Dzɛ̂ms 5 - To kə Kəzə̀ kə̀ Fughu ko

Ekwɛ̂nlò â ghi à kuu gho

¹ Ghɛ̀ a ghî à kuu gho, bʉgha sə wǒ nlǒ dzə̀, ghɛ̀ di ghue zɛʼɛ zo aŋ ŋgoʼ zəla ghɛ̀ ki alenyəa ndûw a te.

² Kum zɛʼɛ e mîaan ndùw nù, soʼosoʼ zə e pfʉ sugho ndzʉ tɛʼɛ̄ to.

³ Kaʼbàŋ tɛʼɛ tə lo dzèe nù àsùghò shwə̀là tɛʼɛ to. Kaʼbàŋ tɛʼɛ àsùghò shwə̀là tɛʼɛ tə n dzè, dzê e ghee e te kê lò fəgha kəla kə kê tsʉʉ̄n fuūw to a zəŋò ghɛ̀, e kê pfʉa sughò gwən e ughùe zɛʼɛ̄ tò uwən. Ghɛ̀ ŋ kum e kuʼ naŋa kɔʼ, mo tsuʼ ù saʼā u sāʼ wə n su, mò à kè lò kum e te zo e lo tsʉā dêe fughuu tûe wɛʼɛ wo an tsuʼ u te wo.

⁴ Kòʼo nlò, ghî a kəfwàʼ ghəla ghe mò fwaʼa an sum zɛʼɛ, ghɛ̀ yia kwu naŋa nduw kə̀a ŋ ghee mò, ghe a yia ghe n dîi səa kɔʼɔ an dzə̂ è tughu, Tsə̂ntə̀mbî vʉ̀a ù zuw dî e ghee zo.

⁵ Ghɛ̀ mò fɛ am mbī mughu an lɔ̄; mò ghɛ̀ dûwsò nǎaŋ tsughûu ghue zɛʼɛ tǒ mbɔ̀ŋ təla ghe mò tsʉ naŋā enyəa ghe wiī pfʉ̄.

⁶ Ghɛ̌ yia zɔ̂ʼ kwu ghî gho mo ghu a ghee a zɔlɔ nù, ghɛ̀ yia wiīn maʼa ghee, mo ghe kâ ghue e bûʼ sə̀ghànlò.

Fə̀ŋ è kɔ̀nlo àsùghò gɔ̀ɔŋ zò

⁷ Waazə̂ ghaŋa gho, ghɛ kɔlɔ tsughu ko nlò fə̂ŋ tò êzə̀, to Mughu ù te kê telè bughò. Kòʼo sùghò aŋghəa ghî a usum a taā tsughu fʉgha u ghee wo a te, ghe ŋ kɔlɔ tsughuu təfə̂ŋ, dòʼò ko enyəə, ghuuw zə m bùghò tsùghù kwə̀n è wo, bùghò tsə̀ghà kɔ̀ʼ è sugho, fʉgha u ghee u te wə n dzə̀əm m bɔ̀ŋ tùghù dzɔ̀ tsùghù an usum.

⁸ Ghɛ̀ kɔlɔ tsughu ko nlò fə̂ŋ tò, ghɛ̀ ka tsughu zə zo, nu nəgha e Mughu ù te è bughoo zə n su.

⁹ Waazə̂ ghaŋa gho, kà nlò ghue zɛʼɛ zə e tsəŋo saʼa, ghe lô saʼā ghɛ. Nu sàʼàtə̀saʼ m bùghò, vʉ̀a a fǔundughu.

¹⁰ Waazə̂ ghò, kòʼo tsughu ko ghiīshʉ̀ghà a Kəzə̀ ghəla ghe fə̀ kə̂aa ghəa gho am bàm e Mughu ù te à. Yi lo ghî ghəla ghe fə kɔlɔ̄ tsughu fə̂ŋ tò an ŋgoʼ zəla ghe fə̀ zuūw.

¹¹ Tò aŋghəa ghɛ̀ mgbaŋ kwo, a nîi enyəa, bughuso e lo â ghî ghəla ghe mò kɔlɔ tsughu fə̂ŋ tò. Ghɛ̀ mafə zuw aŋghəa Dzɔ̂b fə̀ kɔlɔ tsughu fə̀ŋ a te, ghɛ̀ ŋ kòʼ sùghò ghəa zəla Tsə̂ntə̀mbî fə̀ bughò ghəə̄ŋ tsughu, tɔŋlo enyəa Tsə̂ntəmbî kì kəmuwnlo àsùghò se è kwuso zo.

