Gàlashìan 6 - To kə Kəzə̀ kə̀ Fughu ko

Yòso wàazùghù alebòʼò mbùŋ kə wə̄n

¹ Waazə̂ ghaŋa gho, abugho ghùw wɛʼɛ ù lòʼ ghəə̄ŋ boon tsughu ghəa è li zo, ghɛ̀ ghəla Zuʼ tə̀ dêe ghɛ â dzì, ghɛ̀ ŋ ki alenyoʼn kôom bɔɔ̄ tiso wô ghùw u te e bàm an dziī. À m bùghò ghɛ̀ ghəŋlo êzə̀, ghɛ̀ n nîi tsùghu èghòmlo enyəa e kwo ko ghùw wɛʼɛ lô kôom bvʉ̂a kômlo.

² E yoso nlò ghue zɛʼɛ zo alebòʼò mbùŋ kə waazə̂ ghɛʼɛ. Abugho ghɛ̀ ghəŋlo êzə̀, ghɛ̌ fi luesô làŋ kə Kə̀lestò.

³ Tɔŋlo enyəa abugho ghùw mòʼò enyəa e lo fəgha kə̀ li ko mò ù bùʼ yò dzə̂ kə ghee, ù fi tsêe ghue ū wə̄n.

⁴ To ghùw mò tɔ̀ʼɔ̀ lɛ̌ɛn tsughû ghəa a wə̄n à ghəəŋ gho alekòʼ enyəa a dzɔ̂ɔ ko nù a. Abugho ghəa a wə̄n a dzɔɔ̄, ù fi lo nû aletsɔ̀ fə̀ŋ aŋ ghəa ghəla ù lo mò ù ŋ ghəŋlo, mò ù bàan ndùw yǒ ghəa a wə̄n gho ghèe a ghûw ù lì ghò.

⁵ Tɔŋlo enyəa ghùw kì ko mbùŋ kə wə̄n alebòʼò.

⁶ Ghî a ki alefughū nduw sugho yôsò zò â ghì ghəla ghe zoʼn nduw ghee an shwaʼ u Kəzə̀ mo ghe fughuu nduw ghee â fʉgha ù dzûŋ wəla ghe ki.

⁷ Kà nlò ghue zɛʼɛ zə e tseē dzə. Ghùw yò dzə̂ aletsè Kə̀zə̀. Abugho ghùw tam fəgha ko, ù lo tèlè kèle ko kə̀ ghee.

⁸ Ghùw wəla ù ghəə̄ŋ ghəa ghəla gwən e ughùe e wə̄n e ləghaa, ù lo tèlè kèle kô ŋgòʼ è namso kəla ghəa a gwə̀n ghə eghùe a fughuu, mò namso kə te kə lo evʉ. Wəla ù ghəə̄ŋ ghəa ghəla Zuʼ tə̀ Zɔlɔ tə ləghaa, ù lo kelê mùghù zəla e doʼò tən.

⁹ E kwo ko sɛ̀ lô so e bughuu kòom nù aleghə̂əŋ ghəa à dzûŋ ghò, tɔŋlo enyəa abugho nəgha e te e lo kpē tsughuu, sɛ̀ lo kele nù namso ko abugho sɛ̀ doʼŋkè kôom ghɔ̂ɔn wò ebàm.

¹⁰ Aŋghəa e lo êzə̀, e fi lo enyəa sɛ̀ ki aleghəŋlo èdzɔ̀ â ghì ghò a dzə̀m, a ka dɔ̂ɔm tāŋ abugho à tso lo ghî ghəla ghe boō fughu â Zə̀ kò tǒ sɛ̀.

Tsʉ̂ zəla Pôl fughu gûŋso tsughu àsùghò tɔɔŋ zo

¹¹ Kòʼ nlǒ ŋgɔ̀ʼɔ̀ tə səa a kəmwàʼsò ghə̀là Ǹ nyâʼ nyə tsughu mughò â nəŋ ko aŋghəa Ǹ tɔɔ̄ wô ghɛ â mwàʼsò kən ko a.

¹² Ghî ghəla ghe dzâa wô enyəa ghɛ̀ e sughoo twigh wɛʼɛ wo, lo ghî ghəla ghe ləghaa ko aletɔʼɔ̄ deē səa wo ghue e ghee enyəa ghe lo ghî à dzûŋ ghò. Ghe ləghaa yo alezoʼn wo ghî ghò enyəa ghe lo nû alezə̄ kətuw bòʼ aŋghəa Kə̀lestò fə̀ kpuw alo kədàŋlo. Ghe enyə ghəŋlo ghe sô tsəŋō enyəa ghî à lô dzaŋsō kaāŋ ghee.

¹³ Ghe ghəla ghe kəa ko ghəa gho kùu ndùw ghəa à sughoo a kə tigh ghən, ghuūghùe e ghee e bùʼù nǎaŋ sùghò yò lâŋ kə Musî kò. E ghee e lo ko aleghəəŋ kaŋlo enyəa to ghî a mô sùghô twigh u ghee tò ghe e ki kɔʼso mo a te.

¹⁴ Yia a bùghò, Ŋ̀ ki ko aletsɔɔ̄ fə̀ŋ an dǎaŋ kə Mughùbè ù sɛ̀, Yɛso Kə̀lestò. Ghəa a mbī a dzə̀m à lo kənughùnu â mùghò, yìa à lǒ tò mùghò m kpuw â ghəa a mbī gho.

¹⁵ Ghəa è li e ndôʼ yò, ka ghe sugho tigh kə ghûw kò ŋkāa ghe taʼkè sugho; ghəa è səŋò è lo ko enyəa sɛ̀ n ghì à fughu a doʼò.

¹⁶ Ghùw wəla ù naāŋ dzə̂ laŋ kən, to Zə̀ kə̀ mô fughu wə̄n â bughuun zo, kə dêe sùghò wə̄n a se è kwuso zo, àsùghò â ghì a Kəzə̀ ghò a dzə̀m.

¹⁷ E kwo ghùw lò so e kôom fə̀mso mùghò, tɔŋlo enyəa na kə fəsə̀ghà kə̀là ŋ ki a zəŋò mùghò dèe enyəa, Ǹ lo ghûw ù kə̀fwàʼ ù Yɛso.

¹⁸ Waazə̂ ghaŋa gho, gɔ̂ɔŋ zaŋa e lo enyəa, to Mughùbè ù sɛ̀ Yɛso Kə̀lestò mò dê ghɛ̀ a dzə̀m â dzɔ̀ e wə̄n zo. Zə e lo ko êzə̀.