Edêe Fughu 6 - To kə Kəzə̀ kə̀ Fughu ko

Mə̀ŋ tə sûesʉ ten tǔu

¹ Êzəŋ mùghò ŋ kòʼ aŋghəa tsʉa u ndzì vʉ zʉmè nughù kɔʼ mə̀ŋ è sûesʉ zə̀ an lùʼù tə təmə̀ŋ ti to sə̀ghàmbəgha, mùghò n zùw ndùw sùghò aŋghəa kəfəgha kə mɔ̀ʼ am fʉgha ù tughu vʉ̀ u chùako u lo â tuw ko dzɛ̀ sə kɔʼ an dzə̂ è li è dəmā to ghuuw e lô kəmā, enyəa, “Bùghò!”

² Mùghò mə e lɛɛn ndùw nù, daŋso kòʼ ndùw kə̀anyòm kə fəma ko, ghùw wəla ù nyəŋō wo a te ŋ ki kàʼmwɛ̀, ghe m fùghù ndùw wə̄n â tàaŋ kə kədə̀ŋ kò. Ù n sə̀ ndùw tǒ ghùw wəla tema zəa ghî gho aletsoō təma zəa nduw ghî ghò.

³ A m bùghò ù zʉmè nughù tsughu mə̀ŋ è kə̀bə̀ghàa zə̀, mùghò n zùw ndùw fəgha kə tughu kə kə̀bə̀ghà kəla kə lo â tuw ko kə dzɛ̂ tsughu enyəa, “Bùghò!”

⁴ Kə̀anyòm kə̀ li kə n sə̀ è wo, mo kə baŋà nù; ghe m fughu tsughu ghùw wəla ù nyəŋō ghè ko â daʼa ko enyəa ù nìi nughù kɔʼ ebughunlo am mbī, to ghî ghə è wīi kaaŋ ghue zo. Ghe m fughu tsùghu sughò wə̄n â nyə fə̀ ne fo

⁵ A m bùghò ù zʉmè nughu kɔʼ mə̀ŋ è kə̀təgha zən, mùghò n zuw fəgha kə tughu kə kə̀təgha kəla kə lo â tuw ko kə dzɛ̂ tsughu enyəa, “Bùghò!” Mùghò mə e lɛɛn ndùw nù, mùghò n daŋso kòʼ kə̀anyòm kə̀ ləŋo ko, ghùw wəla ù nyəŋō ghè kò ŋ ki fòʼ aŋ ghu.

⁶ Mùgho n daŋso zuw tsughu fəgha kə̀ li ko kə fuŋ sə kɔʼ am bvʉa e fʉgha ù tughu vʉa u lo â tuw ko u chùako tǒ dzə̀ è ghùw enyəa, “Kaŋa fə asò fə mɔ̀ʼ fə̀ e ke kwuu kua wəla ghùw fwàʼ alo fətsūʼ, wʉ̀a zə akue e mɔ̀ʼ e ke kwuu sugho êzə̀. E kwo ghù lò se kuuwn boon màʼnlò mvʉ àsùghò lʉ̀ mò.”

⁷ A m bùghò ù zʉ̀mè nughù kɔʼ mə̀ŋ è kə̀chìakò kò, mùghò n zuw tsughu dzə̀ è fəgha kə chìako kə tughu kəla kə lo â tuw ko, kə dzɛ̂ enyəa, “Bùghò!”

⁸ Mùghò mo e baŋà lɛ̌ɛn kɔʼɔ nù, mùghò n daŋso kò ndùw kə̀anyòm kə̀ li ko mo kə wə̂ən lə̀ŋo nù, zən e ghùw wəla ù fə̀ nyə̀ŋo kə̀anyòm kən ko n lo Evʉ̄, Naʼ zə evʉ̄ zə m bughòo a bǎà wə̄n, ghe n nì fùghù tsughu bâ kə mbī kə mɔ̀ʼ am gba wən u chùakò â ghee enyəa ghe wi alo fənyə̄, an dzəŋ, alo tədzàŋà, àsùghò nyôm tə ŋgwən to fɛ am mbī enyəa tə wiin ghî ghò.