¹² Aŋ ghəa a te gho a dzə̀m a waazə̂ ghaŋa gho, kà nlò è kaā tsughu ghəa zo an zən e kəwālā, kà nlò e kaā tsughu ghəa zo an zən e ghueekətsə̄, ŋkāa kà nlo è zəa sugho kàa mò abugho ghɛ toō naāŋ to ko. Dòʼo tsughu nlò enyəa, mò ghɛ̀ tsughu boo tsughu eghəa, ghɛ̌ fi boo nù, mò ghɛ̀ tue tsughu eghəa, ghɛ̌ fi tue nû, to Zə̀ kə̀ ka lô ghɛ dzûw màʼà.

¹³ Mò abugho ghùw ù lì lò am bvʉa zɛʼɛ̄ ù fanlo ŋkāa ù lo an tsù ù li wo, ù gɔ̀ŋlò è tsughu. Mò ghùw ù lì lò am bvʉa zɛʼɛ̄ ù tsoʼnlo, ù m fughu ŋkɔʼso â Zə̀ kò alo ezom.

¹⁴ Mò ghùw ù li lo nû am bvʉa zɛʼɛ̄ ù dzàŋa, ù n tum tɔŋɔ tsughu tsoʼ tə dzeŋe kə ghì a Kəzə̀, ghe m bughò gɔ̂ɔŋ tsughu an tuw kə wə̄n, mo ghe ŋ wə̄n tsoʼso tsùghù dzə̀ alo mvʉ̄ an zən e Mughu ù te.

¹⁵ Gɔ̂ɔŋ zəla ghe gɔ̂ɔŋ tsughuu am fə̂ŋ e mɔ̀ʼ â Zə̀ kò, e baaŋ nû ghùw ù dzàŋa — Mughu ù te n nì nùghù dzâŋ e te zo. Mo à lò enyəa ghùw ù te mò ghəəŋ boon ghəa è li zo, ghe ŋ ghuuw màʼà ghəa e biigh e te zo.

¹⁶ Ghɛ̌ fi ki alezaā vûŋ wɛʼɛ wo aŋ ghùe zɛʼɛ̄, gɔ̀ɔŋ sùghò aŋ ghùe zɛʼɛ̄ to Zə̀ kə̀ baāŋ kɔʼ ghɛ. Nu gɔ̂ŋlò e ghûw ù tsəghatsəgha è ki kədaʼa, kɔɔ fwàʼà sùghò.

¹⁷ Èlaedzà fə̀ lo sugho ghùw ènyə tǒ sɛ̀. Ù ŋ kùm gɔ̀ɔŋ tsùghù an tì kə̀ li ko enyəa ghuuw e ka tsughu, ghuuw zə ŋ kè tsughu alo tənùu tə̀ təgha à ndzɔŋɔ to tǔu.

¹⁸ A mo è dòʼo ko, ù ŋ kòom gɔ̀ŋlo è tsughu, ghuuw zə n tsùghù kwə̀n è wo, fʉghàzəa wə n noo bɔŋ tsughu aŋ ghueekətsə̄.

¹⁹ Waazə̂ ghaŋa gho, abugho ghùw ù mɔ̀ʼ am bvʉā zɛʼɛ̄ zə̀ghàa maʼà tsughu səŋò zò, làʼ nùghù ndùw an dziī è nùghù, ghùw ù li vʉ̀a ù bùghò nî tiso naŋa sə wo wə̄n ebàm an dziī è sə̀ŋo,

²⁰ ghuw wəla ù ghəə̄ŋ tsughu ghùw ù biigh wə̄n vʉ̀a ù tigh maʼà tsughu ghəa a wə̄n à biigh gho, ù kì alekele tsughu enyəa, ù fi bəghasə̄ ghùw ù biigh vʉ̀ aŋ ghùu vʉ zo. Vʉ̀a ù ghəŋlo enyəa ghe ghuūw maʼà ndə̀mà tə təbòo tə ghûw ù te.

« Roimhe

Air adhart »

2020

Lean sinn:

Ceanglaichean taic

Sanasan