Edêe Fughu 18 - To kə Kəzə̀ kə̀ Fughu ko

Ghe n sàʼ màʼà naʼ e Babilɔ̀n zo

¹ Am bùghò ghəa ghən tsəghà tsughu, mùghò ŋ kòʼ tsə̀ndə̄ghā è Kə̀zə̀ lì è səā tsughuu wô alo kəwālā, mò è ki dwaʼa ù nêene wo, nyəghaan zəla è mò nyəghāaŋ ghè zò ŋ ghəə̄ŋ tsughu luʼū tə n nùghù zɔ̀n dòʼò tsùghù enyə aŋ ghueekətsə̄.

² Zə̀ n naʼn wò an dzə̂ è tughu enyəa, “Naʼ e Babilɔ̀n è səŋò e te zə n tsùghù bvʉ̀. Naʼ e te zə m fwə̀n dòʼo luʼu kəla zə̀a m bǐigh mughu a te àsùghò dzə̀adzə̀ mə̀ nnwən məla ghî à ləghaa yo alekòʼ,

³ Aghî a dzə̀m an naʼàʼ ten n dzə̀m m mʉ mɔ̀m lʉ ŋ wə̄n mò an dzə̀adzə̀ tə aghəa tə wə̄n təla ù gheŋlo, dwə̀ŋ u mbī vʉa u nûuŋ ghue zo ghèe ghee, ghî a mbòʼkùm yia ghaʼ kɔʼ am bàm e wə̄n bòʼ aŋghəa ù ŋgeē ləghaa fʉgha u mbī wo.”

⁴ Mùghò n daŋso kòom zuw kpeʼe ndùw dzə̀ è lì è dzàa səā wô alo kəwālā enyəa, “Ghî ghaŋa gho, nùghu sə wò nlò fughu êzə̀ a zəŋò wìzən ù te! Ghɛ̀ ka nyəso ghuu ko aŋ ghəa a wən à biigh gho, e kwo ko ghe lô fɔeso sughò ghɛ aŋghəa ghe lo fɔeso wə̄n a te!

⁵ Tɔŋlo enyəa bôo tə wə̄n tə ti alo kətə̄m to tə e kɔʼɔ̄ mɔ̂m kə̀wala, Zə chia kə lo mo kə kaām ŋ ghəa a wə̄n à biigh a te a nîzə̀ dzə̀.

⁶ Ghəəŋ nduw nlò wən â fəgha kəla ghuūghùe u wə̄n lo mo wə ŋ ghəŋlo â ghɛ̀, ghɛ̀ tsə kweēn tsəgha nduw wə̄n tənəgha tə bə̀ghà aŋghəa ù mò ghəŋlo â ghɛ̀. Ghɛ̀ nyɔɔm tsughu wùa zə̀ nlʉ e wə̄n è tùghù tsə̀ghà zəla ù mò nyɔ̂ɔm fughuu â ghì ghò, ghɛ̀ fughu nduw â wə̄n.

⁷ Ghəa ù fə̀ tsɔɔ̄ fə̀ŋ enyəa e mughù kuw nû, ki mɛʼɛ fʉgha u mbī wo u dzə̀m, bɔɔm fùghù sugho nlǒ wə̄n a tsù wəla u kpe sugho â wə̄n, to ù e muŋe aŋghəa a te gho. Ghəa ù dzàa tsughuu am fə̂ŋ è wən enyəa, ‘Mùghò wəla n doʼ, nàʼtūm! Ǹ yo dzə̂ aŋ wîkpūw, Ŋ̀ kê kɔ̀ʼ kòʼ yo tsʉ̂a u evʉ wo!’

⁸ Bòʼ ghəa ghən zəŋ è biigh e lo bɔɔm kwuu sùghò wən êzə alo fətsūʼ fə mɔ̀ʼ zəŋ e te e kê lò dzâŋ e biigh zo, ŋgoʼ àsùghò fɛ̀ɛn kə dzəŋ ko. Ghe lo kpâa maʼà kɔʼɔ̄ sughò wə̄n aŋ uwə̀n; bòʼ enyəa Mughu ù te, Zə̀ kəla kə saʼā saʼ è nùghò ù te ghaʼ ndùuŋ nù.”

