Edêe Fughu 21 - To kə Kəzə̀ kə̀ Fughu ko

Mbī e fughu

¹ Mùghò n daŋso kòʼ ndùw wala kə̀ fughu ko àsùghò ghueekətsə̄ kə̀ fughu ko; nu wala kə sûesʉ ko àsùghò ghueekətsə̄ ko mafə tsəghà mìaa, dzùghùntsòʼ ŋ kôom yò dzə̂.

² Mùghò n daŋso kòʼ ndùw naʼ è zɔlɔ zo, tɔɔŋ Yɛ̀lusalɛ̀m è fughu è te, è səā tsughuu wô alo kəwālā, è nùghù wo a vʉ̀a Zə̀ kò, mo ghe n dzə̀ tǒ wìzən ghe so e ndûw fughu alô nùm.

³ Mùghò n daŋso zùw ndùw ghe dzɛ̂ sə wo fughu an ndàŋ è kə̀də̀ŋ e te an dzə̂ è tughu enyəa, “Kòʼô, luʼū kəla Zə̀ kə̀ mughu a te lo dzəəŋ ghèe ghê ghì ghò. Kə lo mùghùun ghèe ghee, ghe e ke lo ghî a wə̄n gho, kə e ke lo Zə̀ kə ghee ko.

⁴ Ù lo zêe maʼà tsughu sə̀ mə̀ èdì ŋ ghee, vʉ e kê koōm yo, ghî ghə̀ ke koōm diīn yo, zuuw sùghò yò fɔɔn zo, tɔŋlo enyəa mbī è wǐi n tsə̀ghà nùghù.”

⁵ Ghùw wəla ù mò doʼ fughu an ndàŋ è kə̀də̀ŋ e te n daŋso dzɛ̀ tsùghu wò enyəa, “Êzə̄ŋ, Ŋ̀ ghəəŋ tsughuu nù ghəa ghə̀n à dzə̀m kòom doʼo tsughu à fughu gho.” Ù ŋ kòom dzɛ̀ kpèʼe tsùghù sùghò enyəa, “Tɔm naŋa tsughu ghəa ghən gho, tɔŋlo enyəa shwaʼ wən lo ushwaʼ ghî à lo aleboō fughu a te, vʉa u lô sugho èsəŋò.”

⁶ Ù n daŋso dzɛ̀ â mùghò, “Ghəa ghən a dzə̀m n tsə̀ghà mìaa! Ǹ lo Kəzìi lò sugho Ekuʼù! À ghəa gho a dzə̀m zîi tsùghu mùghò, yìa à mìasò sughò mugho ghəa gho a dzə̀m! Ghî ghəlà fə̀ŋ zuʼso ghee, Ǹ lo tuuwn fughuu nu ghee â mùghù mò an sə e dzùghù zəla e fughu mughùu zò mo ghe kâ fəgha kə tsə.

⁷ Ghùw wəla ù lo ghaʼ tsughu ghəa a biigh gho kê zə̌a fʉgha wə̄n, Ǹ lo doʼò tsughu Zə̀ kə wə̄n, ù è ke lo wɛ waŋā.

⁸ Yia a bugho ghê mgbêbvʉ̄, ghî ghəla ghe taʼkè boō fughu, ghî a dzəa gho, ghəla ghe wiī ghî ghò, àsùghò à nuūŋ gho, ghî a uvùŋ, ghəla ghe kɔʼso zʉ̀ ù li wə̄n, àsùghò ghî ghə agha a dzə̀m, luʼu ke ghee kê lǒ fɛ̀ɛn fɛ̀ɛn kə wə̀n kəla zuʼ kə biigh kə səa wo àsùghò nyoʼ ko ghe tɔŋlo enyəa à lò sulfò, mò à fi lò e kpuūw kuenlò.”

Yɛlusalɛ̀m è fughu è te

⁹ Tum an tum tən sə̀ghàmbəgha ghe mò bûʼ ki kə̀ŋò mə̀n sə̀ghàmbəgha, məla zəŋ təla tə doʼò gûŋso tsughu sə̀ghàmbəgha lue doʼò a te, m bùghò dzɛ̀ â mùghò enyəa, “Bùghò Ǹ dêe wô ghù â wìzən, wi ù Tsʉ u Ndzì u te wo.”

