Bìoball air-loidhne

Edêe Fughu 12 - To kə Kəzə̀ kə̀ Fughu ko

Wìzən ù lì àsugho ŋgəm è lì

¹ Fɛ̀ɛn kə eghəa kə̀ ne kə̀ li kə n daŋso kùm tsùghù alo kəwālā. Wìzən ù lì n nì dzə̀là tsùghù ezuw tò ndzʉ tə wə̄n, ndzɔŋ n lo a tsəla aghùw a wə̄n; ù ŋ ki kəmbɛ̄ à sə̀ghàbəlà mò a te eghə̄m à ghè mò m bə̀ghà.

² Wìzən ù te n lo unʉghà, soʼò wɛ̄; ù n zuuw è fɔnlo aŋghəa ù sòʼo wɛ, fɔnlo e te zo ŋ ghəəŋ wə̄n ù n dì sə̌a kɔʼɔ.

³ Fɛ̀ɛn kə eghəa kə̀ ne kə̀ li kə ŋ kòom sə kpeʼe kɔʼ alo kəwālā: Faŋkwu kə bàŋàbàŋ kə ŋgə̄m kə̀ li ko, kə ŋ ki utuw səghàmbəghā à ndɔŋ to eghəm a te, mò kə n dzə̀là kèle gbɛ wo sə̀ghàmbəgha an tuw u wə̄n u te wo.

⁴ Nyòm e te n sùʼ màʼà sə̀ tsùghù wò gala kə nsə̀ghàbəlà kə mɔ̀ʼ alo kəwālā aŋ kue u wə̄n, abugho a dzughùu tsughu sə̀ghàbəlà n te mò alo udwə̀ŋò u tʉgha, màʼà tsùghù wò a ghueekətsə̄. Ŋgə̄m e te n ti a vʉ̀a wìzən vʉ̀a ù sòʼo wɛ enyəa e kwuū pfʉ wɛ ù te abugho ù sə tsughu wo.

⁵ Wìzən ù te n daŋso dzə tsughu wɛ ù nùu; wəla ù kè kwo kele mbī alo dwaʼa u dzəm. Ghe n tì bòʼò nùghù kɔʼ wɛ u te nì ndùw wə̄n a vʉ̀a Zə̀ kò, nì dòʼso naŋa tsughu wə̄n an ndàŋ è kə̀də̀ŋ e wə̄n.

⁶ Wìzən vʉ̀ ŋ kuuwn ti nùghù ndùw aŋ ŋgwən; an luʼu kəla Zə̀ kə fə fəghaan naŋa, enyəa ghe kê lɛnlo â wə̄n fughu alo ntsuʼu kam à bɔ̀m mə̀ ntsuʼu mò m bə̀ghà, à ghè mò ŋghəm tǔu.

⁷ Ezə̄ŋ, tsàm m gbən tsughu alo kəwālā, tsə̀ndə̄ghā e ne zəla ghe tɔŋlo enyəa à lò Maekɛ̀l ghèe ghêe tsəntəndīghā tə wə̄n to m buu kə̀ŋgè ghèe ghê ŋgəm zə̀, ŋgəm e te ŋ ki lo sugho ghèe ghê tsə̀təndə̄ghā tə wə̄n to, ghe n sɔʼn tsùghù sùghò ŋkāa alebu kəŋgè.

⁸ Ŋgəm e te ŋ kuuwn bvʉ̀ kòmlò è tsughu, wə̄n ghèe ghê tsə̀təndə̄ghā tə wə̄n tə ŋ kôom kì yo bala zo alo kəwālā.

⁹ Ghe nì màʼà tsughu faŋkwu kə ŋgə̄m chì, zùghù è wǐiwǐi è te, ghe tɔŋlo enyəa à lò avʉatsə̄a àsùghò Satàn, wəla ù nɔɔ̄m kaāŋ ghî gho am mbī e dzə̀m — ghe m màʼà tsùghù wò wən aŋ ghueekətsə̄, màʼà tsùghù wò sùghò tsə̀təndə̄ghā tə wə̄n ghèe ghee.

