Gàlashìan 3 - To kə Kəzə̀ kə̀ Fughu ko

À tsə̀ghà lâŋ kə̀ naaŋ ko ŋkāa fə̀ŋ è gàʼa a zəŋò Kə̀lestò è ghəŋlo enyəa ghùw zə kətuw a

¹ Huʼ, ndzə̀ŋ tə efùw tə Gàlashìa tə̀n, à ghɛ̀ yia boon naŋa ndùghò à? À fə̀ mgbaŋ yo an sə kɛʼɛ̄ ghe fə̀ teso dzaā dzì zəla Yɛso Kə̀lestò fə̀ kpuw a te, mo ghe wə̄n təghàa kɔ̀ʼ alo kədàŋlo a?

² Ghəa e lo ko e mɔ̀ʼ Ǹ so n bvʉ̀ā wô â ghɛ̀. Ghɛ̀ mò kaʼ tsughu ênzə̂n to ghe fughu â Zuʼ tə Kəzə̀ tò a? À mò lo bòʼ ghɛ̀ zuuw kə̀làŋ ŋkāa à mò lo aŋghəa ghɛ̀ mò zuw tsughu shwaʼ u Kəzə̀ wò a ghɛ̀ m boo fughu ndùw â Kə̀lestò enyəa ù kpe nû alebəghaasə ghɛ à?

³ À lǒ kwò ghɛ̀ sô boʼò laʼsò enyə a? Ghɛ̀ mò mgbaŋ kaʼ tsughu alemùghù an daʼa kə Zuʼ tə kə Kəzə̀, à lò enyəa ghɛ̀ êzəŋ so e mîasò kɔʼ aŋ ŋgəŋ zɛʼɛ̄ a?

⁴ À lǒ enyəa fala zəla ghɛ fə̀ fala mò tsəgha miāa kə̀nughùnughù a? Ɛ̂ŋgaŋ dzə̂, Ǹ tɔʼɔ mòʼn dzə̀ yò enyəa fala e te e mò lo kə̀nughùnùghù.

⁵ Ghəa Zə̀ kə fə̀ fughu tsughu ghɛ â Zuʼ tə̀ Zɔlɔ to, dè sùghò nsə̀ghàa am bvʉa zɛʼɛ̄, ghɛ̀ moʼnlò enyəa à mò lo bòʼ ghɛ̀ mò zuūw lâŋ kò ŋkāa, à lǒ bòʼ ghɛ̀ mò zuw tsughu làbəlà è dzùŋ è Yɛso, ghɛ̀ m boo fughu ndùw â wə̄n à?

⁶ Nǐi tsughu ko Abə̀làhâm, tsele ù ghê tselè sɛ̀, aŋghəa Mwàʼsò kə Kəzə̀ kə̀ dzɛ̂ enyəa, “Ù fə̀ boo fughu tsughu â Zə̀ kò, bòʼ fə̀ŋ zəla ù fə̀ gaʼ tsughu a zəŋò Zə̀ kò, Zə̀ kə̀ n nì ndùw wən enyəa ù lò tsəghatsəgha.”

⁷ Ghɛ̀ koʼ tsughu êzəŋ enyəa ghî ghəla ghe boō fughu tsughu â Zə̀ kò lò wɛ ghə Abə̀làhâm.

⁸ Ghe fə̀ tɔm naŋa am Mwàʼsò kə Kəzə̀ enyəa Zə̀ kə̀ lô Tòʼò è naaŋ tsəghatsəgha am fə̂ŋ è ghee zəla ghe gaʼ tsughu a zəŋò wə̄n, Kə̀zə̀. Zən lò e ghee Zə̀ kə fə̀ dzɛ̂ naŋā zîi wo Làbəlà è Dzùŋ â Abə̀làhâm enyəa, “Naʼà tə̀n tə̀ dzə̀m fɛ a mbī kê bughuso e kele am bàm zəghà.”

⁹ Abə̀làhâm fə̀ gaʼ tsughu fə̀ŋ a zəŋò Zə̀ kò, Zə̀ kə̀ m bughuso tsughu wə̄n, a fi lo enyəa ghî ghə̀n à dzə̀m ghe gaʼ tsughu fə̀ŋ a zəŋò Zə̀ kò, ghe lo kele sùghò bughuso tò aŋghəa Abə̀làhâm fə̀ kele.

