Efɛsùs 5 - To kə Kəzə̀ kə̀ Fughu ko

Sɛ̀ ki alemùghù an tsə̀

¹ E fi lo enyəa ghɛ̀ koʼ ni ghəa a Kəzə̀ ghò bòʼ enyəa ghɛ̀ lo wɛ a wə̄n a fə̂ŋ ghò.

² E ləghaa nduw nlò ghî ghò tò aŋghəa Kə̀lestò mò ləgha wo sɛ̀ a te, ù m fùghù sùghò ghue u wə̄n to kəfughu kə̀ ləə̄m dzɔɔ̄ ko enyəa ghe sâa ndûw â Zə̀ kò an tuw u sɛ̀.

³ Ezəŋ wəlà ghɛ̀ lô ghì a Kəzə̀ ghò, e nûŋlò, ghəa à dzəa ghən à dzə̀m à dzə̀m àsùghò kʉmè zò lǒ ŋgòʼ è ghə̀a ghəla a kôom ki dzə̂ yo aleniī bəla ko am bvʉa zɛʼɛ̀.

⁴ E kwo ko ghùw wɛʼɛ lò so e ki dzughu e biigh zo ŋkāa alekəaa shwaʼ ù dzəa wo, ŋkāa shwaʼ ù laʼso wo, tɔŋlo enyəa shwaʼ u te u fween yo ghɛ. Ghɛ̀ lāam ki alefughuu zɔɔŋ kò â Zə̀ kò am fəgha kəla kə lo mò kə fwàʼ â ghɛ̀.

⁵ Kele tsughu nlò enyəa, ghùw wəla ù ghəə̄ŋ dzə̀adzə̀ tə aghəa to ŋkāa ghəa à nuūŋ kaaŋ gho, ŋkāa ghùw wəla ù kume (nu kumè è lo tǒ zə̀ kə̀ li ko ghî a kɔʼsò) lo kele dzə̀ yǒ ndâŋ è lì an fɔ̀e u Kə̀lestò ghèe Zə̀ kò.

⁶ E kwo ko ghùw ù lì lô so e bughô nìi wò zuum tə ushwāʼ tə̀ li to, ù buū fwəlà tsughu tɔ wɛʼɛ̀ a te, tɔŋlo enyəa à lǒ bòʼ ghəa ghən gho Zə̀ kə̀ dêe nʉgha u wə̄n u pfʉa wo a te a zəŋò ghì ghəla ghe zuūw yo â wə̄n.

⁷ E fi lo enyəa ghɛ̀ dɔ̂m kì dzə yo alezəafaa ghɛ̀ à ghê ŋgòʼ è aghì ghəla ghe ghəə̄ŋ ghəa ghən gho,

⁸ tɔŋlo enyəa ghuūghùe zɛʼɛ̄ e fə̀ buʼū lo tsəgha alo kələ̄m, ghɛ̀ yia lo mò ghɛ̀ n sə teme wò an tsə̂ êzəŋ aŋghəa ghɛ̀ à ghê Mughu ù te lô fəgha ko kə mɔ̀ʼ. E ghəəŋ nduw nlò ghəa ghɛʼɛ gho tò ghî ghəla ghe lo mo ghe n sə tēe wò an tsə̂.

⁹ Abugho ghuw ti an tsə̂, ghəa ghən a dzə̀m ù ghəŋlo ghə n dzɔ̂ɔ, lò tsəghatsəgha, lò sugho èsəŋò.

¹⁰ E dəma tsughu nlò aleghəəŋ ghəa ghəla a ghəŋlo enyəa fə̀ŋ è Mughu ù te e tsoʼnlo a te.

¹¹ Kà nlò ghu kò e nyəso aŋ ghəa e kə lə̄m è li zo, tɔŋlo enyəa ghəa a tè a ki dzə yo namso kə̀ li ko. E kuuwn niī deē fughuu səa wo ghəa a te gho an ndɛ to ghî ghə̀ e koʼō.

¹² Tɔŋlo enyəa à bùʼ lò ghəa e tùw kə̀ dəla ko alekəā ghəa ghəla ghî à nalà ghəŋlo.

¹³ Abugho ghe nî tiso sə wô ghəa zo an tsə̂, e fi lo an ndɛ, tɔŋlo enyəa abugho ghəa e lo an ndɛ, e fi lò tsə̀.

¹⁴ Zə̀ lò e ghee ghe dzâa tsughuu enyəa, “Hɛɛ mugho fə̀ŋo tə̀mgbii, zôo nùghu kɔʼ alo evʉ̄, ghù tee kɔʼ alò fwē, tò Kə̀lestò lo ghəŋlo tsə̀ e wən e tughuu a zɔŋɔ ghù.”

¹⁵ E fi lo enyəa ghùw kǐ aletɔʼɔ̄ naŋso tsughuu ghuw kə egbìi kə wə̄n ko, kà è tsôo bwiī ko nlò tò ndzəŋso tə aghì, e kuuwn bwiī nlo tò ghî à tɔɔ gho.

¹⁶ E ghəəŋ tsughu nlò ghəa è səŋò zò an nə̀ghàa zəla ghɛ̀ ki, bòʼ enyəa ghəa a biigh a ŋgee kə̀mà êzəŋ an tsùʼu mən.

