Gàlashìan 5 - To kə Kəzə̀ kə̀ Fughu ko

Ndzə̀əm kə emùghù kəla ghî a Kəzə̀ a ki alemughu ghè kò

¹ Kə̀lestò mafə sɛ̀ zue sə enyəa sɛ̀ ka kôom fwàʼ sùghò kɔ̂ ko a tsəlā làŋ kò. A fi lo enyəa ghɛ̀ ki alefəghaan tɔʼɔ̀ tēe, e kwo ko ghùw wɛʼɛ lǒ so e bomlo alefwàʼà kpeʼe kə̀kɔ̀ a tsəlà làŋ kə̀ loʼ ko.

² Tɔ̀ʼɔ zhəən wò nlò shwaʼ wəla mùghò Pôl, Ǹ dzâa wo êzəŋ â ghɛ̀. Abugho ghùw wɛʼɛ kôom boo tsughu enyəa ghe sugho tigh kə wə̄n, to e doʼò tsəghatsəgha a vʉ̀a Zə̀ kò, a fi lo enyəa fəgha kə̀là Kə̀lestò mò fwàʼ kòom kì dzə yo namso kə̀ li ko am mùghù e ghûw ù te.

³ Ǹ naam dzàa kpèʼe wò ko nù; ghùw wəla ù boo kɔʼ enyəa ghe sugho tigh kə wə̄n ki alebôo lwàŋ u Tə̀dzûu u dzə̀m.

⁴ Ghùw wɛʼɛ wəla ù də̀ma aledòʼò tsəghatsəgha a vʉ̀a Zə̀ kò bòʼ ù naāŋ lâŋ kò, u ŋ ghue u wə̄n u bâʼ nùghù sə a vʉ̀a Kə̀lestò. Ù n naŋa sə̀ ndùw ghue u wə̄n wo an lùʼu kəla ù yò alekòʼ dzɔ̂ e Kəzə̀ a te.

⁵ Zuʼ tə Kəzə̀ tə kûm dzə̀là nù fə̂ŋ tə sɛ̀ tò enyəa sɛ̀ e kwo tən enyəa Zə̀ kə̀ lo nìi sɛ enyəa sɛ̀ lo tsəghatsəgha bòʼ sɛ̀ boo fughu â Kə̀lestò.

⁶ Abugho ghe sugho tigh kə ghûw kò ŋkāa ghe tâʼkè sugho, zə ki dzə yo ghəa è li zo aleghəŋlo am mùghù e sɛ̀ à ghê Kə̀lestò Yɛso. Ghəa èsəŋò zəla e lo ghè zò lò enyəa, sɛ̀ ŋgaʼ fə̀ŋ a zəŋò Kə̀lestò an ləgha zəla a ki ghè zò.

⁷ Ghɛ̀ mò mgbaŋa bwiī dzɔɔ̄ nû, am fwàʼ kə Kə̀zə̀ kɛʼɛ. À màʼà ghɛ koōm bughu naŋa ndughoo enyəa ghɛ̀ ka tee tən tsughu ko an səŋò e te zo a?

⁸ Ghùw wəla ù mò nom ghɛ, à mò yo dzə̄ Zə̀ kəla kə mò tɔŋɔ̄ ghɛ.

⁹ Abugho mbvùŋ toō ko ênzə̂n, è ghə̌əŋ nù kəa mə̀ n tùghù tsə̀ghà è tsughu.

¹⁰ Ŋ̀ ŋgaʼ fə̀ŋ a zəŋò Mughu ù te enyəa ghɛ̀ lo kòom zuw yo tsʉ̂ e ghûw ù lì zo, tsə̀ghà sə̌a ko yo tsʉ̂ zəla Ǹ lo mò mùghò m fughu â ghɛ̀. Mò à kôom lò ko ndugho ù fwə̀là sə ghɛʼɛ gho, a lô wə̄n fɔeso ko Kə̀zə̀ abugho ghùw ù te tso lô ko kwò ko.

¹¹ Waazə̂ ghaŋa gho, abugho e mô lô enyəa Ǹ naam zoʼn kaaŋ ko aghì enyəa ghe e sughoo tiigh ko, à sò lǒ kwo ghe tsôo naām ndzaŋsō kaāŋ ko mugho a? Abugho M̀ mô zoʼn kaāŋ yô ghì ghò aŋ ghəa ghən enyəa Kə̀lestò mò kpuw alo kədàŋlo, to ghùw ù lì mò so pfʉ̀so yo nʉghà.

¹² Dî zaŋa e lo enyəa, ghî ghəla ghe fəmso kaāŋ tsəgha ghɛ, to ghe mô kǔuwn kàa tsughu nù ghue e ghee zo.

¹³ Yia a bughò ghɛ a waazə̂ ghaŋa gho, Zə̀ kə̀ mò ghɛ shìaa nughu sə wo enyəa ghɛ̀ e ndzəə̄m mughu. E kuuwn kwo ko ghùw wɛʼɛ lô so e nîi ndzə̀m kə emùghù kə te ko tò dzì è lì â wə̄n aleghə̂əŋ ghəa à biigh ghəla gwən e eghuè zɛʼɛ e ləghaa ghè ghò. E laam kuuwn mughu nlò alo eləgha, yosò sùghò ghue zɛʼɛ.

