2 Kòlentìan 6 - To kə Kəzə̀ kə̀ Fughu ko

¹ Aŋghəa sɛ̀ à ghê Zə̀ kə̀ dzeŋe fwaʼà êzə̀, ghàʼ buʼu wò kə̀ghu â ghɛ̀ enyəa e kwo ghɛ̀ lô bomlo enyəa dzɔ̂ zəla Zə̀ kə mò de â ghɛ̀ e tsəghàa mîaa kə̀nughùnùghù.

² Ghɛ̀ zuw fəgha kəla Zə̀ kə dzɛ ghè kò a, “Ghəa nəgha e kpe tsughu â mùghò aleləghā ghɛ̀, mùgho n dì zɛʼɛ e zuw, a m bùghò tsuʼ ù bəghasəa u aghì ù kpe tsughu, mùghò n yòsò kɔʼ ghɛ̀.” Kòʼô, nəgha e te zə m kpe, zəla Zə̀ kə ki aledè dzɔ̀ e wə̄n a te, àsùghò nəgha zəla Zə̀ kə̀ bəghaasəa ghî ghò a te zə m bùghò sə.

³ Ghàʼ naaŋ yo fàŋa ko an dzì è ghùw ù lì, ghe lô koʼò enyəa fwàʼ kaʼa kə dzəa nù.

⁴ Ghàʼ kuuwn kɛɛ kô ghue zaʼa tǒ kɔ̀ɔ ŋ Kə̀zə̀ aŋ ghəa ghaʼā à ghəəŋ gho a dzə̀m; am fə̂ŋ zəla ghàʼ kɔlɔ tsughu ghè zò an tsù wəla ghàʼ koʼ, kòʼ ghəa à tughu gho, kòʼ à bìigh gho,

⁵ mʉ ŋkwə̂n, kɔʼ ndughutətsāʼ, ghî yia kə̂m ghaʼ, tsù ghàʼ, ghàʼ yia koʼò zeē nduw dzə̀ŋ, bùghò kòʼò bwǐi ndùw sùghò.

⁶ Ghǎʼ yia dê tsughu enyəa ghàʼ zɔlɔ nù, dè sùghò enyəa ghàʼ tɔɔ nù, dè sùghò ghue zəla ghàʼ maʼà tsughu, dè sùghò dzɔ̂ zaʼa, Shʉghà ù Kəzə̀ vʉa u lo a zəŋò, ghǎʼ yia ləghaa ghî ghò am fə̂ŋ zaʼa e dzə̀m,

⁷ Ghàʼ yia dzaā èsəŋò, fwàʼà ndùw àghəa an daʼa kəla Zə̀ kə̀ fughu â ghàʼ. Ghəa a tsəghatsəgha ghəla ghàʼ ghəə̄ŋ nduw ghè ghò, à lò fʉgha u tsam waʼa wəla ghàʼ ki aŋ kwè ù təma wo àsùghò alô ù kwû wò.

⁸ Ghî à li yia kɔʼsō ghāʼ, à li yəa tsughòsò ghaʼ, à li yia lɛɛ̄n ghaʼ an sə̀ biigh zo, à li gho an sə̀ è dzûŋ zò. Ghî à lɛɛn ghàʼ tò mbaaŋ tə aghì, ghǎʼ yia naām ti ko alo èsəŋò.

⁹ Ghî à li yia a lɛɛ̄m ghaʼ tò ghî ghəla ghe kwo yo ghee, mo ghe gbaŋ kwo nû ghaʼ. Ghî à li a lɛɛn ghàʼ tò ghàʼ lo ghî à kpuuwn gho, aŋghəa ghɛ̀ koʼò wò, ghǎʼ yia naām lô â tuw ko; ghe yia buū zeē ghaʼ am fʉgha wə ŋkwə̀n, ghe yia yo alewi ghaʼ.

¹⁰ Ghî à li yia lɛɛn ghaʼ tò ghàʼ lo ghî ghəla ghe lô alo esē, mo a tsôo dùʼn tsə̀ghà ko nù. Ghî à li yia lɛɛn ghaʼ tò ghî ghəla ghe ki yo fəgha ko, mo a ki fʉgha wə̀n ù dzə̀m, à li lɛɛ̄n ghàʼ tò ghî à laa gho, mò ghàʼ ghəəŋ nù ndə̀m è àghì zə̀a è kuū.

¹¹ Wo ghî a Kɔ̀lênt ghò, ghàʼ kâ dzughu e nân dzə̀ â ghɛ̀, ghàʼ sə wò tughō, mbuw naŋa kɔʼ fə̀ŋ zaʼa tughoo â ghɛ̀.

¹² Ghàʼ ləghaa ghɛ̀ a dzə̀m am fə̂ŋ zaʼa e dzə̀m, à kǔuwn lò ghɛ, ghɛ̀ dêe yò ləgha zɛʼɛ zo zəŋò ghàʼ.

¹³ Ŋ̀ ghəa ghən kə̂a wô to Ǹ lô kə̂āa â wɛghêtùghùu gho enyəa ghɛ̀ bɔŋ tsʉ naŋa kɔʼ sugho nlò fə̂ŋ tɛʼɛ to tughō â ghàʼ.

Ghɛ̀ lo tsughu e Zə̀ kəla kə lô â tuw ko

¹⁴ Kà è zəa faa nlo ghɛ̀ à ghê ghì ghəla ghe doʼŋkè boo fughu â Zə̀ kò. Nu ghəa e tsəghatsəgha e ki yo ghəa è li zo ghèe ghê ghəa à kwu gho. Ŋkāa tsə̀ lò nû aledòʼò dzəəŋ ghèe ləm ko ŋkāa?

¹⁵ Kə̀lestò kǐ kwò ghèe Bɛlial lo a? Ŋkāa ghùw ù Kə̀zə̀ kǐ kwò ghèe ghùw wəlà ù doʼŋkè boo Kəzə̀ a?

¹⁶ Zʉ̀kɔ̂ŋ u ndûw nyə kə̀ŋ kə kwò an Ndùghù è Kə̀zə̀ è ne a? Nu sɛ̀ lo ndughu è Zə̀ kə̀la kə lô â tuw ko; aŋghəa ghuūghùe u Kəzə̀ kə fə̀ dzɛ̂ tsughu enyəa, “Mùghù kaŋa kə kê lò tsəgha ghàʼ à ghê ghì ghaŋa gho, mùghò e ke mughu am bvʉa e ghee, bwìi dzə̌əŋ ghàʼ à ghee. Mùghò e ke lo Zə̀ kə ghee ko, ghe e ke lo ghî ghaŋa gho.”

¹⁷ Mughu ù te dzɛ̂ tsùghù enyəa, “À fi lo enyəa ghɛ̀ zəghaa tsughu ghee, ghɛ̀ doʼo sə wo nəŋ, ghɛ̀ ka e mɔɔ̄m fʉgha wəla u zɔlɔ̄ yo, Ǹ lo daŋso kpeēnîi kɔʼ ghɛ.”

¹⁸ Mughu ù te dzɛ̂ tsùghù enyəa, “Ŋ̀ kê doʼò tsughu tsele wɛʼɛ, ghɛ̀ doʼo tsughu wɛ ghaŋa à nûu ghò àsùghò à zən gho.”