Edêe Fughu 9 - To kə Kəzə̀ kə̀ Fughu ko

Mbuwlì e kə̀tɛ̀ nì wò tsù u biigh u sʉêsʉe wo

¹ Tsə̀ndə̄ghā è kətɛ̀ n daŋso tɔ̄ŋ tsughu è wə̄n zo mbuwlì, mùghò n daŋso kòʼ fə̀sə̀ghàbəlà mo fə maā nughù sə̀ tsùghù wò alo kəwālā bvʉ̀ sə tsùghù wò à ghueetsə̄. Ghe m fùghù ndùw wən â tsʉ kə bùʼ kəla kə doʼŋkè kuʼù.

² Ù n tsʉ kɔʼ dzughu e bùʼ kəla kə kuʼù yo, nyoʼ wə n səa kɔʼɔ an dzughu e bùʼ chì tò nyoʼ wəla u səa kɔʼɔ alo kənàm, nyoʼ u te wə n dzʉ̀a kə̀ŋ nàŋa kɔʼ tʉ̀ghà u tsə̂ àsùghò zuʼ to edzuŋ.

³ Be tə n sə̀ wò an nyoʼ kə te ko, tsùghù wò a ghuu, ghe m fughu tsughu ghee â daʼa ko tò daʼa kə tənàŋ.

⁴ Ghe n dzɛ̀ â ghee enyəa e kwo ghe lô wii maʼn ghê kò am mbī ŋkāa tam kə̀ li ko ŋkāa kâʼ fə̀ lo fo. Ghe n lo ko alenomsô ghì ghəla ghe ki yô lɔʼɔ kə Kəzə̀ kò aŋ kàʼ mə̀ esʉ ŋ ghee.

⁵ Ghe n dzɛ̀ tsùghù enyəa be tə te tə fɔesō tsughu ghî a te gho alo təndzɔŋɔ tə tɛ̀, ghe ka ghee kuuwn wī. Fɔɔn zəla ghe mò zuw, mò lo tò zəla ghùw zuūw abugho nàŋ təgha tsughu wə̄n.

⁶ An tì kə te ko ghî ghə̀ è ke diī keē nduw vʉ zo an tùʼ è diī zo, zə e ke bughōo yo; ghe e ke e buŋlō alekpūw, vʉ zə e ke tii ghee.

⁷ Koʼ e be tə te tə n lo tò ukwʉ̀anyòm ghe fəghaan naŋā an tsām. Ghe ŋ ki fʉgha ù li wo an tuw u ghee u fweēn tǒ mgbɛ wə etsɛ̀; sʉ e ghee zə n lo tò sʉ e aghì.

⁸ Nyûŋ tə ghee tə n dâa tò tə ayìzən to, sɔŋ a ghee ghə n lo tò sɔŋ a ubʉgha.

⁹ Ghe ŋ ki ubʉghaa a zəŋo e eghùe tǒ kə̀ŋ kə fə̂ŋ kə kəbvūʼ, ghôo tə ghee tə ŋ kwûu wò ènyə to nwaŋ u ukʉ̀anyòm ù lô nyəŋō soʼō tsàm ghèe ghê kʉ̀anyòm wò.

¹⁰ Kue e ghee lo sugho tǒ kue u nàŋ, ghe yia təghaa ghî gho a te, ghe ŋ ki daʼa kə te ko aŋ kue e ghee aletəghəŋlo aghì a te alo təndzɔŋɔ tə tɛ̀.

¹¹ Ghe ki tsə̀ndə̄ghā zala è lɛɛnlo a bùʼ kəla kə kuʼù yo tǒ də̀ŋ kə ghee; zən e wə̄n an shwaʼ u Hebə̀lù e lo enyəa Abadɔ̀n, aŋ shwaʼ u Gə̀lêk ghe n tɔɔŋ wə̄n enyəa à lò Àpolìon.

