2 Pità 1 - To kə Kəzə̀ kə̀ Fughu ko

Tɔŋlo e Pità â ghì a Kəzə̀ ghò

¹ Mùghò Sǎemòn, tɔɔŋ Pità, wəla Ǹ lo ghùw ù kə̀fwàʼ àsùghò tum è Yɛso Kə̀lestò; M̀ fughu wò ètɔŋlo â ghɛ̀ ghəla ghɛ̀ lo mò ghɛ̀ ŋ kele boo zəla e tughuu sugho tò zaʼā zo. À lǒ bòʼ dzɔ̀ e Zə̀ kə sɛ̀ àsùghò e Bəghambī ù sɛ̀ zo e ghəŋlo enyəa sɛ̀ e ki boo zən zo.

² Ŋ̀ gɔŋlò enyəa to ghɛ̀ mô lô alo ebughunlo, ghɛ̀ e zuuw sugho kədzûŋ bò enyəa ghɛ̀ kwo nu Zə̀ kò ghèe Yɛso Mughùbè ù sɛ.

Ghɛ̀ ki alemùghù to ghî ghəla a mò tɔŋɔ Zə̀ ko

³ Daʼa kə Kəzə̀ kə̀ m fughu sɛ̀ â fʉgha wən ù dzə̀m sɛ̀ ki alekele alemughu mughù è zɔlɔ zo, aŋghəa sɛ̀ kwo dzə wə̄n wəla ù mò tsɔʼ kɔʼ sɛ̀ alemùghù aŋ kɔʼso ŋ wə̄n àsùghò dzɔ̀ e wə̄n zo.

⁴ An dziī zən, Ù n lueso to kə wə̄n kə̀ ne kela ù fə̀ to naŋā, fughù wo sɛ̀ â ghəa à səŋò ghò. Ghea à səŋò a te yia a ghəŋlo ghɛ̀ yia ti nughù sə wo aŋ ghəa à biigh ghəla gwən e ùghùe e leghāa, enyəa to ghɛ̀ mô mùghù mughù è zɔlɔ zo.

⁵ Zən lò e ghee ghùw ki alesɔʼn tsughu ŋkāa aletəmabaʼso ndùw èdzɔ̀ am boo e wə̄n, àsùghò alebaʼso ndùw tɔ u ghəa Kəzə̀ an dzɔ̀ e wə̄n;

⁶ Kà è kaa ghəəŋ ko nlò ghəa gho tò ghî ghə̀la ghe kwo Zə̀ kò, ghɛ̀ ki sugho alenaŋsô ghuw kə ebwìi kò. Tò aŋghəa ghɛ̀ lo alenaŋsô ghuw kə ebwìi kɛʼɛ, ghɛ̀ ki sugho alekɔlɔ tə̀fə̀ŋ an nə̀gha e utsù. Tò aŋghəa ghɛ̀ lo alekɔɔn tsughuu fə̂ŋ tò an nə̀gha e utsù, ghɛ̀ e ki sugho mwam e ghì a Kəzə̀ gho.

⁷ Tò aŋghəa ghɛ̀ ki mwam e ghì a Kəzə gho, ghɛ̀ ki aleləghāa nduw kə̀chìa tò waazughù. Tò aŋghəa ghɛ̀ ləghaa kə̀chìa tò waazughù, ghɛ̀ ki aleləghāa ghî ghò a dzə̀m am fə̂ŋ e mɔ̀ʼ.

⁸ Abugho ghɛ̀ tso ki dzə̂ ghəa ghə̀ è ghə̀n a dzə̀m, yia nomlo am bvʉa zɛʼɛ̄, a lo ghəəŋ nù ghɛ̀ è fwaʼā dzɔɔ̄, mʉa sùghò tam kə̀ dzûŋ kò, ghəa a te a lo e deē tsughu enyəa ghɛ̀ kwo nû Mughùbè ù sɛ̀, tɔɔŋ Yɛso Kə̀lestò u te.

⁹ Lò êzə̀, abugho ghùw ki yo ghəa ghə̀ è ghə̀n, à fi lo enyəa ù lǒ tǒ ghùw ù fǒo; ù kòʼòkɛlɛ̄ yo ghəa gho, nìzə̀a tsùghu enyəa ghe maā sûw màʼà bôo tə ghee təla ghe fə ghəə̄ŋ tsəghà dzə.

¹⁰ Waazə̂ ghaŋa gho, à fi lo enyəa ghɛ̀ ki alesɔʼn tsughu ŋkāa aledèe tsughu enyəa Zə̀ kə̀ ghɛ shìaa tɔ̀ŋɔ sə̀ wò nù enyəa ghɛ̀ bugho doʼō ghî a wə̄n gho. Abugho ghɛ̀ ghəəŋ dzə êzə̀, ghɛ̀ kê bvʉ̀ kòʼ yò am boo zɛʼɛ̄,

¹¹ ghe kê kpeēnîi sughò ghɛ̀ am fɔ̀e ù doʼn təla wəla à ki Mughùbè ù sɛ̀, tɔɔŋ Bəghambī, Yɛso Kə̀lestò.

