Edêe Fughu 7 - To kə Kəzə̀ kə̀ Fughu ko

Ghî ghə Ezə̀lɛ̂ 144,000

¹ A m bùghò ghəa ghən tsəghà tsughu, mùgho ŋ kòʼ tsətəndə̄ghā tə Kəzə̀ tə̀n tə̀ chìakò tə ti am buw ghən à chìakò am mbī, mo ghe ŋ kə̀ŋ nàŋa tsughu kʉ̀ɛɛ wən ù chùakò am mbī enyəa to kʉ̀ɛɛ kə kâ mò tsò tsə̀ghà am mbī ŋkāa an dzùghùntsòʼ ŋkāa aŋ kàʼ fə̀ li fo.

² Mùgho n daŋso kòʼ tsə̀ndə̄ghā è Kə̀zə̀ è lì è səā kɔʼɔ̄ wo an tsə kə̀ səa ko, zə̀ ŋ ki lɔʼɔ kəla Zə̀ kəla kə lô â tuw ko tsə̂so naāŋ ghî ghò a te, nàʼn wò an dzə̂ è tughu â tsə̀təndə̄ghā tì tə̀ chìakò ghe lo mo ghe maā ghe â daʼa kə fughu alenomsô ghueekətsə̄ ko àsùghò dzùghùntsòʼ,

³ enyəa, “Kà ghueekətsə̄ kə nomso, ŋkāa dzùghùntsòʼ, ŋkāa ŋkâʼ à gɔ̀ʼɔ̀ ko mo a ŋ kɔ̀ɔ n Zə̀ kə sɛ̀ m tsə̂sò nàŋa tsughu alo kəlɔʼɔ aŋ kàʼ mə̀ esʉ ŋ ghee.”

⁴ Mùgho n zuw tsughu kɔ̂n kə aghì kəla ghe mò tsə̂sò tsughu alo kəlɔʼɔ, à n lo kam tə aghì fəbɔm à ghì ghò ŋghəm n chìakò, à ghì ghò a chìakò, ghe nî kaāŋ wo aŋ kèndughu u wɛ ghə Ezə̀lɛ̂ ghə̀n à dzə̀m.

⁵ Ghe n tsə̀sò tsughu kam tə aghì eghə̄m à ghe tò təbə̀ghà aŋ kèndughu kə Dzudà, kam tə aghì eghə̄m à ghè tò tə bə̀ghà aŋ kèndughu kə Lubɛ̀n, kam tə aghì eghə̄m à ghè tò tə bə̀ghà aŋ kèndughu kə Gâd.

⁶ Ghe ne tsə̀so tsughu kam tə aghì eghə̄m à ghè tò tə bə̀ghà aŋ kèndughu kə Ashà, kam tə aghì eghə̄m à ghè tò tə bə̀ghà aŋ kèndughu kə Naftālì, kam tə aghì eghə̄m à ghè tò tə bə̀ghà aŋ kèndughu kə Mànassɛ̀h

⁷ Ghe n tsə̀sò tsughù sugho kam tə aghì eghə̄m à ghè tò tə bə̀ghà aŋ kèndughu kə Simìon, kam tə aghì eghə̄m à ghè tò tə bə̀ghà aŋ kèndughu kə Lɛvì, kam tə aghì eghə̄m à ghè tò tə bə̀ghà aŋ kèndughu kə Essākà.

⁸ Ghe n tsə̀sò tsughu sugho kam tə aghì eghə̄m à ghè tò tə bə̀ghà aŋ kèndughu kə Zɛbūlùn, kam tə aghì eghə̄m à ghè tò tə bə̀ghà aŋ kèndughu kə Dzùghùsî, ghe n tsə̀sò tsùghù sùghò kam tə aghì eghə̄m à ghè tò tə bə̀ghà aŋ kèndughu kə Bɛndzàmɛ̂n.

