.

⁴ Dzì yò dzə̂ â kàŋ tə təmbɔ̀ŋ to àsùghò tə tədzə̀ to alesùuw maʼà tə̀bòo.

⁵ Zən lò e ghee ghəa Kə̀lestò mò so e bugho am mbī, ù n dzɛ̀ â Zə kò enyəa, “Ghù mò ləghaa yo fʉgha ù gboō fughu wo àsùghò fughu ù li wən, ghu m bəgha kɔʼ gwən e ughùe â mùghò.

⁶ Fə̀ŋ zə̀ghà mò zɔlɔ dzə̀ yo am nyòm təla ghe mò kpɛ̂ɛn fughuu wo â ghù asùgho təla ghe mò gbôo fughuu wo alesùuw maʼà bòo tə aghì.

⁷ Mugho n daŋso dzɛ̀ tsùghu enyəa, ‘Ǒo Zə̀ kò, mùgho wəlà, M̀ fɛ bùgho alefwàʼ fwàʼ kəla ghù tsə̀m tsughu, aŋghəa ghe tɔm naŋa an nyəme u kəmwàʼso kùu wò mùgho.’ ”

⁸ Kə̀lestò fə̀ sûesʉ dzɛ tsughu enyəa, “Ghù mò ləghaa yo nyom tə̀ gboo fughuu to, ŋkāa fughu kə̀ kɔʼɔ fughu ko, ŋkāa fughu ù kpɛɛn wo ko ŋkāa fughu ù li wəla u lɛɛn sugho ghəa a təbòo ghò, ŋkāa ghəa a te ghə yo aleghəŋlo enyəa fə̀ŋ zə̀ghà e duʼnlo” (ghe fə̀ fʉgha wən fughuu aŋghəa lâŋ kə Musî kə̀ deē).

⁹ Ù n daŋso dzɛ̀ kpeʼe tsughu enyəa, “Ǒo Zə̀ kò, Mùgho wəla, M̀ fɛ bùgho alebùghò fwâʼ fwàʼ kəla ghù tsə̀m tsughu.” Zə̀ kə̀ bughuu naaŋ tsughu kàa n sûesʉ mò, kə n zə kɔʼ kàa m fughu mò.

¹⁰ Zə̀ kə n tsə̀m tsughu alesùuw maʼà bòo tə sɛ̀, kə ŋ ghəəŋ tsughu enyəa Yɛso Kə̀lestò fughuu kɔʼ ghue u wə̄n an tuw u sɛ̀, ù fughuu təla ko êsəŋò.

¹¹ A fə̀ lǒ tsuʼu mən n dzə̀m n dzə̀m fɔ̀e tə Tə̀dzûu tən tə dzə̀m fə̀ soʼo nyəa nduw fwaʼ kə ghee ko, ghe n tsôo sàa fùghuu kwèen kô fʉgha u mɔʼɔ wo, mo u yo dzə̂ alesùuw maʼà kôʼ təbôo.

¹² Kə̀lestò fə̀ kuuwn sɛ fughu tən kô ghue u wə̄n alo enəgha e mɔ̀ʼ alesùuw maʼà tə̀bôo to mbī kê bughò mîaa. Ù n daŋso dòʼò tsughu aŋ kwe u Kəzə̀ ù təma wo.

¹³ Nì nùghù wò an ti kə te ko, ù fɛ ləəm tsuʼ wəla Zə̀ kə̀ kê ghəəŋ tsughuu enyəa ghiīkətuw a wə̄n a doʼò tsughu fəgha kə wən kə̀ gaʼn kə aghuw kò.

¹⁴ Am fughu kə wə̄n kən kə̀ mɔ̀ʼ, ù ŋ ghəŋlò ghî ghəla ghe sûw maʼà bôo tə ghee to n dòʼò tə̀n kɔʼ ghî à ghe kpe aŋghəa Zə̀ kə̀ ləghaa.