¹² Tsû u sûesʉ u ne wə n tsə̀ghà; tsû è naam ki alebùghò è bə̀ghà.

Mbuwlì e kə̀tǔu e nî wò tsù u biigh wo

¹³ Tsə̀ndə̄ghā è kə̀tǔu n daŋso tɔŋ tsughu è wə̄n zo mbuwlì, mùghò n zùw nyə̀ ndùw dzə̀ è li an ndɔŋ tì tə̀chìakò tə̀ mò teē tsəghà wo am bùghu tə tsaʼ kə etsɛ̀ chia kə ti a vʉ̀a Zə̀ kò.

¹⁴ Dzə̀ e te dzâa ndùw â tsə̀ndə̄ghā è kə̀tǔu zə̀a è mò ki mbuwlì zə enyəa, “Zěe zə̀ghà tsughu tsə̀təndə̄ghā tì tə̀ chìakò ghe kɔlɔ̄ naŋā aŋ dzughù è Yùfə̀lɛ̀tes è ghàʼa.”

¹⁵ Ghe fi zê zə̀ghà tsùghù nu tsə̀təndə̄ghā tì tə̀ chìakò, tiā ghe mò kwu naŋā tsughu aleləma tsughu nəgha e te zo, tsuʼ u te wo, dzɔ̀ŋ è tè, à nùm kə te ko, alewiī maʼà də̀ŋò kə aghì kə mɔ̀ʼ am mbī e dzə̀m abugho a dzughùu tsughu mbī alo udwə̀ŋò u tʉgha.

¹⁶ Ghe mafə dzɛ̀ mugho â kɔ̀n kə sùghugòʼ təla fə̀ nəŋo alo ukʉ̀anyòm: kɔ̂n kə te kə n lo kwən mə̀ m bɔ̀m m bə̀ghà.

¹⁷ Zən lǒ dzì zəla mùgho fə̀ koʼ kʉ̀anyòm u te wo a te an dzǒo waŋā; ghî à nyəŋo a te ghə ŋ ki kwə̀ŋ u kəchīchī mo u ki ŋgwò è bàŋà tò uwən, ŋgwò è ləŋo lìi tò kəwālā àsùghò ŋgwò è lòʼ è bàŋa tò unumlo. Tuw u kʉ̀anyòm u te wə n lo tò tuw u ubʉ̄gha, wən wə n səa wò an dzughu a ghee àsùghò nyoʼ wo mo u lo tò sulfò.

¹⁸ Dəŋò kə aghì kə m kə mɔ̀ʼ mo è kpuw alo tə zə̂ŋ an wən àsùghò nyoʼ wo àsùghò zuʼ kə biigh kə̀ uwə̀n mo alo zuʼ kə biigh kə̀ uwə̀n kala kə səa wo an dzughu a ghee abugho a dzughùu tsughu mbī alo udwə̀ŋò u tʉgha.

¹⁹ Daʼa kə kʉ̀anyòm u te kə lo an dzughu a ghee asùghò an swaŋ u ghee. Swaŋ u ghee wə̀ n lo tò təzughu, à tuw wo ghe nomsō ghî ghò a te

²⁰ Ghî à li ghəla ghe fə nɔsə tsughu an zəŋ ten, ghe ŋ kè zəghàa maʼà ghəa à kɔʼso à mmùʼù ghee mən, ŋkāa ghəa à kɔʼso a zʉ̀ ù biigh gho, àsùghò mə̀ ètsɛ mò àsùghò n Silvà mò, m bəlôns mò, mə̀ n tia mo, mə̀ ŋkàʼ mò, mò ŋ kòʼò yò luʼū to, zuuw yo ghəa gho, bwìi sùghò yò.

²¹ Ghe kafə̄ tso bùʼ tì màʼà sùghò ghəa a ghee à wiīn ghə aghì ghò ŋkāa a kəvùŋ ghò, ŋkāa ghəa à nuūŋ kaaŋ gho ŋkāa à tsɔŋɔ gho.