⁹ Dwə̀ŋ u mbī wəla ghèe mò nûuŋ ghue zo ghèe ghee, zəa sùghò fʉgha u wə̄n kê dîin tsɔʼn tsughu enyə an tuw kə wə̄n abugho ghe kê kôʼ nyoʼ u səaa aŋghəa nughò u te pfʉā.

¹⁰ Ghe kê saŋe teē ndûw alo kədɛ̀, ghe tsəŋo fala e wə̄n zo, ghe e dzaā tsughuu enyəa, “Wɛ̂wɛ̂, wɛ̂wɛ̂! Kɔ kə enaʼ tò ghû, naʼ è nêene zo tò ghu â Babilɔ̀n! Ghe tsô kùʼù mìasò tsughu ko ghù ènyə an tàm zə̀ ezuw e mɔ̀ʼ.”

¹¹ Ghî a bòʼkùm a mbī ghə n dìnlò, ghoʼso daŋso è nduw, ghe diī wə̄n, mbuu ghùw kòom zǔu yo fʉgha u ghee wo.

¹² Ghî ghə̀ ŋ kôom zǔu yo fʉgha u etsɛ̀ wò, ŋkāa fʉgha ù nyəghaan wo, zuu yo fʉgha ù dzəə̄ŋ wo àsùghò sʉghawua məla ghe tɔŋlo enyəa à lò pɛ̂ɛl, zuu yo ndzʉ tə̀ wən è tughu zo ŋkāa tə ulɔ̀m tò, ŋkāa tə təndə̀gha tə̀ wəə̄n baŋā to, ghe n zuu yo kɔ tə ŋkàʼ tə̀n tə̀ dzə̀m àsùghò fʉgha wəla ghe fəghaan sə kɔʼ aŋ kɔ tə ŋkàʼ, zuu yo fə̀ghà mən n dzə̀m ghe fəghaan sə kɔʼ an sɔŋ a nyôodzə̀, ghe n zuu sùghò yò shiaghɔɔŋ to, ubvuʼ àsùghò ŋgɔ̀ʼbelè.

¹³ Ghî ghə̀ n zuuw sùghò ndə̀mà tə fə̀ghà n lə̀mlo n li mò àsùghò ndə̀mà tə vʉ m ləə̄m to, enyeē, ndzaŋ, vʉ n lə̀mlo n li mò ghe mò tɔŋlo enyəa à lò mayàh, ghe n zuu yo nlʉ̀ mò, zuu yo vʉ n zə̌a mò, zuu fùŋ m pǔuw mò, àsùghò saŋ gho, tə̀mbɔ̀ŋ à ndzì tò, ùkwʉ̀ànyòm à nwaŋ zo, àsugho kɔ̀ wò àsugho ghì a li ghe mò kwuūn wo an tsam, ghe feēn sugho ghee.

¹⁴ “Fʉgha u dzûŋ wən u dzə̀m ghù mò naŋa fə̀ŋ a te ŋ ghù ti zə̀ghàa tàʼà, kum zə̀ghàa zəa e miā àsùghò səghanyəgha məghà mò, mò ghù kè kòom kèle kòʼ yò.”

¹⁵ Ghî a mbòʼkùm, ghəla ghe mò kum kɔʼ aŋ ghəa a nughò vʉ̀ e ke lɔʼso ti alo kədɛ̀, ghe tsəŋō fala e wə̄n zo, ghe e diī səa kɔʼɔ an dzì tə tughu to enyəa,

¹⁶ “Utsû, tsû u ne wo â, kɔ kə enaʼ tò kən, kə mò dzəlà kele ndzʉ tə̀ nêene to, təla tə ləŋō baŋā nduw, mò ù n təm fʉgha u etsɛ̀ wò, təm fʉgha ù dzəə̄ŋ wo, àsùghò sʉghawua mò!

