2 Pità 2 - To kə Kəzə̀ kə̀ Fughu ko

Ghɛ ni nlò ghôm zo ghɛ̀ a ghê wàdè ghə agha gho

¹ Ghîishùghà ghə agha a lo səa kɔʼɔ nû am bvʉa zɛʼɛ̄, tò aŋghəa ghe fə̀ lo an tì kə̀ wii ko. Ghe lo e niī wo gha à kaʼn gho aŋ ghəa Kəzə̀; ghe lo tuū maʼà sughò Mughu ù te wəla ù mò zue sə tuw u ghee wo, e kê fi lo enyəa ghe ŋ ghue e ghee e boon maʼà.

² Ndə̀ma tə aghì tə lo səa tsə̀ghà ndùw a bǎà dzə̌adzə̀ kə emùghù kə ghee kə te ko, bòʼ fwàʼ kəla ghe fwaʼa ghè kò. Ghî à lo e suūwn səŋò zò bòʼ ghəa ghəla ghe ghəŋlo.

³ An səa ghee à səa gho, ghe lo e niī wo gha ghəla a fween səŋò zò alezə kua wɛʼɛ. Gha kə mô êzəŋ e sə aŋghəa Zə̀ kə̀ fə̀ kaʼ alebiāan naŋā ghəa kə ki alefɔeso ghee a te. Ghùw wəla ù lo fɔeso ghee bwii dzə̀ yo.

⁴ Tɔŋlo enyəa Zə̀ kə̀ ka fə̂ zəən zə̀ghà dzə̀ alefɔesô tsə̀ntəndə̄ghā tə wə̄n tə̀ li to an nə̀gha zəla ghə fə̀ ghəə̄ŋ tsughu bo zo. Kə a fə̀ ni kɔn tsughu ghee, màʼà nàŋa nyə tsughu alô fə̀baʼebigh, am bùʼ kə utsù enyəa ghe e ləəm tsughu tsuʼu saʼ wo.

⁵ Zə̀ ka fə zəən zə̀ghàa dzə̀ tì kə̀ wii ko aledzùuw maʼà ghee ghì a mbī gho, à fə̀ gɔʼɔ ko yo Nôa wəla ù fə̀ ghəə̄ŋ ghəa ghela Zə̀ kə̀ fə̀ ləghaa ghè gho ghèe ghê ghì a li ghən sə̀ghàmbəgha ghe fə̀ zə tuw ko, an nə̀ghà zəla Zə̀ kə fə̀ nî wo fʉ̀ghàdzughù tò, tə̀ m bùghò kùŋso màʼà ghî biigh gho a te;

⁶ Zə̀ kə̀ fə̀ fɔeso tsughu nàʼ e Soodòm àsùghò e Gòmolà zò aŋghəa kə fə̀ kpâa maʼà kɔʼ naʼà tə te to aŋ wə̀n ù bəghaan wo, bòʼ bòo tə ghee aledòʼò tsughu tǒ tsə̌a â ghî ghəla ghe naaŋ yo lâŋ kə Wə̄n ko.

⁷ Zə̀ kə̀ ŋ kuuwn bəghasə̄ tsughu Lɔ̂t, tɔɔŋ ghùw ù tsəghatsəgha wəla ù fə̀ ləghaa yo alekòʼ dzə̀adzə̀ tə aghəa təla ghî à biigh fə̀ a ghəŋlo.

⁸ Tɔŋlo enyəa ghùw ù tsəghatsəgha fə̀ mughu am bvʉa e ghee, ù ŋgee zuuw èfɔnlo, aŋghəa ù kòʼò zeē ghəa à biigh ghəla ghe ghəŋlo an tsuʼu n te mò ndzə̀m.

⁹ Abugho e lo êzə̀, à fi lo enyəa Mughu u te kwo nû alebəghaasə ghî ghəla ghe ghəə̄ŋ ghəa ghəla Zə̀ kə̀ ləghaa àsùghò alenìi kûum naŋâ ghì à biigh gho, ghe e ləəm tsuʼ u saʼ wo,

¹⁰ a ka dɔ̂ɔm taŋ ghî ghəla ghe mughù tən ko dzə̀adzə̀ kə emùghù kò, bùʼù tsǒo tuu màʼn sùghò daʼa kə Kəzə̀. Ghîishʉ̀ghà ghə agha a te a sǎa â fə̀ŋ tò, bùʼù tsə̀ŋo yo alekə̀a bonlo àghəa a zəŋò ghì a zɔlɔ ghəla ghe lô alo kəwalā, bùʼù sùuwn sùghò ghee.

¹¹ Tsə̀təndə̄ghā tə Kəzə̀ təla tə tsoō tughū, ghaʼà sùghò a vʉ̀a Zə̀ kò, tə buʼù kə̂a bòon yo ghəa è li zo kùu ndùw ghee a vʉ̀a Mughu ù te.

¹² Ghiīshʉ̀ghà ghə agha ghən lò ghî à laʼso gho; ghe bɔɔm lò ko tò tənyôm. Abugho ghùw ù te ləgha tsughu dzə̂ ghəa zo aleghəŋlo, ù n tsò ghə̌əŋ ndùw ko nù. Ghe fə̂ ghee dzə ko alekwuu, ghe e winlo. Abugho ghe tɔ̂ʼ kwo ko yo fəgha ko, ghe n tsò sùuwn ko nù; ghe lô ghee wii ko tò tənyôm.

