Edêe Fughu 5 - To kə Kəzə̀ kə̀ Fughu ko

Tsʉa u ndzì àsùghò Nyəme u kəmwàʼsò wo

¹ Mùghò n daŋso kòʼ ndùw nyəme u kəmwàʼsò aŋ ghu kə təma kə ghûw wəla ù mò doʼ an ndàŋ è kə̀də̀ŋ e te mo ghe ŋ ghəa gho am bàa tə te to tə bə̀ghà tɔm naŋa, mo ghe ŋ nyəme fè zɔʼ naŋa tsughu mə̀ŋ tò a te alo təlùʼu sə̀ghàmbəgha.

² Mùghò n daŋso kòʼ tughu kə tsə̀ndə̄ghā è Kə̀zə̀ è nàʼn wô ghəa gho an dzə̂ è tughu enyəa, “À kɔʼ kpe ndugho ù lò alezʉ̀mè nughù kɔ̀ʼ mə̀ŋ tə te to, ù zèe tsughu sughò nyəme u kəmwàʼso u te wo a?”

³ Ghùw n yo alo kəwālā ŋkāa aŋ ghueekətsə̄ ŋkāa an naʼ zə evʉ̄ ù lò alezèe tsughu nyəme u kəmwàʼsò u te wo, ŋkāa alebùʼù lɛɛ̄n nyəā tsughu a te.

⁴ Mùghò ŋ kè dì sə̀ è wo, biso dì tsɔ̌ʼn tsughu enyəa ghùw yò dzə̂ ù kɔʼ kpē alezèe tsughu nyəme u kəmwàʼsò u te wo ŋkāa alelɛɛ̄n nyəā tsughu a te.

⁵ Tsoʼ e mɔ̀ʼ an tsoʼ ti n daŋso dzɛ̀ â mùghò enyəa, “Kà dî; Kòʼô, tsɛɛ̄kəbə̄ghā e ndùghù è Dzudà, ù sə an tigh kə Dɛvìd n təmzə daʼa kə ebo ko, vʉ̀a ù lo alezʉ̀mè nughù mə̀ŋ tə te to sə̀ghàmbəgha àsùghò alezè nyəme u kəmwàʼsò u te wo.”

⁶ Mùghò kòʼ tsʉa u ndzì ù ti am faʼnlo e ndàŋ è kə̀də̀ŋ zə̀ asùghò ŋgòʼ è fʉgha ù tughu ù li wo u chùakò u lo â tuw ko àsùghò am bvʉa e tsoʼ tì, tsʉa u ndzì vʉ wə n lo ko to ghe n sugho wi. Wə ŋ ki təndɔ̄ŋ sə̀ghàmbəgha àsùghò sə gho sə̀ghàmbəgha, mò à fi lo zə̀a ŋ Kəzə̀ mə̄n sə̀ghàmbəgha ghe tum sə wo am mbī e dzə̀m.

⁷ Ù n daŋso ndùw nì nùghù kɔ̀ʼ nyəme u kəmwàʼsò u te wo aŋ ghu kə̀ təma kə ghûw wəla ù mò doʼ an ndàŋ è kə̀də̀ŋ e te.

⁸ A m bùghò ù daŋso nî kɔʼ nyəme u kəmwàʼsò u te wo, fʉgha ù tughu vʉ̀ u chùako u fə̀ lo â tuw ko àsugho tsoʼ ti to ŋghəm m bə̀gha à ghè tò tə chìakò m bvʉ̀ nyə̀ŋè ndùw a tsəlà tsʉa u ndzì vʉ̀, chìa à bòm kə n tee ko aŋ ghu, àsùghò kàŋà mə̀ ètsɛ mò, mò a te lue kɔʼ ko ènyeē, mò à lò gɔ̂ŋlò e ghì a Kəzə̀.

⁹ Ghe n zôo zom è fughu zo, zoo tsughu enyəa, “Ghǔ ŋ kɔʼkpe alenìi kɔʼ nyəme u kəmwàʼsò u te wo, àsugho alezʉ̀mè nughù kɔʼ mə̀ŋ e te, tɔŋlo enyəa ghe maā ghû wì, ghù n nì kɔ̀ʼ kâŋ tə̀ghà zuesə tsughu aghî a te an ndùm tə̀n tə̀ dzə̀m àsùghò ghì ghən a dzə̀m ghe dzeŋe saʼā shwaʼ wo u mɔ, an tum wən ù dzə̀m, aŋ ghì ghə̀n à dzə̀m an nàʼà tə̀n tə̀ dzə̀m, ghù n nì fùghù wò â Zə̀ kò.

¹⁰ Ghù ŋ ghəəŋ tsughu ghee enyəa ghe doʼò tsughu naʼ e kədə̀ŋ, ghe e lo fɔ̀e tò â Zə̀ kə sɛ̀ kò, ghe e saʼa tuw u aghì ghò a dzə̀m aŋ ghueekətsə̄.”

¹¹ Mùghò lɛɛn kpeʼe e nduw, zùw ndùw dzə̀ tə ndə̀mà tə bɔm tə təkam tə tsə̀təndə̄ghā to mò ghùw yò aletaŋ, tə zoō ghəa gho, mo tə n dzə̀ŋ ŋgəa kɔʼ ndàŋ è kə̀də̀ŋ è te àsùghò tsoʼ ti to àsùghò fʉgha ù tughu vʉa u ki mughù zò.

¹² Ghe n zoo sə̄a kɔʼɔ àghəa an dzə̀ tə̀ tughu to enyəa, “Tsʉa u ndzì wəla ghe mò wi ŋ kɔʼ kpe alekele ùdwaʼa, ekum, etɔ àsùghò sə̀ŋ zò, ŋkɔʼso, ùkɛɛ àsùghò bughuso zo!”

¹³ Mùghò n zuw fʉgha wən u dzə̀m Zə kə fə̀ gbə̂n wo — wəla u lô alo kəwālā, aŋ ghueekətsə̄, an naʼ zə evʉ àsùghò an dzùghùntsòʼ u zoō ghəa gho enyəa, “Â wən wəla ù dòʼ an ndàŋ è kə̀də̀ŋ è te àsùghò â tsʉa u ndzì u te wo, ebughuso, ukɛɛ, ŋkɔʼso, àsùghò dwaʼa wo wə e lo u ghee wo, to mbī kê bughò mîa.”

¹⁴ Nyôm tè tughu tì tə chìakò m bɛlɛ̀ kɔ̀ʼ enyəa, “Zə e lo ko êzə̀!” Tsoʼ ti n tə̀m ndùw tə̀ŋguʼ a vʉ̀a ghee, fùghù ndùw ghee â kɔʼso mò.