Efɛsùs 2 - To kə Kəzə̀ kə̀ Fughu ko

Alemùghù Mughū e mùghù è fughu zo

¹ Ghɛ̀ mò buʼ lo tsəgha tò ghî a kpuuwn gho bòʼ aŋghəa ghɛ̀ mò tsughòsò maʼn lâŋ kə Kəzə̀ kò, àsùghò bòʼ ghəa ghɛʼɛ à biigh gho,

² aŋghəa ghɛ̀ mò boʼ mughù tsəgha a te to ghî a mbī gho, ghɛ̀ m bwîi an lwàŋ u də̀ŋ kə zʉ̀ u biigh wəla u lo kaŋlo edzūŋ alo kəkwɛ̌ɛ, də̀ŋ kən lo zʉ̀ ù biigh wəla u fwaʼā ezəŋ a zəŋò ghì ghəla ghe tsughòsò maʼn Zə̀ kò.

³ Sɛ̀ a dzə̀m mafə mughù sùghò tǒ ghee, aŋghəa gwən e ughùe e ghûw è ləghaa aŋ ki sugho moʼnlò è biigh zo tǒ ghee. È li lo enyəa ghe mǒ sɛ̀ dzə tò ghî ghəla Zə̀ kə̀ ki aledè nʉ̀ghà u wə̄n u pfʉa wo a zəŋò ghee, tò aŋghəa kə ghəŋlo â ghì ghən a dzə̀m.

⁴ À sò kuuwn lò ko enyəa Zə̀ kə̀ ŋge ki se è kwuso zo, bòʼ ləgha e wə̄n zəla kə ki â sɛ̀.

⁵ Aŋghəa sɛ̌ fə̀ bûʼ lô ko tò sɛ̀ kpuw dòʼò nù bòʼ ghəa a sɛ̀ à biigh gho, Zə̀ kə̀ ŋ ghəəŋ tsughu enyəa sɛ̀ e dzeŋe mughu sɛ̀ à ghê Kə̀lestò. À lo dzɔ̂ zəla Zə̀ kə mò dê tsughu â ghɛ e mò ghəŋlo enyəa ghɛ zə tuw ko.

⁶ Zə̀ kə̀ n zôm nughù dzəə̄ŋ kɔʼ sughò sɛ̀ à ghê Kə̀lestò Yɛso, dòʼsò nàŋa dzəəŋ ndùw sùghò sɛ̀ à ghee an lùʼù tə kəwālā, aŋghəa Zə kə fə̀ ghəə̄ŋ tsughu enyəa sɛ̀ e lo fəgha ko kə mɔ̀ʼ sɛ̀ à ghê Kə̀lestò.

⁷ Zə̀ kə fə̀ ènyə ghəəŋ tsughu enyəa an tì kəla kə ki alebùghò, kə ke e lo aledè dzɔ̀ e wə̄n e ne zo an ləgha zəla kə lo mo kə n dè â sɛ̀ aŋghəa ù fə̀ ghəə̄ŋ tsughu enyəa sɛ̀ doʼò kə̀fəgha kə mɔ̀ʼ sɛ̀ à ghê Kə̀lestò Yɛso.

⁸ Tɔŋlo enyəa à ghəə̄ŋ dzɔ̀ e Kəzə̀ enyəa ghɛ̀ zə tuw ko bòʼ boo zəla ghɛ̀ ki â Kə̀lestò. À kà ghə̀əŋ tsùghù dzə̀ ghɛ enyəa ghɛ̀ zə tuw ko, à lǒ fughu kə Kəzə̀.

⁹ À yò dzə̂ am fwàʼ kə̀ li ko ghuw fwàʼà tsughuu aŋ ŋgəŋ e wə̄n kə ghəŋlo enyəa ù zə kətuw, tò ù e lo aletsɔ̀ fə̀ŋ a te.

¹⁰ Sɛ̀ lo ghu a kəfwàʼ a Kə̀zə̀ ù mò bɔm tsughuu aŋghəa sɛ̀ doʼò tsughu kəfəgha kə mɔ̀ʼ sɛ̀ à ghê Kə̀lestò Yɛso, alefwaʼā fwàʼ kə̀dzûŋ kò ù fə̀ biaan naŋā, enyəa sɛ̀ è bwiī a te.

Ghî ghəla ghe boō fughu â Kə̀lestò lò kəfəgha kə mɔ̀ʼ

¹¹ Ghe mò ghɛ dzə wo tò Etoʼò; Tə̀dzûu, ghî ghəla ghe mò sugho tigh kə wɛ ko n tɔɔŋ ghɛ̀ enyəa, “Ghî ghəla ghe sugho yô tigh kə wɛ ko.” Mo ghəa a te a tsô lò ko ghəa ghəla ghùw ghəə̄ŋ tsughuu aŋ gwə̀n e ughùe.

