Edêe Fughu 17 - To kə Kəzə̀ kə̀ Fughu ko

Kpàlà kəla kə fə̀ lo fùŋù uzwɔ̀ŋ

¹ Tsə̀ndə̄ghā e mɔ̀ʼ n sə tsughu an tsə̀təndə̄ghā tì sə̀ghàmbəgha ghe mò ki kwəŋ zə̀ sə̀ghàmbəgha, bùghò dzɛ̀ â mùghò enyəa, “Bùghò, Ǹ so n dêe wô ghù â ŋgoʼ zəla a lo naāŋ kpàlà kə fùŋù uzwɔ̀ŋ kən a te, kpàlà kəla kə nyaʼ an tuw kə enaʼ zəla e mò bəgha doʼo aŋ ŋgùŋu tə tədzùghùu.

² Dwə̀ŋ u mbī wə ŋ ghue zo ghèe ghee nūŋlò, ghî a mbī ghe ŋ kàn dòʼo ndùw an lʉ̀ məla ù fughu â ghee enyəa ghe nyəə̄ŋ ghèe wə̄n.”

³ Zuʼ tə zɔlɔ tə n nyəən tsughu mugho, Tsə̀ndə̄ghā è Kəzə̀ n daŋso bòʼò kɔ̀ʼ mugho nùghù sòʼ ndùw ghàʼ à wə̄n aŋ ŋgwə̄n. Aŋghəa a lo fughu aŋ ŋgwə̄n, mùghò ŋ kòʼ wìzən ù lì ù nyaʼ an nyòoŋgwən zəla è bàŋ sâan tsughu, mo ghe n tɔm naŋa kaaŋ wò zən ghəla a suūwn Zə̀ kò à zəŋò ughùe u nyòòŋgwən zə̀ e dzə̀m. Nyòm zə ŋ ki utuw sə̀ghàmbəgha à ndɔŋ to eghə̄m.

⁴ Nughò vʉ n dzəlà kèle təndzʉ̀ mo ghe ghəŋlo an lɔ̀m kəla kə baŋà sâan tsughu enyə mo tə ŋgee dzɔ̀ɔ sùgho nù, ù là kɔ̀ʼ sùghò ghue u wə̄n u dzə̀m am fʉgha ù dzəə̄n wo mo ghe fəghanlo alo etsɛ̀ àsùghò fʉgha ù dzənlo ù li wo ghe fəghanlo alo nshʉghawʉa à shiaghɔɔŋ to. Ù ŋ ki wùa zə̀ etsɛ̀ aŋ ghu mò a te lue dòʼò kô ghə̀a à biigh gho àsùghò dzə̀adzə̀ tə aghəa tə wə̄n tə̀ nuūŋ tən.

⁵ Zən e shʉ̀ghà è li zə n lo aŋ kwàʼ u usʉ̄ u wə̄n ghe tɔm naŋā enyəa, “Babilɔ̀n, zən ù nē, zə̂ â ùkpàlà wò u dzə̀m àsùghò â ghəa à kwu gho a dzə̀m aŋ ghueekətsə̄.”

⁶ Mùghò ŋ kòʼ nughò vʉ mo kâŋ tə ghì a Kəzə̀ a zɔlɔ tə kɔʼn wə̄n a zəŋò e ughùe àsùghò tə ghì ghəla ghe mò winlo enyəa ghe boo fughu â Yɛso. Ghəa ŋ kôʼ nduw wə̄n dzughu zə m biso zum mugho.

⁷ Tsə̀ndə̄ghā è te n dzɛ̀ â mùghò enyəa, “Dzughu e ghû zǔu aŋ kwò? Ǹ dzâa wò nù ghû â nàn kə eghəa kə wîzən wə̄n ko, àsùghò nàn kə eghəa kə nyòoŋgwən zəla è ki tuw wo sə̀ghàmbəgha à ndɔŋ tò eghə̄m è bòʼò kele wə̄n.

⁸ Nyòoŋgwən è te fə̀ lo tsəgha nû, zə̀a è kòom yo, zə̀a è kuuwn kòom kì alesəa kɔʼɔ̄ wo am bùʼ kəla kə doʼŋkè kuʼù, è ndùw an lùʼu kəla ghe ki aledzùuw maʼà wə̄n a te. Ghî ghəla ghe mughù fɛ aŋ ghueekətsə̄, ghe lo mo ghe kaām tɔm zən a ghee gho am mwàʼsò kə emùghù aŋghəa mbī fə̀ kaʼ tsughu, dzughu ghe lo e zuu ghee alekòʼ nyòoŋgwən è te, mbuu è fə̀ lo nû, zə̀a è mò kôom yo tsəgha, zə̀a è kòom ki alebùghò.

