Edêe Fughu 13 - To kə Kəzə̀ kə̀ Fughu ko

Nyôm tə̀ ne to tə bə̀ghà

¹ Mùghò ŋ kòʼ ndùw nyòoŋgwən è lì è səā kɔʼɔ̄ wo an dzùghùntsòʼ, mò è ki utuw sə̀ghàmbəgha à ndɔŋ to eghə̄m, Zə̀ ŋ ki umgbɛ̄ eghə̄m an ndɔŋ tə te to àsùghò zən gho an tuw u wə̄n u te wo u dzə̀m, mo zən a te a sûuwn ndùw Kə̀zə̀.

² Nyòm e te fə̀ lo ko tò kəbəgha, ghuw a wə̄n ghə n dûuw, ki tənyûŋ a te, nyʉagha u wən wə n dâa tò ghuw a nyòoŋgwən è lì ghe tɔŋlo enyəa à lò bɛ̂ɛ, dzughu e wə̄n zə n lo tò dzughu e tsɛɛ̄kəbə̄ghā. Ŋgəm zə m fùghù ndùw daʼa kə wə̄n â nyòoŋgwən e te, fùghù sùghò ndàŋ è kə̀də̀ŋ è wə̄n, àsùghò ndə̀mà tə udwaʼa tə wə̄n to alesaʼa tuw u aghì wò.

³ Tuw kə wə̄n kə mɔ̀ʼ kə̀ n lo tò kə ki fɛ̀ɛn fɛ̂ɛn kə efəŋ, fɛ̀ɛn kə efə̄ŋ kə wən kə te kə ŋ kè e tsughu, tuw kə m kpuw aghî a dzə̀m am mbī, ghe n sə̀ təŋò ndùw a bàâ nyòoŋgwən è te.

⁴ Ghî ghə̀ m fughu ŋkɔʼso â ŋgəm zə̀, tɔŋlo enyəa è mò fughu tsughu dwaʼa u wə̄n â nyòoŋgwən zə̀, ghe ŋ kɔʼso nyòoŋgwən zə̀, dzàa tsùghùu enyəa, “À lò ndugho tǒ nyòoŋgwən è te a, à lò ndugho alebū kəŋgě ghèe wə̄n à?”

⁵ Ghe zə̀ghàa tsùghu nyòoŋgwən enyəa zə̀ è ki dzughu e biigh zo, sùuwn sùghò Kəzə̀. Ghe n zə̀ghàa tsùghù sùghò enyəa è dèe kəŋo ndûw dwaʼa u wə̄n aŋ ghə̀m n tə̀dzɔ̀ŋɔ n chìakò à ghè tò tə bə̀ghà.

⁶ Nyòm e te n nùghù dzaʼ kɔʼ edzughu sùuwn səā wô Kə̀zə̀; sùuwn zən e Kəzə̀ àsùghò luʼu kəla Zə̀ kə̀ mughu a te àsùghò ghì ghəla ghe mughu fughu alo kəwālā.

⁷ Ghe n zə̀ghàa tsùghù sùghò wən enyəa ù sòʼò ndûw ghì à Kəzə̀ à zɔlɔ gho an tsam, ù təmāzəā kɔʼ ghee. Ghe m fughu tsughu wə̄n â daʼa ko enyəa ù è lɛɛn ndughu tən tə̀ dzə̀m, ghî ghə̀n à dzə̀m, ghî ghəla ghe saʼa saʼà tə tənàʼà ten tə̀ dzə̀m àsùghò tùu tə̀n tə̀ dzə̀m.

⁸ Ghî ghə̀n à dzə̀m ghe mughù aŋ ghueekətsə̄ lo e kɔ̄ʼsō sugho wə̄n, ghî ghəla ghe fə̀ so e bughò bɔm mbī mo zən a ghee a kaān nyə am dzə̀ mwàʼsò kə emùghùu kə Tsʉa u Ndzì wəla ghe fə̀ sugho wī.

⁹ Mò ghùw ki kətuŋlō, ù zuw.

