Edêe Fughu 10 - To kə Kəzə̀ kə̀ Fughu ko

Tsə̀ndə̄ghā àsùghò nyàaŋ fə nyeme u kəmwàʼsò wò

¹ Mùgho ŋ kòʼ kpèʼe ndùw tùghùtughù kə Tsə̀ndə̄ghā e Kəzə̀ è lì e səā tsughuu wô alo kəwālā mò mbàʼ ŋ wən ŋgwûu kɔ̀ʼ, à gbò kəgə̄m ko edzuŋ an tuw kə wə̄n. Sʉ u wə̄n wə n lo tò ezuuw, fwee zə n lo tò nyʉ̀là u uwə̀n.

² Ù ŋ ki nyàaŋ fə unyəme u kəmwàʼsò kə tsʉ doʼō aŋ ghu kə wə̄n, ù n tiso ndùw fwee kə wə̄n kə kwè ù təma wo an dzùghùntsòʼ, tiso ndùw kə kwè ù kwû wò an ghueekətsə̄.

³ Ù n zò tsùghu zò kə dzə̂ kə̀ li ko to bəgha kə lô nə̂mlo. Ghəa ù zò sə kɔʼ dzə̀ êzə̀, ghuuw zə̀ n nùghù kwùu è tsughu tənəghā sə̀ghàmbəgha.

⁴ Ghəa dəm u eghūuw wən sə̀ghàmbəgha kwûu tsughu, mùghò n so e tɔɔ̄ nyəā tsughu fagha kala ŋ zuw tsughu, dzə̀ è eli dzɛ̀ tsughu wô alo kəwālā enyəa, “Nàla naŋa ghəa yia dəm u eghūuw wən sə̀ghàmbəgha dzɛ, e kwo ko ghù lò tɔɔ̄ naāŋ sugho.”

⁵ Tsə̀ndə̄ghā zəla mùgho mò koʼ è ti an dzughù asùghò aŋ ghueekətsə̄ ŋ kele kɔʼ ghu kə wə̄n kə̀ zəa ko edzuŋ,

⁶ kɛ̀ tsùghù an zən Zə̀ kəla kə kəla kə mùghù tən, kəla kə fə̀ gbə̂n wo wala ko àsùghò fʉgha wəla u lo a te, gbə̀n wò ghueekətsə̄ àsùghò fʉgha wəla u lo a te; àsùghò gbən wò sùghò dzùghùntsòʼ àsùghò fʉgha wəla u lo a te, dzɛ̀ tsùghù enyəa, “Ghe lo kòom bǒon sùghò yò nəgha zo êzə̄n.

⁷ Abugho tsə̀ndə̄ghā è sə̀ghàkəmbəgha lo kuūwn tɔŋ tsughu mbuwlì è wən, nàn kə eghəa kəla Zə̀ kə fə̀ fôʼ naŋa lo nìi nù bəla ko, tò aŋghəa ù ke dzɛ̂ naŋa â ghîishʉ̀gha a wə̄n gho.”

⁸ Dzə̀ zala M̀ mô zuw kɔʼ nduw alo kəwālā n dzɛ̀ kpèʼe tsùghù wò â mùghò enyəa, “Ndùw, nǐi kɔʼ nyəme u kəmwàʼsò vʉa u zê doʼò aŋ ghu kə tsə̀ndə̄ghā zə̀a è ti an dzùghùntsòʼ àsùghò aŋ ghueekətsə̄.”

⁹ M̀ fi ndùw nǔ a vʉ̀a tsə̀ndə̄ghā zə̀, dzɛ̀ â wən enyəa ù fughuu wô mùghò â nyàaŋ fə nyəme u kəmwàʼsò fə te fo; ù n dzɛ̀ â mùghò enyəa “Nì, ghù pfʉ; kə kpəŋo nu an dzughu zəghà tò təzuw, tia tə sô kuuwn mgbaŋlo an nʉ̀ghà wʉ̀a.”

¹⁰ Mùghò n daŋso nì kɔ̀ʼ nyàaŋ fə unyəme u kəmwàʼsò fə te fo, pfʉ̀ è nduw; kə m kpəŋō tò təzuw an dzughu zaŋā, a m bùghò Ŋ̀ kuūwn pfʉ mîi tsughu, kə m mgbaŋlo an nʉghà waŋa.

¹¹ Ghe n daŋso dzɛ̀ â mùghò enyəa, “Ghù kì aledzàa kpeʼê shʉ̀ghà u ndə̀mà tə aghì, u ndə̀mà tə tənàʼà wò, u ndə̀mà tə təsàʼà wò àsùghò u ndə̀mà tə udwə̀ŋ wò.”