Edêe Fughu 11 - To kə Kəzə̀ kə̀ Fughu ko

Ghê bvʉ̂nɔ̀ʼ a bəghà Zə̀ kə tum wo

¹ Ghe n daŋso fùghù wò mùghò â fòʼ tǒ mbàŋ è nyə̀nlo, ghe n dzɛ̀ â mùghò enyəa, “Nùghù fòʼn tsughu ndughu e Kə̀zə̀ e nē, à tsaʼ kə te ko, ghù taŋ tsughu sugho ghî yia ghe kɔʼso Zə̀ kò a fughu.

² Kà be kə beē kə kuuwn fòʼn dzə̀; zə̀ghaa màʼà chì, nu a m fùghù tsə̀ghà ndùw â Tòʼò zò. Ghe lo dzùghòon naʼ è zɔlɔ zo alo aghùw aŋ ghə̀m n tə̀ndzɔ̀ŋɔ n chìakò à ndzɔŋɔ to tə bə̀ghà.

³ Ǹ lo daŋso fughuu tsughu ghê bvʉ̂nɔ̀ʼ ghaŋa ghən à bə̀ghà â daʼa ko aledzɛ̀ ùshʉ̀ghà alo ntsuʼu kam à bɔm tə nstuʼu to tə bə̀ghà à ghè mò ŋghəm tǔu mo ghe dzəlà kèlê ndzʉ tə evʉ̄.”

⁴ Ghê bvʉ̂nɔ̀ʼ ghən a bə̀ghà lǒ kàʼ n tə̀ Olèf m bə̀ghà, àsùghò twi u tə̀lâm wò u bʉ̀ghà, ghe yia a ti an sə kə Tsə̂ntə̀mbî wəla ù saʼā mbī e dzə̀m.

⁵ Abugho ghùw dzɛ̀ enyəa e so e nomso ghee, wən wə m bəghaan wò səa wò an dzughu e ghee, wə m pfʉ kɔʼ ghîikətuw a ghee. Abugho ghùw dzɛ̀ enyəa e so e nomso ghee, ghe fi ki alewī ghùw ù te an dziī e mɔ̀ʼɔ.

⁶ Ghe ki kədaʼa alekə̀ŋò naŋa tsughu kəwālā enyəa ghuuw e lô tsughuu an tì kə̀là ghe dzâa shʉghà u Kəzə̀ wò a te. Ghe ki sugho kədaʼa a zəŋò dzùghùu tò aleghəə̄ŋ tsughu enyəa tə fwəlà kɔʼ təkâŋ, àsùghò alefughu mbī â tsù wò aŋ ŋgòʼ è ezə̄ŋ zəla ghe tsə̂m tsughu abugho à lò ko an nəgha è ghɛ zo.

⁷ Abugho ghe lo daŋso dzɛ̂ mɛʼɛ̀ tsughu shʉghà u ghee wo, fɛ̀ɛn kə nyòoŋgwən chia kə lo səa kɔʼɔ wo am bùʼ kəla kə kuʼù yo lo bu kəŋgè ghèe ghee, kə lo təmāzəā kɔʼ ghee, kə wiī maʼà sughò ghee.

⁸ Gwən a ghee a lo e nyəŋ ko an dziī è nàʼ è səŋò zəla ghe fə̀ təghàa Mughubè u ghee a te; zən zə naʼ è səŋò è gɔɔ e te lo enyəa, “Sodòm” ŋkāa “Edzìpt.”

⁹ Ghî à kê nyəŋo lɛ̂ɛn gwən a ghee alo ntsuʼu n təgha à kə̀m kò, aghî ghe sə an ndùm tə̀n tə̀ ndzə̀m, aghî ghe saʼā saʼà tə̀n tə̀ dzə̀m, ghe sə wo an naʼā tə̀n tə̀ dzə̀m, ghe e tuu enyəa ghe tsəən yo ghee.

¹⁰ Ghî a mbī a ke duʼnlo bòʼ vʉ e ghì ghə̀n a bə̀ghà, ghe e zəa, saŋlo, tsɛ̀ʼɛ̀ kǎàŋ ghue e ghee, bòʼ ghiīshʉ̀ghà ghə̀n à bə̀ghà mò fughuu utsû â ghì ghəla ghe mughù am fɛ am mbī.

