Gàlashìan 2 - To kə Kəzə̀ kə̀ Fughu ko

Tum tə̀ li ten nî nàŋà Pôl

¹ A m bùghò nûu tə̀ tsəghà tsughu eghə̄m à ghè tò tə chìakò, mùghò ŋ kòom kɔʼ kpeʼe ndùw an Yɛ̀lusalɛ̀m ghàʼ à Bànabàs. Mùghò n nì kɔ̀ʼ Taetùs, ndùw ghàʼ à ghee.

² Mùgho fə̌ fughu kɔʼ mò à dè tsùghù Kəzə̀. Mùghò n nì kɔ̌ʼ tum təla tə kwu kele dzeŋe kə ghì a Kəzə̀ kò an Yɛ̀lusalɛ̀m, kɔ̀ʼ zə̀m dòʼò tsùghu ghàʼ à ghee, nì tèso dzɛ̀ kɔ̀ʼ ndùw làbəlà è dzùŋ zəla Ǹ naʼnlo â Tòʼò zò â ghee; enyəa e kwo zə e doʼò enyəa Ǹ tuwnlo m̀mughū alo kəsàʼnlo ŋkāa mùghò m mùghù mò alo kəsàʼnlo tuuw.

³ Taetùs wəla ù fə̀ bûʼ lô ko ghàʼ à wə̄n, aŋghəa ù bûʼ lô ko ghùw Gə̀lêk, e fə̀ telē yo dzə̂ enyəa ghe ki alesugho tigh kə wə̄n.

⁴ Ghəa à sughoo a kətigh ghən fə̀ sə kɔʼ wo bòʼ ghî ghə agha à li gho ghe fə̀ ŋgaām nyə wo am bvʉa e ghì a Kəzə̀, ghe n nɔmlo agha enyəa ghe lo ghî a Kəzə̀. Mo e ghee e fə̀ lo ko alebùghò tsêen kôʼ ndzə̀m kə emùghùu kəla a mughu aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò Yɛso. Ghî ghə agha a te ghə n ləghaa enyəa ghàʼ doʼò tsughu ukɔ̂ a bàâ bughōo kə Tə̀dzûu kò.

⁵ Ghàʼ ŋ kè kuuwn buʼù boon nəgha è li zo alezə̂ən ghəa a ghee a te ghəla ghe fə̀ dzâa wo, aleghəŋlo enyəa ghɛ̀ naam boo fughu tsughu ko êsəŋò zəla è lò an làbəlà è dzùŋ zəla ghǎʼ mò zoʼn ghɛ a te.

⁶ Ghî ghəla ghe fə̀ dzɛ enyəa ghe lo tətsoʼ a fughu an dzeŋe ke te ko — kaa ghe fə̀ lo kwò kə ghee ko, e mò moʼo yo ghə̂a è li zo â mùghò; tɔŋlo enyəa Zə̀ kə̌ ghùw lɛ̌ɛn dzə̀ yò aŋ kòʼ e wə̄n. Ghî ghən fə̀ ki dzə yo ghəa è li zo tò kəsànlo ghe lo alefughuu wô â mùghò.

⁷ Ghe ŋ kuūwn kòʼ tsùghù enyəa Zə̀ kə̀ m mùghò â daʼa kə fughu alezùghòo làbəlà è Dzùŋ â Tòʼò zò, aŋ ghəa kə mò fughu sughò Pità â daʼa ko alezùghòo làbəlà è mɔ̀ʼɔ è te â Dzûu tò.

⁸ Zə̀ kəla kə fə̀ dzə̂n Pità â sə̀ŋ zò alefwaʼa â Dzûu tò tǒ tùm è Yɛso, à lò sugho kə ghee kə mò dzə̂n mugho â zə̀ŋ zò enyəa Ǹ doʼò tsughu tum è Yɛso â Tòʼò zò.

⁹ A m bùghò Pità ghèe Dzɛ̂ms asùghò Dzɔ̌n, ghî ghəla ghiī a fə̀ kwo tǒ tsôʼ tə dzeŋe kə ghì a Kəzə̀ tə̀ səŋò tò kele tsughu enyəa à fwàʼ kən â mùghò fughu Kəzə̀, ghe n tɔɔŋ zùw wò ghàʼ à Bànabàs, fùghù ghàʼ â ghu ko aledèe tsughu enyəa ghe ŋ ghàʼ kpenì, enyəa ghaʼ à ghee êzəŋ e lo alo kəfəgha kə̀ mɔ̀ʼ. Ghàʼ à ghee n tsughu boo tsughu enyəa ghàʼ à Bànabàs è naʼn nduw tum è Kə̀zə̀ â Tòʼò zò, to ghe e kuuwn naʼn nduw â Dzûu tò.

¹⁰ Fəgha kəla ghe mò ləghaa ko aŋ ghùu ghàʼ à mò lo enyəa e kwo ko a lô so e nîizə̀a ghî à laa gho, mò à mò bɔɔm lo sugho fəgha kəla mùgho mò muʼù mbuuw aleghəŋlo.

Pôl sàʼ Pità an Antìok

¹¹ A m bùghò Pità bùghò an Antìok, mùghò n lughuun sàʼ ndùw wə̄n, bòʼ ù mò kum fwaʼ boon ghəa è li zo.

