Edêe Fughu 16 - To kə Kəzə̀ kə̀ Fughu ko

Kwəŋ e nʉ̀ghà u Kəzə̀ pfʉa zən sə̀ghàmbəgha wò

¹ “Mùgho n daŋso zùw nyə̀ ndùw zò kə dzə̂ kə̀ li ko fughu an ndùghù Kə̀zə̀ e ne è dzàa nduw â tsə̀təndə̄ghā tì sə̀ghàmbəgha enyəa, ‘Ndǔw kwə̀la màʼa tsughu kəŋò n nʉ̀ghà m pfʉa ŋ Kəzə̀ mì sə̀ghàmbəgha a ghueekətsə̄!’ ”

² Tsə̀ndə̄ghā è sʉesʉ zə fi daŋso ndùw kwə̀n màʼà sə̀ wò nù u wən wo ukwəŋ, zəla nʉghà ù pfʉa u Kəzə̀ ù mô lo a te aŋ ghueekətsə̄. Aŋghəa Tsə̀ndə̄ghā zə kwə̂n maʼà sə wo nʉgha u Kəzə̀ ù pfʉa wo êzə̀, fɛ̀ɛn tə fɔɔn tə nsə̀ghà tə̀ li tə n sə kaaŋ kɔʼ a zəŋò ghì ghəla ghe mò ki tsə̌a è nyòoŋgwən è te àsùghò a zəŋò ghì ghəla ghe mò fughuu kɔʼso mò â mùʼù fə nyòoŋgwən e te.

³ Tsə̀ndə̄ghā è kə̀bə̀ghàa n ndùw kwə̀n màʼà ndùw vʉa u mò lô alô u wə̄n wo ukwəŋ an dzùghùntsòʼ. Aŋghəa è kwə̀n nduw êzə̀, dzùghùntsòʼ è te m fwə̀n kɔ̀ʼ təkâŋ, tò kâŋ tə ghûw ù kpǔuw, nyòo mə̀n n dzə̌m fughu an dzùghùntsòʼ mo è kpuwnlo.

⁴ Tsə̀ndə̄ghā è kə̀təgha n daŋso ndùw kwə̀n màʼà nyə tsughu vʉa aŋ kwə̀ŋ u wə̄n alo tədzùghùu àsùghò alo nndzînlò, dzughùu tə te àsugho nndzînlò n te mə̀ fwə̀n kɔʼ alo təkâŋ.

⁵ Mugho n daŋso zuw tsə̀ndə̄ghā zəla è lɛnlo â dzùghùu tò dzɛ̀ tsughu enyəa, “Ôo ù Zɔ̀lɔ, ghù wəla ghù lǒ, mò ghù fə̀ lo tsəgha nû, ghù lò tsəghatsəgha an saʼ təghà tən.

⁶ Tɔŋlo enyəa ghî ghə̀ ŋ wiin ghî a zɔlɔ gho àsùghò ghǐishʉ̀ghà ghə̀a ghò, kâŋ tə ghee tə n tsughu tsughu aŋ ghueetsə̄, ghù vʉ̀a ghù fughu ghî a te gho â kàŋ tò enyəa ghe mʉ; à lò namso kəla kə kpe â ghee.”

⁷ Mùghò mo e zuw dzə̀ è li n daŋso dzɛ̀ sə wò fughu alo kətsāʼ enyəa, “Ǒo, Tsə̂ntə̀mbî, Zə̀ kə ghaʼa kən kə̀ dzə̀m, saʼ təgha tə̀ lo êsəŋò lò sugho tsəghatsəgha!”

⁸ Tsə̀ndə̄ghā è kə̀chìakò ŋ kwə̀n ndùw fəgha chìa ù mò ki alo u wə̄n wo ukwəŋ alo ezūuw, aŋghəa ù kwə̀n ndûw êzə̀, Zə̀ kə̀ n zə̀ghàa tsùghù enyəa zuw e te e nyɔ̀ʼnlò àghì alo ŋwə̀n.

⁹ Ghî ghə̀ m pfʉ tsughu am bòobò kə enùm kə te ko, ghe ŋ kàʼ ndùw aletsɔ̀ɔm zən e Zə̀ kə̀la kə ki daʼa ko a zəŋō zəŋ tən to, ghe ŋ kè ŋgəmso tiī kuūwn fə̀ŋ tə ghee aŋ ghəa a ghee a biigh gho, ŋkāa alebùʼù fughu ndûw kɔʼso ndûw wə̄n.

¹⁰ Tsə̀ndə̄ghā è kə̀tɛ̀ n daŋso kwə̀n ndùw nʉgha u Kəzə̀ ù pfʉa vʉa aŋ kwə̀n u wə̄n an ndàŋ è kə̀də̀ŋ e nyòoŋgwəŋ è te, aŋghəa ù kwə̀n nduw êzə̀, ləm kə n nùghù bvʉ̀ tsùghù an naʼ e wə̄n, ghî ghə̀ m pfʉa àsɔŋ enyə am fɔɔn zo ghe zuūw.