¹¹ A m bùghò tsùʼù mən n təgha à kə̀m kò tsə̀ghà tsughu, Zə̀ kə̀ n fùghù wò Zuʼ təla tə fughuu mughù zò tə m bùghò nyə̌ən tsughu a zəŋò ghee, ghe n nùghù tème wò am fwee e ghee, fə̂ŋ tə̀ n sə mîaso ndùw ghì ghəla ghe mò ti fughu lɛɛn nduw ghee.

¹² Ghe n zuw ghùw ù lì ù dzɛ̀ tsughu wô alo kəwālā an dzə̂ è tughu â ghee enyəa, “Nùghu kɔʼ wò nlò fɛ!” Ghe n nùghù kɔ̀ʼ ndùw alo kəwālā am mbàʼ mo ghîikətuw a ghee yì tɔʼɔ̀ lɛ̌ɛn wo nù nu an sə a ghee.

¹³ An nə̀gha e te zo, ghueekətsə̄ kə biso nùghù nòʼ ŋgə̀a è wo, dəŋò kə enaʼ kə te ko kə mɔ̀ʼ abugho a dzughùu tsughu naʼ zo alo udwə̀ŋò eghə̄m, kə m bɛ̀lɛ̀ bvʉ̀ è tsughu. Kam tə aghì tə̀ m kpuw an nòʼ e te zo sə̀ghàmbəgha. Fə̂ŋ tə̀ n ti sə ghî à li yì fughu ghe mò taʼkè kpuwnlo, ghe m fughu ukɛɛ â Zə̀ kə kəwālā ko.

¹⁴ Tsû u kə̀bə̀ghà ù ne wə̀ n tsə̀ghà, gha kə səa yo mo u kə̀təgha u kâ bùghò.

Mbuwlì è sə̀ghàkəmbəgha nì wò tsù u kə̀təgha ù biigh wo

¹⁵ Tsə̀ndə̄ghā è sə̀ghàkəmbəgha n daŋso tɔŋ tsughu mbuwlì è wə̄n, a n zuw dzə̂ tə̀ tughu tə̀ li to alo kəwālā tə dzâa wô enyəa, “Naʼ e mbī zə m bùghò dòʼò fɔ̂e u Tsə̂ntə̀mbî ù sɛ̀ wò ghèe Bəghambī u wən: wəla ù fə̀ tsɔʼ kɔʼ, ù ke e saʼa tuw u aghì wò to mbī kê bughò mîaa.”

¹⁶ Tsoʼ tən ŋghəm m bə̀ghà à ghè tò tə chìakò ghe mò doʼ an ndàŋ tə udwə̀ŋ tə ghee a vʉ̀a Zə̀ kò n nùghù bvʉ̀ pfʉ̌ɔ ndùw sʉ e ghee a ghueetsə̄, kɔʼso ndùw Kə̀zə̀.

¹⁷ Ghe n dzâa tsùghù enyəa, “Tsə̂ntə̀mbî Zə̀ kə̀ Ghaʼa kən kə̀ dzə̀m kəla kə mò lô tsəgha, chi kə lo! Ghàʼ fughuu zɔ̀ɔŋ kə̀a enyəa ghù n nì daʼa kə̂a kə̀ ne ko ghù vʉ̀a ghù kàʼ ndùw alesāʼ tuw u aghì!

¹⁸ Toʼò e mò ŋgee pfʉso n nəghà bòʼ nəgha zəla ghù so e dê nʉ̀ghà wʉ̀a u pfʉa wo a te m kpē, àsùghò nəgha zəla ghù ki alesaʼ ghî à kpuuwn gho a te kpe tsughu. Nəghā zə m kpe alenamsô kɔ̀ɔ mə̀ghà, ghiīshʉ̀ghà ghə̀a, àsùghò ghì ghə̀a ghò a dzə̀m, ghî ghə̀n a dzə̀m ghe fughuu ghû â kɔʼso mò, ne ghò àsùghò bvùʼù mə̄n. Nəghā zə m kpe â ghù aleləŋê ghì ghəla ghe sâʼ maʼa mbī.”

¹⁹ Ndughu e Kəzə̀ è ne alo kəwālā n daŋso nùghù tsʉ̀ è tsughu, a ŋ koʼō nyə̌a ndùw tɛtɛ kə ŋkāa kə wə̄n a fughu. Ghuuw zə n nùghù mwɛ̀ɛn kǎaŋ wò ènyə, a n zuuw mbɔ̂ŋ àsùghò dəm kə eghūuw, ghueekətsə̄ kə n noʼò, tiatia mə̀ ŋ ŋgee tâa.