¹⁵ Zuʼ tə̀ Zɔlɔ tə teso dzàa wò sùgho nù ghəa ghən gho â sɛ̀; nu tə fə̀ daŋso dzɛ tsughu enyəa,

¹⁶ “Tsə̂ntə̀mbî n dzɛ̀ tsùghù enyəa mən lǒ kàa məla Ǹ lo zəā kɔʼɔ ghàʼ à ghee abugho tsùʼu n te lo tsəghà tsughu, Ǹ lo dzə̀la nǎaŋ nduw lwaŋ waŋa am fə̀ŋ tə ghee, Ǹ tɔɔ naŋa nyəa nduw an tuw u ghee.”

¹⁷ Zuʼ tə̀ Zɔlɔ tə n dzɛ̀ kpèʼe tsughu enyəa, “Ǹ lo kòom mòʼn yò ghəa a ghee à biigh gho asùgho ghəa à kwu ghəla ghe ghəŋlo.”

¹⁸ Abugho ghe ghuūwmaʼà dzə̂ ghəa ghən gho, efi lo enyəa a kôom ki dzə yo alegboō fughuu fʉgha wo a Zə̀ kò alesùuw maʼn bôo tò.

Sɛ̀ ndûw a vʉ̀a Zə̀ kò

¹⁹ À fi lo enyəa waazə̂ ghò, sɛ̀ tɔ̂ʼ kwò tən nû enyəa a lo nyəa nù an Tsùghu e Baa zo am bàm e kàŋ tə Yɛso.

²⁰ A lô fughu tsəghàa nyə̌a ndùw an dzì è fughu zəla e lo ghəŋlo enyəa sɛ̀ kelê mùghù è doʼn təla zo, dzì zəla u mò tsʉ nyə nduw â sɛ̀ aŋghəa ù mò bâʼ nyə ndûw vʉa zo am vʉ zəla ù mò kpuw ghè zò.

²¹ Sɛ̀ ki nu tuw kə Fɔ̀e kò kə lɛnlo a dzeŋe kə ghì a Kə̀zə̀ ghò alo kəwalā.

²² E lo enyəa sɛ̀ ki alendùw a vʉ̀a Zə̀ kò am fə̂ŋ è zɔ̀lɔ mo aŋ kùm bǒo fughu â wə̄n, am fəŋ təla a lo mo a n sùw zɔnso àsùghò alo eghùe mo a n sùw am mùghù n zɔ̀lɔ mò.

²³ Bùghò nlò tò sɛ̀ tɔʼɔ̀ teē tsughu an tùʼ zəla sɛ̀ chiī ghè zò mo a tsəəŋ kaaŋ yo, tùʼ zəla sɛ̀ dzâa nduw sugho â waazə̂ a sɛ̀ ghò; tɔŋlo enyəa Zə kə̀ naaŋ nǔ to kə wə̄n kəla kə to tsughu.

²⁴ To a mô kele tsughuu ko aletoon nduw ghue è ləghaa nduw zo àsùghò alefwaʼa nduw fwàʼ kə̀ dzûŋ kò.

²⁵ E kwo ko sɛ̀ lǒ zəghàan maʼn mwam zəla sɛ̀ ki enyəa a e bugho təmadzəŋlo, aŋghəa ghî à li a ghəŋlo, sɛ̀ è toon nduw ghue zo aŋghəa Tsuʼ fəla Mughu ù te lo bughoo a te tsoo fəghaan suū wô sugho.

²⁶ Abugho sɛ̀ kele tsughu êsəŋò, sɛ̌ yia naām ndzə̂m ghəə̄ŋ ndûw ko ghəa à biigh gho, fəgha kə̀ li kə kôom yò a lo alesàa fughuu ndûw â Zə̀ kò alesùuw maʼà bòo tə te to a te.

²⁷ Abugho a ndzə̂m ghəə̄ŋ tsughu bo zo enyə, a kê bɔ̌ɔm ləəm nduw ko nʉgha u Kəzə ù pfʉa wo am fə̀ŋ tə̀ tsəəŋ to, ləəm sùghò fɛ̀ɛn kə uwə̀n kəla kə lo bugho ləŋe ghîikətuw a wə̄n gho.

²⁸ Abugho ghùw zaʼ lâŋ kə Musî kò, ghî yia lo a bə̀ghà ŋkāa a təgha ghe tɔʼ teso dzɛ̂ wo, ghe m wì màʼa ghùw ù te mo ghe kâ kwùsò se zo.