¹⁴ Tɔŋlo enyəa lwâŋ u Musî wə̀n u dzə̀m ghe n nì kwu kɔlɔ kɔʼ alo kəlàŋ kə mɔ̀ʼ mo kə dzɛ̂ enyəa “Ləgha wàazùghù tò aŋghəa ghù ləghaa ghue wʉ̀a wò a te.”

¹⁵ Abugho ghɛ̀ chuūwn kaāŋ ghue zɛʼɛ zo alo tədzə̀, pfʉa sùghò àsɔŋ aŋ ghùe zɛʼɛ̄, nǐ nlò ghôom zò, ŋkāa ghɛ̀ lo dzuw maʼa mɛʼɛ̄ ghue zɛʼɛ zo.

Alemùghù an daʼa kə Zuʼ tə̀ Zɔlɔ to

¹⁶ Ǹ so ŋ kuūwn dzâa wô â ghɛ̀ enyəa, mùghù tsughu nlò aŋghəa zəla Zuʼ tə Zɔlɔ tə deē enyəa ghɛ̀ è mughu a te, tɔŋlo enyəa abugho ghɛ̀ mughu êzə̀, ghɛ̀ e ke ghəəŋ yo ghəa ghəla gwən e ughùe zɛʼɛ e ləghaa.

¹⁷ Ghəa à laan ghəla gwən e ughùe è ləghaa enyəa to ghùw mò ghəŋlo boom dzəəŋ yo ghèe ghəla Zuʼ tə Zɔlɔ tə ləghaa. Ghəlā Zuʼ tə̀ Zɔlɔ tə ləghaa enyəa to ghùw mò ghəŋlo boom dzəəŋ sùghò yò ghèe ghəla gwən e ughùe e ghûw è ləghaa. Ghəa a te gho a bə̀ghà bwìi dzə̀ yò fwən wo. Êzə̀, ghəa a te a ghəəŋ nù ghɛ̀ yo aleghə̂əŋ ghəa à dzûŋ ghə̀là ghɛ̀ mô moʼò aleghəŋlo.

¹⁸ À fi lo enyəa lâŋ kə̀ ki dzə yo daʼa ko a zəŋò ghù abugho à ghuw kə e bwìi kə̀a kə̀ naŋsô Zuʼ tə̀ Zɔlɔ to.

¹⁹ Ghəa ghəla ghue u ghûw ù ghɛ̂nlo aleghəŋlo lo an ndɛ: ghəa a te a lo; alesəā ndzāŋ, ghəa à nyəə̄ŋ kaaŋ ghə eghùe gho, dzə̀adzə̀ tə aghəa, aleŋaŋa koʼo ghue zo,

²⁰ mùʼù ŋ kɔ̀ʼsò mòʼ, nyàʼ n zùuw mò, bɛ̂ zə èghùe, kə̀zùghù, kə̀mʉ̀nlo, nə̀ghà m pfʉ̌a mò, ekʉmè, ndzùghùn kə emùghù àsùghò ghəa à ghəəŋ gho ghù tə̀ghū,

²¹ sə à səa gho am fʉgha u aghì, lʉ̀ m mʉ̀aa kala mò, dzweŋe ù biigh wo. Àsùghò ghəa à biigh à li gho. M̀ maa ghɛ bùʼ kwɛ̀ɛn dzə̀ tò aŋghəa Ǹ naām kwɛ̂ɛn wô ko sughò ghɛ êzə̄ŋ, enyəa ghùw wəla ù mùghu ŋgòʼ è mùghù zən zo yǒ tò ù e zə fɔ̂e u Kəzə̀.

²² Twam wəla Zuʼ tə̀ Zɔlɔ tə mʉā wo lò, eləgha, ebughunlo, ghue ù zumso wo, mwam ù dzûŋ wò, edzɔ̂ àsùghò səŋò zò,

²³ zʉ̀ kə emùghù àsùghò ghuw kə ebwìi kə̀ naŋso ko; abugho ghəa ghən enyə lǒ a zəŋò ghùw, làŋ kə̀ li yo dzə̂ alekɔlɔ̄ wə̄n.

²⁴ Ghî ghəla ghe lô ghî a Kə̀lestò Yɛso ghò, ghe lo ko to ghe n təghàa nàŋa gwən e ughùe e ghee zo alo kədàŋlo àsùghò laan tə aghəa təla gwən e ughùe e ghee e ləghaa.

²⁵ Êzəŋ wəla sɛ̀ mughu an daʼa kə Zuʼ tə̀ Zɔlɔ to, sɛ̀ ki aleghəəŋ sugho ghəa gho aŋghəa Zuʼ tə̀ Zɔlɔ tə dêe wo à sɛ̀.

²⁶ E kwo ko sɛ̀ lô so e kɔʼso èghue ŋkāa a ka e soʼsō kaaŋ ghî ghò. A ka e mʉʉn sugho fəgha kə ghûw kò.