2 Kòlentìan 8 - To kə Kəzə̀ kə̀ Fughu ko

Ghî a Kəzə̀ a ki alebughu â ghu ko

¹ Waazə̂ ghò, ghàʼ ləghaa enyəa ghɛ̀ kele tsughu dzɔ̂ zəla Zə̀ kə̀ mò dê tsughu â dzeŋe kə ghì a Kəzə̀ ghò am mbùʼ è Màsɛdonìa.

² Ghe mafə kûm bìso ŋgè mɔ̀msò kòʼ an ndə̀mà tə utsù təla ghe fə̀ tsəgha a te, ghe kǔuwn tsô naam lò ko alo eduʼnlo, dùʼnlo e te zə ghəŋlo ghe m bughuu â ghù ko alefughu ghî ghò â fʉgha wò aŋghea ghe mò buʼù laa ko nû, ghəa ghə n tughuu sùghò a zəŋò ghee.

³ Nu, ghəa Ǹ lô aledzɛ̀, chìa mò fughuu nû bùʼù fùghuu tsə̀ghàa ghəa ghî a mò kwo enyəa ù lò alefughu a te, ghe m fughuu sùghò am fə̂ŋ è ghee e dzə̀m, mo kâ ghee kɔ̂n dzə̀.

⁴ Ghe ŋ kûu bùʼu wò kə̀ghu â ghàʼ enyəa ghàʼ zəghàa tsughu ghee ghe e yosō nduw sugho ghî à Kəzə̀ ghəla a ghe mò laā an Yɛ̀lusalɛ̀m.

⁵ Ghe ŋ ghə̂əŋ ghəa ghən an dziī zəla ghǎʼ mò buʼù moʼn yo ghe zò, fùghù ndùw dzə̀ ghue e ghee â Mughu ù te, daŋso fùghù wò â ghàʼ, aŋ ghəa Zə̀ kə̀ ləghaa.

⁶ Zən lò e ghee ghàʼ buʼ tsughu ghu ko â Taetùs enyəa aŋghəa ù mò kaʼ naŋā tsughu dzə̄ dzɔ̀dzɔ̀ kə kəfwàʼ kən ghɛ̀ à ghee, ù mìasò mɛʼɛ̀ kɔʼɔ̄ ko nù.

⁷ Aŋghəa ghɛ̀ tsū sə ko alo aghəa a dzə̀m, aleboō fughu, aŋ ghəa à kəaa gho, an tɔ wɛʼɛ, aŋ ghɛ̀ zəla ghɛ ki, àsùghò an ləgha zəla ghɛ̀ ki a zəŋò ghàʼ, ghɛ̀ ghəəŋ tsughu enyəa ghɛ̀ tsu sugho sə ko alemwaʼā.

⁸ Ŋ̀ ghəa ghə̀n â ghɛ̀ kə̂aa wò dzə̀ yò tò M̀ fughuu wò kə̀làŋ. Ǹ dêe wò aŋghəa dzweŋe u ghì a Kəzə̀ ù li ghən ki ghɛ̂ zo a te aleyoso ghî gho, alemɔ̀msò kôʼ enyəa ləgha zɛʼɛ e lo nû kùum kə eləgha ko a?

⁹ Tɔŋlo enyəa ghɛ̀ kwo nû dzɔ̂ e Mughubè Yɛso Kə̀lestò zò, enyəa aŋghəa ù mò buʼù kuū ko fɛ, ù n naam tùe zə̀ghàa ndùw kô kum e wə̄n e t zo bùghò dòʼò tsughu ghùw ù lǎa ko ghəa zɛʼɛ, enyəa an lɛ e wə̄n zən, ghɛ̀ è lo alebùghò doʼò ghì a kuu gho.

¹⁰ Tsʉ̂ zaŋa aŋ ghəa zən lò enyəa à dzɔ̀ tsəgha ko enyəa ghɛ̀ miaso kɔʼ fəgha kə̀là ghɛ̀ mò kaʼ naŋā tsughu aleghəŋlo alo kənûm. Ghɛ̌ fə̀ ka yo ko ghî a kəsə gho aleghəəŋ ghəa ghən gho, ghɛ̀ mò ki eghɛ̂ aleghəəŋ ghəa a te gho.

¹¹ Mìaso kɔʼ nlò, to e doʼò tsughu enyəa ghɛ̂ zəla ghɛ̀ ki aleyòsò aghì a te kpeē dzəə̄ŋ ndûw ghèe ghəa yìa ghɛ̀ mîaso kɔʼ am fʉgha wəla ghɛ̀ ki êzə̄ŋ.

