Dzɛ̂ms 4 - To kə Kəzə̀ kə̀ Fughu ko

¹ À ghə̌əŋ tsə̀ghà kə̀ kwò enyəa ghɛ̀ è təma tsàm aŋ ghùe zɛʼɛ̄ à, zùghù sùghò a? À lò ləgha zəla ghɛ̀ ki am fʉgha u mbī u ghəŋlo enyəa ghɛ̀ e tema tsàm aŋ ghue zɛʼɛ.

² Ghɛ̀ ləghaa alekele ùfʉgha, mò ghɛ̀ kuuwn yò alekele, zəa e ghəŋlo ghɛ̀ yia a wiīn ghî ghò. Ghɛ̀ ŋgee ləghaa alekele ùfʉgha mò ghɛ̀ kuuwn yò alekele, ghəa a te a yia a ghəŋlo, ghɛ̀ n zughù zěe, buu sùghò kə̀ŋgè alo eghùe. Ghɛ̀ yo dzə̂ alekele fʉgha u te wo, bòʼ ghɛ̀ kâ bvʉ ndùw â Zə̀ kò.

³ Abugho ghɛ bûʼ bvʉ ko fəgha ko, ghɛ̀ yia a dòʼŋkè kele, à lǒ bòʼ ghɛ sô bvʉ am mòʼnlò è biigh zo, alenìi fwaʼà ndûw ghəa a fə̂ŋ ghɛʼɛ a te.

⁴ Ghɛ̀ ghî à səa ndzaŋa gho, ghɛ̀ kwo yo enyəa ghî ghəla ghe bwîi fwən wo ghèe ghê fʉgha u mbī wo lo ghî a kətuw a Kəzə̀ a? À fi lo enyəa, ghùw wəla ù mòʼnlo alebwiī fwən wo ghèe fʉgha u mbī wo fi doʼò dzə ghùw ù kə̀tūw ù Kə̀zə̀.

⁵ Ghɛ̀ moʼò èndughō an shwaʼ wəla ghe tɔm naŋa am Mwàʼsò kə Kəzə̀ enyəa, “Zə̀ kə̀ kûm ləghaa nù Zuʼ tə̀là Ù lǒ mò Ù m fughu â sɛ̀ à.” À lǒ mò shwaʼ wən lo agha a?

⁶ Zə̀ chia kə kuūwn ki fə̀ŋ è dzùŋ aleghəŋlo enyəa moʼnlò è biigh e sɛ̀ e lô tughuu tsəghàasəa sɛ̀. Aŋghəa mwàʼsò kə Kə̀zə̀ kə̀ dzaā enyəa, “Zə̀ chia kə bvʉ̂sò maʼn ghî ghəla ghe kɔʼsō ghue e ghee zo, kuuwn ti an tuw u ghì ghəla ghe zumsō tsughu ghue zo.”

⁷ À fi lo enyəa ghɛ̀ è zuuw nduw â Zə̀ kò. Kà nlò boo enyəa vʉatsə̄a a kɔʼɔ̄ nyaʼa an tuw wɛʼɛ, a lo tiī zəghàan tsùghuu ghɛ.

⁸ Kuʼn kəŋo ndùw nlǒ a zəŋò Zə̀ kò, Zə̀ kə̀ lo kuʼ kəŋo wô sughò a zəŋò ghɛ̀. Səso nùghu nlò ghu kɛʼɛ ko aŋ ghə̀a à biigh gho, ghî à biigh ghən. Ghɛ̀ suw maʼa sugho nlò fə̂ŋ tɛʼɛ to a ghî a kə̀bàŋàdzə̀m ghən.

⁹ Dòʼo tsughu nlò alo emʉŋe, ghɛ̀ è ŋgee diī sugho ghue zɛʼɛ zo. Kà nlò e tsoʼnlo, e laam dinlo nlò nû. Duʼn kɛʼɛ̄ kə doʼò tsughu se zɛʼɛ.

¹⁰ Mbvùʼu tsughu nlò ghue zo a tsəlà Zə̀ kò, kə lo tsuʼu naŋa kɔʼ ghɛ an ndàŋ.

Kà ghî à li ghə e saʼā

¹¹ Waazə̂ ghaŋa gho, kà nlò dzə̀ è bǐigh kele a zəŋò ghì à li gho. Chìa wəla ù kə̀a nduw dzə̀ è bǐigh â wàazə̀ ŋkāa ù saʼ nduw wàazə̀, ù fi kə̂aa dzə̀ è bǐigh â làŋ kò, saʼa sùghò làŋ kə te ko. Abugho ghù fwə̀là saʼā lâŋ kò, ghù fi bwîi dzə yò an làŋ kə te ko, ghù lò ko sàʼà ù təsāʼ.

¹² Ghùw lò ko u mɔʼ ù fughuu lâŋ kò, saʼa sùghò àghì. À lò wəla ù lò alebəghaasə ghùw, lò sugho alemìasò maʼà. Yia a bugho ghû, ghû kǔuwn lò ndugho alesaʼ ghùw ù lì a?

Kǎ fə̀ŋ tsɔ̂

¹³ Zuw nlò ghɛ a, ghɛ̀ ghəla ghɛ̀ dzâa tsughu enyəa, “Nɛ ŋkāa tsʉtsʉ, ghàʼ nughùun ndùw an naʼ zən ŋkāa ezə̂, a ndûw buū tsughu kənûm fughu, a ghəə̄ŋ kəŋo ndûw mbòʼkùm, a kele kɔʼ ukʉa.”

¹⁴ Ghɛ̀ ŋ kə̂aa èzə̀ mò ghɛ̀ bûʼ kwò naŋa yo tsʉtsʉ. Ghɛ̀ tɔ̂ʼ kwò naŋa ênzə̂n fəgha kəla kə lo səā tsʉtsʉ a? Nu ghɛ̀ lo ko tò kədzən kə nughùun bvʉ̂a tsughuu, kə ŋ kòom ghɛ̌ɛ saŋ tsughu ko mo gha kə kâ sə.

¹⁵ Ghɛ̀ laam ki aledzàa tsughu enyəa, “Abugho Mughu u te tsəm, to sɛ̀ ghə̂əŋ ghəa zən zo ŋkāa ezə̂.”

¹⁶ E fɛ kuuwn lò êzəŋ enyəa ghɛ̀ kɔʼso kaŋlo èghue, tsɔ̀ɔ kǎaŋ təfə̀ŋ. Ghɛ̌ fi ghəŋlo è bo abugho ghɛ̀ tsɔ̂ɔ fə̂ŋ tò êzə̀.

¹⁷ À fi lo enyəa abugho ghùw kwo ghəa e tsəghatsəgha zəla ù ki aleghəŋlo, vʉ̀a ù dòʼŋkè ghəŋlo, ù fi ghəəŋ boon nù.