Bìoball air-loidhne

Edêe Fughu 22 - To kə Kəzə̀ kə̀ Fughu ko

¹ Tsə̀ndə̄ghā e Kə̀zə̀ n daŋso dè wò mughò â dzùghù e kuŋu səa wo an ndàŋ è kə̀də̀ŋ è Kə̀zə̀ zə̀ àsùghò a zə̀ŋo Tsʉa u Ndzì u te wo, dzùghuu e te ŋ ki mùghù məla m fughu mughù zò, mò n zɔlɔ nyəghanlo tò eshiaghɔŋlo.

² Dzùghùu e te ŋ kuŋu tsə̀ghà tsùghù an tsə̀tèʼe fə enaʼ. Kàʼ məla m fughuu mughù zò mə̀ n nomlo aŋ ŋgùŋù tə dzughù tə te to am bàa tə te to tə bə̀ghà, kàʼ n te mə̀ mʉa utwam tənəgha eghəm à ghè tò tə bə̀ghà alo kənùm, m màʼa fə̀ mʉa twam wo alo təndzɔŋɔ tə dzə̀m. Fôo tə ŋkàʼ tə te tə n lo alebaŋlo ghì an nàʼa tən tə̀ dzə̀m a te.

³ Fəgha kə̀ li kôom yò dzə fughu alo enaʼ mò à kà bǒo naŋa dzə̌ Zə̀ kò. Ndàŋ è kədə̀ŋ e Kəzə̀ àsùghò e Tsʉa u Ndzì tə e ke lo fùghu êzə̀, kɔ̀ɔ ŋ wə̄n mə̀ e ke e fughu wə̄n â kɔʼso mò.

⁴ Ghe e ke koʼo sugho sʉ u wə̄n, zən e wə̄n zə e ke lo sugho aŋ kàʼ mə̀ esʉ ŋ ghee.

⁵ Ləm kə e ke koōm bvʉā yo fughu alo enaʼ — ghe e ke koōm ki yo ghəa è li zo aleghəŋlo ghèe ghê kɛ̀ʼɛ kò ŋkāa â tsə̀, tɔŋlo enyəa Mughu ù te, Kə̀zə̀ kè lǒ tsə̀ â ghee, ghe e ke saʼa tò udwə̀ŋ, mo kwu e kə̀də̀ŋ e ghee kê mìaa kòʼ yò.

Bughò e Yɛso

⁶ Tsə̀ndə̄ghā e Kə̀zə̀ n dzɛ̀ â mùghò enyəa, “Shwaʼ wən lo shwaʼ wəla ghî a lo aleboō fughu a te, vʉà ù lô êsəŋòʼ. Tsə̂ntə̀mbî Kəzə̀, kəla kə fughuu Zuʼ tə̀ Zɔlɔ to â ghiīshʉ̀ghà a wə̄n gho n tùm wo tsə̀ndə̄ghā e wə̄n enyəa e bùghò dêe fughu wô â kɔ̀ɔ ŋ wə̄n mò fəgha kəla kə kuʼn ki alenì kəbəla.”

⁷ Yɛso n dzɛ̀ wò enyəa, “Kòʼô! Ǹ lo kùʼn bughò nù! Dzɔ̀ lǒ ghùw wəla ù naāŋ shwaʼ wəla u lo am Mwàʼsò kə ushʉ̀ghà kən!”

⁸ Mùghò Dzɔ̌n, mùghò ŋ ghəa ghən zuw, yìa Ŋ̀ kôʼ mɛʼɛ̀ sugho. A m bùghò Ǹ zuw ghəa ghən gho, kòʼ mɛʼɛ̀ e sugho, mùghò n tə̀m ndùw təŋguʼ a vʉ̀a tsə̀ndə̄ghā zə̀a e mò dê fughu wo mugho â ghəa a te gho;

⁹ Tsə̀ndə̄ghā e te ŋ kuuwn dzɛ̀ â mùghò enyəa, “Kà ghəəŋ dzə̀ èzə̀! Ǹ lo sugho fəkɔ̂ɔ tò ghû ghɛ̀ â ghê waazughu ghò tɔ̂ɔŋ ghiīshʉ̀ghà àsùghò ghì ghəla ghe naāŋ fəgha kəla ghe tɔm naŋa am mwàʼsò kən. E kɔʼso nduw Zə̀ kò!”