¹⁷ Fʉgha wə̀n ù dzə̀m n sàaŋ mǐaa kə̀nughùnùghù aŋ kə̀mà fə enəgha enyə.” Ghî ghə̀n à dzə̀m ghe ki kwə̀n u dzughùu wo n ti alo kədɛ̀,

¹⁸ dìin sə̌a kɔʼɔ aŋghəa ghe koʼò nduw nyòʼ u səā kɔʼɔ aŋghəa naʼ e te pfʉa a te. “À mò lo naʼ è ghɛ zo e lo tò kɔ kə enaʼ kə te ko a?”

¹⁹ Ghe n wâaŋ kɔ̀ʼɔ kə̀gbə̀n an tuw u ghee aŋghəa ghe dînlo, muŋe, dìin sə̌a kɔʼɔ an dzə̀ tə̀ tughu to enyəa, “Wɛ̂ wɛ̂ wɛ̂, â kɔ kə enaʼ ko, mo ghî ghə̀n à dzə̀m ghe mo ki kwə̀n ù nêene wo an dzughùu mò kuu am bàm e fʉgha u wə̄n! Ù m fʉgha wo u dzə̀m guŋù aŋ kə̀mà fə enəgha enyə.

²⁰ Ôo wala ko e duʼnlo, ghɛ̀ ghì zɔlɔ gho, tətum àsùghò ghǐishʉ̀ghà ghò, tɔŋlo enyəa Zə̀ kə̀ n tāʼ ghɛ̀ à ghee, fə̀n tsùghu mgbə̀ghà a zəŋò naʼ e te zo bòʼ ghəa a biigh ghəla ù mò ghəŋlo â ghɛ̀!”

²¹ Tùghùtùghù kə tsə̀ndə̄ghā e Kə̀zə̀ è n daŋso bòʼò kɔʼ etia mo e dûuw tò tia è gwuūn zo, màʼà nyə tsughu an dzùghùntsòʼ, dzɛ̀ tsùghù enyəa, “À bɔ̌ɔm lo ezə̂ ghe lo maʼn Babilɔ̀n alo esə̀ŋ, kɔ kə enaʼ kən, aŋghəa a kê kôom tsuʼ kôʼ yo alo esə̄.

²² Fəgha kə̀ li kə e ke koōm fuŋu yo fɛ alo enaʼ tò kəbôm ŋkāa tò ndɔŋ ŋkāa tò mbuwlì ghe tɔŋɔ ŋkāa ghî à zɔŋɔ̀ ghəa gho. Ghî a kəfwàʼ ghəla ghe ki ghu a kəfwàʼ ghò e ke koōm yo dzə fughu an naʼ zən. Ghùw ù li e koōm taā daŋso yo alegwùu kə̀fəgha an tia è gwuūn zo a fɛ an naʼ zən.

²³ Kɛ̀ʼɛ̀ kê kòom bàŋ kòʼ yò fɛ an naʼ zən. A kê koōm yo alezūw dzə̀ è wìzən ŋkāa è nùuwizən e saʼa fɛ an naʼ zən Ghɛ̀ ghî a mbòʼkùm ghən an naʼ zən mò lo ghî à səŋò ghò fɛ am mbī, vûŋ wəla ghɛ̀ mò ki fɛ alo enaʼ n sè mə̀ŋso tsughu tənaʼà tə dzə̀m kpe.

²⁴ Zə n lo enyəa naʼ e Babilɔ̀n a mò ki nû ghu ko am vʉ̀a tə ghǐishʉ̀ghà a Kəzə̀ àsùghò ghì a Kəzə̀ a zɔlɔ gho, àsùghò an vʉ e ghì ghə̀n à dzə̀m ghe mò winlo aŋ ghueekətsə̄.”