Edêe Fughu 20 - To kə Kəzə̀ kə̀ Fughu ko

Tsə̀ndə̄ghā è Kəzə̀ kɔ̀n nàŋa Satàn alo tənùu Kàm

¹ Mùghò n daŋso kòʼ tsə̀ndə̄ghā è lì səā tsughuu wô alo kəwālā, mò è kì tsʉ kə kəbùʼ kəla kə kuʼù yo aŋ ghu kə wə̄n àsùghò faŋkwu kə tsaʼ kə̀ li ko.

² Ù ŋ kwu kɔ̌ʼ ŋgə̄m zə̀, zùghù è wǐiwǐi e zə̌, zəla à lò Avʉatsə̄a, lò sugho Satàn, kɔ̀n nàŋa tsughu wə̄n enyəa ù dòʼò fughu alo tənùu kam.

³ Ù n nì màʼà nyə̀ tsùghù ndùw wən fughu alo kəbùʼ, dzʉ̀a fè nàŋa ndùw wə̄n fughu, enyəa e kwo ko ù lò kôom sè mə̀ŋso sugho naʼà tò am mbī, mò a gɔ̀ʼɔ̀ ko mo kam è tə̀nùu zən bùghò tsəghà nughù. Abugho nəgha zən lo tsəghà tsughu, ghe lo ki aletsʉā zəghà tsugho wə̄n aŋ kə̀mà fə enəgha.

⁴ Mùghò n daŋso kòʼ ndùw ndàŋ tə udwə̀ŋ, ghî ghəla ghe mò doʼ a te n lo ghî ghəla ghe fughu ghee â dwaʼa wo alesaʼa naʼà tò. Mùgho ŋ kòʼ sùghò gwən a ghì ghəla ghe mò gbôon tuw u ghee wo bòʼ ghe fə̀ lo ghê bvûʼnɔ̀ʼ a Yɛso, ghe n naʼn sùghò shwaʼ u Kəzə̀, ghəla ghe mò doʼŋkè fughu ŋkɔʼso â nyòoŋgwən è ne zə̀, ŋkāa mùʼù fə wən fia fə fweēn wə̄n, kè nîi sughò tsə̌a è nyòoŋgwən zə aŋ kàʼ mə̀ esʉ ŋ ghee ŋkāa aŋ ghu a ghee. Ghe n nùghù dòʼò wò â tuw ko, ghe n saʼa am mbī ghèe ghê Kə̀lestò tò udwə̀ŋ am bɔ̀m n tə̀nùu eghə̄m.

⁵ Ghî à kpuwnlo à li ghən kafə̄ nughù dòʼò kòʼ wò â tuw ko mo kàm è tə̀nùu zən kâ tèlè tsə̀ghà tsùghù dzə̀. Zə̀n lo nəgha e sûesʉ zo Zə̀ kə̀ lo zôo nughùu kɔʼ ghî gho a te alo evʉ̄.

⁶ Dzɔ̀ lò ghî ghəla ghe lo kɔʼɔsəā alo evʉ̀ an nə̀gha e sûesʉ zə̄n, nu ghe lo am fɔe kə ghì a Kəzə̀ a zɔlɔ! Vʉ e kəbə̀ghà zəla e dzûum wo kôom kì yo daʼa kə̀ li ko a zəŋò ghì ghən, ghe kê kǔuwn lǒ tuw u tə̀fɔ̀e u Kəzə̀ àsùghò u Kə̀lestò wò, ghe e ke saʼa am mbī ghèe ghê Kə̀lestò am bɔ̀m n tə̀nùu eghə̄m.

Ghe təmzə̄ Satàn

⁷ Abugho bɔm m tənùu mən eghəm lo bughò tsəghà tsughu, ghe lo zêe zəghàa səā wô Satàn an ndùghù e tsaʼ e wə̄n.

