Edêe Fughu 2 - To kə Kəzə̀ kə̀ Fughu ko

Shwaʼ u te wo â dzeŋe kə ghì a Kəzə̀ ghò an naʼ e Ɛfɛ̄sùs

¹ Yɛso n dzɛ̀ wò sùghò â mùghò enyəa, “Tɔm tsughu â tsə̀ndə̄ghā è Kəzə̀ è dzeŋe kə ghì a Kəzə̀ zə Ɛfɛ̄sùs enyəa; ‘Ghùw wəla ù ki sə̀ghàbəlà mə̀n mò sə̀ghàmbəgha aŋ ghu kə wə̄n kə̀ zə̀a ko, vʉ̀a ù bwìi wo am faʼnlo e twii u tə̀lâm wə etsɛ̀ wən sə̀ghàmbəgha dzɛ̂ enyəa,

² “Ŋ̀ kwo nû ghəa ghə̀là ghɛ̀ lo mò ghɛ̀ ŋ ghəŋlo àsùghò ghə̀là ghɛ̀ lo mò ghɛ̀ m fwàʼ, yìa Ŋ̀ kwo sugho zə zəla ghɛ̀ ka tsughu am fala zɛʼɛ. Ŋ̀ kwo sugho nû aŋghəa ghɛ̀ tsoō boōm naāŋ yô ghî à bǐigh gho an lùʼu kɛʼɛ, ghɛ̀ yia mɔ̂m kôʼ sughò ghì ghəla ghe tɔɔ̄ŋ ghue e ghee zo enyəa ghe lo tətūm mo ghe yô dzə̂, kòʼ tsùghù enyəa ghe lo ghî ghə agha.

³ Ŋ̀ kwo nû enyəa ghɛ̀ mafə nyɛʼɛ ŋge fala bòʼ zən zaŋa, ghɛ̀ ŋ kɔlɔ tsùghù sùghò tə̀fə̀ŋ, tsoo būghūu kòʼò yò.

⁴ Ghəa e kuuwn lò ko e mɔ̀ʼ aŋghəa Ǹ saʼa ghɛ a te, aŋghəa ghɛ̀ zəghàa maʼà tsughu ləgha zəla ghɛ̀ mò bûʼ ki a zəŋò mùghò àsùghò aŋ ghùe zɛʼɛ.

⁵ Mǒʼn wò aŋghəa ghɛ̀ mò bûʼ lo tsəgha a te tò ghɛ̀ è bughò bvʉ̂a kôom tsughu, kuuwn kɔʼ nlò am fə̂ŋ tɛʼɛ to, ghɛ̀ è ghəəŋ nduw ghəa ghə̀là ghɛ̀ mò buʼù ghəə̄n tsəgha. Buw êzə̀, Ǹ lo bughò sɔŋɔ̀ nughù kɔʼ ti kəlâm kɛʼɛ an luʼù kə wə̄n, tò ghɛ̀ ke telē kuuwn wo fə̂ŋ tɛʼɛ to.

⁶ Ghɛ̀ naam kuuwn ki nû ghəa è dzûŋ e li zo ghɛ̀ ghəŋlo, ghɛ̀ bâa ghəa ghəla ghî ghəla ghe boō fughu â Nikòlus ghəŋlo tò aŋghəa M̀ bâa sugho.

⁷ Ghùw wəla ù ki tuūŋ ko, ù zuw fəgha kəla Zuʼ tə̀ Kəzə tə̀ dzâa wo â dzweŋe u ghì a Kəzə̀ wən wo. Ǹ lo fughuu tsughuu kə̀làŋ, ghî ghəlà ghe ghaʼ tsughu ghəa à biigh gho, ghee e kʉɛɛ zəa tam kə kàʼ fə emùghùu fəla fə lo an sum u Kəzə̀ alo kəwālā.”

Shwaʼ u te wo â dzeŋe kə ghì a Kəzə̀ gho an naʼ e Smylnà

⁸ Yɛso n dzɛ̀ wò â mùghò enyəa, “Tɔm ndùw â tsə̀ndə̄ghā è Kəzə̀ è dzeŋe kə ghì a Kəzə̀ ghò an naʼ e Smylnà enyəa, ‘Ghùw wəla ù lò sə ko, lò sugho kəbām, wəla ù fə̀ kpuw tsughu, ù ŋ kòom nùghù dòʼò wò â tuw ko dzɛ̂ enyəa,

⁹ “Ŋ̀ kwo nû tsû wɛʼɛ wo àsùghò aŋghəa ghɛ̀ laa a te (dèe êzə̀ mò ghɛ̀ kuuwn kuu nù aŋ ghəa a Kəzə̀). Ŋ̀ kwo sugho nû shwaʼ ù biigh wəla ghî ghəla ghe dzɛ̂ enyəa ghe lo ghî a Tə̀dzûu, mo ghe yo dzə̂ kəa kaŋlō an tuw wɛʼɛ. Ghe lo ghî ndùghùne e Satàn.

