Edêe Fughu 14 - To kə Kəzə̀ kə̀ Fughu ko

Tsʉa u Ndzì u te wo ghèe ghê ghì a wə̄n gho

¹ Mùghò m bàŋ lɛ̀nlo è nduw, kòʼ ndùw Tsʉa u Ndzì u te wo aŋ kwàʼ u Zayòn, ù n lo ghèe ghêe ghì gho 144,000 (ghèe ghê kam zə̀ àghì fəbɔm à ghè ghò ŋ ghəm n chìako à ghì ghò a chìakò.) Ghî ghən ŋ ki zən e wə̄n àsùghò zən e Tsele zo ghe tɔm naŋā kɔʼ aŋ kàʼ mə̀ èsʉ ŋ ghee.

² Mùghò n zùw kɔʼ ndùw dzə̀ è lì alo kəwālā to dzughùu tə̀ lô kuŋu àsùghò tò ghuuw e lô kwuū; dzə̀ e te ŋ kûu tò ghî a lò buʼu bôm kə ntee ko.

³ Ghe n zoo tsughûu zom è fughu zo an sə kə ndàŋ è kə̀də̀ŋ te, asugho an sə fʉgha wən u chùakò u lo â tuw ko àsùghò an sə kə tsōʼ tì. Ghùw n yo alezoʼn zom zə̀ mò à gɔ̀ʼɔ̀ ko yo kam zə̀ àghì zən fəbɔm à ghì ghò ŋ ghə̀m n chìakò à ghì ghò a chìakò ghe fə̀ bəghasə̄ tsughu am mbī.

⁴ À lò ghî ghən ghe lo mo ghe kaām dzəso ghue e ghee zo ghèe ghê ghìzən gho; nu ghe naam lo mo ghe kaam kwo yo wìzən. À lǒ ghee ghən Tsʉa u Ndzì u te u tsəghàa ko a ghɛ ghe n lo a bàâ wə̄n. Ghən lǒ ghee ghəla ghe bəghasə̄ tsughu aŋ ghu kə ghùw nsɔ̌ɔŋnchùw, ghe lo to fəgha kə sûesʉ kəla kə kwən wo an usum a fughuu kɔʼɔ â Zə̀ kò ghèe Tsʉa u Ndzì u te wo.

⁵ Ghe ka fə̄ kaʼ kò tsə̀gha dzə̀ gha zo, nu ghe dzʉ u li wo am mùghù e ghee.

Shwaʼ u tsə̀təndə̄ghā tə te to tə təgha

⁶ Mùghò n daŋso nùghù kòʼ kpèʼe ndùw tsə̀ndə̄ghā è lì è zəghāa kaŋlo edzuŋ, mò ù kǐ làbəlà e dzùŋ zəla è dòʼò tən alenàʼà â ghì ghən a dzə̀m ghe mughu aŋ ghueekətsə̄, â nàʼà mə̀n n dzə̀m, â ndùm tə̀n tə̀ dzə̀m, â tùu tə̀n tə̀ dzə̀m, àsùghò â ghì a sàʼà tə tənàʼà tən tə dzə̀m.

⁷ Ù mo an zò kə dzə̂ enyəa, “E tsəŋo nduw nlǒ Zə̀ kò, ghɛ̀ è fughuu nduw ghè kò â kɔʼso mò, tɔŋlo enyəa nəgha e wə̄n è saʼa zə aghì zə̀ m kpē; e fughu nduw nlò kɔʼso mò â ghùw wəla ù fə̀ bɔm wala ko à ghueekətsə̄ ko, dzùghùntsòʼ àsùghò nndzînlò”

⁸ Tsə̀ndə̄ghā è kə̀bə̀ghà n dzûum wò è sûesʉ zə̀ nàʼn wò enyəa, “Ù n tsùghù bvʉ̀, Babilɔ̀n tuw kə enaʼ kə n tsùghù bvʉ̀. Naʼ e ne a zəla e fə̀ ghəə̄ŋ tsughu nàʼà mə̀n n dzə̀m m muʼ mʉ kɔʼ aŋ ghəa a ghee a nuūŋ kaaŋ gho to ghe lô muʼu mʉā lʉ̀ mò.”

⁹ Tsəndə̄ghā è lì kpeʼe, è kə̀təgha n dzûum wò tə̀ li tì tə̀ bə̀ghà, nàʼn wò an dzə̂ e tughu enyəa, “Abugho ghùw kɔʼso nyòoŋgwən è te àsùghò mùʼù fə wə̄n fəla fə fweēn wə̄n, ghe yia tsə̂sò tsughu wə̄n aŋ kwàʼusʉ̄ ŋkāa aŋ ghu,

¹⁰ ù lo muʼu mʉa sùghò nù nʉ̀ghà u Kəzə̀ ù pfʉa wo, mo ghe tsom dzə̀n tsughu aŋ wùa è Kə̀zə̀ è nʉ̀ghà ù pfʉa wo mo ghe kâ nyɔ̀mlò, ghe fɔeso tsughu wə̄n am fɛ̀ɛn kə uwə̀n mo zuʼ kə̀ biigh kə̀ li səa wò fùghù èzə̀ an chia tə ŋwə̀n təla ghe tɔŋlo enyəa à lò sulfò, an sə kə tsə̀təndə̄ghā tə̀ zɔlɔ tì àsùghò an sə kə Tsʉ u Ndzì u te wo.