¹⁰ Zuʼ tə zɔlɔ tə n nyəən tsughu mugho, Tsə̀ndə̄ghā è Kəzə̀ n daŋso bòʼò nùghù kɔʼ ndùw mùghò an ndɔ̀ŋɔ̀ndɔ̀ŋɔ̀ fə də̀ghàa kə ukwàʼ kə̀ li ko, dè tsùghù wò mùghò â Yɛ̀lusalɛ̀m, naʼ è zɔlɔ zo, mo zə e səā tsughuu wô alo kəwālā e nughù wo a vʉ̀a Zə̀ kò.

¹¹ Naʼe te zə n lo an səghanyəgha ŋ Kəzə̀, nyəghanlo tò tia è li zo e nyəghanlo tò kəlùwŋgɛ̀lɛ, nyəghaan sùghò tò eshiaghɔŋlo.

¹² Naʼ e te zə ŋ ki faŋkwu kə bəgha kə ughɔ̄ŋ kə̀ daā kə̀ li ko kə dâ mîa kɔʼ nduw edzuŋ, à fu e ughɔŋ zo eghəm à ghè zò e bə̀ghà, tsə̀təndə̄ghā tə Kəzə̀ tə n lo eghə̄m à ghe tò təbə̀ghà a fù e ughɔ̄ŋ e te zo, mo ghe n nyàʼ nàŋa kɔʼ zən a tuw u təndughu wən èghəm à ghè wò u bʉ̀ghà aŋ wɛ ghə Ezə̀lɛ̂ fughu a fù u ughɔŋ u te wo.

¹³ Fu e ughɔŋ e təgha zə n lɛɛn ndùw tsə kə̀ səa ko, e təgha e li zə lɛɛn ndùw tsə kə ekùw kò, e təgha è li zən lɛɛn ndùw tsə kə e màm ko, fu e ughɔŋ è li zən e təgha zə n lɛɛn ndùw tsə kə̀ bəŋo ko.

¹⁴ Ghe mò bəgha ghɔŋ wə naʼ u te wo an tia a kəbəghalo eghəm à ghee gho a bəgha, mo ghè n tɔm naŋa zən a tum tə Tsʉa u Ndì tə̀n eghəm à ghe tò tə bə̀ghà an tia a te.

¹⁵ Tsə̀ndə̄ghā zəla e mò kəa wô ghəa gho â mùghò ŋ ki fòʼ tǒ mbàŋ fə etsɛ aŋ ghu alefòʼ naʼ zə a te, àsùghò fu e ughɔŋ e te zo àsùghò bʉgha ù te wò.

¹⁶ Bʉgha wə naʼ u te wo ù dzəm m bɔɔm kele tsəghà wo foʼ e mɔ̀ʼ, dəghànlò n te mə̀ m bɔɔm lò sugho tǒ zǐi n te mò. Tsə̀ndə̄ghā e te m foʼ tsùghù naʼ e tə zo am fôʼ è mbàŋ fì, fòʼ zə̀ enaʼ e te n lo kwə̀n n tə tàm m bə̀ghà à kam è bɔm tə tətàm tə chìako; dəghànlo n te mə̀ n lo eghəla e mɔ̀ʼ ghèe ghê zǐi n te mò àsugho dà e te zo.

¹⁷ Tsə̀ndə̄ghā è te m foʼ tsùghù bəgha kə ughɔŋ kə te ko, kə lo tətam ŋghəm tǔu à tàm tǒ tǔu an dà e te zo, aŋghəa ghî à foʼò fʉgha wo a te.

¹⁸ Ghe mò bəgha kə te kə bəgha alo tə shiaghɔŋlo; ghe ŋ kuuwn bəgha ghue u enaʼ e te zo am baabâ zə etsɛ̀ mo e zɔlɔ tò kə lùwŋgɛ̀lɛ kəla kə zɔn daŋso nyə nduw.

