2 Kòlentìan 5 - To kə Kəzə̀ kə̀ Fughu ko

Mùghùu kə sɛ̀ alo kəwālā

¹ A kwo nû enyəa abugho ghe sâʼ maʼà tsughu pfʉ̌a kəla sɛ̀ mughu a te fɛ aŋ ghueekətsə̄, tɔ̂ɔŋ gwən e ughùe e sɛ̀, sɛ̀ ki nû ndughu Zə̀ kə̀ naŋā â sɛ̀, ndughu mò à kà bɔ̀m dzə̌ ghùw nsɔ̌ɔŋnchùw, ndughu mò è dòʼò tə̀n nû alo kəwālā.

² Sɛ̌ yia sɔɔ̄ ghue zo êzə̄ŋ, mbùŋlò enyəa to a mô kì ghue zəla sɛ̀ kê kele alo kəwalā,

³ enyəa abugho sɛ̀ lo aŋ ghùe è fughu zən e kwo ko ghe lô koʼò enyəa sɛ̀ lo â ghue è zum zo.

⁴ Tɔŋlo enyəa aŋghəa a naam lo aŋ gwə̀n e ughùe e wii zən, sɛ̀ sɔɔ èghue alo mbūuw an ndə̀mà tə utsù təla tə dəla â zəŋò ghàʼ; à yò dzə̂ enyəa a ləghaa alekpuūw naŋa taʼà tsughu gwən e ughùe zən, à lò enyəa Zə̀ kə̀ è lo alebaʼsō wô mùghùu è fughu zo a zəŋò sɛ̀, to gwən e ughùe zəla e doʼò tən kwuū ŋgwûu tsughu fəgha kə evʉ̄ kən.

⁵ À lò ghuūghùe u Kəzə̀ u biān naŋā tsughu sɛ̀ aŋ ghəa ghən, dzə̀n nàŋa wò Shʉ̀ghà u wə̄n am fə̀ŋ tə sɛ̀ aledèe wô enyəa kə lo fughuu mɛ̀ʼn nǔ sɛ̀ â fʉgha wəla kə fə̀ to naŋā â sɛ̀.

⁶ Zən lò e ghee ghàʼ tsô ki tsəghà ko fə̀ŋ è te. Ghàʼ kwo nû enyəa abugho ghàʼ lo aŋ gwə̀n e ughùe zaʼā, ghǎʼ fi yo dzə ghàʼ à ghê Mughu ù te;

⁷ nu ghàʼ fɛ mùghu ko am fəgha kəla a boō fughu tsughu a te, mò à yò dzə am fəgha kəla a koʼò nduw.

⁸ Ghàʼ tɔ̂ʼ ki fə̀ŋ è te, ghǎʼ yia a laām ləghaa enyəa to a mô yò dzə̂ aŋ gwə̀n e eghùe zaʼā, to ghàʼ mô lǎam lò aŋ ghùe è fughu zo ghàʼ à ghê Mughù ù te.

⁹ À fi lo enyəa abugho a lô ko aŋ gwə̀n e ughùe ŋkāa a buw, ghàʼ kwɛ̂ nàŋa tsughu enyəa ghàʼ è ghəŋlo enyəa fə̀ŋ è wə̄n e zɔlɔ.

¹⁰ Tɔŋlo enyəa sɛ̀ ghən à dzə̀m lo ndùw nyə̌a tēen nù an tia e sāʼ e Kə̀lestò. Ghùw ù sɛ̀ e ke lo alekelê namso kəla kə kpe â wə̄n — kə̀ dzûŋ ko ŋkāa kə̀ biigh ko, kùu ndùw fəgha kə̀là ù lǒ mò ù m fwàʼ aŋghəa ù mò lò aŋ gwə̀n e ughùe e ghûw wə̀ nsɔ̌ɔŋnchùw.

Zə̀ kə̀ n sɛ̀ à ghee bianlo am bàm e Kə̀lestò

¹¹ Ghàʼ kwo nû ghəa zəla e niī aletsəŋ Mughu ù te, zə lo eghee ghàʼ buʼu wô ghî ghò â ghu ko ghe e tsəŋo nduw sugho Wə̄n. Zə̀ kə̀ tɔ̂ʼ kwò nû fəgha kəla ghàʼ lo ghè kò, yìa M̀ moʼò sugho enyəa ghɛ̀ kwo sugho nû fəgha kəla Ǹ lo ghè kò am fə̀ŋ tɛʼɛ.