¹² E fi lo enyəa Ǹ lo ki tsəgha ko alezəə̄ŋ zee wò ghɛ, ghəa e bûʼ lo ko enyəa ghɛ̀ kwo ziī nû ghəa a te gho, tɔ̀ʼ tì sugho an səŋò zəla ghɛ̀ lo mò ghɛ̀ ŋ kele zìi.

¹³ Ŋ̀ kwo enyəa à ŋgə̀mso lǒ dzɔ̀, â mùghò alezəə̄ŋ zee wo ghɛ êzə̄ŋ wəla Ǹ naām lo â tuw ko, enyəa ghùw wɛʼɛ lô so e nîizə̀a ghəa a te gho.

¹⁴ Ŋ̀ kwo nû enyəa aletsùuŋ tsughu, Ǹ lo kòom yò dzə̂ a sə à tughu gho tò aŋghəa Mughùbè waŋa Yɛso Kə̀lestò mò tɔ̂ʼ dê fughu wo â mùghò.

¹⁵ Ŋ̀ ki nû aleghəəŋ tsughu enyəa Ǹ děe naŋa tsughu dzì zəla ghɛ̀ kê lo aletaā moʼn ghəa ghən a te nəgha tən tə̀ dzə̀m abugho Ŋ̀ kê buw ko â tuw ko.

Ghî ghə̀la ghe fə̀ kôʼ kɔʼso ŋ Kə̀lestò mò

¹⁶ Ghàʼ fɛ â ghɛ̀ dzâa wò yǒ zə̂azə̂a mə̀là ghî a fə̀ tɔɔm naŋa tsughu aŋ ŋgəŋ è ghee, aŋghəa ghǎʼ mò dzɛ̂ wô â ghɛ̀ enyəa ghɛ̀ kele tsughu dwaʼa u Mughùbè ù sɛ̀ wò, tɔɔŋ Yɛso Kə̀lestò àsùghò bùghò e wə̄n è ne zəla u lo bughoo ghè zò, à fə̀ kuuwn lo ghəa à ne ghəla ghàʼ ghue e ghùe zaʼā e fə̀ koʼ.

¹⁷ Ghaʼ fə̀ lo a fughu, aŋghəa Kə̀zə̀, Tsele ù te fə̀ naāŋ wə̄n alo ŋkɔʼso àsùghò alo nsəghanyəghā; dò kə dzə̂ kə̀ n sə̀ tsùghù wò fùghu a te alo kə̀wala, dzàa tsùghù enyəa, “Wən lǒ Wɛ ù fə̀ŋ waŋa. Fə̀ŋ zaŋa zɔlɔ nù a zəŋò wə̄n.”

¹⁸ Ghue e ughùe zaʼa e mafə zuw ghəa dzə̀ è te sə tsughu wo alo kəwālā mò ghàʼ à ghee lo a dzə̀m a fughu aŋ kwàʼ ù zɔlɔ wo.

¹⁹ Ghàʼ mô êzəŋ kûum boo fughu enyəa fəgha kə̀là ghiīshʉ̀ghà a Kəzə̀ fə̀ dzɛ̂ naŋā lo êsəŋò. E dzɔ̌ɔ nù enyəa ghɛ̀ gaʼ tsughu tuw ko a te, tɔŋlo enyəa shwaʼ u te u lo tò kəkɛ̀ʼɛ̀ kə baŋā an lùʼù kə kələ̂m, to tsuʼ u kê telè zuw. Kele tsughu ko nlò êzə̀ to abugho nəgha e te e lo bugho, Yɛso, tɔɔŋ sə̀ghàbəlà fə gbəlàgbə̀là fə̀ lo e baŋa aŋ fə̀ŋ tɛʼɛ.

²⁰ Aŋ ghəa ghən a dzə̀m, ghɛ̀ ki alezuūwkɛlɛ̄ tsughu enyəa, ghəa è li yo dzə̂ ghe tɔm naŋa am Mwàʼsò kə Kəzə̀, zəla ghiīshʉ̀ghà a fə̀ dzɛ naŋā wo mò à fə̀ tso moʼn sə kɔʼ ko ghee aŋ ŋgəŋ è ghee.

²¹ Nu shwaʼ u shʉ̀ghà ù li u ka fə̂ bughò kôʼ dzə̀ mò à tsə̀m kɔʼ ghùw; ghî a fə̀ shwaʼ u Kəzə̀ ù naʼn wo mò à ghee tsoom kɔʼɔ̂ Zuʼ tə̀ Zɔlɔ to.