Gàlashìan 4 - To kə Kəzə̀ kə̀ Fughu ko

¹ Fəgha kə̀là M̀ môʼnlo aledzɛ̀ à lò enyəa, zə̀andàŋ nyòʼn bɔɔm lò ko tò fəkɔ̂ɔ abugho ù naām lo aŋ wɛ̂ɛtùghu, ghəa e bûʼ lô ko enyəa à kum e te zo e dzə̀m kǐ wə̄n.

² Ù bùghò ù n naam lò ko aŋ ghu kə ghì ghəla ghe ki alelɛnlo â wə̄n tò ù kè telè noō kpe tsughu aŋ ghûw aŋghəa tsele fə̀ dzɛ̂ naŋā.

³ Aŋghəa sɛ̌ fə̀ naam lô tsəgha mo a kaam kele Kə̀lestò, a mò lo tsəghà ukɔ̂ â zʉ̀ wəla u saʼā mbī.

⁴ A ŋ kuuwn bùghò nəgha e te e biso kpe tsughu, Zə̀ kə̀ n tùm sə̀ wò Wɛ ù wə̄n. Wɛ ù te n nyə wò am mbī mò à wə̄n dzə wò wìzən, wɛ wən m noo kɔʼ a tsəlà làŋ kò.

⁵ Wɛ ù te fə̀ bùghò alebùghò zuū sə tuw u ghì ghəla ghe fə̀ mughù tsəgha a tsəlà làŋ ko, aleghəŋlo enyəa Zə̀ kə̀ nîi naŋa wô sɛ̀ tò wɛ a wən.

⁶ Zə̀ chìa kə dzə̂n nyə wo Zuʼ tə Wɛ ù wə̄n to am fə̀ŋ tə sɛ̀ aledèe tsughu enyəa sɛ̀ lo wɛ a wə̄n. Zuʼ tə te tia tə ghəŋlo sɛ̀ yia a tɔɔŋ tsughu Zə̀ kò enyəa, “Bəghà! Tsele waŋā!”

⁷ A fi lo enyəa Zə̀ kə̀ n ghəŋlo ghɛ̀ yia kôom yô kɔ̂ wò, kuuwn lò wɛ ù wə̄n; abugho ghɛ lo wɛ a wə̄n gho, Zə̀ kə̀ lo fughuu nù ghɛ̀ â namso kəla kə fə̀ to naŋā â wɛ a wə̄n gho.

Moʼnlò e Pôl â ghì a Gàlasìaa ghò

⁸ Aŋghəā ghɛ̀ fə̀ bûʼ lô tsəgha mò ghɛ̀ kwo yo Zə̀ kò, ghɛ̀ n lo ukɔ̂ â fʉgha ù li wo ghɛ̀ mò moʼò enyəa à lò uzʉ̀, dèe êzə̀ mò à yò dzə̂ uzʉ̀.

⁹ Yia a kuuwn bughò êzəŋ wəla ghɛ̀ kele tsughu Zə̀ kò, ŋkāa aŋghəa Zə̀ kə̀ kwo ghɛ, ghɛ̀ lo ênzə̂n alekòom nughù ndûw èbàm a vʉ̀a bvùʼù mə̀ nzə̀a ŋ kə̀nughùnùghù məla n saʼā mbī zən a, alendùw doʼò kpeʼe ndûw ukɔ̀ u gheē a?

¹⁰ Ghɛ̀ shîaa nàŋa kɔ̀ʼ tsuʼu n li mò, tədzɔŋɔ, kətî àsùghò nùu tə̀ lì to, tǒ tsuʼu n sə̀ŋò mò alezəə̄ŋ zee tsəgha.

¹¹ Tsəŋ zaŋa e fɛ lò enyəa mùgho ŋ ŋgɔʼɔ ko a zəŋò ghɛ̀ fwâʼ maʼà kə̀nughùghùghù.

¹² Waazə̂ ghaŋa gho, dòʼo wo nlò tò mugho, tɔŋlo enyəa M̀ maa doʼò sùghò tò ghɛ. Ghùw wɛʼɛ ù li kâ mùghò â ghəa è li e ghəəŋ boon dzə̀.

¹³ Ghɛ̀ kwo nû enyəa à fə̀ ghəəŋ dzâŋ zaŋa enyəa M̀ bughò kə̂aa wô làbəlà è dzùŋ zən â ghɛ̀.

¹⁴ Dzì zəla kôʼ zaŋa e fə̀ lo a te fə̀ lo nu aleghəŋlo enyəa ghɛ̀ tue maʼa mugho; ghɛ̀ ŋ kè kuwn ghəəŋ dzə̂ èzə̀. Ghɛ̀ m fwə̀n kpè nì mùghò tǒ tsə̀ndə̄ghā è Kə̀zə̀ alo kəwālā; tò a so Ǹ tso lǒ ghuūghùe u Kə̀lestò Yɛso.

¹⁵ Duʼn kəla ghɛ̀ mò bûʼ ki tsəgha, kə ndûw ghɛ̀ êzə̄ŋ? Nu mughò ŋ kòʼ enyəa abugho dzì fə̀ bûʼ lo â ghɛ̀ alefɔ̀ʼn səa wô sə ghɛ̄ʼɛ to ghɛ̀ fughu wo â mùghò, to ghɛ̀ mafə êzə ghəŋlo.

¹⁶ À lò enyəa M̀ fɛ kòom fə̀n dòʼò kɔ̌ʼ ghùwkə̀tuw wɛ̄ʼɛ bòʼ sə̀ŋò zəla Ǹ dzɛ̂ wo â ghɛ̀ a?

