Fèlepìan 2 - To kə Kəzə̀ kə̀ Fughu ko

Zumso kə ughùe kə Kə̀lestò àsùghò kɔ tə aghəa to

¹ Aŋghəa e lò dzə enyəa, Kə̀lestò dzə̀là nù fə̂ŋ tɛʼɛ to, Zuʼ tə̀ Zɔlɔ tia tə naāŋ ghɛ̀ alo kəfəgha kə mɔ̀ʼ, ləgha zəla Kə̀lestò ki a zəŋò ghɛ̀ zəa e tsəmso sughò ghɛ, ghɛ̀ yia ki ləgha zo àsùghò se è kwuso zo aŋ ghùe zɛʼɛ̄.

² Ŋ̀ gɔŋlò enyəa ghɛ̀ è lo alo kəfəgha kə mɔ̀ʼ, lò sugho alo edzughu e mɔ̀, àsùghò am fə̂ŋ è mɔ̀ʼ, ləghaa sùghò ghue zɛʼɛ, to duʼn kaŋā kə kpeēn mɛʼɛ̀ tsughu.

³ Kà nlò è ghəəŋ dzə ghəa gho mò ghɛ̀ moʼn tə̀la kô ghue zɛʼɛ, ŋkāa aŋ ghùe è deē zo. E koʼō nduw nlò ghî à li gho tò ghî ghəla ghe tsəghà sə ghɛ.

⁴ Kà nlò e kaa lɛɛn tsughuu ko ghəa ghɛʼɛ gho, e lɛɛn tsughuu sugho nlò ghəa ghəla a dzɔ̂ɔ â ghì à li gho.

⁵ Kele tsughu nlò mwam u Kə̀lestò Yɛso wò am mùghù zɛʼɛ.

⁶ Ghəa ù fə̀ bûʼ lô ko tò Kəzə̀; ki dwaʼa wən ù dzə̀m Zə̀ kə̀ ki, ù ka fə nî dzə̀ ghue u wə̄n wo enyəa e lo Kəzə̀.

⁷ Ù ŋ kuuwn tsughuso tsughu ghue u wə̄n, ghe n dzə̀ wə̄n tǒ ghùw nsɔ̌ɔŋnchùw, ù m bùghò dòʼò tsùghu fəkɔ̂ɔ.

⁸ A m bùghò ù lǒ ghùw nsɔ̌ɔŋnchùw êzə̀, ù n nì tsughu ghue u wə̄n enyəa e yo dzə̂ fəgha ko, ù m màʼà tsughu ghue u wə̄n, tsəŋo Kə̀zə̀, boo tsùghù sùghò alekpuw vʉ e tuw kə̀ dəla ko alo kədàŋlo.

⁹ Bòʼ ghəa zə̀ è zə̀, Zə̀ kə̀ n tsuʼ naŋa kɔʼ wə̄n tsuʼ naŋa kɔʼ wə̄n am bəla kə̀ ne kəla kə tsəghàsə bəla zo e dzə̀m fughu tsughu wə̄n â zən zo, zən zəla e tsəghàsə zən gho a dzə̀m,

¹⁰ Zə enyə lò enyəa abugho ghe tɔŋɔ tsughu zən e Yɛso zò, a ghî à dzə̀m alo kəwālā, aŋ ghueekətsə̄ àsùghò naʼ e ghueetsə̄ zo n təm təŋguʼ a vʉ̀a wə̄n.

¹¹ Àsùghò enyəa, aghî a dzə̀m e ke dzâa səa wo an dzughu e tughō zo enyəa, Yɛso Kə̀lestò lǒ Mughu ù te. Ghe kê èzə ghəŋlo, ghe sô fughuu kɔʼso mò â Zə̀ kò, Tsele ù te.

E tughuu tǒ tsə̀ am mbī

¹² À fi lo enyəa fən ghaŋa à dzûŋ ghò, tò aŋghəa ghɛ̀ mò bwîi tsəgha an làŋ kə Zə̀ kəla mùgho mò zoʼn ghɛ a te aŋghəa sɛ̀ mò lò tsəgha a dzə̀m. À lǎam lo dzɔ̀ êzəŋ wəla M̀ buw sɛ̀, â ghɛ̀ alebwìi an làŋ kə te ko. E fwaʼā nduw ko nlò alo etsəŋ â ghɛ̀ alemìasò kɔʼ fwàʼ kɛʼɛ aŋghəa ghɛ̀ ki alezə kətuw a te.

¹³ Nu Zə̀ kə̀ fwaʼà a zəŋò ghɛ̀ aleghəŋlo enyəa ghɛ̀ è ki zǐi alefwaʼā fwàʼ kə Wə̄n ko, bwìi sùghò an làŋ kə Wə̄n

¹⁴ E fwaʼā nduw nlò ghəa gho a dzə̀m mò ghɛ̀ twəən yo, pfʉa sùghò yò dzughu gho a te,

¹⁵ tò ghɛ̀ lo e zɔlɔ, ki sugho yo dzʉ wo, lò wɛ a Kəzə̀ ghəla ghe nɔʼɔ̄ yo aŋ ghəa è li zo mo ghe mughu dzəŋlo am mbī ghèe ghê ghì a biigh gho àsùghò ghì a kəfwə̀s ghò. Ghɛ̀ è tughu tǒ tsə̀ â ghì ghò am mbī.