¹¹ Nyoʼ kə uwə̀n kəla kə fəmso ghee lo e kɔʼɔ ndùw edzuŋ, kɔʼɔ təla ndùw ko êsəŋò. Ghee ghəla ghe kɔʼso nyòoŋgwən è te àsùghò mùʼù fəla fə fweēn wə̄n àsùghò chìa wəla ghe tso fughu tsughu wə̄n â tsə̌a e wə̄n, ghe a te a kê tsò yò alezʉ̀nlò eghue â tsə̀ tò ŋkāa â tsuʼ wo.”

¹² Zən lò ghəa zəla e dê tsughu enyəa ghî a Kəzə̀ à zɔlɔ a ki alekɔlɔ tsughu təfə̂ŋ, tɔ̂ɔŋ ghì ghəla ghe naāŋ lâŋ kə Kəzə̀ kò, gaʼ sùgho fə̀ŋ è ghee a zəŋò Yɛso.

¹³ Mùghò mo e daŋso zuw dzə̀ è lì è dzâa tsughu wo alo kəwālā enyəa, “Tɔm naŋa tsughu ghəa ghən gho: Dzɔ̀ lò ghî a kpuuwn ghəla ghe mò kpuw aŋ ghəa e Mughu ù te alenìi nughù tsughu êzəŋ.” Zuʼ tə Kəzə̀ tə̀ dzɛ̂ enyəa, “Dzɔ̀ kùm lò â ghee, enyəa to ghe mô zʉ̂ʉn tsughu am fwàʼ kəla ghe fwaʼ, nu fwàʼ kə ghee kə ndûw dzə̌əŋ ko ghèe ghee, dêe wò fəgha kəla ghe lo ghè kò.”

Ghe kwûu ufʉgha am mbī

¹⁴ Mùgho mo e baŋà lɛ̌ɛn ndùw nù, mùghò ŋ kòʼ ndùw mbàʼ è fə̀ma è lì, mo fəgha kə̀ li kə doʼ a te, kə n lo tǒ ghùw à mbɛ kə etsɛ̀ ko alo kətuw, àsùghò tɔ̀ɔtɔ kə ŋgwɛlɛ kə fənyə ko aŋ ghu.

¹⁵ Tsə̀ndə̄ghā è li n sə kpeʼe wò an ndùghù e ne è Kəzə̀, dzàŋa tɔ̌ɔŋ ndùw ghùw vʉ̀a ù mò doʼ am mbàʼ zə enyəa, “Dzə̀la nyə ndùw nyə fəghà fò, ghù kəa fʉgha wo, nu nəgha è kwuū kwəla e ufʉgha zə m kpē aŋ ghueekətsə̄.”

¹⁶ Ghùw vʉ̀a ù mò doʼ an mbàʼ zə fi shʉ̂aa wò nù nyə fə wə̄n fo aŋ ghueekətsə̄, kwùu nùghù kɔ̀ʼ ufʉgha a te a te, dùum nùghu kwən e nduw.

¹⁷ Tsə̀ndə̄ghā è lì n sə kpeʼe wò an ndùghù e Kəzə̀ è ne zə̀a è lò alo kəwālā à tɔ̀ɔtɔ kə ŋgwɛlɛ kə fənyə ko an ghu sughò.

¹⁸ Tsə̀ndə̄ghā è li n daŋso sə wo aŋ kəŋ e te zo, tsə̀ndə̄ghā zəla e ki daʼa ko a zəŋò wən wo, zə̀ n dzàŋ tɔ̀ŋɔ ndùw tsə̀ndə̄ghā zə̀a e mò ki tɔ̀ɔtɔ kə ŋgwɛlɛ kə fənyə chi ko enyəa, “Dzə̀la nyə ndùw nyə fəgha fò, ghù e kwɛɛ̄ nduw mbuuŋ mò alo kəkāʼ aŋ ghueekətsə̄, tɔŋlo enyəa twam u wən wə m bàŋlò.”

¹⁹ Tsə̀ndə̄ghā e te n shùaa nyə̀ ndùw nyə fə wə̄n aŋ ghueekətsə̄ kə̀a kɔʼ kwaʼ wə mbǔŋlo u te wo màʼà nyə̀ tsughu am faŋkwu kə etsugho kə nʉ̀ghà u Kəzə̀ ù pfʉa wo.

²⁰ Tsugho e te zə n dòʼò sə ndùw â ŋgwəlā gho, ghe n dzughòon mbùŋlo n te mò, à n ŋ kuŋu səa wò tə̀kǎŋ fughu alo etsūgho mò tə məən nyəa tsughu ndùw tò tətàm tə bə̀ghà, zə̀ ŋ kùŋ mîasò ndùw tò alendùw kɔʼɔ tɛ̂ kam e tətàm mbɔm n təgha.