2 Pità 3 - To kə Kəzə̀ kə̀ Fughu ko

Tsuʼ wəla Mughu ù te lo kôom bugho ebàm a te

¹ Fən a fə̂ŋ ghaŋa gho, kən êzəŋ e ghəəŋ tsughu mwàʼsò waŋa u bʉ̀ghà Ǹ tɔɔ wo â ghɛ̀. Am mwàʼsò wən ù bʉ̀ghà, mùghò n də̀m alezòom kɔʼ moʼnlò è dzûŋ zò am fə̀ŋ tɛʼɛ aŋghəa M̀ zə̂əŋ wô ghɛ̀ aŋ ghəa ghən.

² Ǹ ləghaa enyəa ghɛ̀ e moʼn tsughuu shwaʼ wəla ghiīshʉ̀ghà à zɔlɔ a fə̀ dzɛ̂ naŋā â wìiwì, àsùghò alezə̀əŋ wô ghɛ̀ an lwàŋ u Mughu ù te, tɔɔŋ Bəghambī, wəla tum tə̀ zɔlɔ tə fə̀ dzɛ̂ naŋā zîi wo â ghɛ̀.

³ Alebùʼù nîi tsughu, ghɛ̀ ki alezuūwkɛlɛ̄ tsughu enyəa ghî à li a kê bùghò nù an tsùʼù məla mbī kê suū wo alebùghò mîa, mò à mùghù e ghee e boʼò kèle ghəa ghəla gwən e ughùe e ghee e ləghaa, ghe lo e tsoʼo ghɛ.

⁴ Ghe lo e bvʉa tsughu enyəa, “À lo mo Yɛso ka fə dzɛ̂ nàŋa enyəa e lo kòom bùghò nù? Ù mafə sô bùghò à? Ù sò wɛ̀ɛ à? Ghê bə̀ghàbəgha mafə kpuwnlo, aghəa à dzə̀m yia kuuwn naam lô ko alo kətə̀ŋ aŋghəa a fə̀ lo tsəgha ko a te to mbī e tsoō kaʼā tsughu.”

⁵ Ghe n tso kuuwn tsùghòsò màʼà tsùghù səŋò zən enyəa kəwala àsùghò ghueekətsə̄ ghue u bɔm dzə̀ mò Zə̀ kə̀ saʼ sə̀ wò dzə̀. Ghe mo enyəa ghe fə̀ ghueekətsə̄ kə fəghaan sə kɔʼ wo alo mmùghu, mùghù mə̀ ndzə̀ŋ ŋgəa kɔʼ ghueekətsə̄ kə tə ko,

⁶ Ghe n dzɛ̀ sùgho enyəa, à fə̀ lo sugho am mùghù m mɔ̀ʼɔ n te mò Zə̀ kə fə̀ nî sâʼ maʼa mbī è wǐi a te.

⁷ Zəa e kuuwn lô enyəa, an dzə̂ è mɔ̀ʼɔ e wə̄n e te, Zə̀ kə̀ m bàʼ nàŋa sə̀ wo wala kəla kə lo êzəŋ àsùghò ghueekətsə̄ ko enyəa ghe e ləəm tsughu tî kə̀la kə̀ kê saʼa wiī maʼn ghî ghəla ghe kwo yo wə̄n a te.

⁸ Fən ghaŋa à dzûŋ ghò, ghəa e kuuwn lô e mɔ̀ʼ ghɛ̀ ki yo alenìizə̂, ghəa e te e lo enyəa: an sə kə Mughu ù te, fətsuʼ fə mɔ̀ʼ fə̀ lo tò tənǔu təbɔm èghəm; tənǔu təbɔm èghəm tia tə lo tò fətsuʼ fə mɔ̀ʼ. Ghəa a te gho a bə̀ghà lò ko kəfəgha kə̀ mɔ̀ʼ â wə̄n.

⁹ E kuuwn lò enyəa, Mughu ù te lɛso dzə̀ yo alelueso to kə wə̄n tò aŋghəa ghî à li a môʼnlo. Ù ləghaa yo enyəa to ghùw mò kwəlà sâŋlò. Ù kuuwn ləghaa enyəa to ghî à mô maʼà bòo tə ghee, ghe tiī kuwnlo.

