2 Tɛ̀sàlonìan 1 - To kə Kəzə̀ kə̀ Fughu ko

¹ À mwàʼsò kən kə tɔɔ wò mùghò Pôl, ghàʼ à ghê Timotì àsùghò Saelàs â ghɛ̀ yia ghɛ̀ lo mò ghɛ̀ m boo fughu â Zə̀ ko, Tsele ù te ghèe Yɛso Kə̀lestò fi an Tɛ̀sàlonikà. Ghàʼ fughuu wô ghɛ̀ â tɔɔŋ zo.

² Gɔ̂ɔŋ zaʼa e lo enyəa to Kə̀zə̀, Tsele ù sɛ̀ ghèe Mughu ù te Yɛso Kə̀lestò mò dê ghɛ̀ â dzɔ̀ zò, ghe fughuu sughò ghɛ̀ â bughuun zo.

Zɔ̀ɔŋ kə fughuu ko àsùghò gɔ̀ɔŋ zò

³ Waazə̂ ghaʼa gho, ghàʼ ki alefughuu zɔ̀ɔŋ kò â Zə̀ kò nəgha tən tə̀ dzə̀m, mo e ŋgəmso dzɔ̀ɔ nù aleghəŋlo èzə̀ tɔŋlo enyəa boo zɛʼɛ̄ àsùghò ləgha zəla ghɛ̀ ki aŋ ghùe zɛʼɛ̄ ŋgee noom nù.

⁴ Zən lò e ghee ghàʼ tsɔɔ fə̀ŋ bòʼ ghɛ̀ an ndughu tə Kəzə̀ tən tə̀ dzə̀m. Ghàʼ tsɔ̂ɔ fə̀ŋ enyəa ghɛ̀ naām ti ko am boo zɛʼɛ̄, aŋghəa ghe buʼù ndzaŋso kaāŋ ko ghɛ, ghɛ̀ yia a fanlō.

⁵ Zə zəla ghɛ̀ ka tsughu lo tsə̌a aledèe tsughu enyəa Zə̀ kə̌ sàʼ è wən saʼa an ndziī è tsəghatsəgha, à fi lo enyəa kə lo ghəəŋ nù ghɛ̀ doʼo tsughu ghî ghəla ghe lo mo ghe ŋ kɔʼkpe am fɔ̀e u wə̄n wəla ghɛ̀ fanlo bòʼ ghè wò.

⁶ Zə̀ kə̀ fwàʼà kô ghəa ghəla a lô tsəghatsəgha, à fi lo enyəa kə lo fɔeso nù ghî ghəla ghe fughuu ghɛ â tsù wò.

⁷ Kə lo fughuu ghɛ̀ ghəla ghɛ̀ fanlō â yòsò zò, àsùghò â ghàʼ. Ghəa ghən kê bəla kə nîi abugho Mughu ù te, Yɛso kè sə tsughuu wo alo kəwālā ghèe ghê tsə̀də̀ndə̄ghā tə Kəzə̀ tə wə̄n tə̀ ghaʼa to.

⁸ Abugho ù kè səā tsughu wo ghèe ghè tsə̀təndə̄ghā tə Kəzə̀ tə wə̄n to èzə̀ à wə̀n ù bəghaan wo, ù kê dî tə̀ŋgàmà a zəŋò ghì ghəla ghe kwo yo Zə̀ kò àsùghò a zəŋò ghì ghəla ghe bwîi yo aŋghəa Làbəlà è Mughùbè ù sɛ̀ Yɛso děe.

⁹ Ghe kê fɔeso ghee, ghe ke e mgbɛɛ zuuw tsəgha ko ŋgōʼ, mbùuŋ kèe alekòʼ Mughu ù te àsùghò səghanyəgha n daʼa kə wə̄n, ghe sò lo mo ghe ŋ ghee bâʼ zə̀ghà sə̀ wò.

¹⁰ Abugho ù kè bugho am tsuʼ fə tēfō, dzughu ghə e ke zuu ghî ghə̀n à dzə̀m ghe lo mo ghe m boo fughu à Zə̀ kò, ghe e fughuu wə̄n â kɔʼso mò. Ghuūghùe zɛʼɛ e ke lo aŋ bvʉa e ghee, ghɛ̀ sô lo mò ghɛ̀ maā boo fughu shwaʼ wəla ghǎʼ mò bughò dzɛ wo â ghɛ̀ kùu ndùw wə̄n.

¹¹ Zən lò e ghee ghàʼ gɔ̂ɔŋ Zə̀ kò an tuw wɛʼɛ nəgha tən tə̀ dzə̀m enyəa Zə̀ kə ghəŋlo tò ghɛ̀ kele daʼa ko alemùghù mùghù zəla kə mò tɔŋɔ̄ ghɛ enyəa ghɛ̀ mughu ghe zò. To Zə̀ kə̀ mô ghəŋlo enyəa moʼnlò è dzûŋ zəla ghɛ̀ ki ghè zò àsùghò fwàʼ kə̀là ghɛ̀ fwaʼā bòʼ boo zəla ghɛ̀ ki ghe zò mò bɔɔ̄m bughò səā ko êzə̀.

¹² Abugho e lô enyə, e lo ghəŋlo enyəa ghî ghə è fughuu kɔʼso mò â Kə̀lestò bòʼ ghɛ̀, àsùghò enyəa, ghue e eghùe zɛʼɛ zə e ki sugho kɔʼso mò bòʼ wə̄n. Ghəa ghən a dzə̀m ènyə lǒ bòʼ Zə̀ kə sɛ̀ ghèe Mughu ù te, Yɛso Kə̀lestò ň dzɔ̀ e ghee dê â sɛ̀.