Efɛsùs 3 - To kə Kəzə̀ kə̀ Fughu ko

Fwàʼ kə Pôl â Tòʼò zò

¹ À lǒ bòʼ ghəa ghəla Zə̀ kə̀ lo mò kə ŋ ghəŋlo aletəmaa dzəə̄ŋ wô Tə̀dzûu ghèe ghê Tòʼò zo alo kəfəgha kə mɔ̀ʼ, mùghò Pôl, Ǹ lo ghùw ù ndùghùtsāʼ aŋ ghəa e Kə̀lestò Yɛso enyəa Ǹ zughò wo làbəlà è dzùŋ â ghɛ̀ à Toʼò zò.

² Ŋ̀ kwo nû enyəa ghɛ̀ maā zuw enyəa, Kə̀zə̀ am dzɔ̀ e wə̄n m mùgho â fwàʼ kə̀ fughu alenàʼà wô làbəlà e dzùŋ â ghɛ̀,

³ àsùghò dzì zəla Zə̀ kə̀ lo mo kə n nì dè fùghù wò nàn kə eghəa M mafə bûʼ tsuʼ naŋa wò dzə̀ â ghɛ̀ a m mwàʼsò kaŋa.

⁴ Abugho ghɛ̀ tɔɔ̄ŋ kɔʼ mwàʼsò kən ko, ghɛ̀ ke alezoʼn kele kɔʼ enyəa Ŋ̀ kûm kwò nû nàn kə eghəa kə te ko kùu ndùw Kə̀lestò.

⁵ Kən fə̀ lo nàn kə eghəa kəla Zə̀ kə fə̀ lo mo kə kaām dê fughù kòʼ tsə̀ghà â ghùw an tì kə̀ li ko, tò aŋghəa Zə̀ kə ghəəŋ tsughu êzə̄ŋ Zuʼ tə̀ Zɔlɔ tia tə nî dè fughu wò nàn kə eghəa tə te to â tum tə wə̄n tə̀ zɔlɔ to àsùghò â ghǐishʉ̀ghà a Kəzə̀ ghò.

⁶ Nàn kə eghəa e Kəzə̀ zən lo enyəa, Toʼò zə̀ m bughò kele sughô daʼa kə te ko aletəmadzəə̄ŋ ndûw Tə̀dzûu alezə̄ fʉgha u Kəzə̀, ghe lo tò wɛ a ghûw u mɔ̀ʼ, ghe yia ki sugho ghu ko am fəgha kəla Zə̀ kə fə̀ to naŋā â ghì ghəla ghe boo fughu â Kə̀lestò Yɛso. Ghəa à dzûŋ ghən enyə bùghò sə bòʼ làbəlà è dzùŋ zəla ghe fə̀ zuw, è boo.

⁷ Ghe n naŋa tsughu mugho tǒ ghûw wəla ù naʼn làbəlà è te, mò à fwàʼ kə te ko â mùghò fughu Kəzə̀ an dzɔ̀ e wə̄n zəla ù mò dê tsughu â mùghò an daʼa kə wə̄n.

⁸ Ghəa e bûʼ lô ko enyəa Ŋ̀ kâ tso kɔ̀ʼ kpe to ghe e tɔŋɔ mùghò enyəa Ǹ lo ghùw ù Kə̀zə̀, ghe fə̌ fwàʼ kən kə fughu wo â mùghò alezùghò naʼa kum e ne zəla e lo am bàm e Kə̀lestò â Tòʼò zò,

⁹ àsùghò aleghəŋlo enyəa mbī e dzə̀m kòʼ nàn kə eghəa kəla Zə̀ kə fə̀ nân naŋā an ndə̀mà tə tənùu, tɔ̂ɔŋ Zə̀ kəla kə fə̀ gbə̂n wô fʉgha wo u dzə̀m.

¹⁰ E fə̀ lo enyəa to dzeŋe kə ghì a Kəzə̀ ghə̀ e lo aledèe ndûw tɔ u Kəzə̀ ù ne wo â zʉ̀ wəla u saʼā ghî ghəla ghe lo a tsəlà ghee an lùʼù tə kəwalā.