¹² Tɔŋlo enyəa abugho ghɛ̂ e te e lo, Zə̀ kə̀ fəgha kə̀là ghùw fughu nìi ndùw sùghò am fəgha kəla ghùw ù te ki, à yò dzə̂ am fəgha kə̀là ù ki yo.

¹³ Ŋ̀ kâ ghəa ghən dzɛ̂ tsùghù dzə̀ enyəa to ghəa a mô zaŋsò kɔʼ a zəŋò ghì à li gho ghə e kuuwn dəla a zəŋò ghɛ̀ à li gho, à kǔuwn lò enyəa to ghəa a mô doʼò tsughu eghəla â ghì ghò a dzə̀m.

¹⁴ Ǹ dzɛ̂ enyəa, aleghəə̄ŋ tsughu enyəa ghəa ghə e alo eghəla, ghɛ̀ ki alefughuu nduw ghî ghò â fəgha kəla ghɛ̀ ki êzə̄ŋ mo ghe ki yo, to ghe e fughuu wo sugho ghɛ â kəla ghe ki, mò ghɛ̀ ki yo, to ghəa ghə e bwiī nduw alo eghəla.

¹⁵ Aŋghəa ghe tɔm naŋā enyəa, “Ghùw wəla ù fə̀ ŋge zûuŋ naŋā fʉgha wo, ka fə ŋge kele sùghò ndə̀m, ghùw wəla ù fə̀ zûuŋ ko mbəs ka fə ŋge kele sùghò mbəs.”

Ghe tum sə Taetùs ghèe ghê ghì a wə̄n gho

¹⁶ Ŋ̀ kuuwn fughûu zɔ̀ɔŋ kə Kəzə̀, Zə̀ kəla kə mò dzə̂n ndûw ghəa à dzûŋ à mɔʼɔ̄ ghəla Ŋ̀ ki a zəŋò ghɛ̀ am fə̂ŋ è Taetùs.

¹⁷ Ù ka mo ka boo dzə̀ bòʼ ghu kaʼa kə̀ buʼu kən â wə̄n, ù mò tso ki ghɛ̂ e te zo aleyòsò ghɛ̀, ù n tsə̀m tsùghù alebùghò kôʼ ghɛ̀.

¹⁸ Ghàʼ tum wò wàazə̀ ù sɛ̀ ù lì ghèe wə̄n mo ghe kwo wə̄n an dzweŋe u ghì a Kəzə̀ wən ù dzə̀m aŋghəa ù nàʼn tùm è dzùŋ a te.

¹⁹ À bùʼ kà yò ko êzə̀, dzweŋe u ghì a Kəzə̀ ù tsɔʼ kɔʼ wə̄n enyəa ù è bwiī kaaŋ ghàʼ à ghee aŋghəa fwaʼà nduw fwàʼ kə̀ dzûŋ kən kəla kə fughuu kɔʼso mò â Mughu ù te, àsùghò aledèe tsughu enyəa ghàʼ ləghaa nù alefughu yôsò zò â ghì ghò.

²⁰ Ghàʼ kəŋo enyəa to ghùw kà mò ghàʼ saʼ dzə̀ an dzì zəla ghàʼ kwu kele fughu kəla ghî a ndzə̀əm fughuu wo,

²¹ nu ghàʼ kaa ləghaa ko yo aleghə̂əŋ ghəa ghəla a lô tsəghatsəgha an kə Mughu ù te, ghàʼ ləghaa sùghò nù aleghəəŋ ghəa a te gho an sə kə aghì.

²² Ghàʼ tuu wò wàazə̀ ù sɛ̀, wəla ghǎʼ mò mɔ̂msò kôʼ tsughu, bùghò kòʼ tsùghù enyəa ù kì nû ghɛ̂ zò an ndə̀mà tə̀ aghəa, mò ù kǔuwn ki eghɛ̂ êzəŋ tsə̀ghàtàʼà aŋghəa ù mò bûʼ ki bòʼ ù nàŋa fə̀ŋ a zəŋo ghɛ̀.

²³ Yia a bugho Taetùs, à lǒ ghùw wəla ù dzeŋe fwaʼā ghàʼ à wə̄n alefwaʼā â ghɛ̀; yia abugho waazə̂ a sɛ̀ ghò, ghe lo tum tə dzweŋe u ghì a Kəzə̀ gho, ghe ghəŋlo enyəa Kə̀lestò kele ŋkɔʼso.

²⁴ Děe tsughu nlò an sə kə dzweŋe u ghì a Kəzə̀ enyəa ghɛ̀ ləghaa nù ghî ghən, àsùghò enyəa fə̀ŋ zəla ghàʼ tsɔ̂ nduw â ghee kùu ndùw ghɛ̀ à lò êsəŋò.