2 Kòlentìan 9 - To kə Kəzə̀ kə̀ Fughu ko

Eyôsò â ghì a Kə̀lestò ghò

¹ Yia a bugho yosò zəla ghî à fughu â ghì à Kəzə̀ ghò an Yɛ̀lusalɛ̀m Ŋ̀ kôom lɛ̌ɛn yò aletɔɔ̄ dzâa wô â ghɛ̀:

² nu Ŋ̀ kwo nû enyəa ghɛ̀ tsôo mùʼù ko â mbuuw mò enyə aleyòsò; mùghò n tsɔ̀ ndùw sùghò fə̀ŋ aŋ ghɛ â ghì a Màsɛ̀donìa ghò, â ghee enyəa à èzəŋ lo kənûm ghəa ghî a Àkaeyà mò ki doʼò to an sɔ̀ŋ è bii zo alefughu eyôsò; ghɛ̂ zəla ghɛ̀ ki aleyosō n nùmsò kɔ̌ʼ ndə̀m è ghee.

³ M̀ fɛ tuū wò waazə̂ a sɛ̀ ghən enyəa fəŋ zəla ghàʼ tsɔɔ̄ a zəŋò ghɛ̀ lò kôom səā kɔʼɔ̄ kə̀nughùnùghù aŋ ghəa zən, enyəa ghɛ̀ ŋ ghue zɛʼɛ e biaan naŋa tsughu, aŋghəa mùgho mò dzɛ̂ naŋa enyəa ghɛ̀ lo lǒ a te.

⁴ Abugho kpaʼ ndûw bugho ghàʼ à ghê ghî a Màsɛ̀donìa à li gho, a bughò koʼò wô mò ghɛ̀ kaām ghue zə m biaan naŋa — to sɛ̀ kele kɔʼ tuw kə̀ dəla ko, a e ki yo ghəa zo alekə̀aa kùu ndùw ghɛ̀ aŋ ghəa ghǎʼ mò tɔʼɔ̀ tsɔɔ̄ fə̀ŋ a te.

⁵ Zən lǒ e ghee mùgho mò dzɛ̂ enyəa e dzɔ̂ɔ aletsəə̄n tsughu waazə̂ a sɛ̀ ghən enyəa, tò mùghò è bughò, ghe buʼù bughò koʼò dzə̂ ghɛ̀ esə̄, ghe biāan naŋā zîi tsughu fəgha kə̀là ghɛ̀ boō naŋā alefughu, zə e lo tən enyəa à yò dzə̂ fəgha kəla ghe tsəə̄n tsughuu nû ghɛ enyəa ghɛ̀ fughu, à è kǔuwn lò fəgha kə̀là ghɛ̀ tsə̂m kɔʼ alefughu.

⁶ Ghəa e te lo enyəa, ghùw wəla ù tam ko sə fə ufʉgha fo, ù ŋ kwùu sùghò fə̀ sə enyə, ghùw wəlà ù muʼ tam tsughu, ù m mùʼ kwùu e sùghò.

⁷ Chìa kì ko alefughu aŋghəa ù tsə̀m kɔʼ a te am fə̂ŋ è wə̄n, à e yò dzə tò ù sə̀əm nù, ŋkāa to a wən tsəən ndùw nù, tɔŋlo enyəa Zə̀ kə̀ ləghaa ghùw wəla ù fughuu mò ù fùghuu am fə̂ŋ è dzùŋ.

⁸ Zə̀ kə̀ lo nû alefughu ghɛ â bughuun zo naʼèdzə̀m, enyəa ghɛ̀ lo è ki tsəgha fʉgha wə̀n ù dzə̀m ghɛ̀ ləghaa bùʼ tsə̀ghàtàʼà wəla ghɛ̀ ki alekele, tò ghɛ̀ e ke lo aledeē nduw dzɔ̂ zò â ghì a li gho am fʉgha u te wo.

⁹ Ghe tɔm naŋa am Mwàʼsò kə Kəzə̀ enyəa, “Ù mwàʼà nu, fughuu ndùw â ghì ghəla ghe laʼā; ghəa a wə̄n a tsəghatsəgha a doʼò tən nû.”

¹⁰ Zə̀ kəla kə fughuu ŋgòʼ tò â ghùwsūm àsùghò fʉ̀ghàzəa wo â ghì ghò alezə, kə lo fughuu mɛ̀ʼn ghɛ̀ â ŋgòʼ tɛʼɛ to tə dzə̀m, kə ghəəŋ sughò ghɛ̀ kele fʉgha wo u dzə̀m aŋghəa ghɛ̀ bughuu â ghu ko a te.

¹¹ Kə kê ghə̌əŋ tsughu nù ghɛ̀ è kuu am mwàʼ zəla ghɛ̀ mwaʼā ghè zò, ghì ghə̀ è ke fughuu zɔ̀ɔŋ kò â Zə̀ kò bòʼ fʉgha wɛʼɛ wəla ghàʼ fughu nduw â ghee.

¹² Tɔŋlo enyəa fwàʼ kə̀là ghɛ̀ fwâʼ tsughu kaa kpēen tsughuu ko yo am fəgha kəla ghî à Kəzə̀ à ləghaa, kə ghəəŋ sùghò nù, ndə̀m è aghì yia fughuu kɛɛ wo â Zə̀ kò.

¹³ Ndə̀mà tə aghì tə̀ e ke fughuu kɔʼso mò â Zə̀ kò mò à lo bòʼ fəgha kəla ghɛ̀ fwâʼ tsughu, aŋghəa ghe zuūw tsughuu Làbəlà è Kə̀lestò è dzùŋ zən, àsùghò am mwàʼ zɛʼɛ alechuuw fughuu nduw ghee â fʉgha wo, chuuw fughuu sùghò ghì à li gho.

¹⁴ Ghe lo e diī ghɛ, gɔ̀ŋlò an tuw wɛʼɛ bòʼ dzɔ̂ è nêene zəla Zə̀ kə̀ dê tsughu â ghɛ̀.

¹⁵ Zɔ̀ɔŋ kə Kəzə̀ am fughu kə wə̄n kə̀ ne kəla ghùw buw aletesō dzɛ̂.