Fèlepìan 4 - To kə Kəzə̀ kə̀ Fughu ko

Etsʉ̂

¹ E fi lo enyəa waazə̂ ghaŋa à dzûŋ ghəla Ŋ̀ ki am fə̂ŋ è dzùŋ, ndòʼò mbùuŋ kèe sùghò alekòʼ ghɛ, ghɛ̀ lo duʼn kaŋā, lò sugho namso kaŋa am M̀ mbûŋ nù alekòʼ ghɛ̀. Ka tsughu ko nlò zə̀ zo aŋ ghəa e Mughu ù te a fən ghaŋa à dzûŋ ghò.

² Ŋ̀ ŋgee buʼu kə̀ghu â ghɛ̀ a yùdìa à Sìndikì, tee tsughu ko nlò ghuw ko kəmòg aŋ ghəa e Mughùbè.

³ Yia a bughò ghû fən waŋa wəla ghàʼ à ghù zumso fwâ kɔʼ wo, yoso yîzən ghən tɔŋlo enyəa ghe maā ŋge fwàʼ ghàʼ à ghee alezùghò làbəlà è Kə̀zə̀, ghèe ghê Kə̀lɛmɛ̀n àsùghò ghî à li ghəla ghàʼ à ghee mò dzeŋe fwaʼā a dzə̀m. Ghəla zŋ a ghee alo am mwàʼsò kə Kəzə̀.

⁴ E duʼnlo nlò an ghəa e Mughùte nəgha tən tə̀ dzə̀m. Ǹ so naam dzàa kueen wô ko â ghɛ̀ enyəa elo alo eduʼnlo.

⁵ Děe ndùw â ghì ghò a dzə̀m enyəa ghù ki zʉ̀ kə mwâm; tɔŋlo enyəa nəgha e mughùte è kwəla nyəa zə m kpe.

⁶ Kà è ŋgee sə̂a â sə gho alo ufʉgha, e kuuwn bvʉa nduw ko fəgha kə̀là ghù ləghaa an ghua Zə̀kò alo egɔ̀ŋlò fughuu ndùw sùghò kəzɔ̀ŋlò.

⁷ Abugho ghɛ̀ ghəəŋ dzə̂ èzə̀, bughuso e Kəzə̀ zəla e tsə̀ghàtàʼà tɔ u ghûw wə̀ nsɔ̌ɔŋnchùw wò, lo ghəŋlo fə̂ŋ tɛʼɛ à moʼn zɛʼɛ zə e lo alo kəfəgha kə mɔ̀ʼ a zəŋò Kə̀lestò Yɛso.

⁸ Alemìasò tsughu shwaʼ waŋā waazə̂ ghaŋa gho, naŋa tsughu nlò moʼn zɛʼɛ zo an ghəa dzuŋ ghò àsùghò aŋ ghəa ghəla a ki kɔʼso mò, àsùghò ghəla alo tsəghatsəgha àsùghò ghəla alo èsəŋò, ghəa a zɔlɔ à sùghò ghəla ghî ləghaa alezuw àsùghò alekòʼ

⁹ Ebɔɔm fwaʼa nduw ko nlò fəgha kə̀là ghɛ̀ mò zoʼn ni an dzughu zaŋā, kòʼ sùghò an fwàʼ kaŋa tò zə̀ kəla kə fughuu bughuso zo le lo ghɛ̀ à ghee.

Pôl fughuu kə̀zɔ̀ŋlò an fugha wəla ghe fə̀ tum wô â wə̄n

¹⁰ Ŋ̀ ŋgee duʼn nù, yìa M̀ fughuu zɔ̀ɔŋ kò â Zə̀kò enyəa ghɛ̀ n dè kpèʼe wô moʼn zɛʼɛ zo azəŋò mùghò. Ŋ̀ kwo nû enyəa ghɛ̀ mò ki ki nû moʼn zò azəŋò mughò, ghɛ̀ yia mò kuuwn ki yo dzə̀ aledè mòʼnlo e tezo.