¹⁶ Shwaʼ wəla u fughuu mughù zò lò fəgha kəla ghɛ̀ ki aleteē tsughu a te, to a kê bughoo an tsuʼ fəla Kə̀lestò kè bugho a te, Ŋ̀ ke e tsɔ̂ɔ fə̀ŋ enyəa Ŋ̀ ka mo fwâʼ màʼà dzə̌ kə̀nughùnùghù.

¹⁷ Abugho ghe bûʼ nî kwə̂ən tsughu ko kâŋ taŋa to enyəa à lǒ ŋgoʼ zəla ghɛ̀ zuūw bòʼ boo zəla ghɛ̀ ki â Zə̀ kò, Ǹ tsoʼn nù a te, yìa Ŋ̀ ŋgeē duʼn sugho sɛ̀.

¹⁸ À lò sugho eghəla êzə̀ ghɛ̀ ki aletsoʼnlo, duʼn dzəəŋ sùghò sɛ̀.

Timotì ghèe Èpàfə̀lòditòs

¹⁹ À lò an daʼ kə Kəzə̀ M̀ moʼnlò enyəa e mô dzɔ̀ɔ nù â mùghò alekùʼn tuū wô Timotì a vʉ̀a ghɛ̀ enyəa ù bùghò tsəmso ghɛ̀ abugho ù nàʼà wo tum zaŋā â ghɛ̀, Ǹ lo e duʼn sugho abugho Ǹ zuūw wô zɔʼn wɛʼɛ wo.

²⁰ Ghùw ù lì kôom yò dzə̂ fɛ ù ki moʼnlò è dzùŋ zò a zəŋò ghɛ̀ tò Timotì, à mìaa ko wə̄n ù zuūwkɛlɛ fəgha kə tsəghàa fɛ a zəŋò mùghò.

²¹ Ghî a li ghən moʼn tə̀la kô ghue e ghee. Ghe dɔ̂ɔ mòʼn dzə̀ yò ghəa e Yɛso Kə̀lestò è li zo.

²² Ghɛ̀ kwo nû enyəa Timotì n dě fwàʼ kə wə̄n ko tǒ wɛ ù tsəlà tsele wəla ù lò alefwaʼā ghàʼ à wə̄n alenàʼà làbəlà è dzùŋ zən.

²³ Zə lo e ghee Ǹ lô daŋso nîi ndzə̂əm tuū wo wə̄n abugho Ŋ̀ lo kəŋ kele sə kɔʼ ghəa zəla e sò e sə a zəŋò mùghò.

²⁴ Yìa Ǹ ndzə̂əm kwo enyəa aletsùuŋ tsughu, Mughu ù te lo ghəəŋ nù M̀ bughò koʼò sughò ghɛ̀.

²⁵ Mùghò ŋ kòʼ enyəa e dzɔ̂ɔ nù â mùghò alenìi tuū wô wàazə̀ ù sɛ̀ wən Èpàfə̀loditùs ebàm a vʉ̀a ghɛ̀. Ù lǒ fən waŋā, lò sugho ghùw wəla fwàʼ dzənlō ghàʼ à wə̄n tǒ sùghugòʼ, ghùw wəla ghɛ̀ mò tum wo enyəa ù bùghò fughu mugho â yòsò zò.

²⁶ Mùghò n tsughu tsən enyəa Ŋ̀ ki alenìi tuū wô wə̄n ebàm a vʉ̀a ghɛ̀, nu ù dìi kèe alebùghò kôʼ ghɛ̀.

²⁷ Alekùu nîi tsughu, ù mò dzaŋā nû; ù m bən lǒ tò ù è dâŋ â wɛ a bvʉ gho an lʉ̀ghà. Zə̀ kə̀ n naam kwuso ko èse a zəŋo wə̄n àsùghò a zəŋò mùghò, aleghəŋlo enyəa Ǹ lô ŋgeē doʼnlo alo ese tò aŋghəa mùgho mò bûʼ lò dzə.

²⁸ M̀ fɛ ŋgee ləghaa alenìi tuū wô Èpàfə̀loditùs ebàm aŋ ghulô ghɛ̀ enyəa ghɛ̀ è lo alo eduʼnlo abugho ghɛ̀ kôom kôʼ tsughu wə̄n, tò Ŋ̀ ka kôom ŋgè bàŋsò sùgho fə̀ŋ a zəŋò ghɛ̀.

²⁹ Kpenǐ nlò wə̄n a m fə̀ŋ è dzùŋ è Mughu ù te, àsùghò alo eduʼnlo; ghɛ̀ è fughuu kɔʼso mò â ŋgòʼ è àghì tò ghən

³⁰ Tɔŋlo enyəa, ù fə̀ shʉan ke tsughu ko evʉ enyə am fwàʼ kə Kə̀lestò, aŋghəa ù fə̀ fughuu mugho â yòsò zəla ghɛ̀ fə̀ yo alefughu.