¹⁰ Kà nlò tsəŋ dzə̀ ghəa è li zo ghɛ̀ lo ki alekùʼù fala tsughu a te. Kele tsughu nlò enyəa vʉatsə̄a a ki alekùʼù nîi dzə̂n ghɛ̀ â li gho an ndùghùtsāʼ, àsùghò enyəa to ghe mô mɔ̂ɔkoʼò tsughu ghɛ̀, ghɛ̀ doʼo an tsù alo ntsuʼu eghə̄m. Gaʼ tsughu ko nlò fə̂ŋ tɛʼɛ to a zəŋò mùghò abugho e lo enyəa ghɛ̀ bùʼ kì ko alekpuw a te, tò Ǹ lo fughuu ghɛ â mùghù zò tò kənamso.”

¹¹ “Ghùw wəla ù ki tuūŋ ko, ù zuw ghəa ghə̀là Zuʼ tə Kəzə̀ kə̀ te kə dzaā â dzweŋe u ghì a Kəzə̀ wò. Ghùw wəla ù ghaʼ tsughu bo zo, vʉ e kə̀ bə̀ghà zən lo mɔ̀m yǒ wə̄n.”

Shwaʼ u te wo â dzeŋe kə ghì a Kəzə̀ ghò an naʼ e Pɛ̀lgamùm

¹² Yɛso n dzɛ̀ kpèʼe wò â mùghò enyəa, “Tɔm ndùw â tsə̀ndə̄ghā è Kə̀zə̀ è dzeŋe kə ghì a Kəzə̀ ghò an naʼ e Pɛ̀lgamùm enyəa, ‘Ghùw wəla ù ki nyə fəla fə tɔɔ̄ bâa tə̀bə̀ghà dzɛ̀ enyəa,

¹³ “Ŋ̀ kwo nû luʼù kəla ghɛ̀ mùghù a te, a fia ndàŋ è kə̀də̀ŋ è Satàn lǒ. Ghɛ̀ těe tən tsughu ko an zən zaŋā, ghɛ̀ ŋ kè tuū maʼà boo zəla ghɛ̀ ki â mùghò aŋghəa ghe fə̀ tso bûʼ wi ko Antipàs, a fia Satàn mùghu. Antipàs fə̀ lo ghùw waŋa ù tùghu ù fə̀ teso dzâa ghəa ghaŋa gho â ghî ghò am fə̂ŋ e wə̄n e dzə̀m.

¹⁴ Nyàaŋ mə̀ ŋ ghə̀anlò n li lo ko nù Ǹ saʼa ghɛ a te; ghî a lo nu fì êzə̀ ghɛ̀ a ghee ghe bwiī an tsʉ̂ e Balàam zò, Balàam wəla ù fə̀ zoʼn tsughu Balàk aŋghəa ù lò aleseē nyəa ghî ghə Ezə̀lɛ̂ a te alo ebō, mò ù ghee gɔ̂ɔŋ tsùghù nû enyəa ghee e zəa fʉgha wəla ghe sɛ̂ nduw alo uzʉ̀kɔ̂ŋ, àsùghò enyəa ghe e ndzaŋa naʼ zo alo enùŋlò.

¹⁵ Ghɛ̀ bɔɔm ki sugho ghî a li êzə̀ ghe zuūw ndûw tsʉ̂ e ghì a Nìkòlùs zò.

¹⁶ E fi lo enyəa ghɛ̀ kì alekuwnlo. Buw êzə̀, Ǹ lo kuʼù bughò nù a fi alô ghɛ̀, alebùghò təm tsàm ghàʼ a ghee an nyə fəla fə lo an dzūghū zaŋā.

¹⁷ Ghùw wəla ù ki tuūŋ ko, ù zuw fəgha kə̀là Zuʼ tə Kəzə̀ te kə dzâa nduw â dzeŋe kə ghì a Kəzə̀ ghò.” Ǹ lo fughuu ghùw wəla ù ghaʼ tsughu bo zo â kə̀m kə̀ fʉ̀ghàzəa kə̀ li ko ghe tɔŋlo enyəa à lò manà, wəla ghe nân naŋā, Ǹ lo fughuu wə̄n â tia è fəma zo, à zən è fughu zo ghe tɔm naŋā an tia e te zo, mò ghùw ù lì kwò yo, mò à kwò ko ghùw wəla ù nì kʼ.