¹⁰ Abugho ghùw lǒ mo ghe lô wə̄n ki alekwuū fêe naŋa an ndughùtsaʼ, ghe lô wən telè kwǔu fèe nǎaŋ ko alo kətə̀ŋ. Abugho ghe ki alegbòo wi ghùw alo kəkɔ̀ɔ, ghe lô wə̄n telè wǐi ko ezə̂. Ghəa ghən fɛ dèe tsùghu enyəa ghî a Kəzə̀ à zɔlɔ a ki alekaā tsughu ezə, ghe naŋa tsughu kô fə̀ŋ tə ghee a zəŋò Zə̀ kò.

¹¹ Mùghò n daŋso kòʼ kpèʼe ndùw nyòoŋgwən è ne è lì è sə kɔʼ wo aŋ ghueekətsə̄. Zə̀ ŋ ki təndɔ̄ŋ tə bə̀ghà tǒ ndɔŋ tə tsʉa u ndzì ù li wo, kuuwn bʉghaa səā wò dzə̀ ènyə tǒ ŋgə̄m.

¹² Zə̀ n dêe dwaʼa u nyòoŋgwən è sʉ̂seʉ zə̄n u dzə̀m an sə kə nyôm e te, zə̀ ŋ ghəŋlo ghueekətsə̄ àsùghò ghî ghəla ghe mughu a te ŋ kɔʼso sugho nyòoŋgwən è sûesʉ zə̀, zəla fɛ̀ɛn fɛ̂ɛn kə efə̄ŋ kə wə̄n kə̀ mò ke tsughu.

¹³ Zə̀ n dêe sə̀ghàa m fɛ̌ɛn mò, bùʼù ghə̌əŋ sùghò wən wə n nùghù sə̀ tsùghù wò alo kəwālā, tsùghù wò aŋ ghueekətsə̄ mo ghî à ti nû.

¹⁴ An sə̀ghàa məla ghe fə̀ zəghàa tsughu enyəa è dè an sə kə nyôm zə̀, zə̀ sèe mə̀ŋsô ghì ghəla ghe mughù aŋ ghueekətsə̄. Nyòm e te n dzɛ̀ â ghee enyəa ghe e bɔɔ̄ kɔʼ fəmùʼù am fwěen kə nyòoŋgwən zəa ghe mò kaʼ alo kəkɔ̀ɔ, zə̀ n naām lò â tuw ko.

¹⁵ Ghe n zə̀ghàa tsùghù sùghò enyəa nyòoŋgwən zə zʉ̂e nyəā tsughu təzuʼ am mùʼù fə fwèen kə nyòoŋgwən è sûesʉ zə̀ to fə e lo alebùʼù kə̂aa àghəa, tò mùʼù fə te fə lo aleghəŋlo ghe ŋ gbòon wîin ghì ghəla ghe tue alekɔʼsô ghè fò.

¹⁶ Nyòm è te ŋ ghəə̄ŋ tsughuu sughò enyəa ghe tsə̂sò naŋa tsughu aghî à dzə̀m, ghî à ne gho àsùghò bvuʼù mə̀ aghì mò, ghî a kuu gho àsùghò à laa gho, ghî ghəla ghe ndzə̂m mughu àsùghò kɔ̀ wò, enyəa ghe tsə̂sò naŋa tsughu ghee aŋ kwe u təma wo ko ŋkāa aŋ kwàʼ u usʉ̄.

¹⁷ To e doʼò tsughu ghùw è yo dzə̂ alezue kəfəgha ŋkāa alefèe mò ù kì yo tsə̌a è te, mò tsə̌a è te lo zən e nyôm è te ŋkāa tàŋ è zə̀n e wə̄n.

¹⁸ Ghùw kì aleki tɔ wo â wə̄n alezuūwkɛlɛ̂ ghəa ghən. Ghùw wəlà ù ki tuw ko, ù kəŋo səā kɔʼ tàŋ è nyòoŋgwən è te, nu à lǒ taŋ zəla e an ti an tuw kə ghûw, tàŋ è te lo 666 (mbɔm tǔu à ghə̀m mò tǔu à ghè mǒ tǔu).