Efɛsùs 6 - To kə Kəzə̀ kə̀ Fughu ko

Dzì zəla tsele ki alemùghù a te ghèe ghê wɛ gho

¹ Wɛghêtùghù gho, e zuuw nduw nlò â ghê tsùghò bòʼ enyəa ghɛ̀ à ghê Mughu ù te lo kəfəgha kə mɔ̀ʼ, nu e lo tsəghatsəgha aleghəŋlo êzə̀.

² “E fughuu nduw nlo kɔʼso mò â ghê tsùghò ghèe ghê zùghù.” Kən lò lâŋ kə sʉesʉ kəla kə ki to ko ebàm:

³ enyəa, “Sə̀ghà è kə̀tuw zɛʼɛ e zɔlɔ, ghɛ̀ lo ŋge mughuu sugho am mbī.”

⁴ Yia a bughò ghɛ a ghê tselè wɛ̀, ka nlò è ghəəŋ ghəa a nʉ̀ghà ù pfʉa gho â wɛ ghɛʼɛ̀ gho. Ghɛ̀ kuuwn ki aleghəŋlo enyəa ghe noō sə kɔʼɔ̄ wò an tsəŋ e Mughu ù te, ghɛ̀ è fughuu sugho ghee â tsʉ̀ zəla Zə̀ kə̀ ləghaa.

Dzì zəla ghê mughu a ukɔ̀ ki alemùghù a te ghèe ghê kɔ̀ u ghee wo

⁵ Â ghɛ a kɔ̂ wò, e zuuw nduw nlo â ghê mughùbè ghɛʼɛ ghəla ghɛ̀ ki fɛ aŋ ghueekətsə̄, ghɛ̀ e tsəŋo ghee, fughuu sughò ghee â kɔʼso mò, fwàʼà nduw â ghee am fə̂ŋ è zɔ̀lɔ̀ tò ghɛ̀ fwaʼa â Kə̀lestò.

⁶ Ka nlò è ka fwaʼa ko an nə̀ghà zəla ghùw u lì ti lɛɛn wò ghɛ̀, enyəa to ù mò tɔ̀ʼɔ̀ kɛ̌ɛ wò ghɛ̀ enyəa ghɛ̀ nyɔ̂ʼɔ̀ fwàʼà nù. E kuuwn fwaʼa nduw nlo fəgha kəla Zə̀ kə̀ ləghaa â ghɛ̀ am fə̀ŋ tɛʼɛ tə dzə̀m, tǒ kɔ̀ɔ ŋ Kə̀lestò.

⁷ E deē nduw nlò ghɛ̂ zò an fwàʼ kɛʼɛ, ka nlò e fwàʼa enyəa ghɛ̀ fwaʼa â ghuw, e fwaʼa nduw nlò enyəa ghɛ̀ fwaʼa â Mughu ù te.

⁸ Nu ghɛ̀ kwo nù enyəa Mughu ù te lo namso nù ghî ghəla ghe fwaʼa fwaʼ kə̀ dzûŋ kò, ka ghe lô kɔ̂ wò ŋkāa ghe ndzə̂m mughu.

⁹ Â ghɛ̀ a ghê mughu a ukɔ̀ wò, e ghəəŋ nduw sugho nlò ghəa è mɔʼɔ zo a zəŋò kɔ̀ wɛʼɛ wo, ka nlǒ ghee e tsəŋso sugho, ghɛ̀ è kwo sugho enyəa ghɛ̀ à ghê kɔ̀ wɛʼɛ u dzeŋe ki ko Mughùbè u mɔ̀ʼ alo kə̀walā, mò ù bàa yò kpìī wo.

Fʉgha u tsam u Kəzə̀

¹⁰ Gùŋsò kə eghəa kaŋā â ghɛ̀ lo enyəa, ghɛ̀ è tughuu an daʼa kə̀ ghaʼa kə̀ Mughu ù te ko, aŋghəa ghɛ̀ lô fəgha ko kə mɔ̀ʼ ghɛ̀ à ghee.

¹¹ Nǐi kɔʼ nlò fʉgha u tsam wɛʼɛ wəla Zə̀kə̀ fughu ghɛ, ghɛ̀ kwu kele kɔʼ tò ghɛ̀ è lo aletughuū tsə̀ghà tsè n utɔ mə̀ avʉatsə̄a.