¹⁰ Zəa e kuuwn lô sugho enyəa, Tsuʼ wəla Mughu ù te kê bughoo a te, ghùw kè kwò naŋa yo, ù kè bùghòo ko tǒ ghùwtsɔ̀ŋɔ. An tsuʼ u te wo, dəm kə ke e kwuū aŋghəa wala kə saŋā mîan nyəā nduw. Wən u kê pfʉā nughù kɔʼ ghueekətsə̄ àsùghò fʉgha wə̀n ù dzə̀m a te, ufʉgha u dzə̀m kə̀ saŋa mîaa ndûw an uwə̀n.

¹¹ Ghəa e lô enyəa ghe lô fʉgha wə̀n ù dzə̀m dzûuw màʼnlò an dziī zə, e fi lo enyəa ghɛ̀ ki alemùghù mùghù è zɔlɔ zəla Zə̀ kə̀ ləghaa,

¹² lə̂əm tsughû tsuʼ wəla Zə̀ kə̀ naŋā enyəa Yɛso kè bughoo a te èbàm, moʼn zɛʼɛ zə e lo tən ko enyəa to ù mò mbaā bughò, tɔŋlo enyəa an tsuʼ u te wo, kəwālā kə̀ dzə̀m kè pfʉ̌a nùghù kɔ̀ʼɔ nù, ufʉgha u dzə̀m a te kê saŋā mîa ndûw.

¹³ A fɛ kuuwn ləəm kô to kəla Zə̀ kə fə̀ to naŋā, enyəa kə lo bɔɔ tsughû wala kə̀ fughu ko àsùghò ghueekətsə̄ kə̀ fughu ko, mbī zəla à kè mughu tən ko ghî ghəla ghe ghəə̄ŋ ghəa ghəla Zə̀ kə̀ ləghaa.

¹⁴ À fi lo enyəa fən ghaŋa gho, aŋghəa ghɛ̀ ləə̄m tsuʼ fən fo, də̀ma tən tsughu nlò aleghəŋlo enyəa ghɛ̀e e zɔlɔ, ghɛ̀ è ki sugho yo nùʼ tò a sə̀a Zə̀ kò, lò sugho alo ebughunlo ghɛ̀ à ghee.

¹⁵ Kele tsughu nlò enyəa Mughu ù te naam ləmlo â ghɛ̀ enyəa ghɛ̀ boo fughu wo â wə̄n tò ghɛ̀ zə tuw ko. Ghəa ghən bɔɔm lò eghəla aŋghəa waʼāwāʼ Pôl fə̀ tɔm wô ghɛ̀ â mwàʼsò kò an tɔ wəla Zə̀ kə mò fughu â wə̄n.

¹⁶ Ù bɔ̂ɔm kə̀aa kô ghəa è mɔʼɔ zo, tò aŋghəa ù kə̂aa am mwàʼsò wən ù dzə̀m. Ghəa à li a lo am mwàʼsò u wən u te wo a tughūu alezuūwkɛlɛ, làʼsò tə aghì ghəla ghe tɔ̂ʼ ti yo and ghəa è li zo yia nî bɔe naŋā ndûw moʼnlò e te zo an dzǐi tə ghee, tò aŋghəa ghe buʼù ghəə̄ŋ dzə an də̀ŋo tə li to am Mwàʼsò kə Kəzə̀, mo ghe êzə fi tsɔ̂ɔ kô nyʉ e ghee aŋ ŋgɔ̀ʼ.

¹⁷ Waazə̂ ghaŋa gho, ghəa e nyɔ̂ʼ lô enyəa ghɛ̀ ŋ kele zìi ghəa ghən gho, e ghomlo nlò, e kwo ko gha a ghì ghəla ghe bwîi dzə̀ yo alo kəlàŋ lò so e ghəŋlo enyəa ghɛ̀ bvʉ komlo.

¹⁸ Zə êzəŋ e lo enyəa, to dzɔ̂ e Mughu ù te, tɔɔn Bəghambī ù sɛ, Yɛso Kə̀lestò àsùghò tɔ wəla ghɛ̀ ki kùu wə̄n mò ghəŋlo enyəa ghɛ̀ e ŋgee noōm dzɔɔ̄. To ghî mô kɔ̀ʼso tsə̀ghà wə̄n to mbī kê bughò mîa. Zə e lo ko êzə̀.