¹¹ Ghəa ghən fə̀ bɔɔm boo dzəəŋ nduw ko aŋghəa Zə̀ kə fə̀ ki fôʼ naŋā, ghəa a te ghə n nyoʼn bùghò sə wo sùghò êzə̀ aŋghəa kə fə̀ fôʼ naŋā am bàm e Kə̀lestò Yɛso Mughùbè ù sɛ̀.

¹² À lǒ Kə̀lestò ù ghəŋlo enyəa sɛ̀ e ndzəə̄m lo alebùghò a vʉ̀a Zə̀ kò mo a ki yo tsəŋ è li zo aŋghəa sɛ̀ gaʼ fə̀ŋ a zəŋò wə̄n.

¹³ Zən lò e ghee Ǹ dzâa wo â ghɛ̀ enyəa, e kwo ko fə̀ŋ lo so e baŋà ghùw wɛʼɛ ù lì aŋ ŋgoʼ zəla Ǹ zuūw fɛ â ghɛ̀, tɔŋlo enyəa ŋgoʼ zəla Ǹ zuūw fɛ, à lǒ dzɔ̀ â ghɛ̀.

Ləgha zəla Kə̀lestò ki a zəŋò ghì ghò

¹⁴ Ǹ təma təŋguʼ a vʉ̀a Tsele ù sɛ̀ Kə̀zə̀ alo egɔ̀ŋlo bòʼ ghəa ghən a dzə̀m ù lo mo ù m fwàʼ â sɛ̀.

¹⁵ À lǒ wə̄n ù bɔm ghî ghò a dzə̀m alo kəwāla àsùghò aŋ ghueekətsə̄.

¹⁶ Ŋ̀ gɔ̂ŋlò enyəa to Zə̀ kə̀ mô nîi kɔʼ kum e wən è ne zəla e kê mîaan koʼò yo kə dzəlà tsughu fə̂ŋ tɛʼɛ a te an daʼa kəla Zuʼ tə̀ Zɔlɔ tə fughuu â ghɛ̀, tò ghɛ̀ e tughuu,

¹⁷ àsùghò enyəa Kə̀lestò e mughu am fə̂ŋ tɛʼɛ bòʼ boo zəla ghɛ̀ ki â wə̄n. Ŋ̀ gɔ̂ŋlò enyəa to ghaŋ ghɛʼɛ a mô nyəā məla tsughu an ləgha zəla ghɛ̀ ki â Zə̀ kò àsùghò aŋ ghuè zɛʼɛ̄.

¹⁸ Yìa Ŋ̀ gɔ̂ɔŋ sughò enyəa ghɛ̀ à ghê ghì a Kəzə̀ à li ghən e ke dzeŋe lo alekelê kə̀daʼa alezuūwkɛlɛ enyəa ləgha zəla Kə̀lestò ki â ghɛ̀ dùw tsə̀ghà sə fəgha kəla ghùw yò aleteso.

¹⁹ Ŋ̀ gɔ̂ŋlò enyəa to ghɛ̀ mo mɔm zuw ləgha e Kə̀lestò zəla ghùw yò aleteso mɛʼɛ̀, tò mwam u Kəzə wəla a zəŋò ghɛ̀.

²⁰ Zə̀ kə lo nû alefwàʼ, kə bùʼù fwaʼà tsəghàsə ghəa ghən a dzə̀m sɛ̀ bvʉā nduw, ŋkāa ghəa zəla a bûʼ moʼn tsughuu ko nû an daʼa kə wə̄n kəla kə fwaʼā a zəŋò sɛ̀.

²¹ Ŋ̀ gɔ̂ŋlo enyəa to sɛ̀, dzeŋe kə ghì a Kəzə̀ mò ghə̌əŋ ndùw ghəa ghəla a fughuu kɔʼsò mò â Zə̀ kò aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò Yɛso an nə̀ghā tən tə dzə̀m to mbī kê bughò mîaa. Zə e lo ko êzə̀.