¹³ Ghe lô ghee tsəa sùghò aŋ ŋgoʼ zəla ghe lo mo ghe m fughu â ghì ghò. Ghe nîi enyəa à lò ghəa è dzûŋ zò aŋghəa ghe zəā ghue e ghee zo, ghə̂əŋ kâaŋ dzə̌adzə̀ tə aghəa â ŋgàla tsə̀ tò. À lò aledzəsô ghue zɛʼɛ àsùghò tuw kə̀ dəla ko â ghɛ̀, â ghee aletseē ghɛ alelaŋā zəa dzəəŋ ghɛ̀ à ghee, kala kaŋlo, buʼn sùghò mbɔ̀ŋ.

¹⁴ Sə a ghee a lo tən ko a zəŋò nùuŋ tə ayìzən to. Ghe bughū tsə̀ghà yo aleghəŋlo èbo. Ghe kwo aleghə̂əŋ ghì ghəla boo e ghee e lo mo e kam tughu enyəa ghe bvʉ̂ alo fətə̀mà. Ghe yia zoʼn naŋa tsughu fə̂ŋ tə ghee to enyəa to à mò ki ko ghee fʉgha wo u dzə̀m. Zə̀ kə̀ ŋ ghee ləŋ naŋa.

¹⁵ Ghe n dzì zə̀ èsəŋò zəghà màʼà, ghe yia sə̀ làʼ è nduw; aŋghəa ghe sə tsəghâ nduw an dzə̀ tə Balàam, tɔɔŋ wɛ ù Bɛyò wəla ù fə̀ ləgha kua wo alekele mò ù ghə̀ŋlo èbo.

¹⁶ Ghe ŋ kwɛɛn wə̄n am bo e wə̄n e te zo. Ndzàkas fə wə̄n fə ŋ kə̀a sə̀ wò àghəa an dzə̂ è ghùw, bughu naŋa ndùw ghəa à zəgha yia ghùwshʉ̀ghà wə̀ agha vʉ̀, tɔɔŋ Balàam fə̀ so e ghəŋlo.

Tsû wəla ghê wàdè ghə agha a lo koʼō

¹⁷ Ghî ghən lo tò bûʼ wə mmùghu wəla mùghù n zʉme nùghù sə kɔʼ a te, mo u ki yo fwàʼ kò; ghe lo tò bʉgha wə eghuuw kuɛ̀ɛ kə̀ dzûu kaāŋ tsəgha. Ghe m bùʼ kò â ghee tsəm naŋa am fə̂ŋ è kə̀ləm.

¹⁸ Ghe kɔʼso kaŋlo èghue, kə̀a shwaʼ ù laʼso wo, nìi kɔ̀ʼɔ ghəa ghəla ghe nûuŋ kaŋlo a te, tsʉ̀a bòon ndùw ghì ghəla ghe kuʼù nughù ti sə wo am bvʉa e ghì ghəla ghe mughu dzə̀adzə̀ kə e mùghù kò.

¹⁹ Ghê wàdè ghə agha a te a zoʼn ndùw ghee a te gho enyəa ghe e ndzə̀m mughu, lo êzə̀ mo ghuūghùe e ghee lo ukɔ̂ â bo zo. Zə êzə lo bòʼ enyəa abugho ghəa enyə tughu tsughu a zəŋò ghùw, ghùw ù te m fwə̀n dòʼò ndùw kə̀kɔ̂ a bǎà ghəa e te zo.

²⁰ Abugho ghî à lo mo ghe n tì zə̀ghà sə̀ wò bo e mbī zo aŋ ghəa ghe kele tsughu Mughùbè ù sɛ̀, tɔɔŋ Bəghambī Yɛso Kə̀lestò, ghe yìa kôom bughô fwə̂n kpeʼe ndûw kɔ̂ wò â bo e te zo, ghe bo tsə̀ghàsə̀ ghəa ghe fə̀ bûʼ lò tsəghà a te aŋghəa ghe fə̀ lo mo ghe kaām kele səŋò zò.

²¹ Aŋghəa ghəa a te a lô ènyə, à mò so e lo dzɔ̀ abugho ghe fə̀ taʼkè kele dzì è tsəghatsəgha, tsəghasə aŋghəa ghe kele tsughu dzì e te kòom bùgho tùe màʼà tsughù lwâŋ ù zɔlɔ wəla ghe fə̀ fughu â ghee.

²² Mwam e ghee e deē enyəa, shwaʼ u kwə̀n kə̀ kwən wən lo èsəŋò enyəa, “Bvʉ kôom ndùuw ko èbàm alezə zaā u wə̄n wəla ù mò zɛ̂ maʼa.” Vʉa u dêe sugho enyəa, “Kwèlebʉgha kəla a sûuw tsughuu kôom bɔ̌ɔm ndùw mbə̀me kɔʼɔ ko ùghue alo kətsāʼ ebàm.”