2 Kòlentìan 7 - To kə Kəzə̀ kə̀ Fughu ko

¹ Waʼāwaʼ, ghəa sɛ̀ ki dzə̂ to kəla Zə̀ kə̀ to naŋā â sɛ̀, bùghò nlò tò sɛ̀ nîi nughù ghu kə sɛ̀ aŋ ghəa ghə̀là à dzə̀m a lô aledzəsô ghue e sɛ̀ àsùghò fə̀ŋ tə sɛ̀ tò, a ghəə̄ŋ tsughu enyəa sɛ̀ mughùu tsughu mughùu è zɔlɔ zəla e kɔʼkpē mo a tsəŋo ndùw Kə̀zə̀.

Duʼnlo e Pôl

² Zèe zə̀ghaa tsughu nlò fə̂ŋ tɛʼɛ to sɛ̀; ghàʼ kâ ghəa e bonlo â ghùw, ghàʼ kâ ghùw tsê, ghàʼ kâ tsə̀ghà tsùghù an tɔ wəlà ghàʼ ki enyəa ghàʼ baāŋ nî fʉgha u aghì.

³ Ŋ̀ ghəa ghən kə̂aa wò dzə̀ yò enyəa Ǹ ləghaa alesaʼā wô ghɛ̀; nu M̀ maā bûʼ dzɛ̀ enyəa ghàʼ ŋge gaʼ fə̀ŋ a zəŋò ghɛ̀, àsùghò enyəa to sɛ̀ mô dzèŋe lò ko a dzə̀m, ŋkāa a kpuwnlo ŋkāa a lô â tuw ko.

⁴ Ghɛ̀ lo ghî ghə̀là Ǹ lô alenaŋā aŋ ŋgòʼ; Ŋ̀ ŋgee tsɔ̀ɔ fə̀ŋ a zəŋò ghɛ; fə̀ŋ zaŋa fɛ tsòo zʉ̀ʉn ko enyə. Aŋghəa sɛ̀ tsoō kele ko ndə̀mà tə utsù tò fɛ, yìa Ǹ naām ŋgeē duʼn ko nû.

⁵ Ghəa ghǎʼ fə bûʼ nyə wô ko am Màsɛ̀donìa, a ka fə dɔ̀m zʉ̀ʉn ghue zo, tsû wə̀ n tsô lò kaaŋ ko a zəŋò ghàʼ bâa tə̀ dzə̀m — ghàʼ n nuum ndùw èghue an ushwāʼ a fɛ a beē, ki etsəŋ alo təfə̀ŋ.

⁶ Kə̀zə̀, kəla kə tsəmsō ghî ghəla fə̂ŋ tə̀ baŋā ghee, ŋ kuuwn dzə̀n wò fə̀ŋ taʼa aŋghəa kə fə̀ ghəəŋ tsughu enyəa Taetùs bùghò.

⁷ Fə̂ŋ taʼa tə ka fə ka nyə ko aŋghəa Taetùs mò bugho tɛ̂ a vʉ̀a ghàʼ, à fə̀ lo sugho aŋghəa ghɛ̌ fə̀ dzə̂n sugho fə̀ŋ è wən a te, aŋghəa ù mò dzɛ̂ wô ghaʼ ghəa ghɛ̀ ləmlo alekòʼ mùgho, dìi èghue am fəgha kəla ghɛ̀ mò ghəŋlo, mùʼù â mbuuw mò alefwàʼ fəgha kəla mùgho mò dzɛ̂ naŋā, mùghò ŋ kòom fə̀ghaan duʼn səso tsughu enyə.

⁸ Abugho mwàʼsò kaŋa kə mò bûʼ ghəə̄ŋ ko ghɛ enyəa ghɛ̀ è muŋe, Ǹ dîi yò ghue wo enyəa mùghò mò tɔm wo êzə̀, aŋghəa mùgho mò bûʼ dî ko ghue wo, nu Ŋ̀ kôʼ enyəa mwàʼsò kə te kə mò ghəəŋ nû ghɛ̀ m muŋe, à n lo enyəa à lò ko aŋ kə̀mà fə enə̀gha.