¹² Tɔŋlo enyəa sɛ̀ təma dzə̀ yǒ tsàm sɛ̀ à ghê ghì ghò, a tsàm kuuwn təma sɛ̀ à ghê zʉ̀ ù biigh wo, təma sùgho sɛ̀ à ghê zə̀a m biigh məla à tuu sə̀a wo dwə̀ŋ u te wo, təma sùghò sɛ̀ à ghê zʉ̀ wəla u ki dwaʼa wo aŋghəa a kələm ghəla a nîi bəla ke êzə̄ŋ, àsùghò zʉ̀ ù biigh ù li wəla u boōn kaāŋ ghəa gho an luʼu tə kəwalā

¹³ Ghɛ fi ki alenìi kele təla kɔʼ fʉgha u tsam wɛʼɛ wəla Zə̀ kə fughu â ghɛ̀ aleghəŋlo enyəa mo tsuʼu zʉ boon ko nù, vʉ u tsəgha mîaa nduw, ghɛ̀ n naam ti ko alo tətsə̂n.

¹⁴ Zən lo dzì zəla ghɛ̀ ki aletee a te, ghɛ̀ kì alenìi kɔʼ esəŋò tò fəkwûu alekɔlɔ̄ tughuso nyəaā ndûw ndzʉ tɛʼɛ a te alo esā, ghɛ̀ è lo sugho tsəghatsəgha aŋghəa ghɛʼɛ à ghəəŋ gho tò kəkə̀ŋ aŋ chichi kɛʼɛ.

¹⁵ Ghəa ghɛ ki zîi e te alezùghò làbəlà e dzùŋ zəla è bùghò â bughun zo, à lo sugho eghəla tò sughugòʼ lò dzə̂n kɔʼɔ guw to alendùw an tsam.

¹⁶ Alebaʼso tsughu aŋ ghəa ghən a dzə̀m, è li e lo enyəa ghɛ̀ naŋa tsughu boo e Kəzə̀ zɛʼɛ̄ zo tò kəkə̂ŋ alebuu baʼa kàʼtəmwɛ̀ təla vʉatsə̄a a tuu səā wo.

¹⁷ Ghɛ̀ ni kɔʼ zə e kətuw zə̀lā Zə̀ kə̀ lo mo kə̀ m fughu â ghɛ̀ tǒ taaŋ kə tsam. Nii kɔʼ nlò shwaʼ u Kəzə̀ wò tǒ kɔ zəla Zuʼ tə zɔlɔ tə fughuu â ghɛ̀.

¹⁸ Ghɛ̀ è gɔŋlo an nəgha tən tə̀ dzə̀m aŋghəa Zuʼ tə Kəzə̀ tə̀ fughuu ghɛ â daʼa ko a te, bvʉa ndùw fəgha kəla ghɛ̀ ləgha a wə̄n. Aŋghəa yì ezə̀, tiso kɔʼ nlò tuw ko alo egɔ̀ŋlò, ghɛ̀ è tɔʼɔ tuw u ghî a Kəzə̀ a zɔlɔ gho a dzə̀m aŋ gɔ̀ɔŋ zɛʼɛ,

¹⁹ Ghɛ̀ e gɔɔŋ tsughu sugho an tuw kaŋa enyəa to Zə̀ kə̀ mô fughu mugho â daʼa ko to mùghò è ki fə̀ŋ alenàʼà nàn kə eghəa kəla kə lo aŋ làbəlà è Kəzə̀.

²⁰ Ghe mò mùgho tum wo â alebùghò naʼà làbəlà èdzùŋ zə̄n, zən lò e ghee Ǹ lô fɛ an ndùghùtsā. E gɔŋlo nlò an tuw kaŋā enyəa to M̀ mò lò aledoō naʼn làbəlà zən an ghəa ghəla ŋ ki alenàʼà a te.

Tɔɔŋ zəla e gûŋso tsughu

²¹ Taekikùs, wàazə̀ ù sɛ̀ wəla u ghàʼ ŋgeē ləghaa, vʉ̀a ù lò sughò kɔɔ fəla fə zumso fwaʼa â Mughu ù te bughò nǔ fì a vʉ̀a ghɛ̀, ù lo bùghò tɔʼɔ̀ teso dzâa wô ghəa ghəla Ǹ lô fɛ a te â ghɛ̀.

²² Zən mìa kô ghəa zəla Ǹ tum sə wo wən a te, enyəa ghɛ̀ kele tsughu ghəa ghə̀là ghàʼ lô fɛ a te, àsùghò enyəa u è lo alefəghaan dzəlà wô fə̀ŋ tɛʼɛ.

²³ Gɔ̂ɔŋ zaŋa e lo enyəa to Kə̀zə̀, Tsele u te ghèe Mughùbè Yɛso Kə̀lestò mò fughu ghɛ â bughun zo, ghe ghəəŋ tsughu enyəa ghɛ e ləgha nduw ghue zɛʼɛ zo, boom fughu nduw sugho â Kə̀lestò.

²⁴ Yìa Ŋ̀ gɔ̂ɔŋ sugho enyəa to Zə̀ kə̀ mo dê dzɔ̀ e wən â ghì ghəla ghe ki ləgha zəla e kê mîaan koʼò yo â Mughùbè Yɛso Kə̀lestò.