Fèlepìan 3 - To kə Kəzə̀ kə̀ Fughu ko

Ghəa a Kəzə̀ à səŋò ghò

¹ Aŋ ghəa à li ghən a waazə̂ ghaŋa gho, duʼn kɛʼɛ̄ kə e lo nduw ko nû, tɔŋlo enyəa ghɛ̀ lo ghî a Mughu ù te. À yò dzə̂ tsû ù li wo â mùghò aletɔɔ̄ kûeen kpeʼē wô ko ghɛ̀ â ghəa è mɔʼɔ̄ zo.

² Nì nlò ghôm zò ghɛ̀ à ghê ghì ghəla ghe ghəəŋ bo zo, ghî ghəla ghe ŋaŋè ghue zo tò tə bvʉ, ghe dzɛ̂ enyəa ghe ki aletèlè sugho tigh kə ghûw sěe ghùw ù te sô telè ki alezə kətuw.

³ Tɔŋlo enyəa sɛ̀ fɛ lǒ tò ghî ghəla ghe lo mo ghe n twii u ghee wo u dzə̂əm sugho, ghî ghəla ghe kɔʼso Zə̀ kò mò à ghe â daʼa kə fughuu wò Zuʼ tə̀ Zɔlɔ to am bàm e Kə̀lestò Yɛso,

⁴ Tò M̀ mô naām buʼù naŋā ko mòʼn zaŋa am fʉgha u mbī wo. Abugho ghùw ù lì mô so gaʼā ko fə̀ŋ am fʉgha u mbī ù è vʉ̀, M̀ mô so e gaʼā fə̀ŋ a te, Ǹ tsəghàa sə wə̄n.

⁵ Ghe fə̀ tiigh kaŋā kə sugho mò Ǹ naam lǒ wɛ̂ɛtùghu aŋghəa ghe dzə tsughu mugho. Ǹ lo wɛ ù kə̀tsə an naʼ e Bɛndzàmɛ̂n, ghùw ù Hibùlù dzə. Tò aŋghəa lâŋ kə Tə̀dzûu kə̀ deē, Ǹ lo Falàsîi.

⁶ Mùgho fə̀ lo tsəgha ghùw wəla ù fə̀ ki zǐi alezoʼn ghì ghò an làŋ kə enaʼ ko, aŋghəa mùgho fə̀ fughuu tsəgha ghî ghəla ghe boō fughu an zən e Kə̀lestò â tsù wò bòʼ mùgho fə̀ moʼn tsəgha enyəa ghe dəmà alesàʼà maʼà làŋ kə enaʼ ko. Mùgho ŋ ghəəŋ dzɔ̀ɔ, tò aŋghəa lâŋ kə̀ deē.

⁷ Ghəa a te a fə̀ lo tsəgha kɔ tə aghəa â mùghò. Êzə̄ŋ, yìa Ŋ̀ kôʼ tsughu enyəa ghəa a te a lo kə̀nughùnùghù, bòʼ Ǹ ləghaa alekele Kə̀lestò.

⁸ Ǹ nî àghəa a dzə̀m tò ghəa kə̀nughùnùghù ghò, yìa M̀ maʼà ndùw ghəa a te gho a dzə̀m enyəa mùghò e lo alekele Mughu ù te, Yɛso Kə̀lestò Yɛso, bòʼ à lǒ ghəa zəla e tsəghàsə ghəa gho a dzə̀m. Tɔŋlo enyəa mùghò ŋ ŋge fala, yìa Ŋ̀ gùŋù ghəa gho a dzə̀m. Yìa Ŋ̀ kôʼ tsughu enyəa, ghəa a te gho a dzə̀m lò udzʉ an sə kaŋā; enyəa e Kə̀lestò è lo namso kaŋa ko,

⁹ mùghò è kuūm lo fəgha ko kə mɔ̀ʼ ghàʼ à wə̄n, də̀mà yò alelo tsəghatsəgha aŋ ŋgəŋ zaŋā, à yò dzə̂ alelo tsəghatsəgha enyəa Ǹ zûuw làŋ kə enaʼ ko. Mùghò êzə̄ŋ e lo tsəghatsəgha bòʼ boo zaŋā àsùghò fə̀ŋ zaŋa zəla Ŋ̀ gaʼ a zəŋò Kə̀lestò,

¹⁰ enyəa aŋ ghəa ghən à dzə̀m, Ǹ dəmà alekele wə̄n, mùghò è ki sughò daʼa kə wə̄n kəla ù fə̀ kpuw kɔʼ sə alo evʉ̄ a te, àsùghò enyəa to M̀ mô fǎan sùghò tǒ aŋghəa ù fə̀ fala am fala e wə̄n, M̀ bughò doʼò sughò tǒ wə̄n aŋghəa ù fə̀ kpuw a te.