⁹ Zə êzəŋ lo ko enyəa Ǹ duʼn nù, à yò dzə̂ enyəa ghɛ̀ mò lo alo ese, à kǔuwn lò enyəa ghɛ̀ mò alo ese lo alefə̀là fughuu ndûw ghue zɛʼɛ â Zə̀ kò; tɔŋlo enyəa muŋe zɛʼɛ̄ e mò lo aŋghəa Zə̀ kə fə̀ fôʼ naŋa enyəa zə e lo êzə, mò aŋ ghəa ghə̀ è yì, a ka fə ghəa è li e ghəəŋ bonlo â ghɛ̀.

¹⁰ Tɔŋlo enyəa ŋgòʼ è muŋe zəla ghùw muŋē mò à lò zəla Zə̀ kə̀ ləghaa ghəŋlo enyəa ghî a tiī kuūwn kɔʼ fə̂ŋ te ghee, to ghe e lo alezə kətuw, mò ghùw yò dzə̂ aledì ughue a te. Muŋe zəla à tsò lô ko e ghûw wə̀ nsɔ̌ɔŋnchùw zò bughòo â vʉ zo.

¹¹ Kòʼ ghəa ghə̀là ŋgòʼ è mùŋe zəla Zə̀ kə̀ ləghaa ghəə̄ŋ tsughu ghɛ a, ghɛ̀ yia muʼū â mbuuw mò, ghɛ̀ yia a ki ghɛ̂ zò aledèe tsughu enyəa ghu ghɛʼɛ zɔlɔ nù aŋ ghəa ghəla ghe kwuū ghɛ a te. Ghɛ̀ mò pfʉso n nəghà ghɛ̀ à ghê ghì ghəla ghe mò ghəəŋ boōn ghɛ â ghəa gho, ghɛ̀ n tsəŋo enyəa Zə̀ kə lo fɔeso nù ghɛ, ghɛ̀ n ləghaa enyəa tò M̀ mô bughò tɛ̂ a vʉ̀a ghɛ̀, ghɛ̀ n dəmà sùghò aleghə̂əŋ ghəa zəla e lô tsəghatsəgha, ghɛ̀ m fɔesò ghì ghəla ghe ghəə̄n boōn tsughu ghəa zo. Aŋ ghəa ghən a dzə̀m, ghɛ̀ n dè enyəa ghɛ̀ kaām nɔʼ dzə̀ aŋ ghəa è li zo.

¹² Ghəa mùgho mò bûʼ tɔm wô ko ghɛ â mwàʼsò kò, à mò yo dzə̂ aŋ ghəa e ghûw wəla ù mò fôʼ bonlō, ŋkāa aŋ ghəa e ghûw wəla ù mò fala aŋ ghə̀a è biigh e te zo, à mò kuuwn lo aledèe fughuu kɔʼ ghɛ̂ zəla ghɛ̀ ki a zəŋò ghàʼ an sə kə Kəzə̀.

¹³ À fi lo enyəa ghɛ̀ m fə̀ŋ taʼa tə dzə̂n. Ghàʼ mò tsoʼn nû, Taetùs m fəghaan bùghò ghə̌əŋ kpeʼe wò enyəa ghàʼ ŋgee tsoʼnlo an tsoʼn kə wə̄n; an tsaʼ kə̀ saa kəla ghɛ̀ a dzə̀m mò kâ mam nduw am fə̂ŋ è wə̄n.

¹⁴ Tɔŋlo enyəa abugho M̀ mô tsɔ̂ɔ nduw fə̀ŋ â wə̄n a zəŋò ghɛ̀, to ghɛ̀ kâ mò mùghò bvʉsò màʼà dzə̀. Ghəa ghǎʼ mò dzâa êsəŋò â ghɛ̀ aŋ ghəa ghən à dzə̀m ghǎʼ mò kəaa, à bɔ̌ɔm lò êzə̀ num zəla ghàʼ mò toō bòʼ ghɛ̀ â Taetùs m bùghò sə wô sugho êsəŋò.

¹⁵ Ləgha zəla ù ki a zəŋò ghɛ̀ e noom ndùw nù aŋghəa ù mòʼn dzə̂ ghəa ghə̀là ghɛ̀ mò bɔɔ̄m ləə̄m ko alezūw â wə̄n àsùghò aŋghəa ghɛ̀ mò kpenī wə̄n a te aŋ ghùe è tsəəŋ zo.

¹⁶ Ǹ duʼn nù enyəa ghɛ̀ lo nû ghî ghəla Ǹ lo alenaŋa fə̀ŋ a te, alo aghəa a dzə̀m.