⁹ A m bùghò ù zʉ̀mè nughù kɔʼ mə̀ŋ è kə̀tɛ̀ zə̀, mùghǒ ŋ kòʼ nyə̀ ndùw ghì ghəla ghe mò kpuwnlo mo ghe ghee wi nû, mo ghe yi a lo a tsəlà tsaʼ kəla ghe kɔʼɔ fughu fughu ko a te; ghe fə̌ ghee winlo enyəa ghe kə̂aa shwaʼ u Kəzə̀ àsùghò aŋghəa ghe fə̀ teē tən tsughu ko aletesô dzɛ̂ ghəa e shwaʼ u Kəzə̀ e te zo.

¹⁰ Ghe ŋ kele sə̄a kɔʼɔ àghəa an dzə̂ è tughu enyəa, “Wo Tsə̂ntə̀mbî ù Ghàʼa ù ghàʼa, ghù zɔ̀lɔ nù, ghù vʉ̀a ghù lò sugho êsəŋò, ghù lô ghì ghən fɛ am mbī saʼa zən, â ghù aledì ŋgə̀mà tə təkàŋ taʼa a?”

¹¹ Ghe n daŋso fùghù ndùw ghee â dàla tə̀ fəma to, dzɛ̀ â ghee enyəa ghe tsûuŋ zʉ̂ʉn tsughu eghue, to kɔ̂n kə kɔ̀ɔ m Mughu ù te àsùghò waazə̂ ghəla ghe ki alewī aŋ ghəa ghe mò wi sugho ghee a te, kə kpeē tsughu.

¹² A m bùghò ù zʉ̀mè nughù tsughu mə̀ŋ è kə̀tǔu zə̀, mùghò mo e koʼò, bɔ̀ŋ n nùghù nòʼso tsughu ghueekətsə̄; zuw zə n daŋso nùghù ləŋ tsughu enyə tǒ ndzʉ tə evʉ̄, ndzɔŋ n nùghù bàŋ dòʼò tsùghu tò təkâŋ.

¹³ Sə̀ghàbəlà ŋ kə̀wala mə̀ n nùghù tsʉ̌ɛʼn sə̀ tsùghù wò à ghueetsə̄ tǒ kâʼ fə̀ lô zəghàsò maʼn tsughuu twam wəla u doʼŋkè biso abugho kʉ̌ɛɛ kə̀ tughu kə tsəghà tsughu.

¹⁴ Wala kə n nùghù mìa nyə̀ kɔ̀ʼ e ndùw to ghe lô nyəmē nughùŋ kɔʼɔ̄ nyəme u kəmwāʼsò wò, təkaʼà tə̀n tə̀ dzə̀m àsùghò nàʼà n dzùghùu mə̀n n dzə̀m n sàŋ nùghù tsùghu an bəla təla ghe fə̀ lô tsəgha a te.

¹⁵ Dwə̀ŋ u mbī, à ghì à səŋò ghò, ghê komndzūghū, à ghì à kuu gho, à ghì à tughu gho, àsùghò ghì ghə̀n à dzə̀m, ukɔ̂ à ghəla ghe ndzə̂m lo n tì nàn dòʼò kǎaŋ ndùw alo ubùʼ àsùghò am faʼa tə unɔe alo təkàʼà.

¹⁶ Ghe n dzâa ndùw â kàʼà tə te to àsùghò nɔe u te wo enyəa, “Bvʉ̌a nàla naŋa tsughu wò nlò ghaʼ aŋ ghùu ghùw wəla ù dǒʼ an ndàŋ è kə̀də̀ŋ e te àsùghò aŋ ghùu nʉ̀ghà ù pfʉa u tsʉa n ndzì u te wo,

¹⁷ tɔŋlo enyəa tsuʼ ù ne u ghee ù pfʉso u unʉ̀ghà wə̀ m kpe. À lò ndughoo ù lò aleteme bâan ndûw ghèe nʉ̀ghà u pfʉa u te wo a?”