¹⁰ Ghî ghəla ghe moʼò enyəa ghe kê lò tsəghatsəgha a vʉ̀a Zə̀ kò bòʼ ghe naāŋ dzə̂ lâŋ kò, à lo ghî ghəla Zə̀ kə lo dzûuw maʼn ghee; nu ghe tɔm naŋa am Mwàʼsò kə Kəzə̀ enyəa, “Ghùw wəla ù tɔ̀ʼɔ̀ bwîi mɛʼn yo aŋ ghəa ghən à dzə̀m ghe tɔm naŋa am Mwàʼsò kə Kəlàŋ, vʉ fi lo ghùw wəla ghe lo dzûuw maʼnlo.”

¹¹ E zɔlɔ nù êzəŋ enyəa ghùw yò dzə̂ aledòʼò tsəghatsəgha a vʉ̀a Zə̀ kò bòʼ enyəa e ŋge kwo alenaŋa kə̀làŋ. Nu ghe tɔm naŋa am mwàʼsò kə Kəzə̀ enyəa, “Ghùw wəla ù lò tsəghatsəgha lo mùghùun nù bòʼ ù bǒo fughu tsughu â Kə̀lestò.”

¹² À fɛ kuuwn lò ko enyəa lâŋ kə̀ ki yo ghəa è li zo aleghəŋlo ghèe ghəa ghəla ghùw boō fughu a te, mwàʼsò kə Kəzə̀ kə̀ laam dzɛ̀ tsùghù enyəa, “Chìa wəla ù ghəə̄ŋ ghəa ghə̀n à dzə̀m lâŋ kə̀ ləghaa, ù lo kele mùghù è səŋò zò.”

¹³ Kə̀lestò mafə tuw kə sɛ̀ kə̀ zue sə̀ wò aŋ ghùu tsù u kəlàŋ wò aŋghəa ù mò doʼò ndûw ghî fə kəlòʼ an tuw kə sɛ̀; nu ghe tɔm naŋa am mwàʼsò kə Kəzə̀ enyəa, “Ghùw wəla ghe təghàa naŋa kɔʼ alo fəkà, à lǒ ghî fə kəlòʼ.”

¹⁴ Kə̀lestò fə̀ enyə ghəəŋ tsughu enyəa, Toʼò zə è lo alekelê bughuso zəla Zə̀ kə fə̀ to naŋa â Abə̀làhâm, àsùghò enyəa sɛ̀ è lo alekelê Zuʼ tə̀ Zɔlɔ təla Zə̀ kə fə̀ to naŋā â sɛ̀ enyəa a kê kèle ko abugho sɛ̀ boō fughu tsughu â Kə̀lestò Yɛso.

Kəlâŋ àsùghò to kəla Zə̀ kə fə̀ to naŋā â Abə̀làhâm

¹⁵ Waazə̂ ghaŋa gho, alebùʼù nîi tsughuu ko an dziī zəla ghî à ghəə̄ŋ ghəa a ghee gho a te, abugho aghî à bə̀ghà à zə kɔʼ kàa mò alo eghəa, zə n tughuu â ghùw u mɔ̀ʼ alekuūwn nyəā tsughu ghəa è li zo aŋ kàa n te mò ŋkāa alebaʼso ghəa è li zo a te.

¹⁶ Zə̀ kə fə̀ to kə to â Abə̀làhâm, àsùghò â wɛ ù wə̄n. Mwàʼsò kə Kəzə̀ kə̀ kâ dzɛ̀ dzə̀ enyəa, “Àsùghò â wɛ a awɛ a wə̄n gho.” E fi moʼò dzə̀ yǒ ndə̀m è àghì; e moʼò ko ghùw u mɔ̀ʼ, “Àsùghò â wɛ wʉ̂a.” Mò à lǒ Kə̀lestò.

¹⁷ Fəgha kəla M̀ môʼnlo aledzɛ̀ fɛ̀ lo enyəa, Lâŋ kə̀ yo alendùw, ke bughò tuū maʼà tsughu kàa məla Zə̀ kə fə̀ zə naŋa ŋkâa ghèe Abə̀làhâm, boo naŋa tsughu enyəa kə lo naaŋ nù dzughu e wə̄n aŋ kàa n te mò. Lâŋ kəla ghe fə̀ fughu wô ko êzə̄ŋ mo nû tə̀ mafə tsəghà təbɔm tə chìakò à ghə̀m n tə̀nùu mò n təgha, kə yo dzə̂ alebùghò tuū maʼà tsughu kàa n te mò à, kə kuūwn kɔʼɔ sughò to kə te ko.

¹⁸ Abugho à mò lô enyəa Zə̀ kə ghùw bughuso bòʼ ghùw ù te tɔʼɔ̀ zuūw lâŋ kò, bughuso e Kəzə̀ e te e fi nyəŋ dzə yo am fùuw tə kətō kə te ko. À fə̀ lo bòʼ to kən Zə̀ kə fə̀ fughu kɔ kə kənāmsō kən ko â Abə̀làhâm.

