Edêe Fughu 4 - To kə Kəzə̀ kə̀ Fughu ko

Dzɔ̀n kôʼ an udzǒo aŋghəa ghe kɔʼso Zə̀ kò a te alo Kəwālā

¹ A m bùgho kôʼ M̀ mɛʼɛ̀ tsughu ghəa ghən gho, mùghò n lɛɛn kɔ̀ʼ è nduw, kòʼ kpèʼe ndùw ghəa à li gho tò Ŋ̀ koʼò an udzǒo, mughò ŋ kòʼ ndùw fuū u ndughu alo kəwālā mo wə n tsʉ̀ dòʼò! Dzə̀ zəla M̀ mô bûʼ zuw è kə̀aa wô mugho â ghəa gho to mbuwlì lò kuū, n dzɛ̀ â mùghò enyəa, “Sə kɔ̀ʼ wò fɛ, tò Ǹ dêe wô fəgha kəla kə ki alenì kə̀bala abugho ghəa ghən tsəghà tsughu.”

² Zuʼ tə Kəzə̀ tə̀ n daŋso tsom kɔʼ mugho, mùghò ŋ kòʼ ndàŋ è kə̀də̀ŋ e lì ti fughu alo kəwālā mò ghùw dòʼ te!

³ Ghùw wəla ù fə̀ doʼ a te, kôʼ e wən zə n nyəghanlo tò tia à li gho ghe fə̀ tɔŋlo enyəa à lò dzaspà àsùghò kànilìyàn, gbò kə ŋgə̄m kə dzə̀ŋ ŋgəa kɔʼ ndàŋ e də̀ŋ e te, kə m fween ko tia è ləŋo zo ghe fə tɔŋlo enyəa à lò emɛlàld.

⁴ Ndàŋ tə udwə̀ŋ ŋghəm m bə̀ghà à ghè tò tə chìakò n tèe dzə̀əŋ ŋgəa kɔ̌ʼ ndàŋ è kə̀də̀ŋ zə̀, an ndàŋ ten à n dòʼ tətsōʼ ŋghəm m bə̀ghà à ghè tò tə chìakò mo ghe n dzəlà kèle sàŋ tə̀ fəma to, àsùghò twàaŋ wò alo utūw mo ghe tsə tsughu alo etsɛ̀.

⁵ A fughu an ndàŋ è kə̀də̀ŋ e te, ghuuw zə m mwɛ̂ɛn sə̌a wò, bɔ̀ŋ mə̀ ŋ kûu sə̌a wò sughò fughu, ghuuw zə ŋ kəmà sə̌a wò sùghò. A fughu an sə kə ndàŋ è kə̀də̀ŋ sughò, kɛ̀ʼɛ̀ wə̀ n ti sə̀ghàmbəgha bəghanlo, mò à lǒ zə̀a ŋ Kəzə̀ ŋ te mò sə̀ghàmbəgha.

⁶ A fughu a vʉ̀a ndàŋ è kə̀də̀ŋ e te, an lo sugho dzùghùntsòʼ mo bugho e te e lo kuŋèkuŋè, mùghù n te mə̀ n zɔn daŋso nyə̀ ndùw ènyə tò kəlùwŋgɛ̀lɛ kəla kə zɔn tɔɔ̄ŋ daŋso nyəa nduw. Aledzə̀əŋ ŋgəāa kɔʼɔ sughò ndàŋ è kə̀də̀ŋ e te, fʉgha u sə̀a tughu u li wə tee tsə̀ghà wò a fughu u chìakò, nyôm tə te tə ŋ ki ndə̀mà tə asə, esə̄ àsùghò ebàm.

⁷ Fəgha kə sə̀a tughu kə̀ sûesʉ kə n lo tǒ tsɛɛ̄kəbə̄ghā, nyòoŋgwən è sə̀a tughu kə kə̀bə̀ghà kən n lo tǒ mbɔ̀ŋ tsətaʼà, fəgha kə sə̀a tughu kə kə̀təgha kən n lo à sʉ wo tò sʉ u ghûw, fəgha kə sə̀a tughu kə kə̀chìakò kən lo tǒ mbuʼ è zəghaa wo e dzūŋ.

⁸ Am fʉgha u sə̀a tughu wən u chuakò sughò, chìa ŋ ki nduw təghûo tǔu, chìa ŋ kelel ŋgə̀a tsə̀ghà wò ko asə a zəŋo ughùe u dzə̀m àsùghò a tsəla təghùo, ghe n zoo zēe ndùw àghəa bùghò zǒo bwīi ndùw mo ghe bughu yo, enyəa, “Ù zɔ̀lɔ, ù zɔ̀lɔ, ù zɔ̀lɔ, ù lò Tsə̂tə̀mbî Zə̀ kə̀ ghaʼa ko, kəla ù fə̀ lô tsəgha, chia kə lǒ êzəŋ, chia kə lo ki sughò alebùghò.”

⁹ Nəgha tən tə dzə̀m fʉgha u sə̀a wən fə̀ ti fughuu ndûw unyoʼ àsùghò zɔ̀ɔŋ kò â ghùw vʉ̀a ù dǒʼ fughu an ndàŋ è kə̀də̀ŋ e te, wəla ù mùghùu tən to mbī kê bughò mîaa.

¹⁰ Tsoʼ tən ŋghəm m bə̀ghà à ghè tò tə chìakò n tə̀m nduw tə̀ŋguʼ, fughuu ndùw sùghò ŋkɔʼso â ghùw vʉ̀a ù dòʼò tən an ndàŋ e kə̀də̀ŋ to mbī kê bughò mîaa, ghe n tsɔʼn màʼà tsùghu twàŋlò u kədə̀ŋ u ghee a sə̀a ndàŋ e kə̀də̀ŋ è te, zoo tsughu àghəa enyəa,

¹¹ “Ghù kpe nû a Tsə̂tə̀mbî waʼa àsùghò Zə̀ kaʼa ko enyəa ghî ghə̀ è fughuu ghû â ŋkɔʼso, àsùghò səghanyəa mò, nu a fə̀ fʉgha wo u dzə̀m gbən wo ghû, ghù fə̀ ləghaa enyəa fʉgha wə̄n e lo, zə lo e ghee ghù fə̀ gbə̂n wo fʉgha u te wo aŋghəa ghù fə̀ ləgha tsughu.”