¹¹ Ghe n tsɔɔ̄m Zə̀ kə kəwālā bòʼ fɔɔn zəla ghe zuūw àsùghò an səghà mia ghe ki, ghe ŋ kè ŋgəmso tiī kuwnlo aŋ ghəa a ghee biigh ghəla ghə ghəŋlo.

¹² Tsə̀ndə̄ghā è kə̀tǔu zə ŋ kwə̀n màʼà sə̀ nduẁ nʉgha u Kəzə̀ ù pfʉa wəla u mò lo alô u wə̄n wo ukwəŋ an dzughùu è nêene zəla ghe tɔŋlo enyəa à lò Dzùghù è Yufə̀lɛ̀t, aŋghəa ù kwə̀n tsughu êzə̀, dzùghù e te n zueme è kɔʼ, alefughu dzì â dwə̀ŋ wəla u sə wo an tsə kə tsə̂ kə̀ səa ko.

¹³ Mùghò mo e kôʼ zə̀a m biigh n li mò n təgha tò utwsàm u səā wo an dzughu e ŋgəm zə̀, səa wò sughò an dzughu e nyòoŋgwən zə̀ àsùghò an dzughu e ghûwshʉ̀ghà wə̀ àgha vʉ̀.

¹⁴ Ghe lo zə̀a m biigh mò ghe dêe sə̀ghàa mò, ghe səa ndùw an nàʼà tə beē to, ndùw kòʼò dwə̀ŋ u nàʼà tə te to, alendùw tughuso naŋā tsughu ghee alesəa wo an tsām an tsuʼ ù nêene u Zə̀ kə̀ ghaʼa kə kə̀ dzə̀m.

¹⁵ Mughu ù te n dzɛ̀ enyəa, “Kòʼô, M̀ bughòo tǒ ghùw ù ghùwtsɔ̀ŋɔ lô bughoo an nəgha zəla ghɛ̀ kwo naŋa yo! Dzɔ̀ lǒ ghùw wəla ù naām koʼō, vʉ̀a ù ki tən ndzʉ tə wə̄n to enyəa ù lô səā ŋgəaa kaŋlo â tuè kò a beē, ù kelê tuw kə̀ dəla ko!”

¹⁶ Zə̀a m bǐigh mi n daŋso tɔŋɔ zuuŋ tsùghù udwə̀ŋ an lùʼù kəla ghe tɔŋlo an shwaʼ u Hebə̀lù enyəa à lǒ Àmàgɛ̀dɔ̀n.

¹⁷ Tsə̀ndə̄ghā è sə̀ghàkəmbəgha n nì kɔ̀ʼ nʉgha u Kəzə̀ ù pfʉa wəla u lo alô u wə̄n wo ukwə̀ŋ kwə̀n màʼà kɔ̀ʼ e dzūŋ, aŋghəa ù kwə̀n kɔʼ êzə̀, mùgho n daŋso zuw dzə̀ è lì è dzɛ̀ sə wo fughu an ndàŋ è kə̀də̀ŋ an ndùghù è Kəzə̀ e ne an dzə̂ è tughu enyəa, “À kpomkəsoʼ!”

¹⁸ Ghuuw zə ŋ kaʼ tsughu emwɛ̂nlò, bɔ̀ŋ mə̀ n səa wò fughu, ghuuw zə ŋ kəmà sùghò, luʼū tə m fɛ̂ɛn nòʼò enyə, mo e kaam sə kòʼ êzə̀ aŋ ghu echìa ghùw fə̀ doʼò wo aŋ ghueekətsə̄.

¹⁹ Naʼ è ne e te zə n nùghùu dzùghùu tsùghù alo ugbà u tʉgha, naʼà tə aghì tə̀ n sàʼà bvʉ̀ kǎaŋ wo enyə. Zə̀ kə̀ m môʼn kô kɔ enaʼ kə Babilɔ̀n, enyəa kə̀ muʼu mʉa ko nǔ fɛ̀ɛn kə nʉ̀ghà u wə̄n ù pfʉa wo.

²⁰ Nàʼà n dzùghùu mə̀n n dzə̀m mo è saŋa, kaʼà tə̀ ŋ kôom yò sughò.

²¹ Ŋgɔ̀ʼɔ̀ tə n tiatia tə̀ li tə ŋ kaʼ tsughu aletsughu a zəŋò ghì ghò, fòʼ zə edə̀n e tiatia n te m fə̀ lo tò dên e mbə̀ghà è sème, ghî ghə̀ ŋ kàʼ ndùw Kə̀zə̀ aletsɔ̀mlò an ndzəgha kə ntiatia kə te ko, nu ndzəgha kə te kə fə̀ fɛɛ̄n ndɔŋ kətuw.