Edêe Fughu 19 - To kə Kəzə̀ kə̀ Fughu ko

Ghî à fughûu unyoʼ â Zə̀ kò alo kəwālā

¹ A m bughò tsə̀ndə̄ghā e ghàʼa zə kə̂a mɛʼɛ̀ tsughu ghəa ghən gho, mùgho n zuw ndə̀m è lì è səŋo alo kəwālā tò nɔe kə aghì kə dzâa tsughuu enyəa, “Ŋkɔʼso â Tsə̂ntə̀mbî! À lǒ wə̄n ù ki səghanyəgha mò àsùghò dwaʼa wo, yìa à lò sugho wə̄n ù bəghaasəa ghî gho.

² Ù sàʼa saʼ è tsəghatsəgha an dziī zəla è zɔlɔ̄, ù n dzə̌n mbə̀ghà è kəkpàlà kəla kə mò nûʼn kaāŋ luʼū to fɛ am mbī an nùŋlò e wə̄n, u n dì tsùghù sùghò ŋgə̀mà tə̌ kɔ̀ɔ ŋ wən məla kpàlà kə te kə fə̀ wīŋlo”

³ Ghe ŋ kòom nàʼà kpèʼe sə̀ wò an dzə̀ tughu to enyəa, “Kɔʼso n lo Zə̀ kò! Nyoʼ wəla u səā kɔʼɔ̄ a zəŋò naʼ e te aŋghea e pfʉā kê tsòo sə̌a tsə̀ghà ko nù to mbī kê bughò mîaa.”

⁴ Ghə̀m n tə̀tsoʼ mə̀n m bə̀ghà à ghè tò tə chìakò àsùghò fʉgha wən u chùako u lo â tuw ko n tə̀m ndùw tə̀ŋguʼ a vʉ̀a ndàŋ è kə̀də̀ŋ zə̀, fùghù ndùw ŋ̀kɔʼsò â Zə̀ kəla kə mò nyaʼ fughu an ndàŋ è kə̀də̀ŋ e te, dzàa tsùghùu enyəa, “Zə e lo ko êzè. Ukɛɛ â Zə̀ kò.”

Tsuʼ u Tsʉa u Ndzì ù niī u wizən wo

⁵ Mùghò n zuw dzə̀ è lì dzɛ̀ sə wo fughu an ndàŋ è kə̀də̀ŋ e te enyəa, “Kɛɛ ndǔw nlǒ Zə̀ kə sɛ̀ kò ghɛ̌ kɔ̀ɔ ŋ wə̄n mən n dzə̀m, ghɛ̀ ghəla ghɛ̀ tsəŋo wə̄n, ghɛ̀ bvùʼu mə̀ aghì àsùghò ghɛ̀ ghì à tughu gho.”

⁶ Mùgho n daŋso zùw ndùw ndə̀m səŋō tò nɔ̂e kə aghì, kwùu wò to ebʉghàbʉ̀ghà, àsùghò to ghuuw e lô kəmā, dzàa tsùghùu enyəa “Kɛɛ u lo â Zə̀ kò! Nu Tsə̂ntə̀mbî, Zə̀ kə sɛ̀ kə̀ ghaʼa kə lo kədə̀ŋ.

⁷ Bùghò nlò sɛ è duʼnlo, a e saŋlo, kɔʼso nduw wə̄n, təma ndùw wən â kəma mò, nu tsuʼ u Tsʉa u Ndzì ù niī u wîzən wə m kpē, wizən u te vʉ̀a ù ti ko an sɔ̀ŋ è bii zo.

⁸ Ghe m fughu tsughu wìzən vʉ̀ â zəghaan fə ndzʉ fì nee fo enyəa ù dzə̀la kɔʼ, tsɛʼɛ̀ tsɛ̀ʼɛ̀ tsɛ̀ʼɛ̀ fə zɔlɔ̄.” (Zəghaan fə ndzʉ̄ fə̀ nee fən lò ghəa a tsəghatsəgha ghəla ghî a Kəzə̀ à zɔlɔ a ghəŋlo.)

⁹ Tsə̀ndə̄ghā zə n daŋso dzɛ̀ â mùghò enyəa, “Tɔm naŋa tsughu ghəa ghən gho: Dzɔ̀ lò ghî ghəla ghe naʼā wo ghee an zə kə Tsʉa u Ndzì kə̀ niī kə wi ko.” Ù n dzɛ̀ kpèʼe wò â mùghò enyəa, “Wən lò shwaʼ ù səŋò wəla u sə wo an dzughu e Kəzə̀.”

¹⁰ Mùghò n daŋso tə̀m ndùw tə̀ŋguʼ a tsəlà wə̄n enyəa M̀ fughuu ndûw wən à kɔʼso mò, zə̀ m fwə̀n dzɛ̀ wò â mùghò enyəa, “Ghù kì dzə yo aleghəəŋ ghəa ghən gho! Ghàʼ à ghù dzeŋe lò ŋkɔ̂ɔ àsùghò waazə̂ ghəla boō fughu aŋghəa è səŋò zəla Yɛso mò dê tsughu. E kɔʼso nduw Zə̀ kò!” À lò səŋò zəla Yɛso mò dê tsughu e ghəŋlo enyəa ghiīshʉ̀ghà ghə̀ e dzâ ghəa gho.