¹² Ghɛ̀ e taā moʼn tsughuu enyəa tî kə te kə fə̀ lo mò ghɛ à ghê Kə̀lestò ka n zə dzəəŋ dzə̀, ghɛ̀ à ghê Ezə̀lɛ̂ n ndzùghùn lò sugho, ghɛ̀ ŋ ki yo ghu ko aŋ kàa məla Zə̀ kə̀ fə̀ zə ghèe ghê ghì a wə̄n gho an to u wə̄n wəla ù fə to naŋā. Ghɛ̀ n chîi yǒ tùʼ aŋ ghəa è li zo, Zə̀ kə̀ n yo sughô am mbī zɛʼɛ.

¹³ Ghɛ̀ à ghê Kə̀lestò Yɛso kǔuwn lò nû alo kəfəgha kə mɔ̀ʼ êzə̄ŋ. Ghəa e fə̀ bûʼ lô ko enyəa ghɛ̀ fə̀ lɔʼso lo tsəgha nù, Zə̀ kə̀ ŋ ghəŋlo aŋ kàŋ tə Kə̀lestò ghɛ̌ yìa kuʼso doʼò wo ghɛ̀ a ghê Zə̀ kò.

¹⁴ À lǒ Kə̀lestò ù fughuu sɛ̀ â bughuun zo, tɔŋlo enyəa à ghə̌ŋ wə̄n enyəa Tòʼò è dòʼò kə̀fəgha kə̀ mɔ̀ʼ ghèe ghê dzûu tò. Vʉ̀a ù sàʼ maʼa sugho bəgha kə ndughū kəla kə mò ghəŋlo enyəa ghɛ̀ ka e koʼō kàʼ mə̀ esʉ mò.

¹⁵ Kə̀lestò mafə zê màʼà lwâŋ u Tə̀dzûu àsùghò ghəa ghela lwâŋ u gəə̄n ghî gho a te an vʉ e wə̄n, ù fə̀ ezə ghəŋlo enyəa to Etoʼò àsùghò Dzûu to mò bùghò doʼò ghì a fughu gho a zəŋò wə̄n to bughunlo e doʼò,

¹⁶ àsùghò enyəa ù e lo alebian ghee a te gho a bə̀ghà, ù naŋa sɛ̀ à ghê Zə̀ kò alo kəfəgha kə mɔ̀ʼ an vʉ̄ e wə̄n alo kədàŋlo. À fì lo mo ù ŋ ghəŋlo enyəa ghe e koʼo dzəəŋ kàʼ mə̀ esʉ mò.

¹⁷ Zən lò e ghee Kə̀lestò mò bùghò kə̂a wô shwaʼ u dzûŋ wo alenìi wo è bughunlo â ghì ghə̀n à dzə̀m — â ghɛ̀ a Toʼò zò, ghɛ̀ ghəla ghɛ̀ mò tso kaām kwo yo Zə̀ kò, àsùghò Dzûu tò, ghe ghəla ghe tsoo kwo wə̄n.

¹⁸ À lò am bàm e Kə̀lestò, sɛ̀ a dzə̀m, Tə̀dzûu à Tòʼò zò, sɛ̀ lô alendùw a vʉ̀a Tsele ù te an daʼa kə Zuʼ tə̀ Zɔlɔ to.

¹⁹ E fi lo nû enyəa, ghɛ a Toʼo zò àsùghò Dzùu to, ghɛ êzəŋ kôom yo dzə ghî ghəla ghɛ bwîin nyə wo nû, ghɛ ezəŋ lo kəfəgha kə mɔ̀ʼ ghɛ̀ à ghê ghì a Kəzə̀ ghò, lò sugho alo kəfəgha kə mɔ̀ʼ ghɛ̀ à ghê kèndughu kə Kəzə̀ kò.

²⁰ Ghɛ̀ ti sugho am bə̀ghàan kəla tum tə Kə kəze tə mò bəgha naŋa kɔ̀ʼ ghèe ghê ghiīshʉ̀ghà gho, mò à lo Kə̀lestò Yɛso ghuūghùe u wə̄n tia zə ebūw zo.

²¹ À ndùghù è te e dzə̀m kwu kele wə̄n, vʉ̀a ù ghəə̄ŋ sugho enyəa è noō doʼò tsughu è baa zo â Mughu u te.

²² Yìa à lo wən ù nì təm dzəə̄ŋ wô ghɛ̀ à alo kəfəgha kə mɔ̀ʼ, ghɛ̌ yìa a doʼò tsughu ndughu zəla Zə̀ kə̀ mughu a tə an Zuʼ tə̀ Zɔlɔ to.