¹⁹ Lâŋ kə̀ è kən màʼà bugho bòʼ kwò à? Ghe fə̀ lâŋ kən kə səso wo aledèe fughu ghəa à biigh ghəla ghî à ghəə̄ŋ ghè ghò; lâŋ kə te kə fə̀ lo ko alefwàʼà bughô tâa wô an zəla wɛ̀ ù Abə̀làhâm fə̀ ki alebùghò a te, tɔɔŋ ghùw wəla to kə te kə fə̀ kə̂a ghəa a wə̄n gho. Tsə̀təndə̄ghā tə Kəzə̀ tə̌ fə̀ lâŋ kə te kə fughu tsughu â Musî, wəla ù fə̀ lo ghùw ù fə̀tsə̀tèʼè ù Kə̀zə̀, ù m fùghù ndùuŋ wò â ghì ghə Ezə̀lɛ̂ ghò.

²⁰ Ghùw ù fə̀tsə̀tèʼè kǔuwn ki dzə yo fwàʼ kò abugho à lò ko ghùw u mɔ̀ʼ lò alo eghəa. Zə̀ kə̀ lo ko kə mɔ̀ʼ, kə m tò sùghò to kə te ko â Abə̀làhâm wə̄n à mughu ko.

So kə eghəa kəla ghe fə̀ fughu wô lâŋ kò a te

²¹ À lò enyəa lâŋ kə te kə boom dzəəŋ yo ghèe to u Kəzə̀ wò à? À dɔ̀m yò dzə̂ êzə̀! Abugho ghe mô fughuu wô lâŋ kə̀ li ko mo kə ghəŋlo enyəa ghùw dòʼò â tuw ko, to ghùw mò dòʼn nù tsəghatsəgha abugho ù naŋā tsughu lâŋ kò.

²² Mwàʼsò kə Kəzə̀ kə̀ fwə̂n dzɛ̀ tsùghù enyəa aghî à dzə̀m am mbī lo ukɔ̀ â bo zo. E dêe enyəa, Zə̀ kə̀ lo fughuu kô namso kə̀là kə to naŋā â ghì ghəla ghe boō fughu â Yɛso Kə̀lestò.

²³ Â fə̀ŋ è gàʼa zən a zəŋò Kə̀lestò alebùghò, à fə̀ lo mò ghe n sɛ̀ kɔ̂n nàŋa a tsəlà làŋ kò, tò Zə̀ kə̀ e telè bughò dêe səā wô ghəa a te gho.

²⁴ À fə̀ lo enyəa, lâŋ kə fə̀ kwukele sɛ̀ tò wɛ fə̀ bughu fo alebùghò tâa wô an tì kə̀là Kə̀lestò fə̀ bùghò a te, enyəa to sɛ̀ mô doʼò tsughu tsəghatsəgha a vʉ̀a Zə̀ kò bòʼ mo a gaʼ tsughu fə̀ŋ a zəŋò Kə̀lestò.

²⁵ Yia kuūwn bughò êzəŋ wəla ghəa è gaʼā a fə̂ŋ zən bugho, à kà kòom kwukele dzə̀ lâŋ kǒ sɛ̀.

²⁶ Tɔŋlo enyəa ghɛ̀ a dzə̀m lò wɛ a Kəzə̀ bòʼ ghɛ̀ gaʼ fə̀ŋ a zəŋò Kə̀lestò Yɛso.

²⁷ Ghɛ̀ ghən à dzə̀m ghe mò ni mùghù ŋ Kə̀zə̀ mò, aledèe tsughu enyəa ghɛ̀ boo fughu â Kə̀lestò, ghɛ̀ mǒ fi ni kɔʼ mwam u Kə̀lestò dzə̀là tsughu a zəŋo ughùe tò təndzʉ̄.

²⁸ Ghɛ̀ a dzə̀m èzəŋ e lò wɛ a Kəzə̀ bòʼ ghɛ̀ gaʼ fə̀ŋ a zəŋò Kə̀lestò Yɛso: nəŋò nəŋ è lì kôom yò dzə̂ a zəŋò ghùw ù Dzûu ghèe Tòʼò zò, ŋkāa, kəkɔ̂ ghèe ghùw wəla ù ndzə̀m mughu, ŋkāa a zəŋò wìnû ghèe wìzən.

²⁹ Abugho ghɛ̀ lô dzə̂ ghɛ̀ à ghêe Kə̀lestò, ghɛ̌ fi lo wɛ ghə Abə̀làhâm, ghî ghəla ghe ki to kəla Zə̀ kə fə̀ to naŋā â Abə̀làhâm.