¹⁷ Ghî à li ghən ki nu zǐi a zəŋò ghɛ̀, yìa à sò kuūwn lô ko enyəa ghe ki moʼnlò e biigh zo a zəŋò. Ghe êzə̀ ghəə̄ŋ ko alebàʼà nughù ghɛ̀ a zəŋò mùghò enyəa ghɛ̂ zɛʼɛ zə e lo tən ko a zəŋò ghee.

¹⁸ E dzɔ̂ɔ nù alekī ghɛ̀ zo alo eghəa abugho ghəa e te lo è dzûŋ zò, abugho M̀ bûʼ yô zeē ko am bùghu zɛʼɛ̄.

¹⁹ Fɔɔn zəla Ǹ zuūw bòʼ ghɛ̀ a wɛ ghaŋā gho lò ko tò fɔɔn zəla wìzən ù nʉgha u wɛ zuūw an nəgha è dzəa zo. Ǹ lo tèlè zǔuw ko fɔnlo e te zo enyə, Ǹ ndûw tâa ndûw an ti kəla mughù e Kə̀lestò e lo dêe səā wo a te a zəŋò ghɛ̀.

²⁰ Ŋ̀ ŋgəmso ŋgee dìi nù enyəa to M̀ mô lǒ fì èzə̀ sɛ̀, tò M̀ fəghaan tsughu sugho dzə̀ zaŋa aleghəŋlo enyəa ghɛ̀ zuwkɛlɛ, tɔŋlo enyəa fə̀ŋ bàŋà mùghò a zəŋò ghɛ̀.

Ghəa a Sɛ̀la ghèe Hagà

²¹ Ghɛ̀ ghəla ghɛ̀ ləghaa alemùghù a tsə̀là làŋ kə Musî kò, dzǎa wò nlò â mùghò, à lǒ mò ghɛ̀ zuuwkɛlɛ yo fəgha kəla lâŋ kə te kə dzaā?

²² Ghe m mbaŋ tɔm naŋa am Mwàʼsò kə Kəzə̀ enyəa, Abə̀làhâm fə̀ ki wɛ à nûu ghò a bə̀ghà. U mɔ̀ʼ, a fə̀ dzə kɔ̂ kə wə̄n kə̀ zən ko, wɛ ù lì wən, à n dzə̀ wò wìzən wəla u fə̀ ndzə̂əm mughu.

²³ Wɛ wəla kɔ̂ kə zən kən fə̀ dzə wo, ù fə̀ dzə wo tò aŋghəa ghe dzəā wɛ gho a te; à ŋ kuuwn bùghò wìzən wəlà ù fə̀ ndzə̂əm mughu, ù ŋ dzə̀ wò wɛ ù wə̄n alelueso to kəla Zə̀ kə fə̀ to naŋā.

²⁴ Ghəa ghən lo tò a e dzâa tsughu enyəa yîzən ghən à bə̀ghà ti aŋ ghəa a nə̀ŋò nəŋ gho a bə̀ghà. Yîzən ghən a bəghà fɛ lǒ tò ŋkâa Zə̀ kə fə̀ zə naŋā ghèe ghê ghì a wə̄n gho. Kàa n lì mən nùghù wò aŋ Kwàʼ ù Sinàe, mò n dèe wɛ ghəla ghe dzəā tò ukɔ̂, mò a dzə̌a wò Hagàe.

²⁵ Hagae lǒ tǒ kwaʼ u Sinae an naʼ zə Alabìa. Hagàe wən fɛ ti a tuw kə Yɛlusalɛ̀m zən nɛ; tɔŋlo enyəa è lǒ tò kə̀kɔ̀ ghèe ghê wɛ a wə̄n gho.

²⁶ Yia a kuūwn bughò Yɛ̀lusalɛ̀m zəla è lò e dzūŋ, ndzə̂əm lò aŋ ghùe u wə̄n, yìa lo zə̂ ù sɛ̀.

²⁷ Ghe tɔm naŋa am Mwàʼsò kə Kəzə̀ enyəa, “Wo kɛ̀ kò, e lo alo eduʼnlo, ghù wəla ghù lǒ mò ghù kaam dzə kô wɛ. Gbənso tsughu ghəa zoo gho alo eduʼnlo a, ghù wəla ghù lo mò kaam zuw kòʼ fɔnlo e wɛ zo. Tɔŋlo enyəa à dùw tsəgha wɛ a wìzən wəla num chiā naŋā, a zəŋò wɛ a wîzən wəla num fə̀ tɔ̂ʼ lô tsəghà ko am bùghu e wə̄n.”

²⁸ Ghɛ̀ êzəŋ a waazə̂ ghò, tò Aezìk, ghɛ̀ lo wɛ ghəla Zə̀ kə fə̀ to naŋā to naŋā to ko kùu ndwù ghee.

²⁹ An tì kə te ko, tǒ wɛ wəla ghe fə̀ kuūwn dzə aŋghəa ghe dzəā wɛ gho a te fə̀ ndzaŋsō kaaŋ tsə̀ghà wɛ wəla ghe fə̀ dzə an daʼa kə Zuʼ tə Kəzə̀, à lò sugho ghəa è mɔʼɔ̄ zo e səā an tì kə nɛ kən.

³⁰ Mwàʼsò kə Kəzə̀ kə kuuwn dzɛ̀ êndūghō a? Kə dzɛ̂ enyəa, “Dzǔu nùghu sə kɔ̂ kə te ko ghèe wɛ ù wə̄n; nu wɛ ù kə̀kɔ̀ lo zəa dzəəŋ yo fʉgha wo ghèe wɛ ù wìzən wəla ù ndzə̀əm mughu.”

³¹ Waazə̂ ghaŋa gho, ghəa e te e lo enyəa sɛ̀ yo dzə̂ wɛ a kəkɔ̀ ghò, sɛ̀ laam lò wɛ a wìzən wəla ù ndzə̀əm mughu.