2 Tɛ̀sàlonìan 2 - To kə Kəzə̀ kə̀ Fughu ko

Ghùw ù bǐigh ù bǐigh

¹ Ǒo waazə̂ ghaʼa gho, kùu ndùw aŋghəa Yɛso Kə̀lestò lo bugho a te ebàm àsùghò dzì zəla sɛ̀ lo zûuŋ wo a te alendùw kpee nî wə̄n a te, ghàʼ buʼu kə̀ghu â ghɛ̀

² enyəa fə̂ŋ tɛʼɛ tə ka e mbaa tsəŋ dzə ŋkāa tuw kɛʼɛ kə e ndzəghanlo abugho ghî a li a bughò dzɛ̂ wo â ghɛ̀ enyəa tsuʼ wəla Mughu ù te ki alebùghò a te wə m kpē. Ghɛ̀ ka e boom fughuu dzə â ghee abugho ghe bûʼ dzɛ̂ ko enyəa ghe ghəa a te gho à mò naʼa wo ghaʼ â ghee ghà mò zuw wo aŋ ghùu Zə̀ kò, ŋkāa à lò an tsʉ̀ zaʼa ghàʼ fughu wo â ghì ghò, ŋkāa enyəa à lò kəmwàʼsò ghàʼ tɔm.

³ E kwo ko ghùw ù lì lô so e tsêe ghɛ̀, tɔŋlo enyəa tsuʼ fə te lo yo dzə̂ alebùghò mò ndə̀m è aghì kaam bûʼ sə̀ wò dzə̀ enyə, enyəa ghe tuu màʼn Kə̀zə̀ — à ke lo sugho mò ghùw ù biigh ù biigh ŋ ghue u wə̄n u dê fughu sə wò; ghùw wəla ghe lo dzûuw maʼnlo an uwə̀n.

⁴ Ghùw ù te e ke kɔʼso ghue u wə̄n wo, tsùghòsò màʼn fʉgha wəla ghe tso tɔŋlo enyəa à lò uzʉ̀. Ù lo nyəā nyaʼā kɔʼ an ndùghène è Kə̀zə̀, ù e dzaā wo enyəa e lo Kəzə̀.

⁵ Ghɛ̀ kwo nû enyəa M̀ maā ghəa ghən gho â ghɛ̀ dzɛ̀ aŋghəa mùgho mò lo a fì èzə̀.

⁶ Ghɛ̌ kwo sugho nû fəgha kəla kə kɔlɔ̀ naāŋ wə̄n enyəa ù ka kaam bùghò, à lò enyəa ghe lo telè dêe fughu kɔʼ wə̄n abugho nəgha e te e lo kpē tsughuu.

⁷ Êzəŋ am mbī, ghî à tsɔŋɔ də̀mà kaaŋ nù ghî ghə̀ e ka e zuuw lâŋ kə Kəzə̀ kò. À sò kuuwn lò ko enyəa ghəa ghəla a ke ki alesə̄ lo tèlè sə̌a ko mo ghe ŋ ghùw ù biigh ù biigh ù te kwu nùghù.

⁸ Ghe lo daŋso dêe fughu səā wô ghùw wəla ù zuūw yo lâŋ kò, Yɛso lo daŋso wiī maʼa wə̄n mò ù fò ndùw təzuʼ a zəŋò wə̄n. Yɛso lo daŋso dzûuw màʼà sugho wə̄n daʼa kə səghanyəgha ŋ wə̄n ù bùghò â ghe kò.

⁹ Ghùw ù bǐigh ù te lo bùghòo mò ù kì daʼa kə Satàn. Ù lo e deē wò sə̀ghà mò, fwàʼà wò sùghò tùghù tùghù tə aghəa mo ghəa è səŋò è li e yo aŋ ghəa a te gho a dzə̀m.

¹⁰ Ù lo e niī wo bòobò tə agha tə wən to tsèe ndùw ghî ghò an ndə̀mà tə tədzǐi, ghî ghəla ghe fə̀ fôʼ naŋā enyəa ghe kê sə̌a mìanlò alo kələ̄ŋ, bòʼ ghe tue maʼa aleboo fughu â sə̀ŋò zò to ghe zə kətuw.

¹¹ Zən lò ghee Zə̀ kə̀ ndzəŋso naāŋ tsughuū ghee enyəa ghe boom fughuu nduw ko â gha gho.

¹² Ghəa ghən fə̀ lo enyəa ghe lo fɔeso ghee bòʼ ghe mò ləghaa aleghəəŋ ghəa à biigh gho, kuuwn tuu alebôo ghəa zəla e lo èsəŋò.

Zə̀ kə mò ghɛ tsɔʼ enyəa ghɛ zə tuw ko

¹³ Ghàʼ ŋgəmso ki nû alefughuu zɔ̀ɔŋ kə Kəzə̀ ko an tuw wɛʼɛ waazə̂ ghaʼa gho alo tənə̀gha tə dzə̀m. Mughu ù te gaʼ fə̀ŋ a zəŋò ghɛ̀, tɔŋlo enyəa â mbī aletsoō zîi tsughu, à fə̀ lo mo Zə̀ kə̀ mafə ghɛ ki shìaa enyəa ghɛ̀ ke bughuo zə tuw ko mò à ghɛ̀ sûuw zɔ̀nso tsughu Zuʼ tə̀ Zɔlɔ to àsùghò aŋghəa ghɛ̀ boō fughu aŋ ghəa zəla e lo êsə̀ŋò.

¹⁴ Zə̀ kə fə̀ ghɛ̀ fɛ aŋ ghəa ghən tɔŋɔ wo bòʼ làbəlà è dzùŋ zəla ghàʼ mò bughò naʼà wo â ghɛ̀, aleghəŋlo enyəa ghɛ̀ lo kele sugho səghanyəgha ŋ Yɛso Kə̀lestò mò, tɔɔŋ Mughùbè ù sɛ̀.

¹⁵ Waazə̂ ghaʼa gho, à fi lo enyəa ghɛ ki alefəghaan tee tsughu, ghɛ̀ gaʼ tsughu tuw ko an shwaʼ ù Kə̀zə̀ wəla ghǎʼ fə̀ naʼà wo â ghɛ̀ an dzə̂ ŋkāa à fə̀ tɔm wo alo kəmwàʼsò.

¹⁶ Ghaʼ gɔ̂ŋlò enyəa to ghuūghùe u Mughùbè ù sɛ̀, Yɛso Kə̀lestò, ghèe Tsele ù te tɔɔŋ Zə̀ kə sɛ̀, ghe ghəla ghe mò ləgha sɛ̀, fughu tən sɛ̀ â tsə̀mso kə fə̂ŋ kəla kə doʼò tən, àsùghò moʼnlò è dzûŋ zò an dzɔ̀ e ghee,

¹⁷ Mô dzə̂n fə̀ŋ tɛʼɛ, tə e tughu aŋ ghəa à dzûŋ ghə̀là ghɛ̀ ghəŋlo àsùghò aŋ ghəa ghɛʼɛ à kəa gho.