Shwaʼ u te wo â dzeŋe kə ghì a Kəzə̀ ghò an naʼ e Tìatilà

¹⁸ Yɛso n dzɛ̀ wò â mughò enyəa, “Tɔm nduw â tsə̀ndə̄ghā è Kə̀zə̀ e dzeŋe kə ghì a Kəzə̀ gho an naʼ e Tìatilà enyəa; ‘Wɛ̀ ù Kə̀zə̀, wəla sə a baŋa bɔ̀ɔ tò uwən, ghuw a wə̄n yia a nyəghanlo lo tǒ bvuʼ kəla ghe tsə tsughu alo kənàm ghe yia tsoʼso tsughu, ù dzɛ̀ enyəa,

¹⁹ “Ŋ̀ kwo nû ghəa ghə̀là ghù ghəəŋ ghè ghò, kwo ləgha zəla ghù ki, kwo boo zəla ghù boō fughu tsughu, kwo fwàʼ kə̀a, kwo sugho fə̀ŋ zəla ghù kɔlɔ tsughu; kùmkùm, êzə̄ŋ èbàm ghù m bùʼ fwàʼ tsə̀ghà fəgha kə̀là ghù fə̀ bûʼ fwâʼ sûesʉ.

²⁰ Ŋ̀ kuuwn ki ko ghəa zə̄n e mɔ̀ʼ Ǹ saʼā ghɛ a te; ghɛ gbən zə̀ghàa màʼà tsùghù wìzən wəla ghe tɔŋlo enyəa à lò Dzɛzɛ̄bɛ̀l, wìzən wəla ù dzɛ̀ enyəa e lo zən ù ùshʉ̀ghà, mo tsʉ̂ e wə̄n e nyuuŋ nùghùun ndùw kɔ̀ɔ maŋa enyəa ghe e ndzaŋa naʼ zo alo enùŋlò, ghe e zəa sugho fʉgha wəla ghe sɛ̂ nduw â mùʼù mò.

²¹ Mugho ŋ wə̄n â nəgha e fughu enyəa ù tiī kuwnlo, vʉ̀a ù kuūwn tuū enyəa e tii maʼà dzə̀adzə̀ tə aghəa tə wə̄n te to, ù kuwnlo.

²² Ŋ̀ ki alenìi təma naŋā tsughu wə̄n an chʉ̀a wə edzàŋ. M̀ lo fughuu tsughu mwàŋ tə wə̄n â bòobò kə efālā ko; à gɔ̀ʼɔ̀ mò ghe lo tùe màʼà tsùghù ghəa ghə̀n a ghe ghəŋlo ghèe wə̄n.

²³ Ǹ lo wiin tsughûu ghì ghə̀n a dzə̀m ghe nî ghuw kə ebwìi kə nughò wən ko. Zən lo zoʼn tsughu dzweŋe u ghì a Kəzə̀ u te wo to enyəa Ǹ lo ghùw wəla Ǹ tsaʼà fə̂ŋ tə ghì tò àsùghò mòʼnlò e ghee zo, àsùghò enyəa Ǹ lo ghùw wɛʼɛ fùghuu ko â fəgha kə̀là kə kpe tsughu aŋ ghə̀a a wə̄n à ghəəŋ gho.

²⁴ Mùghò èzəŋ kə̂a wò ghəa ghən â ghɛ̀ yia ghɛ̀ lo an dzeŋe kə ghì a Kəzə̀ an naʼ e Tìatilà enyəa, ghɛ̀ ghən a dzə̀m ghɛ̀ doʼkè kaam zoʼn kelê ghəa ghə agha ghən, ghɛ̀ yia a lo mo ghɛ kaām zoʼn kele sùghò ghəa zo nàn tə aghəa tə Satàn; e kuuw lo ko enyəa Ŋ̀ kôom fùghuu kpeʼe yo ghɛ â fəm kə̀ li ko;

²⁵ mò a mìaa ko yo enyəa ghɛ̀ tɔʼ kwu kele tsughu ko nlò ghəa ghə̀là ghɛ̀ bûʼ ki tò Ŋ̀ kê telè bughò.

²⁶ Ghùw wəla ù ghaʼ tsughu bo zo, vʉ̀a ù kɔlɔ̄ mɛʼɛ̀ tsughu fə̀ŋ alefwàʼ fəgha kə̀la Ǹ ləghaa, ndùw tɛ̀ è nduw, Ǹ lo fughuu nǔ wə̄n â dwaʼa wo alelɛɛ̄n naʼà tə te to,

²⁷ mò a lò dwaʼa ù mɔʼɔ̄ wəla bəghà fə̀ fughu â mùghò, ù lo kwuū kele ghee aŋ ghù kə̀ tughu ko, ù buū sâan tsughu ghee tǒ tɔ̀e tə etsāʼ.

²⁸ Ǹ lo fughu tsughu wə̄n â sə̀ghàbəlà fə gbə̀làgbə̀là fò.”

²⁹ “Ghùw wəla ù ki tuūŋ ko, ù zuw fəgha kə̀là Zuʼ tə Kəzə̀ te kə dzɛ â dzweŋe u ghì a Kəzə̀ wò.”