Hibùlù 1 - To kə Kəzə̀ kə̀ Fughu ko

Zə̀ kə̀ kə̂a wò àghəa â ghì ghò am bàm e Wɛ ù wə̄n

¹ Â wǐiwì, Zə̀ kə fə̀ kəaa wo aghəa an ndə̀mà tə̀nə̀gha àsùghò an ndə̀mà tə tədzǐi â ghê tsele a sɛ̀ ghò, mò à fə̀ zuuw dzaā wo ghǐishʉ̀ghà.

² Yia a bugho êzəŋ an tsùʼu məla ŋ gùŋso tsughu, Zə̀ kə̀ ghəa gho â sɛ̀ kə̂a wò â wɛ̀ ù wə̄n, Wɛ ù wə̄n wəlà ù fə̀ nî kɔʼ enyəa à lô fʉgha wə̀n ù dzə̀m zə̌a wə̄n, mò kə fə̀ mbī bɔm sugho am bàm e wə̄n.

³ Ù dèe wò nyəghaan zəla e lo an səghanyəgha ŋ Kə̀zə̀, vʉ̀a ù bɔɔ̄m fweēn ko Zə̀ kò, ghəa ù kwu kele mbī an daʼa kə shwaʼ u wə̄n. A m bùghò ù ghəə̄ŋ tsughu enyəa Zə̀ kə̀ ghuūw maʼà bòo tə aghì, ù n doʼò tsùghù aŋ kwe u Kwîfɔ̀e ù təma wo alo kəwālā.

Kə̀lestò tsəghàsə̌ tsə̀təndə̄ghā tə Kəzə̀

⁴ Wɛ ù Kəzə̀ tsə̀ghàtàʼà sə tsə̀ndə̄ghā tə Kəzə̀ tò, to aŋghəa zən zəla Zə̀ kə fə̀ fughu â wə̄ tsə̀ghàtàʼà sə sugho e ghee zo.

⁵ À lǒ mò Zə̀ kə fə̀ dzɛ̀ kōʼ tsəgha dzə nû â tsə̀ndə̄ghā è lì enyəa, “Ghù lǒ wɛ waŋā, nɛ wən mùghò n dòʼo tsùghò.” Ŋkāa enyəa, “Ǹ doʼn tsùghuu tsele â wə̄n, ù dòʼò tsughu wɛ â mùghò a?”

⁶ Alekòom nîi kpeʼē tsughu aŋghəa Zə̀ kə̀ fə so fughuu wo Wɛ̀ ù wən ù sûesʉ am mbī, Ù n dzɛ̀ tsùghù enyəa, “Tsətəndəgha tə Kəzə̀ tə dzə̀m ki alefughuu wə̄n â kɔʼso mò.”

⁷ Kùu ndùw tsə̀təndə̄ghā tə wən, Zə̀ kə̀ n dzɛ̀ enyəa, “Kə ghəəŋ tsughuu tsə̀təndə̄ghā tə wə̄n tə doʼò tsughu tò kəkʉ̌ɛɛ, kɔ̀ɔ ŋ wə̄n mə̀ lo tò wən ù bəghaan wo.”

⁸ Zə̀ chia kə kuuwn dzɛ̂ tsughu kùu ndùw Wɛ̀ ù te enyəa, “Ndàŋ zə̀ghà dòʼò tə̀n nu, O Zə̀ kò, dòʼò tən ko êsəŋò, Ghù ke kwu kele ghî ghə̀a ghò an dziī zəla è lo tsəghatsəgha.

⁹ Ghù lə̀ghaa ghəa à tsəghatsəgha gho, bàa ghəa a biigh gho. Zə̀ lo e ghee Kə̀zə̀, tɔ̂ɔŋ Zə̀ kə̀a, kə tsɔʼ kɔʼ ghù enyəa ghu tsəghasə ghî ghəla ghɛ̀ à ghee lo a dzə̀m, tsoʼn zəghà è tsəghàsəa sughò e ghee zo.”

¹⁰ Zə̀ kə̀ n dzɛ̀ sughò â Wɛ ù wə̄n enyəa, “Mughubè ghù fə̀ gbən wo ghueekətsə̄ aŋghəa mbī mò zîi tsughu, wala chia kə lo sugho fwaʼ kə̀a kə kəghu ko.

¹¹ Ghueekətsə̄ àsùghò wala ko kê bùghò tsə̀gha mìaan nù, fʉgha u te wo u dzə̀m kè ndzěen tsùghuu tò təndzʉ̄, ghù kǔuwn dòʼò tə̀n nû,

¹² Ghù kè ŋgwǔun nùghùun kɔʼɔ ghueekətsə̄ kə te ko àsùghò wala ko tò təndzʉ̄, ghueekətsə̄ kə te ko àsùghò wala kə lo kuūwn kɔʼ kôʼ e ghee. Yia a bughò ghû, ghù lò ko alo kətə̀ŋ, ghù kè dòʼn tə̀la nù.”

¹³ Ù dzɛ koʼ tsəgha dzə̄ â tsə̀ndə̄ghā è ghɛ̌ zò enyəa, “Dòʼò tsughu aŋ kwe waŋa ù təma wo, Ǹ lo telè ghəə̄ŋ tsughuu dzə̂ ghîikətuw ghə̂a à doʼò tsughu fəgha kəa kə̀ gaʼn kə aghùw kò a?”

¹⁴ Tsə̀təndə̄ghā tən tə̀ dzə̀m mgbàŋ yǒ zʉ̀ wəla Zə̀ kə mò tum wo enyəa ghe bughò fwâʼ â ghì ghəla ghe kê zəā tuw ko a?