¹¹ Ŋ̀ ghəa ghən kə̂a dzə̀ yǒ tǒ ghùw lǎa èvʉ̀, tɔŋlo enyəa mùghò n zoʼnlo aletso lo, ka ŋ ki ŋkāa ŋ ki yo.

¹² Ŋ̀ kwo nû fəgha kəla e môʼnlô abugho ghùw də̀mà alekele kə̀fəgha, yìa Ŋ̀ kwo sugho bughu ghùw ŋge ki, Mùghò n zoʼn tɔ wo aletsô lo ko nû, tò Ǹ zə ŋkāa Ǹ tâʼkè zə. Tò Ŋ̀ ki nyàaŋ fò ŋkāa Ŋ̀ ki ndə̀m.

¹³ Ŋ̀ ki nû sə̂ŋ e te zo alefwàʼ aghəa a dzə̀m an daʼa kəla Kə̀lestò fughu â mùghò.

¹⁴ E mò naam ŋge dzɔ̂ɔ sugho nû â ghɛ̀ aleyòsò mùghò an tsù waŋa.

¹⁵ Alekòom buʼù nîi tsughu, ghuūghùe zɛʼɛ̄, ghɛ̀ ghî a Fèlepìan a kwo nû enyəa nəgha zəla a mò ziī tsughu shwaʼ u Kəzə̀ wə̄n, mò Ǹ nughù wò an Masìdonìa, ghàʼ à ndùghù è Kə̀zə̀ è lìī fə̀ zə̂a faa dzə yo, tsə̀ghàsə̌a ko yo ghɛ a fɛ am Felèpîi.

¹⁶ Tɔŋlo enyəa ghəa mugho fə̀ bûʼ lô ko an Tɛ̀sàlonikà ghɛ̀ n tum mugho â yòsò zò, kòom tum à kpeʼe.

¹⁷ Ŋ̀ kəŋo dzə̀ yò fəgha kə̀là ghɛ̀ fughu wo ghè kò. Fəgha kə̀là ŋ kəŋo àlò namso kəla ghɛ̀ lo kele an dzɔ̀ɔ dzɔ̀ kə mwam kɛʼɛ̄.

¹⁸ Mugho n namso kaŋa kə kele kpenlo, bùʼ tsə̀ghà èsə. Mùghò n zə kuw ko, am fʉgha wəla ghɛ mò tum wo â Èpàfə̀loditùs enyəa ù bùgho fughu à mùghò, ufʉgha mo ù lə̂əm dzɔ̀ɔ nù, mò Zə̀ kə̀ boom nù, ghue u wə̄n vʉa u ghɛ̂ɛn sugho alekòʼ.

¹⁹ À lǒ Zə̀ kaŋa kə te ko kə lo fughu fʉgha wən ù dzə̀m ghɛ̀ ləghaa an kum zəla e lo an zən e Kə̀lestò Yɛso

²⁰ Kɔʼso n lo tən à Tsele ù te tɔɔŋ Zə̀ kə̀ sɛ̀, to mbī kê bughò mîaa. Zə e lo ko êzə̀.

Pôl fùghù gùŋsò tsughu etɔŋlo

²¹ Tɔɔŋ zuw kaaŋ ndùw ghî a Kəzə̀ yìa ghɛ̀a ghee lo fi a dzə̀m an zən e Kə̀lestò Yɛso. Waazə̂ a sɛ̀ ghə̀la ghàʼ à ghee lô fɛ a dzə̀m tɔɔŋ zùw wò ghɛ̀.

²² Ghî a Kəzə̀ a dzə̀m tɔ̌ɔŋ zùw wò ghɛ̀; a ka dɔ̂m taŋ a ghî ghò an ndughu alô Kaesà.

²³ Ŋ̀ gɔ̂ŋlò enyəa to Mughu ù te Yɛso Kə̀lestò mò dê ghɛ̀ â dzɔ̀ e wə̄n zo.