¹¹ Tò enyəa mùghò e ki sugho moʼn zò enyəa Ǹ lo kpuuw kɔʼɔ səa sùghò nù alo evʉ.

E dəma nduw ko alekele fəgha kəla ghù kəŋo ghè kò

¹² Ǹ dzâa dzə̀ yò enyəa, mùghò m bəla e te e kele, ŋkāa mùghò n daŋso dòʼò tsəghatsəgha, Ŋ̀ kuuwn naām də̀mà nù aleghəŋlo enyəa bəla e te e doʼò è zaŋa zo, tɔŋlo enyəa Kə̀lestò Yɛso maā ghəŋlo enyəa Ǹ doʼò fəgha kə wə̄n.

¹³ Waazə̂ ghaŋa gho, Ǹ nîi dzə̀ yò enyəa mùghò mô èzəŋ kɔʼ tè am bəla e te zo. Ghəa e lo ko e mɔ̀ʼ Ǹ dəma a te, mo e lo enyəa Ǹ nîi zə̀a ndùw ghəa ghəla a lo mo ghə tsə̀ghà nùghù ndùw e bàm, naam də̀mà ndùw ko am fəgha kəla kə lô â sə ko.

¹⁴ Yìa Ǹ naām dəmà ndûw ko â sə ko am fəgha kəla Ŋ̀ kəŋo ghè kò, enyəa to M̀ mô kele namso kəla Zə̀ kə fughu sə tsughu wo alo kəwālā am bàm e Kə̀lestò Yɛso.

¹⁵ Sɛ̀ ghəla sɛ̀ lo mo sɛ̀ n noo kpe aŋ ghəa a Kəzə̀, sɛ̀ ki alelɛɛn ghəa gho an dzì è mɔ̀ʼɔ è te. À m bùghò ghəa zəla tuw kə kpuūw ghɛ a te, Zə̀ kə ŋ ghəəŋ ghɛ̀, ghɛ̀ mò è kele.

¹⁶ Sɛ̀ ki alekuuwn bwiī nduw ko an sə̀ŋò zəla sɛ̀ kwo zîi dzə.

¹⁷ Waazə̂ ghaŋa gho, e mughu nlò aŋghəa mùgho mò mughu a te, ghɛ̀ è koʼo niī wo sugho mwam e ghì ghəla ghe mughu an tə̀ŋ kəla a mò zoʼ ghɛ a te.

¹⁸ Tɔŋlo enyəa ndə̀m lò nû aŋghəa mùgho mò dzâa tsəgha â ghɛ̀, tò aŋghəa Ǹ naām dzâa kpeʼē wo êzə̄ŋ à sə̀ mò alo kətuw, mughù e ghee e boom dzəəŋ yo ghèe sə̀ŋò zəla e lo am vʉ zəla Kə̀lestò fə̀ kpuw ghè zò alo kədàŋlo.

¹⁹ Mbī è ghee kê mìanlò an tsù, tɔŋlo enyəa Zə̀ kə ghee kə lo nə̀ghà ŋ ghee, ghe sô nî kɔʼ moʼnlò e ghee zo e dzə̀m a, naŋa tsughu am fʉgha u mbī wo a, kɔʼso tə̀mbòʼ aŋ ghəa ghəla ghe mô ki aledənso tuw wo a te a.

²⁰ Yia a bughò sɛ̀, naʼ e sɛ̀ e lo alo kəwāla, à lǒ fughu Bəghambī wəla sɛ̀ ləmlo, tɔɔŋ Mughùbè Yɛso Kə̀lestò, lo nughùun wo a te.

²¹ Ù lo bùghò kǔuwn nùghùun kɔ̀ʼɔ̂ gwən e ghùe zəla sɛ̀ ki êzə̄ŋ, ù kê fughu tsughu sɛ̀ â gwən e ughùe zəla e zɔn buʼ, tò e wə̄n zo. Tɔŋlo enyəa ù ki kədaʼa aledzɛ̀ enyəa, ufʉgha u dzə̀m u doʼò wô a tsəlà wə̄n.