¹² Ghàʼ kôom kɛ̌ɛ kpeʼe wò dzə̀ yò ghue zaʼa zo â ghɛ̀, ghàʼ dêe wò ghɛ̀ â dzì zəla ghɛ̀ lô aletsɔɔ̄ fə̀ŋ a te a zəŋò ghàʼ, tò ghɛ̀ è lo alebèlè ghì ghəla ghe kɔʼsō ghue zo am fəgha kəla ghùw lǒ ghè kò, mò à yò dzə am fə̂ŋ zəla ghùw ù te ki ghè zò.

¹³ Abugho à kpaʼ lô enyəa ghàʼ yo dzə̂ an tɔ waʼā, à lò ghəa e Kəzə̀, abugho ghàʼ kuūwn tɔ̂ʼ ti an tɔ waʼā; à lò aŋ ghəa zɛʼɛ̄.

¹⁴ À sɛ̀ fɛ̀ êzə̄ŋ ki ləgha zəla Kə̀lestò ki â sɛ̀, aŋghəa sɛ̀ zuwkɛlɛ̄ tsughu dzə̂ enyəa ghùw ù lì maā kpuw an tuw u aghî a dzə̀m, à fi lo enyəa sɛ̀ a dzə̀m maā kpuw sùghò.

¹⁵ Kə̀lestò fə̀ kpuw an tuw u ghì ghə̀n à dzə̀m, enyəa ghî ghəla ghe mughu ghe ka mùghùu dzə̀ aŋ ŋgə̀ŋ è ghee; ghe e mùghù an zən e wə̄n wəla ù fə̀ kpuw kɔʼsə alo evʉ aŋ tuw u ghee.

¹⁶ À fì lò enyəa alenìi nughù tsughu êzə̄ŋ ndùw â sə ko, sɛ̀ ki dzə yo aletsòo nìi ko ghùw aŋghəa ghî à koʼò ndûw kôʼ e wə̄n zo a te mbuu sɛ̀ fə̀ bûʼ nî dzə Kə̀lestò aŋ kôʼ e wə̄n, sɛ̀ yia kôom yo alenì wə̄n êzə̀ êzə̄ŋ.

¹⁷ Ghùw wəla ù lò fəgha ko kə mɔ̀ʼ ghèe Yɛso Kə̀lestò, ù fi lo ghûw ù fughu; ghəa à wii ghə n tsə̀ghà mìaa, à fughu yia a bugho.

¹⁸ Ghəa ghə̀n à dzə̀m à ghə̌əŋ Kə̀zə̀, Zə̀ kəla ù mò biān tsughu sɛ̀ à ghee am bàm e Kə̀lestò, fùghù tsùghù sùghò sɛ̀ â fwàʼ kò enyəa sɛ̀ è biaan ghî ghò ghèe ghê Zə̀ kò.

¹⁹ À fi lo enyəa à fə̀ lo am bàm e Kə̀lestò Zə̀ kə fə̀ ndoʼò biāan ghèe ghê ghì gho a te am mbī, kè ndoʼò taŋ yo bôo tə ghee to, kə m fughu naŋa nyə̀ tsùghù sùghò shwaʼ ù bian u aghì wò aŋ ghu kaʼā.

²⁰ Ghàʼ fɛ êzəŋ e lo tuw kə Kə̀lestò, tò è so ghuūghùe u Kə̀zə̀ u mò ghu kə wə̄n kə̀buʼu kə buʼ am bàm zaʼā. Ghàʼ buʼu kə̀ghu an zən e Kə̀lestò enyəa ghɛ̀ biaan tsughu ghɛ̀ à ghê Zə̀ kò, ghɛ̀ ka kôom dòʼò sùghò ghî à kətūw a wə̄n gho, ghɛ̀ doʼo nduw fən a wə̄n gho!

²¹ Kə̀lestò mò ki yo bo è li zo, Zə̀ kə̀ ŋ ghəŋlo è tsughu ù n dòʼò tsùghu tò ghûw ù bǐigh bòʼ ghəa e sɛ̀, enyəa aŋghəa sɛ̀ à ghee təmdzəə̄ŋ kɔʼ, a ke e dzeŋe lo sugho tsəghatsəgha a vʉ̀a Zə̀ kò.