2 Tɛ̀sàlonìan 3 - To kə Kəzə̀ kə̀ Fughu ko

E gɔŋlo nlò an tuw waʼā

¹ Aletsughuu tsəlā tsughu shwaʼ waŋā â ghɛ̀ a waazə̂ ghaʼa gho, lo enyəa, ghɛ̀ e gɔŋlo nlò an tuw kaʼā, gɔ̀ɔŋ sùghò enyəa shwaʼ u Mughu ù te u mbaā nyəŋo ŋgəaā ndûw tə̀ luʼū tə dzə̀m to ghî ghə̀ e zuuw, fughu ndùw ŋkɔʼso â Zə̀ kò, tò ghɛ̌ fə̀ zuw, è boo, fughuu sùghò ŋkɔʼso â Zə̀ kò.

² Ghɛ̀ è gɔ̂ɔŋ sugho enyəa ghàʼ nɔ̂ɔsə aŋ ghu kə ghì a biigh à biigh gho, àsùghò ghu ghì ghəla ghe ki fə̂ŋ tə dzəaa to, nu à yò dzə̂ ghe a dzə̀m ghe boō fughu â Kə̀lestò.

³ À sò kǔuwn lò ko enyəa Mughu ù te lo nâaŋ dzughu e wə̄n, ù lo fughu nù ghɛ â daʼa ko, ù lo tughuso nù ghɛ, ù kə̀ŋo naŋā sùghò ghɛ̀ aŋ ghùu ghì à biigh gho.

⁴ Ghàʼ kwo tən nû am fə̂ŋ taʼa enyəa Mughu ù te fwaʼà nù a zəŋò ghɛ̀, enyəa ghɛ̀ fwaʼà nù ghəa ghəla ghǎʼ mò dzɛ̂ naŋā â ghɛ, àsùghò enyəa ghɛ̀ yia lo ghəəŋ ndûuŋ tsəgha ghəa a te gho

⁵ Ghǎʼ yia a gɔ̂ŋlò enyəa to Mughu ù te mô ghəŋlo ghɛ̀ zuwkɛlɛ dzì zəla Zə̀ kə̀ dêe ləgha e wə̄n zo a te, àsùghò enyəa ghɛ̀ è lo alekɔlɔ̄ fə̀ŋ aŋ ŋgoʼ zəla ghɛ̀ zuūw tò Kə̀lestò.

Aghî a dzə̀m kì alefwàʼ

⁶ Ghàʼ dzâa wò â ghɛ̀ a waazə̂ ghaʼa gho an zən e Mughu ù te Yɛso Kə̀lestò enyəa ghɛ̀ è ka e tughuu ghɛ à ghê waazə̂ ghɛʼɛ à li ghəla ghe ləghaa alezuum lo kaāŋ tsəgha mo ghe fwaʼa yò fəgha kə̀ li ko, mo ghe mughu sugho yo aŋghəa bughōo kəla ghɛ̌ fə̀ zoʼn ni aŋ ghùu ghàʼ děe ghè kò.

⁷ Ghuūghùe zɛʼɛ̄ e kwo nû aŋghəa ghɛ̀ ki alekòʼò nî ghəa ghaʼa a te, tɔŋlo enyəa ghǎʼ mò bɔlɔ yo aŋghəa ghǎʼ mò lo tsəgha fì sɛ̀ a dzə̀m.

⁸ Ghàʼ mò niī zəa sugho yo fəghazəa kə ghûw ko mò ghàʼ kâ tsə̄, nu ghǎʼ mò kuū fwaʼā zee nu, fwaʼà bwǐi enyəa e kwo ko ghàʼ lo so e fughuu kəfəm â ghùw wɛʼɛ ù lì.

⁹ Aŋ ghəa ghəla ghǎʼ mò ghəŋlo lo enyə, à mò yo dzə bòʼ ghàʼ mò ki yo daʼa ko alebvʉa wô fəgha kə̀là ghǎʼ mò ləghaa, à mò kuuwn lo enyəa ghàʼ mo ləghaa aledèe wô â ghɛ̀ tǒ tsə̌a e dzùŋ zəla ghɛ̀ ki alekòʼò nî.

¹⁰ Ghǎʼ maā fughu naŋa ghɛ â lâŋ kən ko an ghəa sɛ̀ mò lo a dzə̀m enyəa, “Abugho ghùw ləghaa yo alefwaʼā, ù kì yo alezə̄.”

¹¹ Ghǎʼ yia a naām zuuw ko enyəa bɔ̀lɔ̀bɔ̀n tə aghì tə̀ li tə naam lo ko am bvʉa zɛʼɛ mo ghe ləghaa yo aleghə̂əŋ ghəa è li zo aŋ ghùe e ghee, kuuwn nyəaa kaaŋ tsə̀ghà aŋ ghəa a aghì nughù ghò.

¹² Ghǎʼ yia a tsʉ̂a wo ŋgòʼ è aghì ghən an zən e Mughu ù te Yɛso Kə̀lestò enyəa ghe zumso tsughu ghue e ghee, ghe e kuūm fwaʼā nduw alekə̄ŋ mughù e ghee.

¹³ Yia a bugho ghɛ a waazə̂ ghaʼa gho, e kwo ko ghɛ̀ lô so e bughu kòom nù aleghəŋlo èdzɔ̀.

¹⁴ Abugho ghuw ù lì kpɛʼɛ̄ tue maʼa alezuw ghəa ghəla ghàʼ tɔm wo â ghɛ̀ am mwàʼsò kən, ghɛ̀ n tsə̀sò nàŋa kɔʼ wə̄n, koòm zə̌afaa yo ghɛ̀ à ghee, to tuw kə də̂n wə̄n.

¹⁵ E kwo ko ghɛ̀ lô so e nîi ŋgòʼ e ghùw ù te tǒ ghùw ù kə tuw wɛʼɛ, ghɛ̀ ŋ kuuwn tsʉ̀a ndùw ko wə̄n tǒ wàazə̀ wɛʼɛ.

Pôl fùghù gùŋso ètɔŋlo

¹⁶ To ghuūghùe u Mughu ù te wəla ù fughuu ghî ghò â bughuun zo, mò fughuu sughò ghɛ â bughuun zo alo tənə̀gha tə dzə̀m àsùghò alo aghəa a dzə̀m. Mughu ù te e lo ghɛ̀ à ghee a dzə̀m

¹⁷ À tɔɔŋ zən êzəŋ enyə, à tɔm nyə tsughu mugho Pôl aŋ ghu kaŋā. Zən lo tsə̌a zəla e lò am mwàʼsò waŋa u dzə̀m, aledèe tsughu enyəa à mwàʼsò kə te kə tɔm mugho Pôl.

¹⁸ Yìa Ŋ̀ gɔ̂ŋlo enyəa to Mughu u sɛ̀ Yɛso Kə̀lestò mò dê ghɛ̀ a dzə̀m â dzɔ̀ e wə̄n zo.