⁸ Ù kè sə̌a wò alebùghò sêe məŋsô kâaŋ nàʼà təla tə lô kaŋlo am mbī, mo ghe naʼà tən tə tɔŋlo enyəa à lo Gɔ̂ʼ àsùghò Magɔ̀ʼ, alezùuŋ wô ghee an tsə a tsam; tàŋ è ghee lo n də̀m tò shiashia kə mǎakùw.

⁹ Ghe fə̀ sə mɛlɛ tsughu am mbī e dzə̀m, dzə̀əŋ ŋgəa kɔʼ bɛlɛ kə ghì à zɔlɔ gho, naʼ zəla Zə̀ kə ləghaa; wən wə ŋ kuuwn sə̀ tsùghù wò alo kəwālā bùghò tsughu kpàa màʼà kɔʼ ghee.

¹⁰ Ghe ŋ màʼà nyə̀ ndùw vʉatsə̄a ghəla a mò nɔm ghee aŋ wə̀n u fɛɛ̄n wo mo ghe kpâa kɔ̀ʼ am fəgha kə̀ li ko kə ki zuʼ kə̀ biigh ko ghe tɔŋlo enyəa à lò sulfò, a fia nyòoŋgwən è ne ezə̂ ghèe ghùwshʉ̀gha wə̀ agha u vʉ mò lo, a fia ghe kê tsôo zuūw zeē tsəghà ko fɔɔn zo bùghò zǔuw bwii ndùw to mbī kê bughò mîaa.

Tsuʼ fəla a kê zuūw dzughu e sāʼ zo a te

¹¹ Mùgho n daŋso kòʼ ndùw faŋkwu kə fə̀màfə̀m kə ndàŋ è kə̀də̀ŋ è lì àsùghò ghùw wəla ù dòʼ a te. Kəwala àsùghò ghueekətsə̄ kə n nùghù saŋ tsughu fughu an sə kə wə̄n, ghe ŋ kôom yò alekòʼ kəwālā àsùghò ghueekətsə̄ kə te ko.

¹² Mùgho n daŋso kòʼ ndùw ghì à kpuuwn gho, bvùʼù mə̀ aghì àsùghò ghì a səŋo ghò, ghe ti an sə kə ndàŋ è kə̀də̀ŋ zə̀. Tsə̀təndə̄ghā tə̀ li tə n tsʉnlo ùmwàʼsò, ghe n tsʉ kpeʼe kɔʼ mwàʼsò kə̀ li ko, mò à lǒ mwàʼsò kə emùghùu. Zə̀ kə̀ n sâ saʼ tə ghì à kpuuwn yì aŋ ghəa ghəla ghe tɔm naŋā fughu am mwàʼsò vʉ̀, ghe n saʼ ghe aŋ ghəa ghəla ghe lo mo ghe mafə ghəŋlo.

¹³ Dzùghùntsòʼ n tùŋù nàŋa sə kɔ̀ʼ wò ghì à kpuuwn ghəla ghe mò lo a te a beē. Evʉ àsùghò naʼ zə evʉ zə n zə̀ghàa màʼà wò sùghò ghì à kpuuwn ghəla ghe mò lo a fughu a te, Zə kə̀ n saʼ saʼ tə ghee a dzə̀m, chìa am fəgha kəla ù lǒ mò ù ŋ ghəŋlo.

¹⁴ Ghe n daŋso nì màʼà nyə̀ ndùw Èvʉ ghèe Naʼ zə Evʉ̄ zo aŋ fɛ̀ɛn kə uwə̀n kə̀ biigh ko. Fɛ̀ɛn kə uwə̀n kə biigh kən fɛ lò vʉ e kə̀bə̀ghà zəla e dzûum wo.

¹⁵ Ghùw wəla ghe mò kəŋo kêe tsughuu zən e wə̄n zo am mwàʼsò kə emùghù, ghe m màʼà nyə̀ ndùw wən am fɛ̀ɛn kə uwə̀n kə te ko.