¹⁰ Mùghò n daŋso zuw ndùw dzə̀ e tùghu è dzàa tsughu alo kəwālā enyəa, “Êzə̄ŋ, Zə̀ kə bəghasəa nù ghî a wə̄n gho, chia kə dê sugho daʼa kə wə̄n tò kədə̀ŋ, Bəghambī ù wə̄n vʉ̀a ù dè sughò dwaʼa u wə̄n wo! Bòʼ enyəa ghùw wəla ù fə̀ ŋgaām sɔʼɔ̀ zeē ghu ko a zəŋò waazə̂ a sɛ̀ ghò, ghe ŋ wə̄n nî shùaa màʼà sə̀ tsùghù wò, aŋghəa ù fə̀ ŋgaām kwuū ghee an sə kə Kəzə̀.

¹¹ Ghe n təmzə kɔʼ wə̄n aŋ kàŋ tə Tsʉ u Ndzì u te wo àsùghò an êsəŋò zəla ghe kəaa, tɔŋlo enyəa ghe ka fə̀ŋ naŋa dzə̀ am mùghù e ghee, ghe m boo sùghò enyəa to ghe buʼù kpuwnlo.

¹² À fi lo enyəa ghù ki aleduʼn ko nû êzəŋ wala ko àsùghò ghɛ̀ ghəla ghɛ̀ mughu a te! Tsû ù ne wo â ghɛ̀ ghəla ghɛ̀ mughu aŋ ghueekətsə̄ àsùghò â ghɛ̀ ghəla ghɛ mughu an dzùghùntsòʼ, nu vʉatsə̄a ghə n tsùghù wò fì à bòobò kə unʉ̀ghà ù pfʉa ko, mbuu ù kwo enyəa e ki ko kəmà fə enə̀gha.”

¹³ A m bùghò ŋgəm zə kôʼ tsughu enyəa ghe ŋ wən maʼà sə̀ tsùghù wò a ghueetsə̄, zə̀ n nùghù ndùw a bǎà wìzən vʉ̀a ù mò dzə tsughu wɛ ù nùu vʉ̀.

¹⁴ Ghe ŋ kuūwn fughu tsughu nughò vʉ̀ â ghûo tə nùu mbuʼ to tə̀ bə̀ghà enyəa ù è lo aletiī zəghāa nughù kɔʼ a te, ù tiī soʼō ndûw zughu zə aŋ ŋgwə̄n, a fiā ù ki alendùw tsûuŋ mughù tsughu ghe lo e lɛnlo alo tənùu tə təgha à kə̀m kò.

¹⁵ Zughu zə ŋ kwəlà sə̌a wò m̀mughū an dzughu e wə̄n mə̀ m gbaa sə̄a wò tǒ dzùghùu a bǎà nùghò vʉ̀ enyəa e kuŋso maʼà wə̄n a te.

¹⁶ Ghueekətsə̄ kə n yòsò nùghò vʉ̀, zɛɛ naŋa kɔʼ dzughu e wə̄n, mʉ̀ mɛ̀ʼɛ̀ tsùghu dzùghùu zəa ŋgəm zə kwə̂n sə wô alo edzughu.

¹⁷ Ŋgəm è tə n daŋso pfʉso kɔʼ unʉghà a zəŋò nùghò vʉ̀, nùghù tsùghù alendùw sôʼ wɛ a wə̄n à li ghən an tsam, ghəla ghe naāŋ lâŋ kə Kəzə̀ kò, mʉa fughuu gùw è Yɛso.

¹⁸ Ŋgəm zə n tee tsughu an shiashia kə mǎakùw.

« Roimhe

Air adhart »

2020

Lean sinn:

Ceanglaichean taic

Sanasan