²⁹ Ghɛ̀ moʼò enyəa ghùw wəla ù tso kuuwn chwiilwii tsughu Wɛ̀ ù Kə̀zə̀, lɛɛn kè tsughu kâŋ tə kàa ŋ Kə̀zə̀ məla tə fə̀ sûw maʼà tsughu wə̄n, tsoʼô Zuʼ tə Kəzə̀ təla tə bughòo dzɔ̂ zò, u wən wo utsû kǔuwn tsò bòʼò lò aledòʼò ênzə̂n?

³⁰ A kwo nu ghùw wəla ù fə̀ dzɛ̂ tsughu enyəa, “À lò mugho Ǹ diī ŋgə̀mà tò, Ǹ lo ghəəŋ nù ghiīkətuw ghaŋa a lo fala bòʼ bo zəla ghe ghəŋlo.” U n dzɛ̀ kpèʼe sùghò enyəa, “Mughu ù te lo saʼa nù ghî a wə̄n gho.”

³¹ À ŋgè lǒ fɛ̀ɛn kə eghəa â ghùw alebvʉ̀a tsughu nyəa tsughu aŋ ghu kə Kəzə̀

³² Mòʼn wò nlò ghəa ghəla a fə̀ sə a zəŋò ghɛ̀ à wǐiwì, aŋghəa ghɛ̀ mò kôʼ tsughu tsə̀ è Kəzə̀, ghɛ̀ m fala tsughu an ndə̀mà tə aghəa, ghəa a te ghə ŋ kè kuuwn tsəghàsə ghɛ.

³³ Ghe n sûuwn ghɛ̀ bùʼù bǔu sùghò ghɛ̀ an nəgha tə̀ li to an sə kə aghì. Ghɛ̀ n yosò sughò ghî a li ghəla ghe mo faan sugho, ghe fə̀ buu sùgho ghee an nəgha tə̀ li to.

³⁴ Ghɛ̀ mò bughoo ghɛ̀ Ŋ̀ ki se è kwuso a zəŋò ghìidughutsaʼ gho, ghɛ̀ m boo nduw aŋ ghùe e ghɛɛn zo enyəa ghe kwuū nughù fʉgha wɛɛ; nu ghɛ mo kwo nu enyəa ghuūghùe zɛʼɛ e ki nû ghəa è səŋò è li zo alo kəwalā, mo e kê tsɛ̀lɛ̀ nù.

³⁵ Kà nlǒ fə̀ŋ zəla ghɛ̀ gaʼ tsughu a zəŋò Mughu ù te kôom nì nùghù ebàm, nu è lo nìi wò nù ghɛ â namso kə̀ ne ko.

³⁶ Ghɛ̀ ki alekɔlɔ tsughu ko tə̀ fə̀ŋ, tò ghɛ̀ e lo aleghəəŋ ghəa ghəla Zə̀ kə ləghaa, ghɛ̀ lo kele kɔʼ fəgha kəla ke fə̀ to naŋā â ghɛ̀.

³⁷ Ghe tɔm naŋa am Mwàʼsò kə Kəzə̀ enyəa, “Nu a tsûuŋ tsùghu ko enyə, ghùw wəla ù ki alebùghò ù bùghò nù, ù lòʼn yo.

³⁸ Ghùw wəlà ù lò tsəghatsəgha lo mughùun nù aŋghəa ù gaʼ tsughu fə̀ŋ e wə̄n a zəŋò Zə kò, abugho ù kuuwn kôom ghɔ̂ɔn tsughu ebàm, fə̀ŋ zaŋa ŋ kôom dzɔ̀ɔ yò a zəŋò wən.”

³⁹ Sɛ̀ kuuwn yo dzə̂ aŋ kɔ̀n kə ghì ghəla ghe ghɔ̂ɔn wo ebàm, Zə̀ kə n dzùw màʼa ghee. Sɛ̀ lo ghî ghəla ghe gaʼ fə̂ŋ tò a zəŋò Zə̀ kò, mo kə lo bəghasəa nǔ sɛ̀.