¹² Tɔŋlo enyəa Pità fə̀ zəa dzəəŋ tsəgha ghèe ghê Tòʼò zò, a m bùghò ù kòʼ kɔʼ ghî yia Dzɛ̂ms tum wo, ù ŋ kaʼ aletiī zəghàa Etòʼò; ù màʼa fə̀ tsəŋō ghî ghəla ghe fə̀ ləghaa enyəa mò ghùw ù nughùnùghù so e boo fughu â Zə̀ kò, ghe n tèlè sugho tsughu tigh kə wə̄n.

¹³ Dzûu tə̀ li tə ŋ kàʼ ndùw sùghò alefòʼn ghəa a kə̀bàŋàdzə̀m a Pità a te gho a ka dɔ̂m taŋ Bànabàs wəla ghe fə̀ sê məŋsō nduw aŋ ghəa a kə̀bàŋàdzə̀m a te gho.

¹⁴ A m bùghò mùghò Pôl kuuwn kôʼ tsùghù enyəa ghî ghən nyɔʼɔ̀ bwìi dzə̂ yò alo êsəŋò zəla e lo an làbəlà è Kə̀lestò, mùghò n dzɛ̀ ndùw â Pità an sə kə ghì yì à dzə̀m enyəa, “Abugho ghù Pità, ghùw ù Dzudà, lò alemùghùu tò Etoʼò, mùghù yo tò Dzûu, ghù lǒ êzə̂n aletsəən Toʼò zò enyəa e bughò kaʼ alemùghùu tǒ tə̀ Dzûu a?”

Dzûu tə̀ zəa kə̀tuw ghèeghêe Tòʼò am fə̂ŋ zəla ghe gaʼā tsughuu

¹⁵ Ghuūghùe zaʼā, à ghàʼ dzə Tə̀dzûu, mo à yò dzə̂ “Toʼò zəla e mughu alo ebo” aŋ ghə ghe tɔɔ̄ŋ ghee a te,

¹⁶ a kwo sugho nû enyəa ghùw dòʼn dzə̀ yǒ ghûw ù zɔ̀lɔ a vʉ̀a Zə̀ kò enyəa so ù nàŋa tsughu kəlâŋ, à lǎam lò abugho ù gaʼ tsughu fə̀ŋ e wə̄n a zəŋò Yɛso Kə̀lestò. Zən lò e ghee ghàʼ boō fughu ndûw sugho â Kə̀lestò, enyəa ghàʼ doʼò tsughu ghî à zɔlɔ gho am fə̀ŋ zəla a gaʼ tsughu a zəŋò Kə̀lestò Yɛso, à yò dzə̂ làŋ kə̀ naaŋ ko; tɔŋlo enyəa abugho à lò ko an làŋ kə̀ naaŋ ko, ghùw yò aledòʼò ghùw ù zɔ̀lɔ.

¹⁷ Abugho sɛ̀ dəmà enyəa a doʼò ghì à tsəghatsəgha gho a vʉ̀a Zə̀ kò aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò, zə e kôom sə wô enyəa sɛ̀ lo ghî à biigh gho — à so yia lo enyəa à lǒ Kə̀lestò ù kòom ghəŋlo enyəa sɛ̀ e ghəəŋ bo zo ŋkāa? Ɛ̂ŋgaŋ dzə̂, à dɔ̀m yò dzə̂ èzə̀!

¹⁸ Abugho Ŋ̀ kôom bəgha tiso kɔʼ lâŋ kəla Ǹ lo mò M̀ maā sâʼ màʼà, M̀ fi ghə̂əŋ ghue waŋa tǒ ghùw wəla ù zaʼā lâŋ kò.

¹⁹ Abugho à lò ko â làŋ kò, Ǹ lo ko tǒ ghùw ù kpǔuw, à fi lo enyəa lâŋ kə̀ kôom ki yo daʼa ko a zəŋò mùghò, enyəa to M̀ mô mùghu aŋghəa Zə̀ kə̀ ləghaa.

²⁰ E fi lo ko to ghe mǒ ghàʼ à ghê Kə̀lestò təghāa dzəəŋ kɔʼ a dzə̀m alo kədàŋlo; à kòom yò dzə̂ mugho M̀ mughu, à lǒ Kə̀lestò ù mùghù a zəŋò mùghò. Mughùu zəla M̀ mughu êzə̄ŋ aŋ gwə̀n e ughùe, M̀ mughu ghè zò am fə̂ŋ zəla Ŋ̀ gaʼ tsughu a zəŋò Wɛ̀ ù Kə̀zə̀, wəla ù mò ləgha tsughu mugho, ù m fùghù ndùw tuw kə wə̄n aŋ ghəa zaŋā.

²¹ Ǹ yo dzə̂ aletuū maʼà ghəa zən enyəa Zə̀ kə̀ maā sɛ̀ bəghasə am fə̀ŋ è wən è dzùŋ zəla kə ki a zəŋò sɛ̀. Abugho ghùw mò doʼn ghûw tsəghatsəgha an sə kə Kəzə̀ bòʼ enyəa ù naāŋ kò, to e mò fi lo enyəa Kə̀lestò mò kpuw maʼa kə̀nughùnùghù.