Nɔ̂e kə aghì kə̀ ne ko alo kəwālā

⁹ A m bùgho ghəa ghən tsəghà tsughu, mùgho ŋ kòʼ nɔ̂e kə aghì mò ghùw lì yo aletaŋ, aghî ghe sə kaāŋ wo an naʼà tə̀n tə̀ dzə̀m, an tùu tə̀n tə̀ dzə̀m, sə kaaŋ wò sùghò ndughu tən tə̀ dzə̀m, ghe n saʼâ sàʼà tə nàʼà tə̀n tə̀ dzə̀m; ghe n ti an sə kə ndàŋ è kə̀də̀ŋ è te àsùghò a sə̀a Tsʉa u Ndzì u te wo. Ghe a dzə̀m n lo mo ghe n tə̄m dàla tə̀ famā to a zəŋo e eghùe, chìa ŋ ki kətsəghā aŋ ghu.

¹⁰ Ghe n dzâa sə̌a kɔʼɔ an dzə̀ tə̀ tughu to enyəa, “À lǒ Zə̀ kə sɛ̀ kəla kə doʼ an ndàŋ è kə̀də̀ŋ ghèe Tsʉa u Ndzì u te wo ghe bəghaasəa sɛ̀!”

¹¹ Tsə̀təndə̄ghā tə Kəzə̀ tì tə̀ dzə̀m n lo mo ghe n tee dzə̀əŋ ŋgəa kɔʼ ndàŋ è kə̀də̀ŋ e te, tee dzə̀əŋ ŋgə̀a kɔ̀ʼ sùghò tsoʼ tì, àsùghò fʉgha vʉ̀ u chùakò ù mò lo â tuw ko, ghe n nùghù bvʉ̀ pfʉ̌ʉn ndùw èsʉ a ghueetsə̄ a sə̀a ndàŋ è kə̀də̀ŋ e te, fughuu ndùw ŋ kɔʼso â Zə̀ kò.

¹² Ghe n zoo àghəa dzàa tsùghuu a te enyəa, “Zə e lo ko ezə̀! Ebughuso, nsəghanyəgha, etɔ àsùghò zɔ̀ɔŋ kə̀ fughu ko, ŋkɔʼso, kədaʼa àsùghò ghaʼ zo, e doʼò təla ndûw â Zə̀ kə sɛ̀ kò to mbī kê bughò mîaa. Zə e lo ko êzə̀.”

¹³ Tsòʼ è lì n nùghù bvʉ̀ sə̀ wò â mùghò enyəa, “Ghən lò ghê ndūghō ghe dzəlà kele ndzʉ tə̀ fəma to a, ghe sə ghɛ?”

¹⁴ Mùghò m bɛ̀lɛ̀ kɔ̀ʼ enyəa, “Ŋ̀ kwo yo a Mughùbè, à lǎam kwo ghû.” Ù n daŋso dzɛ̀ â mùghò enyəa, “Ghən fɛ lo ghî ghəla ghe lo mo ghe m fala an ndə̀mà tə aghəa fəgha lə ŋ kè kuūwn nomso ghee, ghe yia sûw maʼà tsughu dàlà tə ghee to aŋ kàŋ tə Tsʉ u Ndzì u te wo, tia tə fə̂m tsughu fùuŋ.

¹⁵ Zən lò e ghee ghe lo a vʉ̀a ndàŋ è kə̀də̀ŋ è Kə̀zə̀, fwàʼà bwǐi ndǔw ndùw â wə̄n bùghò fwàʼà zěe wò an tsughu e wə̄n. Ghùw wəla ù dòʼ an ndàŋ è te lo e lɛnlo â ghee aŋghəa ù lò dzə̂ ghèe ghee.

¹⁶ Dzə̀ŋ kè ghee kôom zà kòʼ yò, fə̀ŋ è m̀mùghu kê ghee kôom zùʼso kòʼ sùghò yò. Tsə̀ kè zùʼ kòʼ yǒ ghee, zuʼ tə nu tə kê ghee mɔ̂m kòʼ sùghò yò;

¹⁷ tɔŋlo enyəa Tsʉ u Ndzì u te wəla u lo an ndàŋ è kə̀də̀ŋ è te kê lǒ bàʼàtə̀ndzì ù ghee. Ù lo nìi ndùw ghee an sə e dzughù zəla e ki mùghù mə̀là ŋ ghəŋlo enyəa ghùw è lo â tuw ko. Zə̀ kə̀ lo zêe maʼà tsughu sə̀ mə̀ èdì n dzə̀m aŋ tuw kə ghee.”