Edêe Fughu 15 - To kə Kəzə̀ kə̀ Fughu ko

Tsə̀təndə̄ghā ghèe ghê zəŋ təla tə guŋso tsughu

¹ Mùghò n daŋso kòom kòʼ kpèʼe ndùw kɔ kə fɛ̀ɛn fɛ̀ɛn kə tsə̌a kə̀ li ko, à mò lo tsə̀təndə̄ghā sə̀ghàmbəgha àsùghò zəŋ təla tə fə doʼò gûŋsò tsughu sə̀ghàmbəgha; tɔŋlo enyəa Zə̀ kə̀ lo so e dêe gûŋsò tsughu nʉghà u wə̄n ù pfʉa wo ghèe ghee.

² Mugho n daŋso kòʼ ndùw fəgha kə̀ li ko kə fwēen ko dzùghùntsòʼ è kə̀lùwŋgɛ̀lɛ è fɔ kɔʼ ghèe wən wo, ghî ghəla ghe mò ghaʼ tsughu nyòoŋgwən è te ghèe ghê mùʼù fə wə̄n fəla fə mò fweēn wə̄n, àsùghò tàŋ è zən e wə̄n n ti a ŋgùŋ è dzùghùntsòʼ è kə̀lùwŋgɛ̀lɛ zə̀, à gbòm wə ntee wò aŋ ghu, Zə̀ kə̀ fughu tsughu a ghee.

³ Ghe n zôo zom zəla à fə̀ bughòo tsughu Musî kɔ̂ɔ fi Kəzə̀, asùghò e Tsʉ u Ndzì zò, dzàa tsùghùu a te enyəa, “Tsə̂ntə̀mbî, Zə̀ kə̀ ghaʼa kən kə̀ dzə̀m, ghəa ghə̀a à ghəəŋ gho a bòʼò ghàʼa kwò enyə a, Ôo Də̀ŋ kə mbī ko! Ghəa ghə̀a à lo tsəghatsəgha, lò sugho êsəŋò.

⁴ À lò ndūghō ù yò alestə̄ŋ ghu a Tsə̂ntə̀mbî, ù tàʼkè fughuu wô ghù â kɔʼso an zən zəghà mò a? Nu à bɔ̌ɔm zɔlɔ ko ghù â nəŋ ko. Aghî a dzə̀m an nàʼà mə̀n n dzə̀m kè bùghò tə̀ma tə̀ŋguʼ a tsəlà ghù, tɔŋlo aghî a dzə̀m ŋ ko enyəa ghəa ghəla ghù ghəŋlo a lo tsəghatsəgha.”

⁵ Ghəa zən n tsə̀ghà è tsughu, mugho ŋ kòʼ ndùw ndùghù e Kə̀zə̀ è ne alo kəwālā, pfʉ̌a kàa ŋ Kəzə̀ kə̀ n lo mo kə n tsʉ̀ dòʼò.

⁶ Tsə̀təndə̄ghā tən sə̀ghàmbəgha ghe mò ki zəŋ tən sə̀ghàmbəgha n sə̀ wò fughu an Ndùghù è Kə̀zə̀ e ne, mo ghe n dzəla dàla tə̀ nee tə̀ fəma nyəghaan to a zəŋo eghùe; à kwùu mə̀ estɛ mò mo ghe ŋ wā naŋā alo kəchīchī.

⁷ Kəfəgha kə mɔ̀ʼ am fʉgha vʉ̀ u chùako u lo â tuw ko m fùghù ndùw kə̀ŋò mə̀ ètsɛ̀ sə̀ghàmbəgha â tsətəndəghā tì sə̀ghàmbəgha; kə̀ŋò mə̀ e tsɛ̀ mən fə̀ lo mo ghe lueso naŋa nʉghà u Kəzə̀ ù pfʉa wo a te, tɔ̂ɔŋ Zə̀ kəla kə doʼò tən.

⁸ Nyoʼ wə n nyə lue tsughu an Ndùghù è Kə̀zə̀ e ne e te, mo u sə wò an səghanyəgha ŋ Kə̀zə̀ àsùghò an daʼa kə wə̄n, ghùw n yo alekòom tsə̀ghàa nyə fughu an ndùghù è Kəzə̀ e ne e te mo zəŋ tì sə̀ghàmbəgha tə nughù wo aŋ ghùu tsə̀təndə̄ghā tì sə̀ghàmbəgha kâ bùgho tsə̀ghà mîaa kɔ̀ʼ dzə̀.