¹⁹ Ghe mo bəghàan kə ghɔŋ wə enaʼ kə te kə fəghaan tən ko n kɔɔ tə atia tə dzûŋ tò. Tia è kəbə̀ghānlò e sʉesʉe zə ŋ ki eshiaghɔŋlo, e kəbə̀ghànlo e kə̀bə̀ghà zə ŋ ki tia fə̀ nî, tia e kə̀təgha zə ŋ ki udzʉ̂adzʉ̀a, tia e kəbə̀ghànlo e kə̀chìkò zə ŋ kə tia ghəla a ləŋo lòʼ tò kəghê,

²⁰ tia e kəbə̀ghànlo e kətɛ̀ zə tia zəla e ləŋo tò kənɛ, tia e kəbə̀ghànlo e kətǔu zə ŋ ki ŋkɔbɛ̀lɛ̀, tia kəbə̀ghànlo e kə̀səghàmbəgha zə ŋ ki tia è li zo nyəghaan ləŋo nduw tò tuw kə kəghè, tia e kəbə̀ghànlò e kěfaa ŋ ki tia e kə məghaməgha, tia e kəbə̀ghànlo e kə̀tɛ̀ndzughu zə̀ ŋ ki tia zəla e mò nyəghaan baŋa tò unumlo, tia e kəbə̀ghànlo e kěghəm zə ŋ ki tia e li zo ghe mò tɔŋlo enyəa kə̀lesopə̀lɛ̀s, tia e kəbəghànlò e kěeghəm à ghè zò e mɔ̀ʼ ŋ ki tia zəla e ləŋo tò kəwālā, e kəbəghànlò e kěeghəm à ghè ghò a bəghà zə̀ zəla ghe tɔŋlo enyəa à lò ametyst.

²¹ Ghe mò fu e ughɔŋ zən e eghə̄m a ghe zo ebəgha ghəŋlo am fə̀ghà n nyə̀ghanlo n li mò ghə tɔŋlo enyəa à lo pɛ̂ɛl eghəm a ghè mò m bəgha, ù fu u mɔ̀ʼ alo fə pɛ̂ɛl fə mɔ̀ʼ. Ghe n bəgha tsughu dziī tə tənàʼà tə to am baabâ zə etsɛ̀ mo e zɔlɔ tǒ lùwŋgɛlɛ kəla kə zɔn daŋso nyə nduw.

²² Mùgho ŋ kè kôʼ ndùghù è Kə̀zə̀ e ne è li zo fughu alo enaʼ, tɔŋlo enyəa ndùghù e Kəzə̀ e ne zə̀ ena e te màʼa fə̀ lo Tsə̂ntə̀mbî Zə̀ kə̀ ghaʼa kən kə̀ dzə̀m ghèe Tsʉa u Ndzì u te wo.

²³ Ezuw ŋkāa dzɔ̀ŋ buʼ ki yo fwàʼ kò fughu alo enaʼ, tɔŋlo enyəa səghanyəgha ŋ Kə̀zə̀ n lo tsə̀ a fughu alo enaʼ, Tsʉa u Ndzì vʉa u baŋà sugho fughu alo enaʼ tò kəkɛ̀ʼɛ̀.

²⁴ Ghî a nàʼà tən tə dzə̀m e ke bwiī tsəgha an tsə̀ e naʼ e te zo, ù dwə̀ŋ u mbī wən ù dzə̀m lo nîi wô â fʉgha u ghee u dzə̀m an naʼ zən.

²⁵ Fu e ughɔŋ zə e naʼ e te zo ke lo tsəgha ko tùghò tsuʼù mə n dzəm, tɔŋlo enyəa tsuʼ u kê dzə̀ kòʼ yǒ a fùghù ezə̀.

²⁶ Ghe lo nìi wò kɔ tə ufʉgha tə nàʼà tə̀n tə dzə̀m àsùghò kum e ghee zo a fughu êzə̀ an naʼ e te zo.

²⁷ Fəgha kə li kə ke kòom tsə̀ghà nyə yo fughu alo enaʼ mo ke dzəa nù, ghuw wə agha kê nyə̀ yo fughu alo enaʼ ŋkāa ghuw wəla ù ghəəŋ ghəa tuw kə̀ dala ko. À lǒ fughu nyəa ko ghì ghəla ghe lo mo ghe n tɔm naŋa zən a ghee gho am mwàʼsò kə emùghù kə Tsʉa u Ndzì e te.