⁹ Ghəa ghən ləghaa ghùw wəla ù ki tɔ wo. Tuw wən sə̀ghàmbəgha fɛ ti an tuw u təkàʼà sə̀ghàmbəgha, nughò vʉ nyaʼ a te.

¹⁰ Tuw wə̄n sə̀ghàmbəgha fɛ ti sugho an tuw udwə̀ŋ ù sə̀ghàmbəgha; udwə̀ŋ utwɛ̀ an dwə̀ŋ u te wə m kpuwnlo, kə mɔ̀ʼ chia kə naām lo â tuw ko; kə̀ lì kən kaam kuuwn bùghò. Abugho kə bùghò, ù lo alebùghò tèlè dòʼn ko aŋ kə̀mà fə kəgha enyə.

¹¹ Yia a bugho nyòoŋgwən zə̀a è fə̀ lô tsəgha, zə̀a è kòom buw êzə̄ŋ, à lǒ də̀ŋ kə kèfāa ko mò kə̀ kuuwn lò am fɔe kə dwə̀ŋ wən sə̀ghàmbəgha, kə ndûuw an lùʼu kala ghe ki aledzùuw maʼà wə̄n a te.

¹² Ndɔŋ tən èghəm ghù mò kôʼ lo sugho udwə̀ŋ eghə̄m mo ghe kaām ŋ ghee n sûw an ndàŋ è kə̀də̀ŋ, mo ghe kuuwn ki alenìi kɔʼ kədaʼa tò udwə̀ŋ ghe doʼo ko an nəgha e tàm zə̀ ezuw e mɔ̀ʼ ghèe ghêe nyòoŋgwən è te.

¹³ Dwə̀ŋ u te lo dòʼn tsùghuu èdzughu e mɔ̀ʼ ghe fughuu ndûw dwaʼa u ghee â nyòoŋgwən è te.

¹⁴ Ghe lo sòʼò nduw Tsʉa u Ndzì u te wo an tsam, Tsʉa u Ndzì u te u kê təma kɔʼ ghee, nu ù lò Mughu ù ghê mughùbè, lò sugho Də̀ŋ kə udwə̀ŋ. Ghî ghəla ghe lo ghèe ghee lo ghî ghəla ghe gaʼ tsughu fə̀ŋ a zəŋò wə̄n, ghe mò tɔŋɔ̄ tsughu, shìaa è kɔʼ.”

¹⁵ Tsə̀ndə̄ghā è te n daŋso dzɛ̀ â mùghò enyəa, “Dzughùu tə̀là ghù mò koʼ kpàlà kə chi kə nyaʼ a te lo an tuw u ŋgòʼ tə aghì, nɔ̂e kə aghì, tətûu, àsùghò sàʼà tə tənàʼà tò.

¹⁶ Ndɔŋ tən èghəm ghù mò koʼ ghèe ghêe nyòoŋgwən zə lo bɛ̂ kpàlà chì, ghe ghəə̄ŋ tsughu kə dòʼò tsughu chwaʼchwaʼ u ghueetsə̄ wo, ghe tsʉā dêe kɔʼ tue kə wə̄n a beē. Ghe lo kə̂aan pfʉ wə̄n, ghe kpâa kɔʼ shwâ u ŋgwən e wə̄n zəla e doʼòdoʼò tsughu aŋ uwə̀n.

¹⁷ À lǒ bòʼ Zə̀ kə̀ n dzə̀n nàŋa am fə̀ŋ tə ghee enyəa ghe e ghəə̄ŋ nduw fəgha kə̀là kə ləghaa, enyəa ghe fughuu tsəghàa ndûw ndàŋ è kə̀də̀ŋ â nyòoŋgwən è te an dzə̂ e mɔ̀ʼ, to ghe lo telè bugho lueso tsughu lâŋ kə shwaʼ u Kəzə̀ u te wo.

¹⁸ Nughò wəla ghù mò koʼ, à lò naʼ è səŋò zəla e ki daʼa ko a zəŋò dwə̀ŋ u mbī wo.”