Ghùw aŋ kə̀anyòm kə̀ fəma ko

¹¹ Mùghò mo e kôʼ wala kə n nùghù tsʉ̀ è tsughu, mughò ŋ kòʼ kɔ̀ʼ ndùw kə̀anyòm kə fəma ko. Ghùw wəla ù mò nyaʼ a te ghe tɔŋlo enyəa à lò Ghùw wəla ù naāŋ dzughu e wə̄n zo, lò sugho êsəŋò, ù saʼā saʼ tsəghatsəgha, təma sùghò tsàm tsəghatsəgha.

¹² Sə a wə̄n a lo tò uwən u bəghaan wo, vʉ̀a ù ki mgbɛ wo alo kətuw ndza. Ù kì ezən ghe tɔm naŋā a zəŋò wə̄n mò ghùw mɔʼɔ̄ kwo yo, mò à kwò tsughu ko wə̄n.

¹³ Ù dzə̀là kèle sàŋ è lì mò à ndùuw ko tə̀kàŋ a te, zən zəa ghe tɔɔ̄ŋ wə̄n a te lo “Shwaʼ u Kəzə̀.”

¹⁴ Sùghugòʼ tə kəwālā tə n ndûuw a bǎà wə̄n aŋ kʉ̀anyòm ù fəma wo mo ghe dzəlà kèle zəghaan mə̀ n ndzʉ m fə̀ma mò, mò n zɔ̀lɔ tsɛʼɛ̀ tsɛʼɛ̀.

¹⁵ Nyə fə̀ tɔɔ fə̀ li fə n sə̀ wò an dzughu e wə̄n â wən aletəmazəa nduw naʼà tò a te, tò ù e ke saʼa ghee aŋ ghu kə̀ tughu ko. Zə̀ kə̀ ghaʼa kən kə̀ dzə̀m lô nʉ̀ghà u wə̄n u pfʉa u bɔɔm dèe sùgho tò aŋghəa ghe tsuʼ ləma to a te abugho ghe kpɛɛ̄n lʉ̀ n tughu mò.

¹⁶ Ghe n tɔm naŋa an ndzʉ tə wə̄n àsùghò am bì kə wə̄n enyəa, “Də̀ŋ kə udwə̀ŋ àsùghò Mughu wəla ù tsə̀ghàsə ghê Mughubè a dzə̀m.”

¹⁷ Mùghò n daŋso nùghù kòʼ ndùw tsə̀ndə̄ghā è lì alo ezūw, zə̀ n tɔɔŋ ndùw nwə̀n mə̀n n dzə̀m n zəghāa tsəghàa edzuŋ an dzə̂ è tughu enyəa, “Bùghò nlò, zǔuŋ wò nlò to a zə kùun tə Kəzə̀ tə̀ ne to.

¹⁸ Ghe bugho nlo pfʉ nyòm è ùdwə̀ŋ, nyòm è tə̀komndzūghū, nyòm è ghì à səŋò ghò, nyòm è ukʉ̀anyòm àsùghò è ghì à nyəŋo ukʉ̀anyòm wò, àsùghò nyòm è ghì ghə̀n à dzə̀m; a pfʉ nyòm è ghì ghəla ghe ndzə̂əm lo àsùghò ghəla ghe lô kɔ̂ wò, a pfʉ nyòm e bvùʼu mə̀ n aghì àsùghò nyòm e ghì a tughu gho.”

¹⁹ Mùghò n daŋso kòʼ nyòm e te ghèe ghê dwə̀ŋ u mbī wo àsùghò sùghugòʼ tə ghee to, ghe zûuŋ doʼò aletə̄m tsàm ghèe ghê ghùw vʉ̀a ù mò nyaʼ alo kəkə̀anyòm àsùghò sùghugòʼ tə wə̄n to.

²⁰ Ghe ŋ kwu kɔʼ nyòm è ne zə̀, kwu dzəəŋ kɔ̀ʼ sùghò ghùwshʉ̀ghà wə àgha vʉ̀a ù mò dê tsughu sə̀ghàa mò an sə kə nyòoŋgwə̄n e ne zə. Ù n sè mə̀ŋso tsughu aghì nɔɔm tsughu ghî yia ghe mo tsə̂so naŋa ghee an tsə̌a è nyòm è ne zə̀, àsùghò ghì ghəla ghe kɔʼso mùʼù fia fə fweēn nyòm è te. Ghe n nì kɔʼ nyòm è ne e te ghèe ghùwshʉ̀gha wə̀ agha vʉ̀ â sə a tughu gho, màʼà nyə̀ ndùw am fɛ̀ɛn fɛ̀ɛn kə uwə̀n u biigh wo mo zuʼ kə̀ ləma kə̀ biigh kə̀ li kə mò səa wo an nyoʼ uwə̄n u te wo mo ghe tɔŋlo enyəa à lò sulfò.

²¹ Wə̄n wəla ù mò doʼ alo kə̀anyòm m gbòoŋ wi tsughu à li ghən an nyə fia fə mô sə wo an dzughu e wə̄n; nwə̀n mə̀ n zə tughuso tsughu enyə aŋ gwə̀n a ghee.