¹⁷ Ghɛ̌ ki dzə yo alelo ghî à laʼso gho. E kuuwn zuuwkɛlɛ tsughuu ko nlò fwàʼ kəla Mughu ù te ləghaa enyəa ghɛ̀ è fwaʼa ghè kò.

¹⁸ Ka nlò è mʉa kala sugho lʉ̀ mò, tɔŋlo enyəa lʉ̀ ŋ ghəəŋ nù ghùw ŋ ghə̂əŋ ghəa à kwu gho. E zəghaan tsughu nlò Zuʼ tə̀ Zɔlɔ to tə n dêe ndùw ghɛ̀ â dzì.

¹⁹ Mò ghɛ̀ bugho təmdzəə̄ŋ kɔʼ nû, ghɛ̀ n dzeŋe zôo àghəa àsùghò ndzàŋ təlà Dɛvìd fə̀ bughòo naŋā, buʼu ùfʉgha, zɔŋɔ̀ sùghò kə̀zɔ̀ŋ aŋghəa ghɛ̀ fughuu kɔʼso mò â Mughu ù te am fə̀ŋ tɛʼɛ tə dzə̀m.

²⁰ Ghɛ̀ è fughuu nduw sugho zɔɔŋ kò â Zə̀ kò, Tsele ù sɛ̀ alo aghəa a dzə̀m àsùghò an nə̀gha tən tə̀ dzə̀m an zən e Mughùbè Yɛso Kə̀lestò.

Ghəa ghəla num ghèe wi ki alemughu dzəŋlo a te

²¹ Mò ghùw wɛʼɛ dzɛ̂ ghəa è li zo â wàazə̀, wàazə̀ ù te mò è zuw bòʼ kɔʼso məla ghɛ̀ ki â Kə̀lestò.

²² Ghɛ̀ a yi ghə a num gho, e zuuw nduw nlò â num ghɛʼɛ gho, tò aŋghəa ghɛ̀ zuuw â Mughu ù te,

²³ tɔŋlo enyəa num lo kətuw â wī tò aŋghəa Kə̀lestò lò tuw ko a zəŋò dzeŋe kə ghì a Kə̀zə̀ ghò. Kə̀lestò wə̄n lo wəla ù mò bəghasə̄ ghî a Kə̀zə̀ ghəla ghe lô ghue u wə̄n wo.

²⁴ Yi ghə anum a ki alezuuw nduw â num a ghee gho, tò aŋghəa dzeŋe kə ghì a Kəzə̀ kə̀ zuūw a te â Kə̀lestò.

²⁵ Num ghə ayi gho, e ləghaa nlò yi ghɛʼɛ gho, tǒ aŋghəa Kə̀lestò mò ləgha ghî a Kəzə̀ gho a te boo tsughu alekpūw an tuw u ghee.

²⁶ Ù fə̀ enyə ghəəŋ tsughu enyəa dzeŋe kə ghì a Kəzə̀ kò dòʼò fəgha kə̀ ba ko an daʼa kə shwaʼ u wə̄n aŋghəa ù fə̀ nî kɔʼ ghee sùw sə kɔʼ alo mmùghu.

²⁷ Ù fə ezə ghəŋlo alenì tiso wô dzeŋe kə ghì a Kəzə̀ an sə kə wə̄n mò ghe lo alo nsəghanyəgha, mo ghe ki yo nwa wo ŋkāa mo ghe kâ tàŋndzùʼnlo, ŋkāa ghəa e biigh è li zo; enyəa ghe e zɔlɔ, mò ghùw yò alesaʼ ghee aŋ ghəa è li zo.

²⁸ À fi lo enyəa wìnû kì sugho aleləghaa wī ù wə̄n tò aŋghəa ù ləghaa ghue u wə̄n wo a te. Ghùw wəla ù ləghaa wi ù wə̄n, ù fi ləghaa sùghò nù ghue u wə̄n wo.

²⁹ Tɔŋlo enyəa ghùw ù lì yo dzə̂ ù bàa ghue u wə̄n wo, ù lǎam lɛnlo â ghè wò, tsʉa sùghò tò aŋghəa Kə̀lestò ghəŋlo â dzeŋe kə ghì a Kəzə̀ ghò,

³⁰ bòʼ enyəa sɛ̀ lo tǒ nyùŋ u ughùe u wə̄n.

³¹ Tò aŋghəa ghe tɔm naŋā am mwàʼsò kə Kəzə̀ enyəa, “Zən lò e ghee wìnû zə̀ghàan taʼn tsughuu tsele ghèe zə̀, ù n nduẁ təm dzəəŋ kɔʼ ghèe wi ù wə̄n, ghee a te gho a bə̀ghà m bùghò dòʼò kɔʼ kəfəgha kə̀ mɔ̀.”

³² Səŋò e ne e lo nu e nân doʼo an shwaʼ wən, Ŋ̀ ghəa ghən fɛ kə̀aa kùu ndùw Kə̀lestò ghèe ghê dzeŋe kə ghì a Kəzə̀ ghò.

³³ Shwaʼ wən enyə lǒ â ghɛ̀ a dzə̀m, enyəa ghùw kì aleləghaa wi ù wə̄n tò aŋghəa ù ləghaa ghue u wə̄n wo a te, wìzən e tele zuuw nduw sugho â num ù wə̄n.