¹⁰ Zə̀ n dzɛ̀ â mùgho enyəa, “E kwo ko ghù lo nalà naāŋ ghəa a ushʉghà ghəla ghe tɔm naŋa fɛ am mwàʼsò kən, tɔŋlo enyəa nəgha zə n sū â ghəa ghən gho alenì kəbəla.

¹¹ Naŋâ to ghî a biigh ghə e ghəəŋ nduw ko bo zo, ghî a dzəa ghə e ghəəŋ nduw ko dzə̀adzə̀ tə aghəa to, ghî a dzûŋ ghə̀ e ghəəŋ nduw ko ghəa a dzûŋ gho, ghî a zɔlɔ a doʼò təla ndûw ko ghì a zɔlɔ gho.”

¹² Yɛso n dzɛ̀ wò enyəa, “Kòʼô! Ŋ̀ kuʼù bùghò nu â namso kaŋā ko alebùghò tsə aghî am fwaʼ kəla ghe lo mo ghee m fwàʼ.

¹³ Ǹ lo kəsə lò sugho kəbam. À zìi tsùghu mùghò ghəa gho a dzəm, yìa à mìasò sugho ghəa gho a dzə̀m.”

¹⁴ Dzɔ̂ lò ghî ghəlà ghê sûuw zɔnso tsugh dalà tə ghee to enyəa ghe e ki daʼa ko alekwɛ̀ɛ zə tam kə fəkàʼ aŋ kàʼ fəla fə fughuu mughu zò, ghe e lo sugho aletsə̀ghàa nyə am fu e ughɔŋ zə naʼ e te zò.

¹⁵ Ghî ghəla ghe yo dzə an naʼ e te fo lo ghî ghela ghe ghəə̄ŋ dzə̀adzə̀ tə aghəa to, àsùghò ghì a uvùŋ ghò, ghəla ghe nûuŋ kaŋlo àsùghò ghəla ghe wii ghî gho, ghəla ghê kɔʼso mùʼù mò àsùghò ghəla ghe kaʼn gha gho aŋ ghəa ghee kə̀a gho àsugho aŋ ghəa a ghee à ghəəŋ gho.

¹⁶ “Mùghò Yɛso, mùghò n tsə̀ndə̄ghā e Kəzə̀ zaŋa tum wo a vʉ̀a ghù â shwaʼ waŋa wo alenàʼà ndûw an dzweŋe u ghì a Kəzə̀ wò. Ǹ sə e an tiigh kə Dɛvìd, yìa Ǹ lo sə̀ghàbəlà fə gbəlàgbə̀là fə̀ nyəghaan fo.”

¹⁷ Zuʼ tə̀ Zɔlɔ tə te to ghèe ghê wì ù Tsʉa u Ndzì e te wə n dzɛ̂ enyəa, “Bùghò!” Ghùw wəla ù zuw ghəa ghən gho telè ki sugho aledzàa tsughu enyəa, “Bùghò.” Ghùw wəla fə̀ŋ è m̀mùghu zuʼso wə̄n, ù bùghò. Ghùw wəla u mbùŋlo alemʉ mùghù məla m fughuu mughù zò ù nìi kɔʼ kə̀nughùnùghù.

E tsughuu tsən

¹⁸ Mùghò Dzɔ̀n, M̀ fɛ tɔ̀ʼɔ̀ kwɛ̀ɛn wò ghɛ̀ a dzə̀m ghəla ghè zuuw shwaʼ u ushʉ̀ghà u mwàʼsò kən. Abugho ghùw baʼso ghəa zo am mwàʼsò kən, Zə̀ kə̀ lo tuū wô zəŋ təla ghe teso naŋa am mwàʼsò kən a zəŋo wə̄n.

¹⁹ Abugho ghùw nì nughù sə kɔʼ ghəa zo am mwàʼsò kə shwaʼ u ushʉ̀ghà kən, Zə̀ kə lô nî nughù tuʼ e wən aŋ kàʼ fəla fə fughuu mughù zò, mò ù kə̀ nyə̌a sùghò yo zo an naʼ è zɔlɔ zo aŋghəa ghe teso naŋa am mwàʼsò kən.

²⁰ Wə̄n wəla ù tèso dzâa wô ghəa ghən gho dzɛ̀ enyəa “Kùmkùm Ǹ lo kuʼù bùghòo nù.” Zə e lo ko êzə̀. Bùgho a Mùghùbè Yɛso!

²¹ To Mughùbe Yɛso mò dê ghî a Kəzə̀ a dzə̀m â dzɔ̀ e wə̄n zo.

« Roimhe

Air adhart »

2020

Lean sinn:

Ceanglaichean taic

Sanasan